Barambeda ho ga Mbori vovo zogarago nga ga ngbangbaturũ nika tona zogarago ni ku auru kpotosende, zegino nika da ni kporo ngbarago nga gu aboro nika raka rogoho na kodatise na kini mangi wene asunge. Mbori ima sia Yesu Kristo tipa ko zogo zegino. Areme badungu abazogo aberãnga pa aboro ya, ono anga wo du Yesu te, ko ti aregbo dunduko nikaa berã kina gupai du ni wenehe tipa aboro. Mburu gako zogarago nika ru rii nyemuse, ko nika du na nunga, inaapai, na ni ruru Bakindo ti aregbo dunduko.—Yesaya 11:4.

Agu aboro nika raka yo adunga ni kparakakparaka yo mbiko pa atunga yo te. Aboro dunduko nika du ni kodikodi yo. (Yugoti 7:9, 10) Agu aboro nikaa raka auru kpotosende dunduko nikaa kpinyemu Mbori na gayo amurakporo na i nika kodabeyo kina sa rogo zereda tipa ka mangapai ka digiso gu ga Mbori ringbisapai naadu tipa ngerefuo gu kpuyo nga kpotosende.—Atambuahe 115:16.

Ho ga Mbori Kindo nika tona zogarago ni, Bakusiahe nika du na ome kurii agu apai dunduko namanga mbiko ome zegino, ki saha si nimangisunge wenengai. (Atambuahe 24:1, 2) Ho Yesu adu ni auru kpotosende, ko ayugu pa gu ome Mbori afuhe fuko ho ko arugusi kere bavugumo ni. (Marako 4:39, 41) Tiibe ga Kristo zogarago, boro ho nika du na ndupai ka gunde be agu apai namanga mbiko ome zegino te. Ga Mbori kindo nika sa gupai nga kodatise du dagba aboro na kusikusi ahe.—Osea 2:18.

Aboro dunduko nika du na rengberengbe kpotoyo. Boro ho nika ti na kaza, ka gbinza watadu ka kpi te. (Yesaya 35:5, 6) Aboro nika gbia ngbarago ti wene gigiri rago wakina gu bambata arogotise naadu ati Edene aagbia ngbarago ti ni. Kina wai si adu Edene yo, rogo vovo zegino, kpotosende nika kusa riahe kpaima na aboro dunduko auru kpotosende kidu na riahe beyo kpaima. (Bambata Pai 2:9) Wakina gu ga Mbori rikaaboro nangia aYisaraere, aboro dunduko rogo Paradizo nika ‘ri gayo riahe ki mbiki.’—Pa Amotumo 26:4, 5.

Tii gu ga Mbori zogarago nika du ku auru kpotosende dunduko, aboro dunduko nika du rogo zereda na kini mangi fu akurayo rogo nunga na ngba wene gene. Avura adunga te, mangasunge gbegberẽ na pagbia adunga te na aboro asotanga tipa ka gbia agu ahe i aida na ni te. Baibiri nafu gu kidohe nga: “Aboro ni ba sa sa asúnga kina tii gayo bakakue na tii gayo vurumo a, a nga boro sa nika gundesi yo te.”—Mika 4:3, 4.

Aborokporo dunduko nika du na kporo beyo i nikaa raka rogoyo ki zanga gunde nga i nika do yo na agu sunge aboro nikaa mangaha dunduko nika du na wene sangbanaha ti ni. A wa Baibiri apehe, agu aboro nikaa raka rogo ga Mbori vovo zegino “i amánga nga sunge gbua te,” watadu zanga gbia undo ti ni te.—Yesaya 65:21-23.

Baibiri nakidohe nga: “kpotosende ahí be ina pa Yekova.” (Yesaya 11:9) Agu aboro nikaa raka rogo vovo zegino nika wirikapai tipa gu tatamana nga ga gu Bakusi yo nga Yekova, na gu wene ahe ko akusihe. I amanganga sunge na gayo inohe tipa ka mbakada abundu watadu ka manga fu gu kura aboro gbegberẽ te. (Yesaya 2:4) Kuba gure, i nika wirikapai ka raka na zereda na akurayo gbiati wai ka ngerafuo kpotosende.—Atambuahe 37:11.

Mbori adi bakere regbo tipa ka mbakada kpotosende tipa gupai nga ani gbia ngbarago rogo raka yo na aˈuru dunduko. Ko aida aboro raki aˈuru kpotosende nyeanye kindi. (Atambuahe 37:29; Yesaya 45:18) Tipa ka digiso gi gako ringbisapai re, Mbori “adígisa pa kpio nye anye kindi.” (Yesaya 25:8) Baibiri nafu gu kidohe nga “kpio adú nga berewe te, rungo adú nga yo na akpe na ima a te.” (Yugoti 21:4) Mbori nika fu gu momu nga ga raka nyeanye kindi fu agu aboro ko nika batasa yo ti gu regbo ko nika gberesa gi gbegberẽ zegino re gbiati gu dungu kangba aboro ko nika zingisayo ku rogo vovo zegino.—Yoane 5:28, 29; Amokedi 24:15.

 Dungu amirioni aboro nambakada tiyo awere tipa ka raka tii ga Mbori kindo nga gu naima mbeda. Wa vura du yo ni kpakpa aboro, i naasada kadu ni gu ngbatunga aboro nga agu yo Mbori nika ida yo rogo vovo zegino. Rogo gini gene? Ni wirika yo pai tipa Yekova Mbori na guko ko akedi ko nga Yesu Kristo.—Yoane 17:3.

Mo wiriki kura apai tipa wai rengbe mo ka bata ti regbo digido gi zegino re na ki raki rogo gu wene zegino naima mbeda ka ye re. Mo idi pa gu wisigo Baibiri du gbua be boro sa dagba aDezire Yekova, l amangaha rogo gu buku nga Mo Raki Nyeanye Kindi na Ngbarago!.