ABORO

Gupai Baibiri agumbaha: Mbori ‘amanga nga [kpotosende] ni kungba he te, ko ambakadi he aboro niraki rogo.’—YESAYA 45:18.

KPOTOSENDE

Gupai Baibiri agumbaha: “Rikaaboro sa nasusa, kura rikaaboro ki niye, ono kpotosende nye anye kindi.” —BATUNGUSIPAI 1:4.

GUPAI SI AYUGOHO: Ringbisihe kuti Baibiri, i agbarasanga kpotosende te, na aboro nikaa raka araka kindi auruhe. Sidu, rogo gupai yo nga digido zegino nga gine?

MO BERẼNGA KURIIHE: Baibiri naringbisapa digido zegino kuti gupai namangi ti rago Noa. Ti gu regbo re, ‘kpotosende ahi be zuu.’ (Bambata Pai 6: 13) Ono tie, Noa angia ruru boro. Sidu tie, Mbori abatasi Noa na gako aborokporo, ono Ko agbarasi gbegberẽ aboro na ime akangbii. Baibiri nafura tipa agu apai naamangi mbata kusayo re nga: ‘Gu zegino nadu ho mbata, ime afu afu ku auru he si ki gberẽ.’ (2 Petero 3:6) Gere angia digido gu zegino naadu ti gu regbo re. Ginihe i agbarasihe? I agbarasanga kpotosende te, ono gu gbegberẽ aboro naadu auru kpotosende. Ho Baibiri afura ni tipa gbarasa zegino si afuranga tipa gbarasa zegino te. Kuba gure, si nafura tipa gu gbegberẽ aboro du auru zegino na gu sino mangapai du ho.

AKPAKARAPAI NA GBEGBERẼ MANGAPAI

Gupai Baibiri agumbaha: “Bambiko fuo rago ngbutuko, gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te. Ono bayee aboro adía kumbo ringara, ki du na ngbarago tipa gu wenepia du kpaima.” —ATAMBUAHE 37:10, 11.

GUPAI SI AYUGOHO: Gu ime akangbii naadu ti rago Noa aadianga gbegberẽ apai kusayo bara sa kindi auru kpotosende te. Tingbafuo ime akangbii, gbegberẽ aboro asa raka berewe fu aboro ni gbegberẽhe. Ono barambeda, Mbori nika nyasa riipa gbegberẽ apai. A wa bake papara Atambuahe agumbaha: “Gbegberẽ boro adú nga ho berewe te.” Mbori nika nyasa riipa gbegberẽ apai vurube gako Kindo—nga gu zogarago nika ru ngbangbaturũ yo kaa zogarago ku sende no kurii agu aboro nikaa giasangba Mbori.

MO BERẼNGA KURII GIPAI RE: Ya mo agu aboro nazoga zegino awere asongoda gu zogarago nga ga ga Mbori Kindo? Baibiri nayugo gupai nga i asongodanga ha te. Mbiko gayo pa mungo i nika soga ga Mbori Kindo. (Atambuahe 2:2) Sangbanaha nika ngia gine? Ga Mbori Kindo nika dia ba gu zogarago nga ga wiri aboro dunduko na “si ki nye anye kindi.” (Daniere 2:44) Tipagine si aida i digisi gu zogarago ti ni nga ga wiri aboro?

Gupai Baibiri agumbaha: “Gu boro nata, pa ruga gani apai si rogo ni yo te.”—YEREMAYA 10:23.

GUPAI SI AYUGOHO: I akusanga wiri aboro tipa i zogo tiyo te. I azoganga aboro wenengai na kini mbakadi gayo kpakarapai te.

MO BERẼNGA KURII GIPAI RE: Kura buku sa ape gupai nga, “Gu zogarago nga ga wiri aboro arengbanga ka nyasa riipa gu vura aboro nga rungo, gomoro, akaza, agu agberãngo naye be ome zegino na vura gbiati zuu te,” si ape kura pai nga “si naida zogarago duho sa nga gu nika nyasa riipa gbegberẽ apai.” Britannica Academic. Ono tie, ka zogarago nga ga wiri aboro vura koda tihe, zegino du kindi ni zogozogoho be kpakpa aboro nga aguyo kaa rengbanga ka nyasa riipa gu kpakarapai ani nifura tipaha re ya. Kina ga Mbori Kindo sa du na ome ti ni tipa ka nyasa riipa agu apai namanga rogo zegino nyeanye kindi.

Sidu tie, ringbisihe kuti Baibiri digido zegino nga digido gi gbegberẽ sino raka re—anga si nga gupai si aida wene aboro gunde behe te. Kuba gure, si nga gupai si aida ani moibangirani tipaha bambiko ga Mbori vovo zegino nika diaba gi gbegberẽ zegino naima gberã re!

Gini regbo agi apai re nika manga ti ni? Gu Kekeapai ngbefuo gere nika sakapai tipaha.