Ho ani awirikapai ni tipa agu asino du ti boro, si nasarani ani ini gu boro re wenengai, na rogo gi gene re, gaani pagume na ni ki da ni nyanyakihe. Wakina gure a, ho ani awirikapai ni tipa agu asino du ti Yekova, si nasarani ani ini da du nga ko, na rogo gi gene re, si ki sa gaani pagume na ko si du ni nyanyakihe. Dagba gu wene asino dunduko du ti Mbori, agu akuraha biama du nga banguaha: gako ome, tatamana, ruru sarangbanga, na nyemuse.

“Ako Yekova Mbori! Mo du namangi ngbangbaturũ na kpotosende be ga bakere tandu.”—YEREMAYA 32:17.

Gu gopai nayugo pa ga Mbori ome gudu ni yuguyuguhe rogo agu ahe ko akusihe. Ni kpiapai, ho mo niru ni zegiyo rogo kere uru, ginihe ninaazo kpotoro? Faa-uru du nidu. Nirengo, guhe ninaazo kpotoro re, nga sangbana gu ga Yekova ome ko akusi ahe na ni. Wai du du uru na ome? Beberehe yo, ba faaha yo wa ka i faasi gbigiwi bara amirioni 27. Rogo asekonde ni basasa, uru nakusa ome du bakioho wa sumbusumbu dungu akama amirioni agu abombu nga ga kere bundu.

Wa vura duhe wo, gaani uru ni wiri tooni he gbua ka i ringbisihe kuti agu amirioni akerekuru duho. Aboro-birĩ-inohe nape gupai nga gu kerekuru du rimo ru nga Yü Skü′tī du dagba agu akerekuru du ni bakiki ra, bakio ru ima susa uru bara 1,700. Ka gu kerekuru nga Yü Skü′tī di ba uru, u nadada kpotosende na ki ndu kisusi gu bisue zegino i ayambaha nga Jupiter. Isoke, gipai re naundo rani ani rugutirani wenengai na gupai Yeremaya agumbaha nga, Yekova Mbori ambakadi ngbangbaturũ na kpotosende mbiko gako bakere ome.

Wai du ani agbia undo ti ga Mbori ome? Gaani raka naruriipa agu ahe Mbori akusihe, ahe wa uru gbiati gu wene ahe dunduko du auru kpotosende. Kurigure,  Mbori namangasunge amanga na gako ome tipa ka fu undo furani ni basasa. Ngba gini gene? Rogo bambata sa kama agarã, Mbori afu ome fu Yesu ko mangi agu apai naadu ni iiriwoho. Ani nageda gupai nga: “Airavurari nangera, airaterenga ki nita, airangbataka ki nihu; airangbianga ki nigi apai, kangba aboro ki nizingi be kpio.” (Matayo 11:5) Na ginipai namanga areme? Baibiri naya, “Ko nafu tandu fu gu ni he amaka ni,” na si nagbia kurapai kuti ni berewe nga: “Agu yo nakida kuti Yekova i aúngasi omeyo” watadu i agbia ome berewe. (Yesaya 40:29, 31) Mbori ima rengba kafu gu “bakere tandu susi” furani tipa gupai nga ani hi akpakarapai na agu aˈasada ani agbia tirani na ni rogo raka yo. (2 AKorindo 4:7) Ya mo gipai re asanga ro mo du mbembedi na gu Mbori namangasunge na gako ome na nyemuse tipa gupai nga kafu undo furani te?

‘Ako Yekova, na nge gamo mangaapai! Mo amangi he dunduko na tatamana.’—ATAMBUAHE 104:24.

Ho ani awirikapai ni ni bakerehe tipa agu ahe Mbori ambakadihe, kina iriwo rago nati tirani mbiko gako tatamana. Zavura Kura aboro-birĩ-inohe nawisigo wai awisigo du agu ahe Yekova ambakadihe tipa gupai nga ka mbakada gayo ahe kuti ni. Si tona ti mbakada agu ahe du ni rukutuhe ki da ti mbakada atiyara (Avion).

Gu kpiapai nga ga ga Mbori tatamana nga gu susi asusa gbe nga kpoto aboro. Ni kpiapai, mo makianga gu gene gude asona ngbaha. Gude naenga ti bangisa para kure, nga gu du na agu apai rogoho dunduko si aidaha tipa gu gude re. Gu para kure re na kparaka ku rogo kura apara kure nga gu nangera kina kubani sa. Ono ho regbo ada ni, agu apara kure re na kparaka tihe ku rogo akama apara kure du ni bakiakia, wa agu nga zamba apara kure na pusi apara kure, agu apara kure nga ga agu agbaga dunduko du rogo boro yo, na agu apara kure nga ga meme. Fuo bete regbo, apapara gude nakura na ki tona kaa mangasunge. Fuo adiwi ribua gbua, gu bangisa para kure naadu sa re, na sona ki da ni tooni gude nga guru du na abirioni apara kure rogoru yo. Gu tatamana du rogo gu kusikusihe du wa gere, nasa badungu aboro i idi kuti gupai bake Baibiri sa agumbaha nga: “Mi nafu atambuahe foro, bambiko mo ambakadi re na iiriwo banaru pai.”—Atambuahe 139:14.

Wai gu ani agbia undo ti ga Mbori tatamana? Bakusiahe ima ino gupai nga ani naida kadu na ngbarago. Wa duhe nga ko na bakere inohe gbiati giarogopaiyo, ko rengbe kafu wene rugute furani rogo Fugoko yo nga Baibiri. Ni kpiapai, Baibiri nazungodi rani nga: ‘Oni nivu akuaroni’ avu kina boro ngbaduroni yo. (AKorosaio 3:13) Ya mo wene rugute du du re? Ii. Amunganga bi gupai nga ho du boro ni na gu sino nga ga mbupai, si nasa boro ni ra wenengai na ki zogosi gupai nga kure naora rogo boro yo na bakere ome. Si ima rengba ka zogosa gupai a nga ka boro dunga na bakere gberãrago ti ni gbiati kura akpakarapai nga ga kpotose ya. Mbori wakina gu bakure du nga iratatamana nga gu ni ambunga fu gu rugute furani du na bakere undo ti ni ya. (2 Timoteo 3:16, 17) Ya mo mo aidanga kadu na gu ngbatunga bakure re te?

‘Bambiko Yekova nakpi nyemu ruru sarangbanga.’—ATAMBUAHE 37:28.

Mbori namanga kina agu apai du ni ruruhe ti aregbo dũ. Nirengo, “ka manga gbegberẽpai, si turũ ti Mbori,  na ti gu Ko du na tandu apai dũ, ka manga irairapai!” (Eyobo 34:10) Ga Yekova sapangbanga ni ruruhe, a wa bake papara Atambuahe agumbaha ho ko aafura ni fuko ki ya: “Mo nasapa ngbanga aboro nzunzu.” (Atambuahe 67:4) Irabiriki ho rengbe ka biriko Yekova te mbiko “Yekova nangera ku kpoto aboro yo,” ko na rengba ti aregbo du ka ino rengo na ki saringbanga ni ruruhe. (1 Samuere 16:7) Kurigure, Mbori ima inopai tipa gu iraira sarangbanga gbiati gu irairapai namanga auru kpotosende, na ko ima kidohe nga barambeda, ‘i nika róga gbegberẽ aboro ku sa yo zegino.’—Asanza 2:22.

Wa vura duhe wo, anga Mbori nga gu gbegberẽ basapungbanga nakpinyemu kafu kina mbusa te. Ko nayugo inapai ayugo ho daha ada ni. Baibiri naya: “Yekova du na nunga aboro na inapai a,” zavura fu gbegberẽ aboro ka si du nga i saberãyo ti gayo ingapai. Ya mo gipai re nga ndikidi sarangbanga te?—Atambuahe 103:8; 2 Petero 3:9.

Wai gu ani agbia undo ti ga Mbori ruru sarangbanga? Gu mokedi nangia Petero aya: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.” (Amokedi 10:34, 35) Ani nagbia undo agbia ti ga Mbori ruru sarangbanga mbiko ko angbanga na kina kura aboro kisusi akurayo te. Ko ima rengba ka ida na ani na ani kidu ni airisiko zanga bipa ngbatunga rani, gu rago du ani rogoho, singia ani wirikipai watadu ani awirikanga ha te, watadu pa gupai du tipa rani rogo raka.

Mbori ima fu sangbakpotoseyo furani, mbiko gupai nga ko naida ani gbia undo ti gako ruru sarangbanga. Ziazia Kekeapai naringbisa sangbakpotoseyo kuti gu ndiko du ‘ni keke he kpotorani yo,’ nga gu du ni ‘dezirepai’ kuti rani singia gaani mangapai ni ruruhe watadu ni irairaha. (ARomo 2:15) Wai du ani agbia undo ti sangbakpotoseyo? Gu sangbakpotoseyo i arabaha wenengai, rengbe ka fõngbaduraniyo ani ne gupai du ni gbegberẽhe watadu iraira mangaapai. Na ka ani mangi ingahe, si rengbe ka fõngbaduraniyo ani saberã na ki rugu gaani gene mangaapai. Nirengo, pa ruga ani tirani na ga Yekova ruru sarangbanga naundo rani na kini mbedisi rani na ko!

“Mbori nga nyemuse.”—1 YOANE 4:8.

Mbori na ome, tatamana, na ko nasarangbanga ni ruruhe, ono Baibiri ayanga wẽ Mbori nga ome, tatamana, watadu ruru sarangbanga te. Si naya, Mbori nga nyemuse. Tipagine? Mbiko gupai nga ga Mbori ome nasako ko mangipai na gako ruru sarangbanga gbiati tatamana nangbembatayo fu agu apai ko amangaha. Ono ga Yekova nyemuse nafõngbadukoyo ko mangipai. Nyemuse na maapai kurii agu apai dunduko ko amangaha.

Wa vura duhe nga he ho nakpa be Yekova te, gako nyemuse afõngbadukoyo ko kusi amaraika ku ngbangbaturũ yo, na aboro ku auru kpotosende, nga aguyo rengbe ka gbia undo na ngbarago ti gako nyemuse gbiati wai ko angerafuo aboro. Zanga berã kina patiko, ko ambakadi kpotosende si du ni wene kporo fu aboro. Na ko nandu kindi kumbatayo kaa yugo nyemuse fu aboro dunduko rogo gu gene yo nga, “ko nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.”—Matayo 5:45.

Kurigure, Yekova “na bakere nunga ti ko, na bakere inapai.” (Yakoba 5:11) Ko nayugo nyemuse fu agu aboro namanga ndikidi diandue ka inoko na ka mbeda na ko. Mbori nabi agu aboro re wa du yo ni basasa. Nirengo, ‘ko naberã pa ro’ aberã.—1 Petero 5:7.

Wai gu ani agbia undo ti ga Mbori nyemuse? Ani nagbia ngbarago ti bi wai uru ati si ki du ni bawenehe. Ani nagbia ngbarago ho ani agia mongo gude ni. Ani nabi gu nyemuse nga ga mbembedi agumerani na nyanyakipaha. Agi apai re arengbanga kadu na nyanyakipaha te, ono si nasa gaani raka si du ni wenehe gbe.

Ani nagbia undo agbia a ti gu kura gene Mbori ayugo nyemuse ngbaha: kparakpee. Baibiri nazungodi rani nga: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.” Wakina gu bagude du na nyemuse, Mbori naida ani ye fuoko tipa undo tipa agu apai nzunzu ani abakabangirani tipaha. Fuoho, Yekova na kido rani rogo gako nyemuse adunga na gbangbati ya nga ko nika fu “gu zereda nga ga Mbori nagasi rugatinapai dunduko” furani.—AFiripoio 4:6, 7.

Ya mo gi bete sakapai tipa gu bangua asino Mbori du nga—ome, tatamana, ruru sarangbanga, na nyemuse—undo ro mo bi agu asino du ti Mbori? Ka mo aida ka kiiso gamo tambuahe tipa Mbori, ani naho pai bero nga mo wirikipai tipa agu apai ko na mangihe tipa ka undo ro na agu ko ata manganga ha ya.