Rogo gu kekeapai naadu mbata fu gere, ani aima karagapai kuti gu sanahe nga, Da nga Mbori? Ani atonaha na wirika gupai rogo Ziazia Kekeapai yo nga rimo Mbori nga Yekova na gako bangua sino nga nyemuse. Ani abi gupai ko namangihe tipa gu undo nga ga aboro na gupai ko nika mangaha fuyo kumbatayo. Wa vura duhe nga, dungu apai kinaho rengbe ani ka wirikaha tipa Mbori, mo ima rengba ka bakabangiro tipa gu undo mo nika gbiaha ti wirika kura dungu apai tipa Mbori.

Yekova nakidohe nga, “ka mo agbata ko, mo abí ko abi.” (1 Pekapai 28:9) Wa mo nika ye ka ino Mbori, mo nika du na bawene he bero nga “ga Yekova rondo” du nga mbembedi pagume na Yekova! (Atambuahe 25:14) Gini undo rengbe mo ka gbiaha ti gu pagume re?

Ndikidi ngbarago. I pepa Yekova nga ko nga “betedi Mbori” watadu Mbori ngbarago. (1 Timoteo 1:11) Padu mo mbembedi na ko na kini wiriki gako agene nika ye na ndikidi ngbarago foro, nga gu rengbe ka undoro berãro yo na ti kpotoro. (Atambuahe 33:12) Mo ima rengba a ka du na gu raka du na ngbarago—ni ne mo agu amangapai nagbarasa raka, kini mangi agu apai rengbe ka undo ro, na ki du na wene pagume na kura aboro. Mo nika ye ka ida kuti agu afugo bake papara atambuahe apehe nga: “Si ni wene he fere ka mbeda na Mbori.”—Atambuahe 73:28.

Yekova nika ngerafuoro. Yekova nakido gako amoyambu nga: “Mi arúga ro ni maa bangire ti ro.” (Atambuahe 32:8) Gure nayugo gupai nga Yekova nangerafuo gako amoyambu ni basasa na ko namangapai kuti gayo azingo ni basasa. (Atambuahe 139:1, 2) Bara sa kindi mo nasonosi wene pagume na Yekova, mo nika ye ka bi gupai nga ko kinaho ti aregbo dũ tipa ka undo ro.

Wene raka kumbatayo. Kurii gupai nga ka undo ro mo du na wene raka awere, Yekova Mbori nasaha foro taata mo du na wene raka a kumbatayo. (Yesaya 48:17, 18) Ziazia Kekeapai naya: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yoane 17:3) Ti gi regbo du apai rogoho ni kpakarakpakaraha re, gu maabangirise Mbori afuhe furani rengbe ka du wa gu he nazada rani ani du “nyanyaki nganganga.”—AEbere 6:19.

Gere gbua nga gu bete nyanyakipa nduapai rengbe ka undo rani ani ini Mbori na ki sonosi wene pagume na ko. Mo ima rengba ka fura na boro sa dagba aDezire Yekova watadu ka ndu ku rogo gaani bangiriba nga ga Internet nga jw.org/zne tipa ka ino kura apai.