‘Ako mo nga gu ko ninagia kpetambuahe! Aboro dunduko nikaye koyo du mo ni.’—Atambuahe 65:2.

Kura aboro namanga kparakpee mbiko i naya si nasa yo i du wenengai, wa vura duhe nga i aidanga kuti gupai nga boro kinaho nadegatuni te. Ono anga kparakpee gbua nga gupai ani amangaha mbiko si sarani ani du wenengai tipa ka mangapai kuti gaani akpakarapai te. Ziazia Kekeapai nakido rani nga “Yekova * du mbembedi na agu yo dunduko nakpara fu ko, na agu yo dunduko ninakpara fu ko ni rengo. . . . ko nagia gayo kpe ku ari a.”—Atambuahe 145:18, 19.

Sidu, ani ima rengba ka du na gu kido nga, Yekova Mbori nadegatuko kuti agu akparakpee nga ga airisiko. Ko nagumba gupai nga: “Oni ki yambu re ki ye ka kpara fere, mi ki gi paroni.”—Yeremaya 29:12.

‘Oni kpatagara kuti kpe kindi.’—ARomo 12:12.

Rogo Ziazia Kekeapai yo, i nangarasa rani tipa ani “nikpari” na ki “nikpari ti aregbo dunduko.” Si tie ziazia nga, Yekova Mbori naida ani kpari fuko.—Matayo 26:41; AEfeso 6:18, NW.

Tipagine Mbori aida ani kpari fuko ti ni? Mo makianga gipai re: Gini vungugude kaa idanga tooni wirini ya funi “Baba, ya mo ka mo undo re?” Rengo ngaha nga, baagude ima rengbe ka ino gu he wirini aidaha, ono ho ni agia agu afugo re ni, si nayugo gupai funi nga wirini ima kido kuti ni na ki du mbembedi na ni. Wakina gure a, ho ani amanga kparakpee ni fu Mbori, ani nayugo gupai fuko nga ani ima kido kuti ko na kidu mbembedi na ko.—Asanza 15:8; Yakoba 4:8.

‘Oni bá agu apai nafuda roni ku auru ko yo; mbiko ko naberã pa roni.’—1 Petero 5:7.

Mbori naida ani kpari fuko mbiko ko ima kpinyemu rani na ko naberã pa rani aberã. Ko ima inopa gaani abakabangirise, na ko naida ka undo rani.

Rogo ga Bakindo Davide raka naabaha, ko akpari fu Yekova Mbori tipa undo na ki gumbapa gako aberãpai fuko. (Atambuahe 23:1-6) Mbori aabi Davide wai? Mbori akpinyemu ko na ki degetuko kuti gako dungu akparakpee. (Amokedi 13:22) Wakina gure a, Mbori nadegatuko kuti gaani akparakpee mbiko ko naberãpa rani.

Gure nga agu afugo nga ga gu boro nake papara atambuahe rogo Ziazia Kekeapai yo. Ko aima du na gu kido nga Mbori agi gako akparakpee, na gupai re adu na bakere sangbanaha kurii ko. Ko abi tiko nga ko mbembedi na Mbori na ki gbia ome tipa ka mangapai kuti agu akpakarapai nga ga raka.—Atambuahe 116:1-9.

Ho du ani ni na gu kido nga Mbori nadegatuko kuti gaani akparakpee, si nasarani ani naakpara akpara fuko kindi. Mo bingo gu kpiapai nga ga Pedro, nga gu ko naraka rogo gu papara Spain du ku nodiyo. Ko azanga wiriko garãko adu nga 19 mbiko gu béno nga ga tarambiri. Rogo ga Pedro rungo, ko aauka kpotokoyo fu Mbori na ki sanahe tipa wasa na undo. Ginipai namangi? Pedro aya, “Yekova akaragapai kuti gimi akparakpee vurube gu wasa na undo ani agbiaha na diare vurube akuarani aKristano.”

Wa vura duhe nga akparakpee aakaraganga wiri Pedro berewe ku rogo unga te, si aima undo ko na gako aborokporo ngba dungu agene. Diako nga, María Carmen, agumba gupai nga: “Kparakpee aundo re tipa mi hi pakpio wire. Mi aima ino gupai nga Mbori ima rugatiko na mi mbiko ho mi aamanga kparakpee ni fuko mi agbia zereda.”

Ziazia Kekeapai na agu apai rogoho badungu aboro nabihe rogo gayo raka yo nayugoho ayugo ziazia nga Mbori nadegatuko adega kuti akparakpee. Ono tie, si nayugo gupai a nga Mbori akaraganga pai kuti akparakpee dunduko te. Tipagine Mbori akaragapai ti ni kuti kura akparakpee na ki zanga karagapai kuti agu akuraha?