Wakina gure a, ani dunduko naraka ti gene kere “bavugumo,” nga gu Yesu ayambuhe nga “bakere gberãngbi.” (Matayo 24:21) Ani arengbanga ka ne gi gberãngbi re te. Ono ani ima rengba ka mangapai tipa ka banda tirani. Ginipai rengba ani ka mangaha?

Rogo gu ga Yesu Kristo tungusapai naadu rii bagangara yo, ko afu gi rugapai re: “Oni gbáta [ga Mbori] ngbi mbata, na gako rurupai.” (Matayo 6:33) Wai gu ani amanga gipai re?

Mo gbata ga Mbori Kindo mbata. Nayugo gupai nga si naida ani bi ga Mbori Kindo ni nyanyakipa pai kisusi ai pai. (Matayo 6:25, 32, 33) Tipagine si aida ani bihe ti ni wo? Bambiko wiri aboro arengbanga ka dia gu gbegberẽ apai namanga aboro te. Kina ga Mbori Kindo sa nika manga gi kpakarakpakara sunge re.

Mo gbata gako rurupai. Si naida ani mangi ome tipa ka raka kuti ga Mbori arugute na gako bangua arengo. Tipagine? Bambiko ka ani diberã nitirani tipa gupai du ni wenehe na gu du ni gbegberẽhe sangbanaha nika du ni kere gbegberẽhe. (Asanza 16:25) Ono ka ani raki ringbisihe kuti ga Mbori arugapai, ani nika sa ngbarago tiko na gaani raka ki du ni bawenehe.—Yesaya 48:17, 18.

Mo ni gbata ga Mbori Kindo mbata na gako rurupai. Yesu afu zahe nga kura aboro kinaho nika zanga  maaberã yo kuti Kindo na kini berẽ gupai nga, ka i mangi marã ni bakerehe i nika duadu ni bandabanda yo. Gu kura aboro ima rengba kaa mangasunge tipa ka ngerafuo tiyo na gayo aborokporo, ka regbo adunga beyo i gbata ga Mbori Kindo ya.—Matayo 6:19-21, 25-32.

Ono tie, Yesu akidohe nga agu aboro nasongoda ga Mbori Kindo nika du adu na agu ahe i aida ha awere na i nika du na nyenye amaku kumbatayo.—Matayo 6:33.

Wa vura duhe nga gu ga Yesu abawiriki naadu rogo bambata sa kama agarã aagbata ga Mbori Kindo Mbata na gako rurupai, i aabingo digido igirã na rungo ti gayo regbo te. Ono i adu nibanda bandayo. Ngba gini gene?

I aaraka ringbisihe kuti ga Mbori arugute, na si abanda yo ti gu gbegberẽ apai namanga agu aboro aidanga ka manga gupai Mbori agumbaha ya. Gu nyanyaki idapase i adu na ni nga ga Mbori Kindo nika yeaye aundo yo tipa i hi kere akpakarapai. Na Mbori afu gu “bakere tandu susi” fuyo tipa i hipai.—2 AKorindo 4:7-9.

Agu aKristano naadu rogo bambata sa kama agarã agi gu ga Yesu zinahe nga ga gbata Kindo mbata. I atungusi gu wene pangbanga nga ga Kindo rogo gu papara zegino i adu rogoho. (AKorosaio 1:23) Ya mo aboro ho namanga gupai re areme?

Ii! ADezire Yekova ima inoho nga ga Mbori Kindo nika digiso gi sino raka re barambeda. Sidu, i namanga ai gupai rengbe yo ka mangaha tipa ka manga gu sunge Yesu azinahe tipaha: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”—Matayo 24:14.

Wai gu mo nika mangapai sa wene pangbanga? Ani nangarasa ro mo wiriki agu aboro naraki rogo bambata sa kama agarã rogo ga Makedonia gbata nangia Beroya. Ho i agi gu wene pangbanga ni nga ga Kindo ngba gu mokedi nangia Pauro, i aidi gako pangbanga “wenengaĩ ka berã ha.” Fuoho, i ‘awisigi Ziazia Kekeapai’ ka bihe singia rengo du nga ha, na i ki mangipai sa gupai i awirikihe.—Amokedi 17:11, 12.

Mo ima rengba ka manga kina gu bangisapai re. Ni gbata mo ga Mbori Kindo na gako rurupai, mo nika gbia bagbuko awere na ki gbia nyenye zereda na ngbabase kumbatayo.