Rogo kura Rago Poso sa fuo bebere uru, aKenneth na Filomena naraka Curaçao yo, andu ka bi arogotise i aawisigo Ziazia Kekeapai na yo.

Kenneth aya, “ho ani ada ni, ngbadimo kpuyo adu ni kisikisihe na tarambiri aadunga ho te. Ono he afõ re mi yambu ga diako terefuni.”

Gu dee re atumba terefuni ki pe gupai nga kumbari basunge yo. Ho ri aini gupai ni nga Kenneth gbiati Flilomena adu zegiyo, ri aye ku ngbadimo na ki yambu yo ku dimo yo.

I abi gupai nga ri aima tona ni kpari. Ho Kenneth atona wisigo Ziazia Kekeapai ni ni tona ko ho na kparakpee, ri atona kpee berewe. AKenneth na Filomena asana ri tipa ginipai du namanga ri.

Ri ape gupai fuyo nga ri naaida ka imo tiri rogo gi bebere uru re, na ri naake waraga imotise fu kumbari Kenneth ki ni yambuhe ti kina gu regbo re si ki ni rugusi ri. Ri agumba gupai fuyo nga ri aawoka be bakere gberãrago, i ayugu afugo wasa furi rogo Ziazia Kekeapai yo. Ngarasaro nga guhe nabatasa boro.

Kennethe aya, “ani natambua Yekova tipa sa ko rani ani undo gi dee re, gbe wai ko asa rani ani ndu ko yo ni manga ko sunge na—maraika watadu gako ziazia toro—tipa ani yambuhe rogo terefuni!” *

Ya mo aKenneth na Filomena rengbe ka ida gupai nga, Mbori aundo yo singia vurube amaraika watadu Gako ziazia toro, nga gako ome mangaapai? Watadu ya mo gu yambahe aKenneth ayambuhe re adu gbua nga pa momu?

Ani arengbanga ka pehe wo te. Ono gupai ini anihe nga Mbori namangasunge na gako amaraika ka undo rani rogo toro yo. Ni kpiapai, Ziazia Kekeapai naya, Mbori amangisunge na maraika ko ndu na gu batungusi wene pangbanga nangia Firipo ko undo gu banyaki nangia boro Etiopia nga guko naagbata gu undo nga ga toro.—Amokedi 8:26-31.

Dungu apambori nasonosa ida tipa agu atoro du na bakere ome tiyo, agu akurayo kinaho i ayugo yo ni wene sino atoro nga aguyo namanga ga Mbori pai watadu namangasunge ni babanda rani. Badungu aboro ima ida kuti gupai nga amaraika kinaho ti ni nzunzu, na i na kina ome kurii gayo raka. Ono tie, kura dungu aboro kinaho aidanga kuti amaraika ya.

Ya mo amaraika ti ni nzunzu? Ka si du wo, i aenge wari? Gini rengo du tipa amaraika? Ya mo i rengbe ka du na ome kurii gamo raka? Ani bingo agopai.