1-2. Tipagine ani naadu ti ni pati Tingida Pakpio Yesu rogo agarã dunduko?

 AGARÃ wa 2,000 kusayo, Yesu afu ungako tipa rani, tipa ka zakagene furani ani gbia nyenye unga. Rogo gu yuru nadu mbata fu kpio Yesu, ko azinahe fu apefuoko tipa i naatingidapa gu gako mangapai nga ga nyemuse ni mangayo taata sungo nga gu naakoda kpakuto na imekakue.​—1 Kor. 11:23-26.

² Ani namangapai kuti gi ga Yesu zinahe re mbiko ani ima kpinyemuko ni bakerehe gbe. (Yo. 14:15) Rogo agarã yo dunduko ti regbo Tingida Pakpio Yesu, ani ninaayugo gaani tambuahe tipa gupai ko namangihe furani ni dia ani regbo ka berã na kini mangi kparakpee tipa gupai kpio ko ayugoho fu aboro. Ani a na ngbarago ka kiiso gaani sunge tungusapai, ka yamba aboro ni dunguyo a wa rengbe omerani na ni tipa i kodi tiyo na ani tipa gi kparakpara mbakadapai re. Na rengo ngaha nga, ani ima diaberã ka zanga mbu ai pai si ká na ani ti du pati Tingida Pakpio Yesu.

3. Gini apai ani nika sakapai tipaha rogo kekeapai re?

³ Rogo gi kekeapai re, ani nika sakapai tipa agene biata nga gu ga Yekova aboro namangi asadatise ngbaha wa rengbe omeyo na ni tipa ka Tingida Pakpio Yesu: (1) nimanga Tingida Pakpio Yesu ngba gu gene Yesu aruguyo i naamangaha ngbaha, (2) niyamba kura aboro tipa Tingida Pakpio Yesu, na (3) nimanga Tingida Pakpio Yesu akpakarapai ki vura du vurũ.

4. Gini arengo i naasakapai tipaha rogo agarã yo dunduko ti regbo Tingida Pakpio Yesu, na tipagine si aida nga ani naabi agi arengo re ti ni na pa ha taata ya? (Ruka 22:19, 20)

⁴ Rogo agarã yo dunduko ti regbo Tingida Pakpio Yesu, ani ninaadega turani kuti gu gumbapai du mburuhe rii Baibiri nga gu  nafu ruru akaragapai kuti dungu asanahe. Ani nawirika pa ndu gupai aboro aida na motumo tumorii ti ni na wai rengbe pakpio bangisa boro sa ka tumo agu aingapai nga ga dungu aboro. I naatingida rani na pa gupai kpakuto arukubaha na ada si aida i ri kpakuto na ki mbiri imekakue. (Oni gedi Ruka 22:19, 20.) Na ani naberãpa gu wene amaku du kumbatayo fu agu aboro du na maabangirise ka raka nyeanye kindi auru kpotosende. (Yes. 35:5, 6; 65:17, 21-23) Si aidanga ani naabi agi arengo re na paha taata te. Abirioni aboro aruganga tiyo na agi apai re te, na i na tambuahe tipa wai nyakipa ga Yesu motumo tumorii te. Na i amanganga Tingida Pakpio Yesu ngba gu gene ko arugu apefuoko i naamangaha ngbaha te. Tipagine duhe ti ni wo?

5. Tifuo badungu amokedi kpiki, waigu aboro atona ka manga Tingida Pakpio Yesu?

⁵ Ngbutuko fuo kpio badungu amokedi, ziree aKristano ada ni papara dungurati. (Mt. 13:24-27, 37-39) I aagumba “irairaapai, ka gbefa abawiriki fuo yo.” (Amo. 20:29, 30) Pai sa dagba gu “irairaapai” yo ziree aKristano atona kaa yugoho angia, Yesu aatumongo bara sa “ka dia gu ingaapai nga ga dungu aboro ku sa yo” wagu Baibiri apehe te, ono si nika ida ko naafu motumo tumorii afu kindi. (Eb. 9:27, 28) Areme, badungu aboro ima ida kuti gi ziree yugopai re. I naadunguratiyo ku rogo akanisa dedede​—na ti kura aregbo na aˈuru dunduko​—tipa kaa iriso guhe i ayambaha awere nga “Gu Motumo Nga ga Vugahe.” b Gu kura akanisa naya si nga ga aKristano ninaamanga tingida pakpio Yesu amanga ti kura aregbo, ono i aruganga tiyo nzunzu na gupai ga Yesu motumo tumorii ayugoho te. Gu kura aboro rengbe ka baka bangiri yo nga, ‘Ya mo pakpio Yesu nzunzu nayugo gupai nga i ima rengba ka mbupai fere ti gimi aingapai?’ Tipagine i asana gu sanahe re ti ni? Bambiko i aima digo niidi kuti agu aboro nape gupai nga ka i mbunga pai fu aboro ti gayo aingapai vurube kpio Yesu te. Waigu ndikidi apefuo Yesu aundo aboro i rugutiyo na gupai ga Yesu motumo tumorii ayugoho na gu ruru gene si aida i mangi Tingida Pakpio Yesu ngbaha?

6. Rogo 1872, ginipai badona aBawiriki Ziazia Kekeapai arugutiyo na ni?

⁶ Rogo gu garã nangia 1870, badona aBawiriki Ziazia Kekeapai nga aguyo Charles Taze Russell angbe kumbatayo fuyo atona kaa wisigo Ziazia Kekeapai sirisiri. I aaida ka ino gupai ga Yesu motumo tumorii ayugoho nzunzu na wai si aida i naamanga tingidapa kpioko. Rogo 1872, i arugutiyo na gupai nga, Yesu nirengo aima fu motumo tumorii tipa aboro dunduko. I aabandanga agu apai i awirikihe kina tipa tiyo sa te. Kuba gure, i ayugu agu apai i awirikihe fu aboro rogo abuku, awaraga apangbanga, na amagazini. Ngbutuko fuo gure, i atona ka wirika agu aKristano nadu rogo bambata sa kama agarã, i atona kaa dunguratiyo bara sa rogo garã yo tipa kaa manga Tingida Pakpio Yesu.

7. Waigu ani agbia undo ti gu wisigopai agu aBawiriki Ziazia Kekeapai nadu mbata amangihe?

⁷ Areme, ani nagbia undo ti agu apai agu aKristano re amangi wisigopai tipaha dungu agarã kusayo. Ngba gini gene? Yekova ima undo rani ani rugutirani na gupai ga Yesu motumo tumorii ayugoho na gupai si nika mangaha furani na fu aboro dunduko. (1 Yo. 2:1, 2) Ani ima wirika gupai a nga, Baibiri nafu amaabangirise ue fu agu aboro nasa ngbarago ti Mbori​—agu amaabangirise re nga, raka zanga kpio ngbangbaturũ yo fu kura aboro, na nyenye unga auru kpotosende fu amirioni kura aboro. Ani nambeda na Yekova ho ani awisigopai ni tipa bakio wai ko akpinyemu rani na bakio wai ani agbia undo ti ga Yesu motumo  tumorii. (1 Pet. 3:18; 1 Yo. 4:9) Wakina gu ruru awirina nadu mbata kusayo, ani nayamba kura aboro i kodi tiyo na ani tipa ka manga Tingida Pakpio Yesu ngba gu gene Yesu arugu apefuoko i mangihe ngbaha.

8. Ginipai ga Yekova aboro namangihe tipa ka yamba kura aboro tipa Tingida Pakpio Yesu? (Oni bi sura.)

⁸ Ga Yekova aboro aima digo niyambu aboro tipa Tingida Pakpio Yesu tipa dungu agarã. Rogo tonatona gu garã nangia 1881, i ayambu agu awirina du Amerika yo tipa i dunguratiyo kurogo ba sa rogo kporo rogo gu gbata nangia Allegheny, Pennsylvania yo, tipa kparakpara mbakadapai. Kusa, adungurati nibasasa nanaamanga Tingida Pakpio Yesu ni tihe. Rogo Marungu 1940, i aya fu abatungusipai wẽ, i ima rengba ka yamba ai gu boro i nika bi ni rogo gayo dagbarago nga guni yugu nyemupai. Ti bambata regbo rogo 1960, Betere agbingbida awaraga yambahe fu adungurati. Natona ti gu regbo re ka ndu kumbatayo, i aima digo ni kparaka abirioni awaraga yambahe. Tipagine ani amanga asadatise ti ni kakaka tipa ka yamba kura aboro?

9-10. Ada nagbia undo ti gu asadatise ani amangaha tipa ka yambaha aboro tipa Tingida Pakpio Yesu? (Yoane 3:16)

⁹ Ndupai sa ani ayamba kura aboro ti ni i ye ka manga Tingida Pakpio Yesu na ani nga, ani naida agu aboro ye tipa Tingida Pakpio Yesu ti bambata regbo wirikipai tipa gupai aYekova na Yesu namangihe furani dunduko. (Oni gedi Yoane 3:16.) Ani na gu kido nga, gupai i nika bihe na ki gihe pati Tingida Pakpio Yesu nika fõngbaduyo yo afõ i wirikipai ni bakerehe na ki da ni ga Yekova amoyambu. Ono kura aboro nagbia undo agbia a.

 ¹⁰ Ani nayamba agu aboro ayamba a naima zera rogo toro yo. Ani namanga ha wo tipa ka tingida yo na gupai nga Mbori nakpinyemuyo kindi. Badungu aboro naadia gaani yambahe adia kugume, na ani nidu na bakere ngbarago ka bi yo. Pa du yo pati Tingida Pakpio Yesu natingida yo na pa gu bakere ngbarago i anaagbiaha ti iriso Yekova mbata kusayo. Ani makianga ga Monica kpiapai. c Ri atona kaa tungusapai berewe ti regbo gu ririkaza nga Korona. Tingbafuo ri mangi Tingida Pakpio Yesu rogo 2021, ri aya: “Gi Tingida Pakpio Yesu re ima du na nyanyakipaha fere gbe. Si ni bambata regbo vuru agarã yo 20, mi nadu na rengba ka tungusapai fu aboro na ka yamba yo tipa Tingida Pakpio Yesu. Mi aima fu tire ka yamba aboro wa omere arengbe na ni bambiko mi na bakere tambuahe gbe tipa gupai aYekova na Yesu namangihe fere.” (Tam. 103:1-4) Singia aboro nadia gaani yambahe kugume watadu i adianga ha te, ani naasada na omerani dunduko ka yamba yo tipa Tingida Pakpio Yesu, na ani ima ino gupai nga Yekova nabi gaani ome na nyanyakipaha.

11. Waigu Yekova nafu maku kurii gu ome ani amangaha ka yamba aboro tipa Tingida Pakpio Yesu? (Agai 2:7)

¹¹ Yekova ima fu maku ni bakerehe kurii agu asadatise ani amangaha tipa ka yamba aboro tipa Tingida Pakpio Yesu. Rogo 2021, wa vura duhe nga i arugusi kura apai mbiko gu ririkaza nga Korona, bange agu aboro nadu pati Tingida Pakpio Yesu adu nga 21,367,603. Bange agu aboro re adu wa ka i gbia bange agu aDezire Yekova du rogo zegino dunduko wa bara ue na beberehe! Rengo ngaha nga, anga namba gbua nga gupai Yekova abihe na nyanyakipaha te. Ko na nyemu agu aboro nibasasa dunduko du pati ni. (Rk. 15:7; 1 Tim. 2:3, 4) Ani ima rengba kadu na gu kido nga ho ani afu waraga yambahe ni fu aboro, Yekova naundo rani ani gbia agu aboro du na wene ngbaduyo yo.​—Oni gedi Agai 2:7.

12. Gini apai rengbe ka saha furani ni kpakarakpakaraha tipa ka manga Tingida Pakpio Yesu? (Oni bi sura.)

¹² Yesu ape gupai nga, ti yangara arame, ani nika gbia tirani na dungu ngbatunga akpakarapai​—sogote be aborokporo, arungosiro, avura, ririakaza, na dungu kuraapai. (Mt. 10:36; Mk. 13:9; Rk. 21:10, 11) Ti kura aregbo, agi apai re nasaha furani ni kpakarakpakaraha tipa ka manga Tingida Pakpio Yesu. Gini apai awirinarani namangihe tipa ka diabe ngbatunga agu akpakarapai re, na waigu Yekova naundo yo?

13. Waigu Yekova afu maku kurii ga Artem wingbaduse na gako diaberã ka manga Tingida Pakpio Yesu ho ko adu ni bambukiso yo?

¹³ Zio boro ku bambukiso yo. Agu awirinarani du nizizi yo ku bambukiso yo tipa gayo idapase namanga agu apai rengbe omeyo na ni tipa ka manga Tingida Pakpio Yesu. Oni bingo ga Artem kpiapai. Rogo gu garã nangia 2020 rogo agu aposo nadu mbata fu Tingida Pakpio Yesu na tifuoho, i aziko ki moiko kurogo wiri tooni bambukiso bakioho adu wa ametere 17 nga gu narengbe ka dia ziziaboro gbua bisue ti bangisa regbo sa. Wa ko avura du bambukiso yo, ko aima du na rengba ka gbia ahe tipa ka manga kpakuto tipa Tingida Pakpio Yesu, na ka manga mbakadapai ka fu gumbapai nga ga Tingida Pakpio Yesu tipa ka gbia undo behe. Ono agu akumba nadu na ko bambukiso yo aavugundö nikerehe na kini gumba gbegberẽ afugo nikerehe. Ginipai ko amangihe? Ko asana yo singia i rengbe ka mbu gbegberẽ afugo na vugundö tipa kandara saa sa. Kina ngba Artem nazere ka bi gupai nga agu aboro nadu na ko bambukiso  yo re ada kuti gupai nga i avungo gundö na kini gumba gbegberẽ afugo ti regbo Tingida Pakpio Yesu te. Artem aya, “Mi apepa Tingida Pakpio Yesu fuyo.” Wa si avura du nga i aya i aidanga ka giapai tipa gupai re te, tifuo i bi Artem ko nimangi Tingida Pakpio Yesu na kini gi agu apai ko agumbaha, i asana ko tipa agu apai du tipa ha dunduko.

14. Waigu ga Yekova aboro amangi Tingida Pakpio Yesu gu ririkaza nga Korona ki vura du vurũ?

¹⁴ Gu ririkaza nga Korona. Ho gu ririkaza re ati ni, ga Yekova aboro aadunga na rengba ka dunguratiyo kurogo ba sa ka manga Tingida Pakpio Yesu te. Ono gupai re aakánga na yo ti manga Tingida Pakpio Yesu te. d Agu adungurati nadu na rengba kadu na Internet, amangi Tingida Pakpio Yesu rogo vidio. Na ginipai tigaha nadu tipa agu amirioni aboro naadunga na Internet ya? Rogo kura aringara, abe-basunge amangi ambakadapai tipa gupai nga aboro du na rengba ka bi gumbapai rogo terevizioni watadu ka degatuyo kuti ni rogo radio. Kurigure, abe-basunge ade fugo gumbapai rogo afugo niima susa 500 tipa gupai nga zavura agu aboro du rogo agbaria duadu na rengba tipa ka manga Tingida Pakpio Yesu. Na awirina andu na  gu dede afugo re fu agu awirina du rogo agu aba re nga aguyo naaidaha.

15. Ginipai mo awirikaha ti gu kpiapai nga ga gu nawiriki Baibiri du rimori nga Sue?

¹⁵ Sogote be aborokporo. Tipa kura aboro, gu bakere kpakarapai i naagbia tiyo na ni tipa ka manga Tingida Pakpio Yesu nga sogote be gayo aborokporo. Oni bingo gu kpiapai nga ga nawiriki Baibiri du rimori nga Sue. Rogo 2021, rogo gu uru nadu mbata fu Tingida Pakpio Yesu, Sue agumba gupai fu gari nayugu Baibiri nga, ri adunga na rengba ka manga Tingida Pakpio Yesu te bambiko kura aboro rogo gari ngbadimo kporo nasoga ri asoga. Gari nayugu Baibiri agedi Ruka 22:44. Tifuo ho, ri asakirogo gupai yo fu ri nga ho ani agbiatirani ni na akpakarapai, si naida ani pekefuo ga Yesu kpiapai ni ndu ani koyo du Yekova ni rogo kpee yo na ki moi gaani kido kuti Ko dunduko. Rogo gu uru nangbe fuo gure, Sue ambakadi kpakuto na imekakue na ki bi gu kparakpara mbakadapai nga ga Gu Irisombori Nga ga Wiso rogo jw.org. Rogo gu nyemu re, ri andu ku dimo kpuri yo nisa ri, na kini dege turi kuti Tingida Pakpio Yesu rogo gari terefuni. Tifuo gure, Sue akepai fu gari nayugu Baibiri nga: “Mo aima ngarasa re gba ni bakerehe gbe. Mi aima manga agu apai dunduko narẽ na omere tipa kadu pati Tingida Pakpio Yesu, na Yekova aima undo re. Ka mi sakingo pa gu ngbarago na tambuahe du mi na ni fu Yekova te!” Ya mo mo naberã gupai nga Yekova rengbe ka undo ro ka mo gbiatiro na ngbatunga pai wakina gure?

16. Tipagine du ani ti ni na gu kido nga Yekova nika fu maku afu kurii gu ome ani amangaha tipa kadu pati Tingida Pakpio Yesu? (ARomo 8:31, 32)

¹⁶ Yekova nabi agu aome ani amangaha na nyanyakipaha ka Tingida Pakpio Yesu. Ani ima rengba kadu na gu kido nga ko nika fu maku afu furani ho ani ayugo tambuahe ni tipa gupai ko namangihe furani. (Oni gedi ARomo 8:31, 32.) Sidu tie, ani dinga berã adia kadu pati Tingida Pakpio Yesu rogo gi garã re, na ki mangi gupai rengbe omerani na ni tipa ka kiiso gaani asunge nga ga toro ti regbo Tingida Pakpio Yesu.