IDAPASE nafu bakere ome furani. Ni kpiapai, wa vura duhe nga Satana naida ka imo rani rogo toro yo, idapase naundo rani ani ‘bisi gu siida we nga ga gbegberẽ ko.’ (Ef. 6:16) Ka ani du na idapase, ani ima rengba ka hi agu akpakarapai nga gu rengbe ka du wakina abaagangara. Yesu ape gupai fu gako abawiriki nga: “Ka gaoni idapase du wa tunga musutada, oni ayá fu gi bagangara re, ‘Mo gúari erẽ koyo re;’ si ki guari.” (Mt. 17:20) Wa duhe nga idapase ima rengba ka nyakasa rani rogo toro yo, si naida ani sana tirani na agi asanahe re: Gine nga idapase? Wai du du gupai du kpotoraniyo na maapai kurii gaani idapase? Wai du rengbe ani ka nyakasa gaani idapase? Na da si aida ani du na idapase kuti ni?​—Rom. 4:3.

Idapase ima susa gupai gbua nga ka ida kuti pai watadu ka ino rengo, bambiko zavura ‘adaimona ima ida [ya Mbori kina ti ni ] ki nikio.’ (Yak. 2:19) Ono tie, gine nga idapase?

Ziazia kekeapai fura tipa idapase nga si na apaparaha ue. Bambataha nga, “idapase nga ndikidi he, du aboro na maabangirise mbiko ho.” (Eb. 11:1a) Ka mo du na idapase, mo ima ida nyanyaki kuti gupai nga agu apai dunduko Yekova agumbaha, si nga rengo na si nika digiso tihe adigiso. Ni kpiapai, Yekova agumba gupai fu aYisaraere nga: “Ka oni rengbe na gbarasa gi mokido du tipa uru na gi mokido du tipa yuru, si du ka uru akura nga na yuru ti ni ti gaha ringbisiringbisi rago ya, si du tie ka gi mokido du na gi moyambu nangia Dawidi nyasi ti ni a.” (Yere. 33:20, 21) Ya mo mo adunga na gunde nga uru ima rengba ka mbu kura na ki mbu tigo, si ki sa gupai nga ka imarago gbiati yuru dunga ti ni ya? Ka si du nga kapa ho du mo na ni tipa agu andiko nabanda kpotosende tipa si naake kina rogo baha pati uru te, ya mo si naida mo du na kapa nga gu Bakusiahe naamoi agu andiko re arengbanga ka digiso gako akidohe te? Wagusa te!​—Yes. 55:10, 11; Mt. 5:18.

Uehe nga, idapase “nga wisiga pa agu ahe i abi nga ni bangirise ya.” I nape gupai tipa idapase nga, “si nga ka ida kuti gu goapai,” du tipa agu apai ka i abingo ho ni bangirise ya ono si kidu nga rengo. (Eb. 11:1b) Rogo gini gene? Ani yanga gude sana ro nga, ‘Wai du mo aino gupai nga wege kina ti ni?’ Wa vura duhe nga mo aabingo wege mbata te, mo ima rengba ka fura fu gu gude re tipa agu apai nayugoho nga wege kina ti ni, wa agu nga, gu wege ani agbidaha, agu apai wege amangaha, gbiati kura apai. Ho gude aida ni kuti gupai nga agu apai re nga rengo, u naruga tiru na gupai nga si rẽarẽ boro idi kuti agu apai ni abingo ho ya. Wakina gure a, idapase naru rii nyanyaki gopai.​—Rom. 1:20.

Wa du he nga idapase naru rii gopai, tipa ka du na idapase, boro du wa ka ni du na “gu inahe nga ga rengo.” (1 Tim. 2:4) Ono anga kina inohe sa si aidaha te. Gu mokedi nangia Pauro akepai nga: ‘Boro naidapase kpotoni yo.’ (Rom. 10:10) Si aidanga gupai nga boro idi kina pa rengo gbua te ono si naida ni bihe na nyanyaki paha. Mangaha wo rengbe ka sa ni ni du na idapase, naida ka ya ka mangapai ringbisihe kuti rengo. (Yak. 2:20) Gu boro adunga na bakere tambuahe kpotoniyo  tipa rengo ya ima rengba ka ká gu goapai nayugo pa rengo mbiko gupai nga ni aidanga ka aria gani ida te, watadu ni naida ka manga kina gupai ngba ti ni. (2 Pet. 3:3, 4; Yuda 18) Si du duhe ti ni nga ti agu aregbo i aakeka Ziazia Kekeapai ti ni, anga agu aboro dunduko naabi iiriwoapai naadu na idapase te. (Geda 14:11; Yo. 12:37) Ga Mbori ziazia toro nafu idapase kina ku kpoto agu aboro yo nzunzu nakpi nyemu rengo angianga ziree ya.​—Gara. 5:22; 2 Tesa. 2:10, 11.

Bakindo Davide adu dagba agu aboro yo naadu na nyanyaki idapase. (Eb. 11:32, 33) Wa si avura duwo, anga aboro dunduko dagba ga Davide aborokporo yo naadu na nyanyaki idapase te. Ni kpiapai, mo berẽnga pa unvura Davide nangia Eriaba. Ho Goriata aaserekpo aYisaraere ni, rago aangbanga ti Davide na ni te. Eriaba azingi kuti Davide tipa gupai re, ho Eriaba azingi ni, ko ayugu gupai nga ko aadunga na idapase kuti Yekova te. (1 Sam. 17:26-28) Boro ho i avunga ni na idapase te; na boro ho a nadia idapase ti avungu ni te, sidu, ga Davide idapase aye mbiko gako pagume na Mbori.

Rogo Atambuahe 27, Davide ayugu wai ko arengbe ka du na ngbatunga gu nyanyaki idapase re. (Veresi 1) Davide aberẽ kusayo kuriipa agu apai naamangi ko rogo gako raka yo na ku rii pa wai Yekova amangipai na avurako. (Veresi 2, 3) Ko adu na bakere tambuahe tipa ga Yekova mbakadapai nga ga irisombori. (Veresi 4) Davide airisi Mbori kina sa na akurako aidipase banye yo. (Veresi 6) Ko agbata Yekova nyanyaki rogo kparakpee yo. (Veresi 7, 8) Davide aaida rugapai a ngba ga Mbori gene. (Veresi 11) Idapase adu na nyanyaki paha fu Davide si ki sako ko sana gu sanahe nga: “Wari ka mi ni du ni ka idapase naadunga tire ya?”​—Veresi 13, NW.

Mo ima rengba kadu na idapase wakina Davide ka mo wiriki gu berẽpai gbiati mangapai i nayuguhe rogo Atambuahe 27. Wa duhe nga idapase naru riipa ndikidi inohe, wa mo nikaa wisigo Fugo Mbori na agu awaraga du mburuhe rii Ziazia Kekeapai, si nika du foro taata tipa mo du na gu sino nga gu ga Mbori toro aundo rani ani sonosihe. (Tam. 1:2, 3) Mo di regbo ka berãkuriipai ho mo amanga wisigopai ni. Ho mo aberã ni kurii gupai mo awisigoho, si nika sa gupai nga gamo tambuahe tipa Yekova du ni bakerehe gbe. Mbiko padu mo na bakere tambuahe fu Yekova, mo nika du nzunzu na nyemu ka du na idapase kutiko ni iriso mo ko ti regbo agu adunguratise nga ga dungurati na kini takipande pa gu maabangirise du mo na ni fu kura aboro. (Eb. 10:23-25) Berewe a, ani nayugo gupai nga ani na idapase ho ani ‘akpara ni dedede, zanga mbu be he.’ (Rk. 18:1-12) Sidu tie, “ka oni pirigi nga ti kpara kpe” fu Yekova ya, oni du na gu kido nga “ko naberã pa roni” aberã. (1 Tesa. 5:17; 1Pet 5:7) Idapase nasarani ani mangi gupai du ni ruruhe na ho ani amanga gupai ni du ni ruruhe, gaani idapase nada ni nyanyakihe gbe.​—Yak. 2:22.

Rogo gu nyemu naadu mbata fu Yesu kpi, ko agumba gupai fu gako amokedi nga: “Oni ídi pa Mbori, oni ídi pa re a.” (Yo. 14:1) Sidu, si aidanga ani du na idapase sa kina kuti Yekova te, si naida aida ani du na idapase a kuti Yesu. Waigu rengbe mo kadu na idapase kuti Yesu? Ani wisigingo agene biata.

Bambataha nga, mo naabi ga Yesu motumo tumorii ni gu gamahe Mbori nafuhe foro. Gu mokedi nangia Pauro aya: “Gu unga du mi ngbaha awere ni borore mi ngba ha mbiko idapase, gu idapase nga ida pa Wiri Mbori, ko nakpi nyemu re, ki fu tiko tipa re.” (Gara. 2:20) Ho du mo ni na idapase kuti Yesu, mo naida kuti gupai nzunzu nga ga Yesu motumo rengbe arengba ka undo ro, si nga mburu mbupai furani ti gaani aingapai, si nafu gu maabangirise nga ga nyenye unga foro, na si nga gu bangua gopai nayugo gupai nga Mbori ima kpinyemuro. (Rom. 8:32, 38, 39; Ef. 1:7) Ka mo idi kuti gupai nzunzu nga ga Yesu motumo ima rengba ka undo ro, si nika saro ka mo naabingo tiro nga gbegberẽ boro nga mo watadu mo nga kere boro ingapai ya.​— 2 Tesa. 2:16, 17.

Uepai nga, mo mbedi na Yekova rogo kparakpee yo riimburu ga Yesu motumo. Mbiko motumo tumorii, ani rengbe arengba ka manga kparakpee fu Yekova zukazuka zanga gunde, “ni erã ku pati gu mbatabakindo nga ga undahe, ya ani di inapai, ki bi undahe si unda rani rogo rago zingo.” (Eb. 4:15, 16; 10:19-22) Kparakpee nanyakasa rani ani mangi diaberã ka sovura kuti gu asada nga ga ingapai.​—Rk. 22:40.

Biatapai nga, mo gi sangba Yesu. Gu mokedi nangia Yoane aya: “Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te, kina ga Mbori zinga nye ri ni.” (Yo. 3:36) Oni bi gupai nga Yoane ayugu kparakparapai dagba du na idapase na basasangba. Sidu, mo nadu na idapase kuti Yesu ni gia mo sangbako. Mo nagiasangba Yesu ni peka mo fuo “ga Kristo rugute,” naida ka ya, agu apai dunduko ko ayuguhe na ki rugu paha. (Gara. 6:2) Mo naagia sangba Yesu ni peka mo fuo agu arugute ko afuhe vurube “kangara moyambu.” (Mt. 24:45) Ni gia mo sangba Yesu, mo nika du na ome ka hi agu arungosiro du wa kina bavugumo.​—Rk 6:47, 48.

Ti kura regbo sa, kumba apoi kuari fu Yesu ki ya: “Mi idi pase mo únda re wa mi aida nga pase ya!” (Mk. 9:24) Gu kumba re aima du na bete idapase tiko, ono ko ki du na umbasitise ki ini gupai nga ko naida bakere idapase. A wakina gi kumba re, ani dunduko nikaa ida bakere idapase aida ti kura aregbo. Ani dunduko rengbe ka nyakasa gaani idapase awere. A wa ani nabihe, ani nanyakasa gaani idapase ho ani awisigo Fugo Mbori ni kini berẽkuriihe, nga gu nika kiiso gaani tambuahe tipa Yekova. Gaani idapase nanyaka a ho ani na akuarani aidipase airiso Yekova ni, kini takipande gaani maabangirise gbaiga, na kini kpatagara kuti kparakpee. Kurii gure, ho ani anyakasa gaani idapase ni, ani nagbia bakere mosoro. Fugo Mbori nangarasa rani nga: ‘Oni sonosi tironi rogo gaoni ziazia idapase tipa ka bánda tironi rogo ga Mbori nyemuse yo.’​—Yuda 20, 21.