1. Ginipai Yesu apehe tipa agu aũkumuko nga ga ngbangbaturũ?

ANGA aũkumuko dunduko rengbe yo ka bihe te. Nirengo, agu aũkumuko ngba kisusi, ka i bingo ho te. Rogo ga Yesu tungusapai naadu rii bagangara yo, ko afura tipa agu aũkumuko nga ga ngbangbaturũ nga gu nyakipaha ni bakerehe kisusi agu aũkumuko nga ga borose. Fuaho, ko ape kurapai nga: “Bara ho du ga ũkumuko ni, ngbaduro du kina ku ho a.” (Mt. 6:19-21) Kpotoraniyo rengbe ka sarani ani pekefuo agu ahe ani abihe na nyanyakipaha gbe. Ani ‘nadúngura aũkumuko ni gaani ku ngbangbaturũ yo’ ni manga ani wene rimo na Mbori watadu nidu ani na wene pagume na ko. Yesu ape gupai nga, ngbatunga agu aũkumuko re, ka paha gberẽnga te na ka i dingo ho a te.

2. (a) Ringbisihe kuti 2 AKorindo 4:17, 18, ginipai Pauro azungodi rani ani mangihe? (b) Gini apai ani nika wirikaha rogo gi kekeapai re?

² Gu Mokedi nangia Pauro azungodi rani nga ‘ani ngere ti agu ahe i abi nga ha ya.’ (Oni gedi 2 AKorindo 4:17, 18.) Agu ahe i abingo ho re ya nakoda agu amaku ani nika gbia ngbarago ti ni rogo ga Mbori vovo zegino. Rogo gi kekeapai re, ani nika wirikapai tipa aũkumuko biama ka ani abingo ho ni bangirani ya nga gu rengbe ani ka gbia undo ti ni kina awere—agu aũkumuko re nga, pabakure na Mbori, gu gamahe nga ga kparakpee, gu undo nga ga ziazia toro, na gu undo ani agbiaha be Yekova, Yesu, na amaraika gene tungusapai yo. Ani nika wirikapai a tipa wai rengbe ani ka yugoho nga ani na bakere tambuahe tipa agi aũkumuko ani abingo ho ni bangirani re ya.

3. Gu bakerepa ũkumuko kisusi ka i abingo ho ni bangirise ya nga gine, na ginihe nasa gupai nga ani du na rengba kadu na ni?

³ Gu bakerepa ũkumuko kisusi ka ani abingo ho ni bangirani ya nga pabakure na Yekova Mbori. (Yak. 2:23) Wai du duhe nga Mbori ima rengba ka zio bakure na aboro ingapai ko ki nye kindi ni ziazia ko? Ko rengbe arengba ka mangaha wo mbiko gu motumo nga ga Yesu “nadia gu ingapai nga ga zegino ku sa yo.” (Yo. 1:29) Yekova aima inoho mbata fu regbo nga gako ringbisapai du tipa fu Batasi tipa aboro azanganga manga te. Si du nga ndu gupai Mbori anaazio bakure ti ni na agu aboro naadu mbata fu Kristo kpi.—Rom. 3:25.

4. Oni funga akpiapai nga ga agu akumba naadu mbata fu regbo aKristano nga aguyo naada ni abakurea Yekova.

⁴ Mo berẽnga pa agu akumba naaraki mbata fu regbo aKristano nga aguyo naada ni abakurea Mbori. Abarayama angia gu kumba naadu na nyanyaki idapase tiko. Agarã naima susa 1,000 tifuo kpio Abarayama, Yekova ayambu ko nga “wene badiare” watadu wene bakureami. (Yes. 41:8) Sidu, zavura kina kpio, ka si kparanga mbembedi abakurea Yekova tiko te. Yekova natingidapa Abarayama kindi. (Rk. 20:37, 38) Gu kura kpiapai nga ga Eyobo. Barabangiri ndurumo amaraika ngbangbaturũ yo, Yekova afura tipa Eyobo na kido. Yekova ayambuko “nga ziazia kumba ni ruru ko, nga gu ko nagunde ti Mbori, ki nine gbigbitapai.” (Eyo. 1:6-8) Gini bipai Yekova adu na ni tipa Daniere, nga gu boro nairisi Yekova ni ruruko rogo gu ringara nangia ga apagano tipa agarã wa 80? Amaraika akido gi gbinza bakumba re bara biata nga Mbori “nakpi nyemu ko gbe.” (Dan. 9:23; 10:11, 19) Ani rengbe kadu na kido nga Yekova na bakere nyemu gu uru ko nika zingisa agu abakureako naima kpiko.—Eyo. 14:15.

5. Ginipai si aidaha tipa kadu na mbembedi pabakure na Yekova?

⁵ Bange kpakpa aboro wai areme du na mbembedi pabakure na Yekova? I nga amirioni. Ani naino gipai re mbiko badungu akumba, adee, na agude rogo zegino dunduko nayugoho rogo gayo mangaapai yo nga i naida kadu ni abakurea Mbori. Yekova na mbembedi pabakure na “ruru boro.” (Snz. 3:32) I na gi pabakure re na ko mbiko gu idapase du yo na ni kuti ga Yesu motumo tumorii. Mbiko gu motumo tumorii re, Yekova nambugene furani ani kpara tirani fuko na ki zi bapatiza. Ho ani amanga gi nyanyakipa adiandue re ni, ani nakoda tirani na agu amirioni aKristano naima kpara gayo raka fu Yekova ki zi bapatiza nga aguyo du na “dawedawe pagume” na gu bakerepa Boro kisusi nga ga haurago ko!

6. Waigu rengbe ani ka yugo tambuahe tipa gaani pabakure na Mbori?

⁶ Waigu rengbe ani ka yugo gupai nga ani nabi gaani pabakure na Mbori na nyanyakipaha? A wa si adu tipa Abarayama na Eyobo, nga aguyo nanye ni ruruyo fu Mbori tipa agarã naima susa sa kama, si naida ani nye ni ruru rani a ka si vura du vurũ nga ani ima dia gbanga regbo kuti mangasunge fu Yekova rogo gi zegino re. A wa si adu tipa Daniere, si naida ani bi gaani pabakure na Mbori na nyanyakipaha kisusi apai dunduko. (Dan. 6:7, 10, 16, 22) Na ga Yekova undo, ani ima rengba ka hi agu aˈasada ani agbiatirani na ni tipa kadu ti aregbo dunduko ni abakurea Yekova.—Frp. 4:13.

7. (a) Ringbisihe kuti Asanza 15:8, ga Yekova bipai nga gine tipa kparakpee? (b) Wai du Yekova akaragapai kuti gaani akparakpee?

⁷ Gu kura ũkumuko ka ani abingo ho ya nga kparakpee. Abakure nidu gbe na nyemu pekapa gayo aberãpai na abipai dagbatiyo. Ya mo wo du nzunzu du gaani pabakure na Yekova? Ii, wo du duhe! Yekova nafura furani vurube  Fugoko, na vuruhe yo du ko apeka pa gako aberãpai na abipai ni furani. Ani nafura na ko rogo kparakpee yo, na ani ima rengba ka pekapa agu apai du kpotoraniyo fuko. Yekova nidu na ngbarago kaa degatuko kuti gaani akparakpee. (Oni gedi Asanza 15:8.) Wangia Yekova gu Bakure nga boro nyemuse, ko nadegatuko kuti gaani akparakpee na kini karagapai kutini. Ti kura aregbo, ko nakaragapai kuti gaani akparakpee ni kina boro ipo. Ono ti kura aregbo, si ima rengba ka ida ani naakpara akpara kindi tipa pai. Wa vura duhe wo, ani rengbe kadu na kido nga ko nika fu karagapai ti kina boro wene regbo na rogo gu gene ngba kisusi. Kina rengo ngaha nga, ga Mbori karagapai ima rengba kadu kia ti gupai ani aidaha. Ni kpiapai, kuba gupai nga ka dia asada kusayo tirani, ko ima rengba ka fu tatamana furani na ome tipa ani “rengbe ka hi he.”—1 Kor. 10:13.

8. Wai du rengbe ani ka yugo gaani tambuahe tipa gu gamahe nga ga kparakpee?

⁸ Wai du rengbe ani ka yugo gaani tambuahe tipa gi nyanyakipa gamahe nga ga kparakpee re? Gene sa ani amanga gipai re ngbaha nga ni gia ani sangba gu ga Yekova rugute nga, “ka oni pirigi nga ti kpara kpe ya.” (1 Tesa. 5:17) Yekova aziongo rani ngbaome ani mangi kparakpee te. Kuba gure, ko nairisa gu ranirii du ani na ni ka siapai na kini zungodi rani ani “kpatagara kuti kpe kindi.” (Rom. 12:12) Sidu, ani rengbe ka yugo gaani tambuahe ni manga ani kparakpee dedede na aˈuru dũ. Si naida aida gaani akparakpee du a na agu afugo nga ga tambuahe gbiati sambuohe rogoho fu Yekova.—Tam. 145:2, 3.

9. Gini bipai du kura wirina na ni tipa kparakpee, na wai du mo abi gupai re?

⁹ Wa ani kaa mangasunge fu Yekova ni gbangaha na kini bi wai ko akaragapai kuti gaani akparakpee, gaani tambuahe tipa gu gamahe nga ga kparakpee nika kio ni bakerehe. Oni bingo gu kpiapai du tipa Chris nga gu wirina naima mangasunge kindo ti aregbo dũ tipa agarã awere 47. Ko aya: “Mi naagbia ngbarago ti zinga wiso tipa ka manga kparakpee fu Yekova. Si ni bawenepai kisusi ka fura na Yekova ho uru akura ni na ahe dunduko kidu ni bawenehe gbe! Gipai re nasa re mi naatambua ko tipa gako agamahe dunduko, kodihe na gu momu  nga ga kparakpee. Ho mi naamanga kparakpee ni ti digido uru, mi naara rogo zereda.”

10. Tipagine si aida ani naabi ga Mbori ziazia toro ti ni na nyanyakipaha?

¹⁰ Gu kura gamahe ka ani abingo ho ni bangirani ya nga gu si aida ani bihe na nyanyakipaha nga ga Mbori ziazia toro. Yesu angarasi rani nga ani naakpara akpara kindi tipa ziazia toro. (Rk. 11:9, 13) Yekova namangasunge na gako ziazia toro kafu “gu bakere tandu susi” watadu ome furani. (2 Kor. 4:7; Amo. 1:8) Mbiko gu undo nga ga ga Mbori toro, ani rengbe ka hi gu ngbatunga asada dunduko rengbe ka gbia rani.

11. Gini gene ziazia toro narengbe ka undo rani ngbaha?

¹¹ Ziazia toro rengbe ka undo rani tingba agu asunge ani amangaha fu Mbori. Ga Mbori toro ima rengba ka kiiso gu tandu mangaapai du tirani. Si naundo rani ani mangi agu asunge nga ga aKristano du berani. Ani ima inoho nga gu wene sangbanapai ani agbiaha ti ngba ga Mbori sunge ayengo berani te ono mbiko gupai nga gako ziazia toro nasaha furani taata si mangi.

12. Ringbisihe kuti Atambuahe 139:23, 24, ani rengbe ka manga kparakpee tipa ziazia toro undo rani ani mangi ginipai?

¹² Gu kura gene rengbe ani ngbaha ka yugo gupai nga ani nabi ga Mbori ziazia toro na nyanyakipaha nga ni manga ani kparakpee tipa si undo rani ani inipa gu gbegberẽ aberã watadu nyemuapai du kpotoraniyo. (Oni gedi Atambuahe 139:23, 24.) Ka ani mangi kparakpee tipa gipai re, Yekova vurube gako toro ima rengba ka sarani ani rugutirani na pa gu gbegberẽ aberã watadu nyemuapai re. Ka ani bi tirani nga ani na gbegberẽ nyemupai watadu gbegberẽ berã, si naida ani mangi kparakpee tipa ga Mbori toro tipa si fu gu ome ani aidaha ka sovura kuti gu gbegberẽ nyemupai watadu berãpai re. Ka ani mangihe wo, ani nika yugoho nga ani ima diaberã ka ne agu apai dunduko rengbe ka sa Yekova ko mbu undo rani na gako ziazia toro.—Ef. 4:30.

13. Wai du rengbe ani ka kiiso gaani tambuahe tipa ziazia toro?

¹³ Ani rengbe ka kiiso gaani tambuahe tipa ziazia toro ni berã ani kurii agu apai gu toro re amangaha ti gi gaani regbo re. Mbata fu Yesu  ga ku ngbangbaturũ yo, ko agumba gupai fu gako abawiriki nga: “Oni adía tandu ho Ziazia Toro ka ye ni ku ri roni. Oni adu ni adezirere, . . . digida sende yo.” (Amo. 1:8) Agi afugo re nadigisotihe areme ngba iiriwo gene. Mbiko gu undo nga ga ziazia toro, i ima dungura airisi Yekova du bangeyo wa amirioni muambe na beberehe rogo apapara zegino naabaha. Berewe a, ani nagbia ngbarago ti gu paradizo nga ga toro mbiko ga Mbori toro naundo rani ani sonosi gu wene asino du wa nyemuse, ngbarago, zereda, hipai, mangapase, weneringise, idapase, zera, gbiati rugatise. (Gara. 5:22, 23) Nairiwo gu wene gamahe du nga ziazia toro re!

14. Gini undo ani agbiaha ti regbo tungusapai nga gu ani abingo ho ni bangirani ya?

¹⁴ Ani na gu nyanyakipa ũkumuko berani ka ani abingo ho ya nga ga ‘mangasunge’ sa na Yekova, Yesu, gbiati amaraika. (2 Kor. 6:1) Ani namangasunge na yo ti ai gu regbo ani andu gene sunge sa aboro yo ni abawiriki. Pauro afura tipa tiko gbiati agu aboro namanga gi sunge re nga: “Ani nga ga Mbori abadiasunge.” (1 Kor. 3:9) Ho ani amanga gu sunge ni nga ga aKristano, gere nga ani nga ga Yesu abadiasunge a. Oni tingidi gupai nga fuo Yesu zinahe fu gako abawiriki nga i ndu “ki sa arikaaboro dunduko ni abawiriki,” ko aya: “Mi na oni.” (Mt. 28:19, 20) Na ginipai tigaha du tipa amaraika? Ani na bakere tambuahe nga amaraika nangbembatayo furani ho ani andu ni ka takapandepa “nyenye pangbanga . . . fu agu yo dunduko naraka auru kpotosende”!—Yugo. 14:6.

15. Oni funga kpiapai rogo Baibiri yo nga gu nayugo gu nyanyakipa pai Yekova amangaha rogo gaani sunge tungusapai.

¹⁵ Ginipai gi undo naye furani ngbangbaturũ yo re aundo rani ani mangihe? Wa ani ami gu pangbanga nga ga Kindo, kura atungaha kinaho nati ku kpoto agu aboro yo nadiaha kugume na si ki sono. (Mt. 13:18, 23) Da du nasa gupai nga agu atunga nga ga rengo re sono na ki zuku? Yesu ape gupai nga boro ho rengbe kada ni pefuoko te kinagu ka ‘Bako gbe ni.’ (Yo. 6:44) Kpiapai kina rogo Baibiri yo tipa gipai re. Oni berẽnga pa gu regbo Pauro atungusipai fu badona nga ga adee rogo gu gbata nangia Firipoi. Baibiri nafura tipa guni sa dagbayo yo nangia Rudia ki ya: “[Yekova] ki za kpotori yo, ri di agu apai Pauro agumba ku gume.” (Amo. 16:13-15) Wakina Rudia, Yekova ima gbe dungu amirioni aboro.

16. Da si aida i fu taarimo funi tipa gu diabese du ani na ni gene tungusapai yo?

¹⁶ Da si aida ni gbia taarimo tipa gu diabese ani agbiaha gene tungusapai yo re? Pauro aima karagapai kuti gi sanahe re ho ko akepai ni tipa gu dungurati naadu Korinda yo ki ya: “Mi arũ he, Aporo ki nitudi he; ono Mbori nazugasi he. Si du tie watadu gu ni narũ he na gu ni natuda ha, he nga ni te; kina Mbori nazugasi he.” (1 Kor. 3:6, 7) Wakina Pauro, si naida ani fu taarimo ti aregbo dunduko fu Yekova tipa gu diabese du ani na ni gene tungusapai yo.

17. Wai du rengbe ani ka yugo gaani tambuahe tipa ‘mangasunge’ sa na Mbori, Kristo gbiati amaraika?

¹⁷ Wai du rengbe ani ka yugo gaani tambuahe tipa gu momu nga ga ‘mangasunge’ sa na Mbori, Yesu gbiati amaraika? Ani rengbe ka mangaha wo ni manga ani ai gupai rengbe omerani na ni tipa ka tungusa wene pangbanga fu kura aboro. Dungu agene duho rengbe ani ka manga gipai re ngbaha, wa gu nga ka tungusapai “gbayaga na nitangara bambu a.” (Amo. 20:20) Dungu aboro nagbia ngbarago ti tungusapai ti agu aregbo i ambakadanga tiyo ambakada tipaha ya. Ho i agbia gu boro ni i ainongo ni ya, i nafu sene funi ngba wene gene na ki asadi ka tona fugo na ni. Ka gu boro re karagapai wenengai, i nayugo gu pangbanga nga ga Kindo funi rogo birĩ yo.

18-19. (a) Wai du ani atuda tunga rengo? (b) Oni furanga tipa gu pangbanga nayugo wai Yekova aundo kura bawiriki Baibiri sa.

 ¹⁸ Wangia ani “ga Mbori abadiasunge,” si aidanga ani naarũ kina rũrũ tunga rengo sa te ono si naida ani naatudaha atuda a. Ka boro yugu nyemupai, si naida ani mangi ome ka ndu berewe ka bi ni, watadu ka manga mbakadapai na gu kura boro ni ndu ka bi gu boro re na gu sasa nga ga tona wisigo Baibiri na ni. Wa gu wisigopai re nikaa ndu kumbatayo, ani nadu na ngbarago ka bi wai Yekova aundo gu bawisigi Baibiri re tipa ni mangi ariapai ti gu gene ni aberã ngbaha na gu gene ni abi apai ngbaha.

¹⁹ Oni bingo gu kpiapai nangia ga Raphalalani, nangia binza South Africa yo. Ko aima kpinyemu gupai ko aawirikaha rogo Baibiri yo. Ono si aima du ni kere kpakarapai fuko ka ida kuti gupai Fugo Mbori agumbaha tipa fura na agu atitase naima kpiko. (Pa Rug. 18:10-12) Tooni tooni, ko ambu Mbori ko naamanga ariapai ti gu gene ko aaberã ngbaha. Wa regbo aasusa, ko ambu sunge abinza wa si avura du vurũ nga si nangia guhe nanaaye na marã fuko. Raphalalani, du garãko awere nga 60 aya: “Mi na bakere tambuahe tipa wai aDezire Yekova naundo re rogo dungu agene yo, wa gu nga ka undo re mi gbia sunge marã. Gu susi gbe nga, mi na bakere tambuahe fu Yekova tipa wai ko naundo re mi mangi ariapai rogo gimi raka yo, mi awere na rengba ka tungusapai ni gu Dezire Yekova naima zio bapatiza.”

20. Ginipai mo nadiberã ka mangaha?

²⁰ Rogo gi kekeapai re, ani ima wirikapai tipa aũkumuko biama ka ani abingo ho ya. Gu paha nanyaki kisusi gbe dagbaha yo nga gu momu nga ga du na mbembedi pabakure na Yekova. Ho ani ada ni ni mbembedi abakurea Yekova, ani rengbe ka gbia undo ti gu kura aũkumuko ani abingo ho ya wa kparakpee, gbia gu undo nga ga ziazia toro, na gbia gu undo naye ngbangbaturũ yo furani ti ngba gaani sunge tungusapai. Ani dinga berã adia ka kiiso gaani tambuahe tipa agi aũkumuko ka ani abingo ho ni bangirani re ya. Na si naida ani naafu tambuahe fu Yekova ti aregbo dunduko tipa padu ko ni wene bakure.