1. Ginipai si aida boro mangihe mbata fu ni tona ka dua bambu?

MO BERẼNGA gupai nga boro diberã ka dua bambu. Ni ima ino gu ngbatunga bambu ni aida ka duaha. Ya mo ni rengbe ka ndu nibasa ku babagaahe yo tipa ka ngbeka ahe na ki tona duaha? Oó. Mbata fu ni tona duaha, nyanyakipa pai kina ho si aida ni mangihe—nga ka ino bakio gu marã si nika diaha. Tipagine? Bambiko si naida ni ini singia gu marã du be ni anyasa sunge gu bambu re. Ka si du nga ni ima wisigo pa gu marã wenengai si nika diaha mbu regbo ko yo, si nangera wa ni nika duadu na diabese ka nyasa sunge gani vovo bambu.

2. Ringbisihe kuti Ruka 14:27-30, ginipai si aida mo berẽkuriihe wenengai mbata fu zio mo bapatiza?

² Ya mo ga nyemuse tipa Yekova na gu tambuahe du mo na ni tipa ko fõngbaduroyo mo berẽpa zio bapatiza? Ka ngia wo duhe, si naida mo mangi diaberã wakina ga gu kumba naida ka dua bambu re. Tipagine rengbe ani ka pehe ti ni wo? Ani makianga agu afugo Yesu du rogo Ruka 14:27-30. (Oni gedihe.) Yesu aasakapa gupai si aidaha tipa boro da ni gako bawiriki. Tipa ka du ni gako bawiriki, si naida ani du na nyemu ‘ka geda pa’ agu akpakarapai si akodaha na agu apai ani ambupaha. (Rk. 9:23-26; 12:51-53) Mbata fu mo zi bapatiza, si naida mo berẽ wenengai gbe kurii agu apai si akodaha. Si du mo nika mbakada tiro ti ni wenengai ka iriso Yekova niruru ro ni gu Kristano naima zio bapatiza.

3. Ginipai ani nika sakapai tipaha rogo gi kekeapai re?

³ Ya mo pa da ni ga Kristo bawiriki ima nyaka kisusi agu apai si aida ani mbupaha? Ii, paha ima nyaka! Bapatiza nazaka gene tipa dungu amaku awere na gu du kumbatayo. Ani sakingo pai tipa bete nyanyakipa asanahe nibipa bapatiza. Manga mo ho wo  nika undoro mo karagapai kuti gu sanahe nga, “Ya mo mi ima rẽ tipa ka zio bapatiza?”

4. (a) Ginihe nga kparatise? (b) A wa i napehe rogo Matayo 16:24, ginipai pa ‘mbu’ boro kura gani apai ayugoho?

⁴ Ginihe nga kparatise? Mbata fu mo zi bapatiza, mo du wa ka mo mangi kparatise. Ho mo amanga kparatise ni, mo namanga kparakpee fu Mbori kina boro ngbaduroyo na ki pe gupai fuko nga mo nika mangasunge na gamo raka ka irisoko nyeanye kindi. Ho mo akpara tiro ni fu Mbori, mo ‘nambú’ pa kura gamo apai. (Oni gedi Matayo 16:24.) Mo nada ni ga Yekova boro, nga gupai du ni bakerepa momu. (Rom. 14:8) Mo nape gupai fuko nga tona awere ka ndu kumbatayo, mo nika maaberã ro gbe tipa agu apai ko akpinyemuhe angianga gu mo akpinyemuhe ya. Gamo kparatise fu Mbori nga kidohe—nga gu kidohe mo namangihe fuko na kpotoroyo dũ. Yekova amanganga rani ngbaome ani mangi ngbatunga gu kidohe re te. Ono ho ani amangaha ni, ko naida ani digisihe adigiso.—Tam. 116:12, 14.

5. Waigu du kparatise na ngbanya dagbaha na bapatiza?

⁵ Waigu du kparatise na ngbanya dagbaha na bapatiza? Gamo kparatise nga gupai kina ro amangaha ho du mo ni nisaro; si dagbaro na Yekova. Bapatiza nga gupai boro amangaha gbaiga kubara bangiri aboro, gbe ti regbo gu bakere dunguratise nga ga uru sa watadu ga aˈuru biata. Ho mo azio bapatiza ni, gure nga mo nayugoho fu aboro nga mo ima kpara gamo raka fu Yekova. * Gamo bapatiza nayugo gupai fu aboro nga mo ima kpinyemu Yekova gamo Mbori na ngbaduroyo dũ, na mbisimoro dũ, na berãro dũ, na omero dũ na mo ima diaberã ka irisoko nyeanye kindi.—Mk. 12:30.

6-7. Ringbisihe kuti 1 Petero 3:18-22, gini nduapai duho ue du bapatiza ti ni na nyanyakipaha?

⁶ Ya mo si naida aida nzunzu boro zi bapatiza? Ani makianga agu afugo du rogo 1 Petero 3:18-22. (Oni gedihe.) Kina wai kurungba adu ni gu gopai naayugo pa ga Noa idapase, kina wo a du gamo bapatiza ni gu gopai nayugo gamo kparatise fu Yekova. Ono ya mo si naida aida nzunzu boro zi bapatiza? Ii, si naidaha aida. Petero ape ndu gupai si aidaha ti ni wo. Bambatapai nga, si “nabatasa roni.” Bapatiza ima rengba ka batasa rani ka si du nga ani ima manga agu adiandue si aidaha tipa ka yugo gupai nga ani na idapase kuti Yesu na ani ima ida kuti gupai nga ko akpi tipa rani, na ki zingi be kpio, ki ga ku ngbangbaturũ yo, na ko awere “pati kumbabe Mbori.”

⁷ Uepai nga, bapatiza nasa gupai nga boro du na “wene sangba kpotoyo.” Ho ani akpara gaani raka ni fu Mbori na ki zi bapatiza, ani narimo ku rogo kparakpara pagume na ko. Mbiko gaani ndikidi saberã, na gaani idapase kuti motumo tumorii, Mbori nambupai furani ti gaani aingapai. Rogo gi gene re, ani ima rengba kadu na wene sangba kpotoseyo barabangiri Mbori.

8. Ginipai si aida si du nga gu ndupai sa ro mo diberã ka zio bapatiza?

⁸ Gini nduapai si aida mo diberã ti ni ka zio bapatiza? Ni sangbana gamo wene wisigo Ziazia Kekeapai, mo ima wirika badungu apai tipa Yekova—gako asino na gako agene mangaapai. Agu apai mo nawirikihe tipa ko ima zio ngbaduroyo na ki sa ro mo kpinyemuko ni bakerehe gbe. Gamo nyemuse tipa Yekova si aida si du nga gu bambata ndupai sa ro mo diberã ka zio bapatiza.

9. A wa duhe rogo Matayo 28:19, 20 ginipai pa zio bapatiza ku rogo rimo Ba na Wiri na ziazia toro ayugoho?

⁹ Gamo diaberã ka zio bapatiza naru a riimburu agu arengo nga ga Ziazia Kekeapai mo naidi kutini. Ani makianga gupai Yesu  apehe ho ko afu gu zinahe ni nga ga sa aboro ni abawiriki. (Oni gedi Matayo 28:19, 20.) Ringbisihe kuti Yesu, si naida agu aboro nazio bapatiza zihe “rogo rimo Mbori nga Ba na Wiri na Ziazia Toro.” Gipai re nayugo ginipai? Mo du wa ka mo idi na ngbaduroyo dunduko kuti agu arengo nga ga Baibiri du tipa Yekova; wiriko nga Yesu; na ziazia toro. Agi arengo re na bakere ome ti ni na si ima rengba ka zio ngbaduroyo wenengai. (Eb. 4:12) Ani fugungo bete agu arengo re.

10-11. Gini arengo tipa Ba mo nawirikihe na ki idi kutini?

¹⁰ Mo berẽnga pa agu aregbo kusayo mo awiriki agu arengo du tipa Ba: Rimoko “nga Yekova,” ko nga “gu Ko nga Bahe ki susi auru kpotosende dunduko,” na kina ko sa nga “ndikidi Mbori.” (Tam. 83:18; Yere. 10:10) Ko nga Bakusirani, na “bata kina be Yekova.” (Tam. 3:8; 36:9) Ko ima manga mbakadapai tipa ka batasa rani be ingapai na kpio na ko ima fu gu maabangirise furani nga ka raka nyeanye kindi. (Yo. 17:3) Gamo kparatise na bapatiza nika yugoho nga mo nga Dezire Yekova. (Yes. 43:10-12) Mo nika da ni papara agu aborokporo nga airisimbori du rogo zegino dunduko nga aguyo du na ngbarago kadu na rimo Mbori riyo na kini yuguhe fu kura aboro.—Tam. 86:12.

¹¹ Nairiwo gu riko momu ngaha ka giarogo agu ayugopai yo du tipa Ba! Ho mo aidapa gi wene arengo re ni, kpotoroyo nafõ ro mo kpara gamo raka fu Yekova na ki zi bapatiza.

12-13. Gini arengo tipa Wiri mo nawirikihe na ki idi kutini?

¹² Gamo bipai angia gine ho mo awiriki agi arengo ni du tipa Wiri re? Yesu nga gu ue kikiipa boro rogo haurago. Ko nga Batumorirani. Ko afu gako unga tipa rani ni nyemuhe. Ho ani ayugo gupai ni rogo gaani mangaapai yo nga ani na idapase kuti ga Yesu motumo, Mbori ima rengba ka mbupai furani ti gaani aingapai, na ani kidu na wene pabakure na ko, na ani ki gbia nyenye unga. (Yo. 3:16) Yesu nga gaani Gbiamotumo. Ko naida ka undo rani ani gbia undo ti gako motumo na kidu na wene pagume na Mbori. (Eb. 4:15; 7:24, 25) Wangia Yesu Bakindo ga Mbori Kindo, vurube ko du Mbori nika ziasi Rimoko na ki digisi gbegberẽ apai na ki ye na nyenye amaku ku rogo gu Paradizo nika ye. (Mt. 6:9, 10; Yugo. 11:15) Yesu moi wene kpiapai furani. (1 Pet. 2:21) Ko amoi kpiapai furani nifu ko tiko ka manga gupai Mbori akpinyemuhe.—Yo. 4:34.

¹³ Ho mo aidapa agu apai ni Ziazia Kekeapai ayugoho tipa Yesu, mo naye ka kpinyemu gi Wiri Mbori ko nakpinyemuko re ni bakerehe gbe. Gu nyemuse re nafõ ro mo mangisunge na gamo raka ka manga gupai Mbori akpinyemuhe wa gu Yesu amangihe. Ni sangbana gipai re, si nasa ro mo kpara gamo raka fu Yekova na ki zi bapatiza.

14-15. Gini arengo mo nawirikihe tipa ziazia toro na ki idi kutini?

¹⁴ Ginipai mo aberẽhe ho mo awiriki agi arengo ni du tipa ziazia toro re? Si nga boro te, ono si nga ga Mbori zaaza ome mangaapai. Yekova amangisunge na ziazia toro si du kugii agu aboro nake Ziazia Kekeapai na si naundo rani a ani girogo agu apai yo ani agedaha rogo Ziazia Kekeapai na kini mangipai kutini rogo gaani raka yo. (Yo. 14:26; 2 Pet. 1:21) Yekova nafu “gu bakere tandu susi” furani vurube ziazia toro. (2 Kor. 4:7) Ziazia toro nafu ome furani ani tungusi wene pangbanga, ani sovura kuti aˈasada, ani sovura kuti gberãrago, na ani dibe akpakarapai. Si naundo rani ani yugu gu wene asino nga gu nakusa “zuzu Toro.” (Gara. 5:22) Mbori nafu gi gako toro re fu agu aboro nakido kuti ko na kini sanako tipaha.—Rk. 11:13.

¹⁵ Nairiwo wai duhe nipa wasa ka ino gupai nga airisi Yekova ima rengba ka kido kuti ziazia toro tipa si undo yo i irisi Mbori! Ho mo adia gu rengo ni kugume mo nawirikihe tipa  ziazia toro, si nika fõngbaduroyo mo kpara tiro fu Mbori na ki zi bapatiza.

16. Ka da ku ane, ginipai ani nawirikihe rogo gaani sakapai yo?

¹⁶ Mo namanga nyanyakipa diandue ho mo adiaberã ni ka kpara gamo raka fu Mbori na ki zi bapatiza. A wa ani nawirikihe, mo du wa ka mo idi agu apai dunduko si akodaha—akpakarapai na agu apai mo nika mbupaha. Agu amaku mo nika gbiaha ima kio kisusi agu apai mo nika mbupaha. Bapatiza rengbe arengba ka batasa boro, na si nasa boro ni du na wene sangbakpotoseyo barabangiri Mbori. Gamo diaberã ka zio bapatiza du wa ka si ru riimburu gamo nyemuse tipa Yekova Mbori. Si naida mo idi kuti agu arengo mo nawirikihe tipa Ba, Wiri, na ziazia toro na ngbaduroyo dũ. Wa ani nawisigipai tipa agi apai re ki da ku ane, wai gu rengbe mo ka karagapai kuti gu sanahe nga, “Ya mo mi ima rẽ ka zio bapatiza?”

17. Gini bete adiandue duho nandu na boro sa zio bapatiza?

¹⁷ Ka si du nga mo nabihe nga mo ima rẽ tipa ka zio bapatiza, zanga kapa, mo ima manga badungu adiandue tipa ka sonosa wene pagume dagbaro na Yekova. * Ni sangbana gamo wisigo Ziazia Kekeapai dedede, mo ima ye ka inopai tipa Yekova na Yesu ni bakerehe. Mo ima sonosa idapase a. (Eb. 11:6) Mo ima du na kido kuti ga Yekova akidohe du rogo Ziazia Kekeapai yo na ngbaduroyo dũ, na mo ima ida kuti gupai nga gamo idapase kuti ga Yesu motumo rengbe arengba ka batasa ro be ingapai na kpio. Mo ima saberã ti gamo aingapai; na ki bira tiro tipa agu aingahe mo amangihe, na ki sana Yekova ko mbupai foro. Mo ima sa gamo raka; ki mbu gu gbegberẽ gene raka mo anaarakaha mbata na ki tona ka raka ngba gu gene nasa ngbarago ti Mbori. (Amo. 3:19) Mo na nyemu ka pepa gamo idapase fu kura aboro. Mo ima rẽ kada ni gu batungusipai ata ziongo bapatiza ya na ki tona tungusapai na dungurati. (Mt. 24:14) Yekova na bakere ngbarago na mo tipa gu wene adiandue mo namangihe re. Mo ima ye na bakere ngbarago ku kpotokoyo.—Snz. 27:11.

18. Gini kura apai berewe si aida mo mangihe mbata fu zio mo bapatiza?

¹⁸ Mbata fu mo zi bapatiza, bete apai kinaho si aida mo mangihe. A wa ani niwirikihe mbata, mo du wa ka mo kpara gamo raka fu Mbori. Mo kusuko kpotoroyo fuko ho du mo ni nisaro rogo kparakpee yo, na ki kidoko nga mo naida ka mangasunge na gamo raka ka manga gupai ko akpinyemuhe. (1 Pet. 4:2) Sidu, si naida barii gu rondo nga ga abaakumba ini gupai nga mo naida ka zio bapatiza. Ko nika pehe fu kura abaakumba i ye fuoro. Ka mo gunde nga ho i nika ye ni fuoro ya. Zanga kapa, gi wene awirina re ima ino ro na i nakpinyemu ro akpi. I nika fugö gu bangua arengo na mo nga ga Ziazia Kekeapai nga gu mo nawirikihe. I naida ka ino gupai nga mo ima giarogo agu ayugopai  yo re na mo ima rugatiro na nyakapa kparatise na ki zi bapatiza. Ka si du nga i ima ida gupai nga mo ima rẽ, i nika pehe foro nga mo rengbe arengba ka zio bapatiza ti gu bakere dunguratise naye nga ga uru sa watadu ga aˈuru biata.

19-20. Ginipai mo nika mangaha tifuo zio mo bapatiza, na waigu rengbe mo ka mangaha?

¹⁹ Tingbafuo zio mo bapatiza ginipai si nika ida mo mangihe? * Mo tingidi gupai nga kparatise nga kidohe na Yekova naida gupai nga mo digisihe adigiso. Tifuo gamo bapatiza, si naida mo raki ringbisihe kuti gamo kparatise. Waigu rengbe mo ka manga gipai re?

²⁰ Mo du mbembedi na dungurati. Wangia mo gu Kristano naima zio bapatiza, mo awere nga papara gu riigbu nga ga “awirina.” (1 Pet. 2:17) Agu awirinamo nga akumba na adee du rogo dungurati nga gamo aborokporo nga ga toro yo. Mo nika nyakasa gamo pagume na yo ni ye mo kupati adunguratise dedede. Mo nigedi Fugo Mbori na kini berẽkuriihe na aˈuru dũ. (Tam. 1:1, 2) Fuo geda mo pai rogo Ziazia Kekeapai yo, mo di regbo ka berã dudunguro kurii gupai mo nagedihe re. Sidu, afugoho nika zio ngbaduroyo wenengai. Mo “nikpari” dedede. (Mt. 26:41) Gu gamo akpee naye kina boro ngbaduroyo nika mbedisa ro na Yekova. ‘Mo gbáta gako ngbi mbata.’ (Mt. 6:33) Mo rengbe ka manga gupai re ni maa mo sunge tungusapai ni bambatapai rogo gamo raka yo. Ni tungusa mo pai dedede, mo nika nyakasa gamo idapase, na mo ima rengba ka undo kura aboro i du ngba gene nyenye unga.—1 Tim. 4:16.

21. Gamo bapatiza nika zakagene foro tipa ginipai?

²¹ Gamo diaberã ka kpara gamo raka fu Yekova na ki zi bapatiza nga nyanyakipa diaberã kisusi. Rengo du nga apai kinaho si akodaha. Ya mo amaku ho mo nika gbiaha ti mangaha wo? Ii amaku kinaho! Ai agu arungo mo nika gbiatiro na ni rogo gi kuru zegino re ‘ni aakpura ha na si nanye ngbutuko.’ (2 Kor. 4:17) Ono gamo bapatiza tigaha, nika zaka gene foro tipa bawene raka awere na “ndikidi unga” kumbatayo. (1 Tim. 6:19) Sidu, mo berẽ wenengai gbe na ki mangi kparakpee tipa gu gamo karagapai du kuti gu sanahe nga, “Ya mo mi ima rẽ ka zio bapatiza?”