1-2. (a) Ringbisihe kuti AEfeso 6:16, gini ndupai ani aida ti ni na gu “vurakube nga idapase”? (b) Gini asanahe ani ka sakapai tipaha?

YA MO gu “vurakube nga idapase” bero? (Oni gedi AEfeso 6:16.) Zanga kapa, si kina bero. Wakina gu vurakube nabanda dungu abarapa boro, gamo idapase nabanda ro be gu gbegberẽ apai du rogo gi zegino re, wa gu nga wasiwasi mangaapai, zuu, gbiati agu apai dunduko adunga na ngbanya dagbaha na gupai Yekova akpinyemuhe ya.

² Ono tie, ani naraka ti “kusa rago” watadu yangara arame, na gaani idapase nikaa duadu kindi ni asadiasadihe. (2 Tim. 3:1) Waigu rengbe mo ka wisigo gamo vurakube nga idapase tipa ka bihe singia si ni nyanyakihe? Na ginipai rengbe mo ka mangaha tipa ka zada gamo vurakube nyanyaki? Ani sakingo pai tipa agu akaragapai du kuti agu asanahe re.

3. Ginipai abanzengere anaamangaha na gayo avurakube, na tipagine?

³ Ti agu aregbo i aakeka Ziazia Kekeapai ti ni, abanzengere anidu na vurakube dedede nga gu naanidu na kpoto ti vuroho. Abanzengere anaabe avurakube na nzeme tipa ka banda gu kpoto naanidu ti ni na ka banda gu kura apaparaha naanidu rogo marã yo tipa ka si denga zaza ya. Ho banzengere anibi gupai ni nga gani vurakube ima gberã, ni anaamanga ome tipa i mbakadihe tipa wa ka ni rengbe kadu ti aregbo dunduko regerege tipa gu kura vura. Ginipai gi kpiapai re ayugoho foro tipa gamo idapase?

4. Tipagine si aida mo naawisigo gamo vurakube nga idapase ti ni, na waigu si aida mo mangihe?

⁴ Wakina agu abanzengere naadu bakuru kusayo, si naida mo  naawisigo gamo vurakube nga idapase dedede na kini ngerefuoho tipa gupai nga kadu regerege ti aregbo dunduko tipa vura. Wangia ani aKristano, ani naso gu vura nga ga toro, na avurarani nakoda gbegberẽ atoro. (Ef. 6:10-12) Boro ho rengbe ka ngerafuo gamo vurakube nga idapase foro te. Ginipai rengbe mo ka mangaha tipa gupai nga gamo idapase du nyanyaki ho mo agbia tiro ni na aˈasada? Bambatapai nga, si naida mo mangi kparakpee tipa ga Mbori undo. Fuo gure, si naida mo mangisunge na Fugo Mbori tipa si undo ro mo naabi tiro wa gu Mbori abi ro. (Eb. 4:12) Ziazia Kekeapai naya: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya.” (Snz. 3:5, 6) Na gupai re berãseyo, mo berẽnga pa pai nga gu si narengbe kadu nga si amangi ro bambeda kusayo gbiati gupai mo amangihe tipaha. Ni kpiapai, ya mo mo agbia tiro na bakere zingo marã? Ya mo gu ga Yekova kidohe du rogo AEbere 13:5 nga gu naya: “Mi ahe nga unda ro wa sa te, mi ambú nga ro a wa sa te,” aye ku berãro yo? Ya mo gu kidohe re afu gu kido foro nga Yekova nika undo ro aundo? Ka ngia wo si amangi, gure nayugo gupai nga mo nabanda gamo vurakube nga idapase wenengai.

5. Ginipai rengbe mo ka bihe ho mo awisigo gamo idapase ni?

⁵ Gupai mo abihe ho mo awisigo gamo idapase ni wenengai ima rengba ka iriwo tiro. Mo ima rengba ka bi arungbura nga gu mo aainongo paha ya. Ni kpiapai, mo ima rengba ka bi gupai nga bakere bakabangirise, aziree, gbiati gberãrago ima gbarasapa gamo idapase. Ka si du nga pai wa gure ima manga ro, waigu rengbe mo ka banda gamo idapase tipa gupai nga ka paha gberẽnga berewe kumbatayo ya?

6. Gini akpiapai duho nga ga wene abakabangirise?

⁶ Kura ngbatunga abakabangirise kinaho ngba angba. Ni kpiapai, si ngba angba ani naabakabangirani tipa pa fu ngbarago fu aYekova na Yesu. (1 Kor. 7:32) Ka ani mangi kere ingapai, ani nadu rogo bakabangirise tipa mbakada gaani pagume na Mbori. (Tam. 38:18) Ani nabakabangirani a tipa fu ngbarago fu gaani badiarogatise na tipa ngerafuo gaani aborokporo gbiati akuarani aidipase.​—1 Kor. 7:33; 2 Kor. 11:28.

7. Ringbisihe kuti Asanza 29:25, tipagine si aidanga ani naagunde ti ni be aboro ya?

⁷ Ono tie, bakere bakabangirise ima rengba ka gbarasapa gaani idapase. Ni kpiapai, ani ima rengba kaa bakabangirani ti aregbo dũ tipa du na bakere riahe gbiati aroko. (Mt. 6:31, 32) Sidu, tipa ka dia gu bakabangirise re kusayo, ani ima rengba kaa maaberã rani gbe tipa gbia aũkumuko. Zavura ani ima rengba ka sonosa nyemu marã. Ka ani mbu gupai re si mangi rani, gu idapase du ani na ni kuti Yekova ima rengba ka rungbura na gaani pabakure na ko ima rengba ka gberã. (Mk. 4:19; 1 Tim. 6:10) Watadu ani ima rengba kaa bakabangirani ni kerehe nibipa gupai aboro aberãha tipa rani. Fuo gure, ani kini tona kaa gunde tipa pa sawia aboro rani watadu rungosi aboro rani kisusi wai ani agunde be gupai nga ga ba gberãrago ti Yekova. Tipa ka bandatirani be gu kerepai re, si naida ani zungodi Yekova tipa ko fu gu idapase gbiati wingbaduse ani aidaha tipa gupai nga ka ani naagundenga be aboro ya.​—Oni gedi Asanza 29:25; Rk. 17:5.

8. Waigu si aida ani mangipai kuti aziree?

⁸ Satana nga guko du ni iraziree kidu ni ‘baha’ namangasunge na agu aboro du kutiibe ko tipa ka gbandaka aziree tipa Yekova na tipa awirinarani. (Yo. 8:44) Ni kpiapai, abasamungu kuti ndikidi pambori nakusa aziree na kini aria agu arengo du tipa ga Yekova riigbu, i namanga gipai re rogo abangiriba nga ga Internet, rogo terevizioni, na rogo kura aũgbandaka apangbanga. Agu aziree re du dagba ga Satana ‘asiida we’ yo. (Ef. 6:16) Ginipai rengbe ani ka mangaha ka boro tona kaa peka aziree furani tipa ngbatunga apai wa gure? Si naida ani ká ka degaturani fu ni!  Tipagine? Bambiko ani ima du na idapase kuti Yekova na ani ima du na kido kuti awirinarani. Nirengo, si aidanga ani naasakapai na abasamungu kuti ndikidi pambori te. Si aidanga ani tikango na yo tipa ai wiripai kandara tooni te, ka si vura du vurũ gbua nga, ani nakpinyemu ka rugatirani na gupai i agumbaha.

9. Ginipai rengbe gberãrago ka manga rani na ni?

⁹ Gberãrago ima rengba ka rungburasi gaani idapase. Ti kura aregbo, ani ima rengba kadu rogo gberãrago mbiko agu akparakapai ani agbia tirani na ni. Na rengo ngaha nga, si aidanga ani zanga berãpa agi akpakarapai re te. Ono tie, si aidanga ani naaberã kurii gaani akpakarapai ti aregbo dũ te. Ka ani aaberã kina kurii gaani akpakarapai ti aregbo dũ, si ima rengba ka sa rani bangirani go ti gu bawene maabangirise Yekova nafuhe furani. (Yugo. 21:3, 4) Gberãrago ima rengba ka rungburasi rani na ki sarani ani mbu iriso Yekova. (Snz. 24:10) Ono si aidanga gupai re mangi rani te.

10. Ginipai mo awirikaha ti gu waraga kura wirina sa akehe?

¹⁰ Oni bingo wai wirina Amerika yo angerafuo gari idapase ti kina gu bangisa regbo ri angerafuo kumbari nga guko du na kere kaza. Ri ake waraga fu riibasunge ki ya: “Ti kura aregbo, gaani kpakarapai ninaasa gupai nga ani du ni fudifudi rani berãraniyo na kidu rogo gberãrago, ono gaani maabangirise ni nyanyakihe. Mi na bakere tambuahe tipa agu apai dunduko Yekova afuhe furani tipa si nyakasi gaani idapase na ki ngarasi rani. Nirengo, ani naida agi arugute re aida. Si naundo rani ani naairiso Yekova kindi, na ani hi agu aˈasada Satana amangasunge na ni ka rungburasi rani.” Ani nawirika gupai ti afugo gi wirina re nga ani ima rengba ka diabe gberãrago! Waigu rengbe ani ka diabehe? Mo tingidi gupai nga gamo akpakarapai nga asada be Satana. Mo du na gu kido nga Yekova nika fu wasa afu foro. Na mo du na tambuahe tipa gu riahe nga ga toro ko afuhe.

11. Gini asanahe si aida ani sana tirani na ni tipa ka bihe singia gaani idapase ni nyanyakihe?

¹¹ Ya mo mo nabihe nga abangiriba kinaho ti gamo vurakube nga idapase si aida mo mbakadihe? Vuru gu bete adiwi yo susi kusayo, ya mo mo adu na rengba ka mbu bakere bakabangirise? Ya mo mo aká ka degaturo fu abasamungu kuti ndikidi pambori na ka zanga tikango na yo nibipa agu aziree i agbandakaha? Na ya mo mo adu na  rengba ka diabe gberãrago? Kangia wo si adu, gure nga gamo idapase ni wenehe. Ono si naida ani du na rubangirise bambiko gupai nga kura aũvura kinaho be Satana nga gu ko aˈasada ka mangasunge na ni kuti rani. Ani sakingo pai tipa ũvura sa dagba agu aũvura re.

12. Ginipai rengbe nyemu aũzegino ka sarani ani mangihe?

¹² Nyemu aũzegino ima rengba ka gbeberã rani kusayo na ki sarani ani mbupa gaani idapase. Gu mokedi nangia Pauro aya: “A nga banzengere navoda tini na pa gi unga re ho du ni ni ti ngba vura wa sa te; ni ngba bangiri gu ni nasia ni ni du ni banzengere.” (2 Tim. 2:4) I anaaidanga ha fu agu abanzengere nangia ga Roma yo i naamangasunge bagaahe te. Ginipai naanirengbe ka manga ka si anidu nga banzengere ká ka mangapai kuti gu ndiko re?

13. Tipagine si anaaidanga ti ni banzengere rimisi tini ku rogo sunge bagaahe yo ya?

¹³ Oni berẽnga kurii gipai re. Badona nga ga abanzengere naraba tiyo tipa vura na gayo abasape wiso, ono gu kurani sa dagbayo yo ho te. Gu banzengere adunga ho re ya ti gani gbata yo nabaga riahe. Agu abanzengere re di regbo nyemu kaa wisigo gayo aũvura na kini terẽ gayo abasape. Ono guni nabaga riahe di regbo kaa manga riahe nga gu ni nika bagaha rogo gu uru ngbefuo gure. Ono tie, fuo giro rago, avura agu abanzengere re ye ka zubo yo ka i ainongo ya. Gini banzengere dagba agu abanzengere yo re nika du regerege tipa vura na nika fu ngbarago fu gani barutiriivura? Na ka si du nga mo ba sovura yo, mo idi ka ru pati gu banzengere kura apai naima gbe berãrani kusayo, watadu pati agu abanzengere naima mbakadatiyo regerege tipa vura?

14. Ginipai ani abihe na nyanyaki paha wangia ani ga Kristo abanzengere?

¹⁴ Wakina wene abanzengere, he agbenga berãrani kusayo ti gaani nyanyakipa sásá du nga ka sa ngbarago ti gaani Abarutiriivura nga aYekova na Yesu te. Ani nabi gu sásá re na nyanyakipaha kisusi ai guhe rengbe ga Satana zegino ka fuhe furani. Ani na gu regbo gbiati ome berani ani aidaha tipa ka mangasunge fu Yekova na ka ngerafuo gaani vurakube nga idapase gbiati gu kura gaani aũvura nga ga toro tipa gupai nga si du ni wenehe.

15. Gini zahe Pauro afuhe furani, na tipagine?

¹⁵ Si naida ani du na rubangirise ti aregbo dũ!  Tipagine? Gu mokedi nangia Pauro afu zahe nga “agu yo nakpi nyemu ka kumuko,” i nika ‘inga ainga ti idapase.’ (1 Tim. 6:9, 10) Gu fugo mangiyo sunge na ni nga ‘ainga ainga’ nayugo gupai nga, ani ima rengba ka tona gbeberã rani kusayo ni tona ani kaa dungura agu aũkumuko adunga ani na zingoho ya. Fuo gure, ani kini sonosi “dungu mumungo gbegberẽ nyemuahe.” Kuba gupai nga ka mbu gu nyemuapai re si rimi ku ngbaduraniyo, si naida ani tingidi gupai nga, Satana namangasunge na agu aũvura re tipa ka rungburasi gaani idapase.

16. Si naida gu pangbanga du rogo Marako 10:17-22 fõngbaduraniyo ani berẽkurii gini asanahe?

¹⁶ Si ima rengba kadu nga marã kina berani rengbe arengba tipa ka ngbeka dungu ahe na ni. Ya mo gbegberẽpai du ngaha ka ani ngbeke agu ahe ani aidaha ono nga gu adunga ani na zingoho ya? Si arengbanga kadu ni gbegberẽpai te. Ono mo berẽnga kurii agi asanahe re: Ka si vura du nga ani ima rengba ka ngbe kurahe, ya mo ani nzunzu na gu regbo gbiati ome si aidaha berani tipa ka mangasunge na guhe re na ka bandaha? Berewe a, ya mo ani rengbe ka tona kaa kpinyemu gaani ahe kisusi? Ya mo gaani nyemuse tipa gaani ahe rengbe ka sarani ani du wakina gu paranga kumba naká ga Yesu yambahe tipa ka mangasunge gbe fu Mbori? (Oni gedi Marako 10:17-22.) Nairiwo wai duhe furani ni bawenepai ka raka taata raka na kini mangisunge na gaani regbo gbiati ome tipa ka manga gupai Mbori akpinyemuhe!

17. Ginipai si aidanga bangirani go ti ni ya?

¹⁷ Ka bangirani gonga ti gupai nga ani nasovura na si naida ani du regerege kaa so gu vura re na aˈuru dũ ya. (Yugo. 12:17) Ka awirinarani tindinga gaani vurakube nga idapase furani te. Ani nitirani si aida ani zadihe nyanyaki.

18. Tipagine agu abanzengere naadu bakuru kusayo anaazada gayo avurakube ti ni nyanyaki?

¹⁸ Bakuru kusayo, banzengere anaagbia taarimo agbia ho ni anidu ni ngangarã ba vurayo. Ono ka ni anikaraga tini ku kporo yo zanga gani vurakube, ka si anidu ni pa zee funi. Bakeke kuru apangbanga nangia Tacitus akepai ki ya: “Ka banzengere animbu gani vurakube sayo, ka si anidu ni bakere pawasiro kisusi.” Gure nga ndupai sa abanzengere anaazada gayo avurakube ti ni nyanyaki.

19. Waigu rengbe ani ka zada gaani vurakube nga idapase nyanyaki?

¹⁹ Ani nazada gaani vurakube nga idapase nyanyaki ni du ani pati agu adunguratise nga ga aKristano dedede na ni fura ani fu aboro tipa rimo Yekova gbiati gako Kindo. (Eb. 10:23-25) Berewe a, ani nazadaha nyanyaki ni geda ani Fugo Mbori na aˈuru dũ na kini mangi kparakpee fu Yekova tipa ko undo rani ani naamangapai kuti gupai ani agedaha rogo agu apai yo dũ ani amangaha. (2 Tim. 3:16, 17) Ka ani mangihe wo, ũvura ho Satana nika ye na ni kuti rani nika ye na nyenye imisiri te. (Yes. 54:17) Gaani “vurakube nga idapase” nika banda rani abanda. Ani nika ruaru nyanyaki, kini mangisunge ngangarã na awirinarani. Ani nika diabe gu vura ani asoho na aˈuru dũ tipa ka banda gaani idapase ni nyanyakihe. Na gu nyakipaha anyaka gbe nga, ani nika du na gu momu berani nga ga du ku bara Yesu yo ho ko nika dia ni be gu vura ko nika soho kuti Satana gbiati apefuoko.​—Yugo. 17:14; 20:10.