Ya mo mo agedinga agu aNgbaõbambu Sinziri kuru barambeda kusayo? Mo bingoho singia mo rengbe ka karagapai kuti agi asanahe re:

Gini gopai duho rogo Ziazia Kekeapai yo nayugo gupai nga Mbori na nunga rani tiko?

Ho agu aYisaraere naadu mbata adu ni ni akanga Ezipeta yo, Mbori aima inopa gu imisiri i adu rogoho na ko ki moi tiko ku rogo gayo aigirã. (Gate 3:7; Yes. 63:9) I akusi rani rogo kpia Mbori yo, na ani ima rengba kadu na nunga tirani. Nunga rani kina tiko zavura ho ani narengbe ka berãha ni nga ani arẽnga na gako nyemuse te.—wp18.3, kpe. 8-9.

Waigu ga Yesu ayugopai aundo aboro i dibe gupai nga kadu na gbegberẽ bipai tipa kura aboro?

Badungu agu aYudo naadu ti rago Yesu adu na gbegberẽ bipai tipa kura aboro. Kristo anyakasi gupai nga si naida aboro du na umbasitise na ko ape gupai nga si aidanga aboro du na rukö tipa ngbatungayo te. Ko angarasi apefuoko nga i naabi akurayo ni awirina.—w18.06, kpe. 9-10.

Ginipai ani awirikaha ti ndu gupai Mbori aambunga Moize ti ni ku rimi ku rogo Ringara Mokido ya?

Moize adu na mbembedi pagume na Yekova. (Pa Rug. 34:10) Ni mbedi kuti digido ga aYisaraere nduge ngbakungba yo tipa agarã 40, i akpakanahe berewe ni uehe tipa zingo ime. Mbori aya fu Moize wẽ ko fura fu mbia. Kuba gure, Moize anari mbia kuba gupai nga ko fura fuhe. Si nawira gupai nga Mbori azingi na Moize mbiko gupai nga ko aapekanga fuo Gako arugapai te, watadu mbiko gupai nga ko aafunga taarimo fu Mbori tipa gu iiriwopai namangi re te. (Geda 20:6-12) Si naida gipai re yugu gupai furani nga giasangba Yekova na kini fu taarimo fuko na nyanyakipaha.—w18.07, kpe. 13-14.

Waigu rengbe ani ka inga ni ipo ka ani aasapangbanga aboro kuti wai ani abiyo?

Apai ho biata nasa dungu aboro i naasapangbanga aboro kuti wai i abiyo: rangi kpoto boro watadu ngbatunga ni, kumuko, gbiati garã boro. Si ni nyanyakipa pai furani ani naabi kura aboro wakina Mbori nga guko akparanga aboro ya! (Amo. 10:34, 35)—w18.08, kpe. 8-12.

Gini agene rengbe sosono aKristano ka undo kura aboro ngbaha?

Gu sosono Kristano gani sunge naˈariatihe, Mbori nabi ni kindi na nyanyakipa ni, na ni ima rengba ka undo kura aboro bakere gbe. Ni ima rengba ka undo agu aboro du kina gayo abadiarogatise rogo rengo yo gbiati agu aboro naima zera rogo toro yo, na ni ima rengba ka wisigo Ziazia Kekeapai na aboro na ki kiisi gaani sunge tungusapai.—w18.09, kpe. 8-11.

Gini Aũsunge Nga ga Yugopai du be aKristano?

Akarte na awaraga yambahe. Wene atrakte muambe na agu amagazini nga Ngbaõbambu Sinziri na Awake! Bete aburosua, bangua abuku ue tipa wisigoho, gbiati nyanyakipa avidio biama kodihe na Gupai Si Aida Mo Wiriki Ziazia Kekeapai Ti Ni.—w18.10, kpe. 16.

Waigu rengbe Kristano ka “ngbé rengo,” a wa duhe ni nyakasinyakasihe rogo Asanza 23:23?

Ani angbenga rengo na marã te. Ono tie, ani nadia regbo na kini mangi ome tipa ka gbiaha.—w18.11, kpe. 4.

Ginipai rengbe ani ka wirikaha ti wai Osea amangipai na diako nangia Gomere?

Gomere amangi bäri naima susa bara sa, ono Osea aima mbupai furi na ri ki nye ni diako. Ka si du nga ga Kristano badiarogatise mangi wasiwasi kodaba, gu Kristano nga boro wenesa ima rengba ka mbupai funi. Ka ni tona kodaba berewe na gu gani badiarogatise mangi wasiwasi kodaba re, ndupai dunga ho berewe tipa mbutise ringbisihe kuti Ziazia Kekeapai te.—w18.12, kpe. 13.