1, 2. Tipagine duhe ti ni ni patatamana ka degaturani koyo du Bakusirani ni ho ani asia asásá ni rogo raka? (Oni bi agu asura duti tonatonaha.)

KA SI du nga paranga boro nga mo, si nawira wa mo ima gbia badungu arugute tipa gamo raka kumbatayo. Si ima rengba kadu nga abayugupai, abafurugute, watadu kura aboro ima ngarasaro mo merefuo bakere wirikapai watadu mo gbia gu sunge du na bakere marã ti ni. Ono tie, Yekova naruga ro mo mangi gu kurapai kia. zanga kapa, ko naida mo mangisunge nyanyaki ho du mo ni sukuru yo tipa gupai nga raka ro duadu ni wenehe fuo nyasa mo sukuru. (Koro. 3:23) Ono ho mo amanga diaberã ni tipa agu apai si aida mo moi paha mbatayo rogo gamo raka, ko nangarasa ro mo mangi diaberã ringbisihe kuti gako abangua arengo nga gu du tipa gako ringbisapai gbiati gupai ko akpinyemuhe tipa rani ti gi digido regbo re.​—Mt. 24:14.

² Mo moi gupai a ku berãro yo nga, Yekova ini agu apai du kumbatayo bambiko ko ima ino gupai du kumbatayo tipa gi zegino re na ko ima ino pa wai mbedi digidoho. (Yes. 46:10; Mt. 24:3, 36) Ko ima ino rani a​—ko ima ino guhe nafu ndikidi ngbarago furani gbiati guhe rengbe ka ye na gberãrago kuti rani. Sidu, ka gu rugute nga ga wiri aboro vura kaa ngera ni wenehe wai vurũ, ka mburuhe adunga rii Fugo Mbori ya, si ni patatamana te.​—Snz. 19:21.

3, 4. Wai du pa degatue kuti gbegberẽ rugute amangipai na aAdamu na Eva gbiati awiriyo?

³ Gupai nga ga fu gbegberẽ rugute atona bakuru kusayo, na Satana du nangia bambata boro ka fu gbegberẽ rugute. Ko ape gupai fu Eva nga ri na kumbari nika du na bakere ngbarago ka i diberã kaa manga gupai ngbatiyo rogo raka yo. (Bam. P. 3:1-6) Ono tie, ka pe guhe nga rengo, gu pai Satana amangihe re angia mangapai nga ga gbangbati. Ko aaida gupai nga aAdamu na Eva gbiati awiriyo kumbatayo ra ni goyo fuko na kini irisi ko angianga Yekova ya. Ono ginihe ko amangingo ho fuyo? Yekova du nafu agu ahe dunduko naadu beyo​—ko afu ramukporo nga ga rogatise fuyo, gayo bawene kporo nangia ati Edene, gbiati rengberengbe kpotose na gu maabangirise nga ga raka nyeanye kindi.

⁴ Si nafu kina gberãrago nga, aAdam na Eva aima basasangba Mbori, na ki gu kusayo tiko. A wa oni nainihe, asangbana gupai re aima du ni kere gbegberẽhe. Wakina agu ambumbudo i nakatihe kusayo ti nguaha, i atona kaa gbinza yeeye, na fuoho i ki kpiki. Awiriyo aima rungo a be sangbana gayo ingapai, na agu awiriyo re nakoda rani dunduko a. (Rom. 5:12) Wakina aAdamu na Eva, badungu aboro areme aidanga ka ra fu Mbori ya. I naida kaa raka kina wai i akpinyemuhe. (Ef. 2:1-3) Sangbana gayo mangaapai nayugoho ayugo ziazia nga ‘tatamana ho rengbe na ru kuti Yekova’ te.​—Snz. 21:30.

5. Gini kido Mbori adu na ni kuti agu aboro ko akusi yo, na ya mo si aruaru ko du na gu kido re?

⁵ Ono tie, Yekova aima ino gupai nga kura aboro adu kinaho, kodihe na badungu paranga aboro, nga aguyo nika gbata ko na kini irisiko. (Tam. 103:17, 18; 110:3) Nairiwo wai ko abi gu paranga aboro re na nyanyakipa yo! Ya mo mo dagba gu paranga aboro re? Kangia wo duhe, zanga kapa, mo nagbia ngbarago agbia ti gu dungu “wene ahe” Mbori afuhe nga gu naye na bakere ngbarago foro. (Oni gedi Atambuahe 103:2, 3, 5; Snz. 10:22) A wa ani nika bihe, gi “wene ahe” re nakoda wene riahe nga ga toro, wene abakure, nyanyakipa asásá, gbiati ndikidi ranirii.

6. Tipagine si aida ti ni mo naangerafuo gu gamo azingo nga ga toro, na ginihe Yekova afuhe tipa si undo ro?

⁶ Mo kia ti anya, bambiko ami na agu azingo nga ga toro te, ono mo gu duadu tigamo na agu azingo re, na kina Bakusiro sa rengbe ka mbisa ha. (Mt. 4:4) Ho mo adegaturo ni fuko, mo nagbia dudungurobipai, tatamana, gbiati ngbarago. Yesu aya, “Aboro ngbarago nga agu aboro inipa gu gayó azingo nga ga toro, bambiko gu ngbi nga ga ngbangbaturũ nga gayo,” NW. (Mt. 5:3) Mbori nambiisa gu gamo azingo nga ga toro vurube Fugoko gbiati gu riahe nga ga toro nga gu ko afuhe vurube “kangara moyambu.” (Mt. 24:45) Na gu riahe nga ga toro re ima du kpaima, na si na angbatungaha ni bakiakia!​—Yes. 65:13, 14.

7. Gini aundo duti ri gu riahe nga ga toro Mbori afuhe?

⁷ Gu riahe nga ga toro Mbori afuhe rengbe ka fu tatamana foro gbiati tandu berãpai, nga gu rengbe ka banda ro rogo dungu agene yo. (Oni gedi Asanza 2:10-14.) Ni kpiapai, agi asino re naundo ro mo inipa ziree ayugopai, wa gu ziree yugopai nga Bakusiahe ti ni te. Si nabanda ro ti gu ziree nga marã gbiati aũkumuko rengbe ka saro mo du na ngbarago. Na si naundo ro mo ne iraira nyemuahe gbiati agu asino rengbe ka ye na kerepai kutiro. Sidu, mo naandu kindi kumbatayo kaa gbata gu tatamana nga ga Mbori gbiati tandu berãpai, na kini bihe wa aũkumuko! Wa mo nika gbia gu nyanyakipa asino re, mo nika ye ka inoho nitiro nga Yekova ima kpinyemuro na ko naida gupai du ni wenehe kisusi tipa ro.​—Tam. 34:8; Yes. 48:17, 18.

8. Tipagine si aida mo mbedi ti ni na Mbori awere, na wai du gipai re nika undo ro kumbatayo?

⁸ Barambeda, ai papara ga Satana zegino i  nika gbarasaha, na kina Yekova sa nika du ni babanda rani. Nirengo, regbo ima rengba kaduho kumbatayo ani nikaa ngera kina koyo du ko ni tipa kina boro gu riahe ani nika rihe! (Abak. 3:2, 12-19) Nirengo, awere nga regbo tipa mo mbedi na gu Bamo du ngbangbaturũ yo na ki nyakasi gamo kido kutiko. (2 Pet. 2:9) Ka mo mangihe wo, ka ginipai vura kaa manga patiro, mo nika du wakina gu bake apapara Atambuahe nangia Davide nga guko naake pai ki ya: “Mi namaa Yekova ku mbata yo a fere dedede; bambiko ko du ku kumbabere, mi awõ nga te.”​—Tam. 16:8.

9. (a) Ringbisihe kuti Yoane 6:44, ginipai Yekova amangaha? (b) Ginipai du kia nibipa ho aDezire Yekova agbiatiyo ni ti bambata regbo?

⁹ Yekova nagbe agu aboro koyo du ko ni ko aida i da ni gako aborokporo nga ga toro yo, kini sa agu aboro du na ruru ngbaduyo yo i du na nyemu ndikidi irisombori. (Oni gedi Yoane 6:44.) Ho mo naagbia boro ni nga guni adunga rogo rengo yo ya ti bambata regbo, ginipai mo niinihe tipa ni? Mo niini rimoni gbiati wai ni angera, ono si nawira gupai nga kura dungu apai ho berewe tipa ni mo nidu na inohe nga gaha te. Ono tie, si naadunga wo ho mo agbia gu boro ni ti bambata regbo du rogo rengo yo te. Zavura ka si vura du nga agu apai du tipa gu boro re, gani ringara, tunga ni, watadu gani sino mangaapai kia, mo ima ino badungu apai tipa ni na ni ima ino badungu apai a tipa ro!

10, 11. Gini apai du kina sa tipa ga Yekova aboro, na wai du gipai re aundo rani?

¹⁰ Nibasa ho mo agbia kura Dezire Yekova ni, mo naino gupai nga apai kinaho du kina sa tipa roni na ni. Mo naino gupai nga ka si vura du nga oni nape afugo ni bakiakia, “fugo” kinaho oni dunduko ue apehe ape, nga gu “nzunzu fugo” nga ga rengo. (Zef. 3:9) Naida ka ya, oni dunduko ue ima ida kuti Mbori, oni naraka ringbisihe kuti bangisa arugute, na oni na bangisa maabangirise tipa raka kumbatayo. Agi apai re naundo roni oni du na kido dagba tironi. Si naundo roni a oni mangi wene pabakure nga gu nika nyeanye kindi.

¹¹ Ho du mo ni ni irisi Yekova, mo ima rengba ka pe gupai nirengo nga mo na yangara bawene abakure bero. Mo na abakure bero rogo zegino dunduko, ka si vura du vurũ nga mo ata gbianga yo te! Ada duho kparakusayo  ti ga Yekova aboro nagbia ngbarago ti gi nyanyakipa gamahe re?

12. Gini wene asásá nga ga toro rengbe mo ka maaha?

¹² Oni gedi Batungusipai 11:9–12:1. Ya mo asásá ho bero mo amanga ome kada ti ni? Si ima rengba kadu nga mo moi sásá nga ga geda apapara Ziazia Kekeapai na aˈuru dunduko. Watadu si ima rengba kadu nga mo na gu sásá nga kaa fu wene akaragapai ba dunguratise yo, kaa manga apapara dunguratise ni wenehe, watadu kaa yugopai ngba wene gene. Mo nidu wai ho mo abi wene sangbana gamo asásá ni watadu ho aboro abihe ni na kini tambua ro? Zanga kapa, mo nidu na bakere ngbarago. Na si rẽarẽ mo du wo, bambiko mo nawirika Yesu ni maa mo gupai Mbori akpinyemuhe mbatayo fu gupai mo akpinyemuhe.​—Tam. 40:8; Snz. 27:11.

13. Wai du du iriso Yekova ni wenehe kisusi maaberãse fuo agu asásá du rogo gi zegino re?

¹³ Ho mo amaaberã ro ni tipa agu apai nga ga toro, mo namanga gu sunge a nika saro mo du na ngbarago, bambiko mo amanganga ha gbua te. Gu mokedi nangia Pauro akepai ki ya: ‘Oni dú nyanyaki, zanga wo, nimángi ga Gbia sunge zaza dedede, bambiko oni ini ya gaoni sunge adu nga gbua rogo Gbia yo te.’ (1 Kor. 15:58) Ono ho aboro amaaberãyo ni tipa agu asásá du rogo gi zegino re, wa gu nga manga marã watadu da ni abaworimo, i agbianga ngbarago nzunzu te. Ka i vura du na diabese, rago nagberã tiyo dedede. (Rk. 9:25) Gu boro nayugu gupai nga gipai re nga rengo angia Bakindo Soromo.​—Rom. 15:4.

14. Ginipai rengbe mo ka wirikaha ti gu wisigopai Soromo amangihe nibipa ngbarago?

¹⁴ Soromo, nga guko naadu ni kere irakumuko na kidu na bakere pagbia beko amangi wisigopai. Ko aya ku kpotoko yo wẽ: ‘Mo rú nga, mi asadi ro na pa ngbarago na ki bi gu wenepai rengbe ka kura,’ NW. (Batu. 2:1-10) Ko ameke wenewene abambu, ki mbakadi agu aˈati nga ga ambumbudo aboro asungo rogoho kaa ongoda, na ki mangi ai gupai ko adu na nyemu ka mangaha. Wai du ko adu tingbafuo mangako agi apai re? Ya mo ko adu na rengbabepai na kidu na ngbarago? Soromo nitiko aima pe wai furani ko adu. Ko akepai ki ya: “Mi tigimi ki niberẽ pa agu asunge dunduko bere amangi . . . , si adu dunduko ni kina kungba pai . . . a nga u ho tii uru no te.” (Batu. 2:11) Nairiwo gu nyanyakipa pai gipai re ayugoho! Ya mo mo amangapai ni tatamana ki wirikipai ti ni?

15. Tipagine du idapase ti ni na nyanyakipaha, na gini aundo duti ni ringbisihe kuti Atambuahe 32:8?

¹⁵ Kura aboro nawirikapai rogo raka yo kinaho i amanga aingahe ni kini mbu be asangbanaha, ono Yekova aidanga ngbatungapai wa gure mangi ro te. Nirengo, si naida mo du na idapase tipa ka giasangba Mbori na ki moi gupai ko akpinyemuhe mbatayo rogo gamo raka yo. Gu idapase re na nyanyakipaha, na si ayengo na gberãrago kuti boro te. Nirengo, bangiri Yekova agonga ti ‘gu nyemuse mo ayugu ti rimoko’ te. (Eb. 6:10) Sidu, mo mangi ome tipa ka sonosa nyanyaki idapase, na manga mo ho wo nika saro mo bi gupai nitiro nga gu Bamo du ngbangbaturũ yo naida agu apai du ni wenehe kisusi tipa ro.​—Oni gedi Atambuahe 32:8.

16. Tipagine si aida ani naabi ranirii ti ni na nyanyakipaha, na kini mangisunge na ni ngba wene gene?

¹⁶ Pauro akepai ki ya, “Ho du Toro Gbia ni yo du raniri ni.” (2 Kor. 3:17) Nirengo, Yekova ima kpinyemu ranirii, na ko akusi ro na kina nyemu du na ranirii a. Ono tie, ti kina gu bangisa regbo re, ko naida gupai nga mo mangisunge na gamo ranirii ngba wene gene, na manga mo sunge na ni wo nga bandahe foro. Isoke mo ima ino gu kura paranga aboro nga aguyo nabi kpia kundiri aboro watadu nga aguyo namanga wasiwasi kodaba, kini ngi kere ambaro, kini di kere angua kuti kpotoyo yo na kini kpi buda. Zanga kapa, i ima rengba ka  gbia ngbarago tipa bete regbo ti gi mangaapai re. Ono tie, si naye dedede na gbegberẽ asangbanapai, wa agu nga kaza, du ni kanga fu pai, watadu kpio. (Gara. 6:7, 8) Si tie ziazia nga, gu paranga aboro re nananga tiyo gbua nga i na “ranirii” beyo.​—Tito 3:3.

17, 18. (a) Wai du pa giasangba Mbori aye na ndikidi ranirii? (b) Rogo gini gene aAdamu na Eva adu mbata na bakere ranirii beyo kisusi gu ranirii du aboro na ni areme?

¹⁷ Ono tie, bange aboro wai mo naini yo nga aguyo kaza aziyo mbikopa ka yo kuti agu arugute nga ga Ziazia Kekeapai? Si tie ziazia nga, giasangba Yekova ni gupai nasa kpotoboro ni wenehe na ni gupai nafu ndikidi ranirii fu boro. (Tam. 19:7-11) Na ho mo amangasunge ni na gamo ranirii ngba wene gene, naida ka ya, ho mo amanga siapai ni ka irisa ga Yekova andiko gbiati arugute, mo nayugo gupai fu Mbori na fu avunguro nga mo ni gu boro rengbe yo ka kido kutini na ki fu bakere ranirii funi. Na Mbori ima kidohe nga barambeda, ko nika fu gu rengberengbe ranirii fu gako ruru amoyambu Ziazia Kekeapai ayambaha nga “gu [ranirii] nga ga awiri Mbori.”​—Rom. 8:21.

¹⁸ Gere nga gu ranirii aAdamu na Eva adu na ni. Bange apai wai Mbori aya fuyo ka i mangingo ho ya ati Edene yo? Pai sa gbua. Ngua adu sa ko aya fuyo ka i ringa zuzuhe ya. (Bam. P. 2:9, 17) Ya mo mo rengbe ka ya gu ndiko Mbori afuhe fuyo re aima du ni kere ndiko? Wagusa te! Mo berẽnga pa gu badungu andiko aboro nakusihe na kini mangi kura aboro ngbaome i irisihe. Ono Yekova tigako afu bangisa ndiko gbua fuyo.

19. Rogo gini agene yo i ayugopai furani tipa ani da ni agu aboro du na ranirii?

¹⁹ Yekova namangapai na ani ni tatamana. Kuba gupai nga kaa fu badungu andiko furani, ko nayugopai furani ni zerangbaduse ani irisi gu ndiko nga ga nyemuse. Ko naida gupai nga ani naaraka ringbisihe kuti gako abangua arengo na kini sogo gupai du ni gbegberẽhe. (Rom. 12:9) Gu ga Yesu tungusapai naadu rii bagangara yo nga wene kpiapai nga ga gu yugopai re, bambiko si napepa gu ndupai aboro amanga gbegberẽ apai ti ni. (Mt. 5:27, 28) Nidu Kristo ni Bakindo ga Mbori Kindo, ko nikaa ndu kindi kumbatayo kaa yugopai furani rogo vovo zegino tipa gupai nga ani naabi rurupai gbiati irairapai kina wai ko abihe. (Eb. 1:9) Ko nika sa rani a ani du ni rengberengbe rani ti kpotorani na berãrani yo. Mo berãnga kurii gupai nga mo adunga berewe na ingapai tiro te na mo ambunga berewe a be asangbana ingapai te. Fuo gure, ni yangaraha, mo nika du na “gu [ranirii]” Yekova nakidopaha tipa ro.

20. (a) Wai du Yekova amangasunge na gako ranirii? (b) Wai du rengbe mo ka wirika ko?

²⁰ Rengo ngaha nga, gaani ranirii nika duadu na ngbandaha ti ni. Nyemuse tipa Yekova na tipa akuarani nika du na maapai kurii gaani ranirii. Ho du nyemuse ni na maapai kurirani, ani nawirika Yekova. Ko na gu ranirii beko adunga ngbandaha ti ni ya; ono wa vura duhe wo, ko ima sia gupai nga nyemuse du na maapai kurii ko ho ko amangapai ni na ani. (1 Yo. 4:7, 8) Sidu, si ruaru tie nga ani rengbe kadu na ndikidi ranirii kina gu ka ani mbu gu nyemuse nga ga Mbori si du na maapai kurii gu ranirii re.

21. (a) Ginipai Davide apehe nibipa Yekova? (b) Ginipai ani nika sakapai tipaha rogo gu kekeapai ngbefuo gere?

²¹ Ya mo mo na tambuahe tipa gu “wene ahe” Yekova nafuhe foro, wa agu nga gu riahe nga ga toro, wene abakure, nyanyakipa asásá, gbiati gu maabangirise nga ga rengberengbe ranirii? (Tam. 103:5) Kangia wo duhe, mo ima rengba kadu kina wai Davide adu ho ko amangi kparakpee ni rogo Atambuahe 16:11 ki ya: “Mo nayugo gene unga fere; ngbarago du bara bangiro rengbe, rogo kumbabero du aũngbarago ni nye anye kindi.” Gu kekeapai ngbefuo gere nika fura tipa gu kura nyanyakipa ahe nga ga toro nga gu du rogo Atambuahe 16. Si nika undoro mo bi wai rengbe mo ka raka gu raka du ni bawenehe kisusi.