1. Gini agene rengbe ani ka mangasunge na Yekova ngbaha?

FUO Yekova kusi aboro, ko aaida gupai nga i du ni gako abadiasunge tipa ka digiso gako ringbisapai. Wa vura duhe nga aboro areme na zangarengba tiyo, ruru aboro ima rengba kaa mangasunge na Yekova na aˈuru dũ. Ni kpiapai, ani nada ni “ga Mbori abadiasunge” ni tungusa ani gu wene pangbanga nga ga Kindo na ni sa ani aboro ni abawiriki. (1 Kor. 3:5-9) Oni berẽnga pa wai du he ni pa momu kadu ni agu aboro namanga nyanyakipa sunge sa na Bakusiahe du na tanduapai dũ! Ono tie, anga tungusapai na kini sa aboro ni abawiriki nga gu yangara agene ani amangasunge na Yekova ngbaha te. Gi kekeapai re nika sakapai tipa kura agene rengbe ani ka mangasunge na Yekova ngbaha​—agu agene re nga, undo gaani aborokporo gbiati agu aboro ani airisombori na yo, dia aboro kugume, gbiati kiiso ani gaani ziazia sunge.​—Koro. 3:23.

2. Tipagine adunga ha ti ni ni patatamana ka ringbisa gupai mo amangaha fu Yekova na gu kura aboro amangaha ya?

² Wa ani nikaa wisigo gi kekeapai re, ka mo ringbisinga gupai rengbe mo ka mangaha fu Yekova na gu rengbe kura aboro ka mangaha ya. Mo tingidi gupai nga, garã rani, wai du kpotorani, agu apai du tipa rani, gbiati agu apai du ani na tandu mangaha ni bakiakia. Gu mokedi nangia Pauro aya: “Boro niásadi kina gani sunge, ni  nikadu na gu pai ka ni tambua tini mbiko kina ha sa, mbiko kurani te.”​—Gara. 6:4.

3. Waigu duhe nga agu aboro dunduko nangerafuo gayo aborokporo namangasunge na Yekova?

³ Yekova nakpinyemu gupai be gako amoyambu nga i ngerefuo gayo aborokporo. Ni kpiapai, si naida mo mangisunge marã amanga tipa ka ngbeka agu ahe du gamo aborokporo na zingoho. Dungu anaagude ninaasungo kporo tipa ka ngerafuo rukutu awiriyo. Si naida agu agude naima sona ngerefuo sosono avunguyo. Agi apai re dunduko na nyanyakipaha. Fugo Mbori naya: ‘Gu ni ka aberãnga pa agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.’ (1 Tim. 5:8) Ka mo du na ngbatunga agi atindiro re bero, si ima rengba ka du ni mbumbuhe foro tipa mo naadia regbo kaa manga agu apai nga ga siokrasia wa gu mo akpinyemuhe. Ono tie, ka rago gberẽnga tiro ya! Yekova na ngbarago ho mo angera ni fuo gamo aborokporo.​—1 Kor. 10:31.

4. Waigu rengbe avunguagude ka maa agu apai nga ga Kindo mbatayo fu gayo nyemupai, na sangbanaha rengbe kadu nga gine?

⁴ Agu aKristano nga avunguagude namangasunge na Yekova ho i amaa agu asasa ni nga ga toro fu awiriyo. Badungu agu aboro mangi gipai re ima sa gupai nga awiriyo tona sunge Kindo ti aregbo dũ tuturũ ti kporo. Aguyo namangasunge ni amokedi; aguyo kini mangisunge ni abazakigene rogo agu aba du na zingo abatungusipai rogoho; agu akurayo kini mangisunge Betere yo. Padu yo tuturũ ti avunguyo nayugo gupai nga, avunguyo adianga regbo na yo wagu i aidaha te. Wa vura duhe wo, agu avunguagude du na gu toro nga ga futise nangarasa awiriyo tipa i kakuti gayo sunge. Tipagine? I nagbia bakere ngbarago mbiko inoyo gupai nga awiriyo namaa agu apai nga ga Kindo mbatayo. (3 Yo. 4) Isoke dungu agi avunguagude re nafura wakina Ana, nga guri naya ri “akpara” wiriri nga Samuere fu Yekova. Agi avunguagude re nabihe nga si ni pa momu ka mangasunge na Yekova ngba gi gene re.​—1 Sam. 1:28.

5. Waigu rengbe mo ka undo agu aboro du rogo gamo dungurati? (Oni bi gu sura duti tonatonaha.)

⁵ Ka si du nga bakere tindiro bero nga ga aborokporo te, ya mo mo rengbe ka undo agu aboro mo airisombori na yo nga agu yo nangerafuo aboro, watadu ka undo gbarĩgbarĩ aboro, sosono aboro, gbiati agu aboro kaa ida undo? Si adu ni wenepai ka mo ngere rogo gamo dungurati tipa agu aboro naida na undo. Isoke si rengbe kadu nga wirina nga dee nangerafuo sosono avungu ri, ya mo mo rengbe ka sungo pati yo tipa ri mangi kura apai? Watadu ya mo mo rengbe ka undo agu aboro naida undo tipa ka tinda yo ku pati adunguratise, ka ndu ka ngbeka ahe fuyo, ka otoka gene gupai yo i aidaha, watadu ka ndu na yo ka bi boro bambungua yo? Ka mo aamangaha wo, mo rengbe kaa mangasunge na Yekova tipa ka karagapai kuti kparakpee.​—Oni gedi 1 AKorindo 10:24.

6. Dia aboro kugume nakoda ginipai?

⁶ I naino ga Mbori abadiasunge ti gu sino nga ga dia aboro kugume. (Eb. 13:2) Fugo Mbori na agu apangbanga rogoho nayugopai furani tipa ani yugu ngbatunga gi nyemuse re. (Bam. P. 18:1-5) Si naida ani naagbata amomu tipa ka undo kura aboro dedede, si ngia ani na yo rogo “idapase yo” watadu ani na yo te.​—Gara. 6:10.

7. Tipagine si aida mo berẽpa dia agu aboro ti ni kugume namangasunge Kindo ti aregbo dũ?

⁷ Ya mo mo rengbe ka mangasunge na Mbori ni dia mo agu amangisunge Kindo ti aregbo dũ kugume nga aguyonaye ku rogo gu rago du mo rogoho? (Oni gedi 3 Yoane 5, 8.) Ngbatunga gi kodatise re dedede ninaaye na “wasa” watadu ngarasaro dagba tise. (Rom. 1:11, 12) Oni bingo gu kpiapai nga ga Olaf. Ko  natingida gupai nga, regbo adu kinaho dungu bawe agarã kusayo babi adungurati nangia bakuparanga aye ka bi gu dungurati ko adu rogoho na si kini idi ba tipa ko sungu rogoho, ono ka boro adunga ho rogo dungurati ka diko ku kpuni yo ya. Gi paranga nga Olaf re asana agu avunguko naangianga aDezire Yekova ya singia gu babi adungurati re rengbe ka sungo fuoyo kporo yo. I aidihe na ki gumba gupai nga Olaf nika pi rii gbanga basungo. Gi wiri ariapai re aima du na wene sangbanaha. Olaf aya, “Nga gi bawene poso naadu! Ani anaazinga na babi adungurati ngba wiso kini saki dungu apai pati gu riahe nga ga wiso. Gu ngarasaro mi agbiaha angarasi re mi idi ka manga sunge Kindo ti aregbo dũ.” Vuru agu agarã 40 susi kusayo, Olaf ima mangasunge ni mokedi rogo dungu aba.

8. Gini nduapai duho si aida ani naayugo wenesino ti ni zavura ka si vura du mbata wa ka i ya aboro na tambuahe tipaha te? Oni funga kpiapai tipa gipai re.

⁸ Oni ima rengba ka yugo nyemuse fu kungbo aboro rogo dungu agene yo, zavura ka si vura du vurũ nga i na tambuahe ti bambata regbo tipa gu ome oni amangaha te. Oni bingo gi kpiapai re. Wirina sa Spain yo aawisigo Ziazia Kekeapai na dee ni boro Ecuador rimori angia Yesica. Rogo kura uru sa ti regbo gayo wisigo Ziazia Kekeapai, gu natungusipai re abi gupai nga Yesica aakpara akpara kindi. Gu natungusipai re kini sana ri nga tipagine ri akpara ti ni. Yesica ape gupai nga mbata fu ri ye ku Spain yo, ri adu ni irarungo, na rogo kura uru sa, si ki da ti gupai nga riahe ho ka ri fuhe fu wiiri te. Guhe ri arengbe ka fuhe fu wiiri angia kina ime sa. Yesica aasadi ka zungodi wiiri u ra na ri kini mangi kparakpee tipa undo. Tingbafuo gure ngbutuko, aDezire Yekova ue aye kua Yesica yo, ono Yesica azingi kutiyo na ki sipi gu magazini i afuhe fu ri. Ri asana yo nga, “Gere nga gu riahe oni aida mi fuhe fu wire?” Agu awirina re aˈasadi ka zungodi ri, ono ka ri aidanga ka gia gupai i aape ya. Fuo regbo kusa, i aye ki mbu riahe na baga furi ngbadimo kpuri. Gayo wenesino aima zio ngbadu Yesica yo na rago ki gbere tiri mbiko gupai nga ri aadeganga turi ho Mbori aakaragapai ni kuti gari kparakpee te. Ono ri aima diaberã ka iriso Yekova. Nairiwo gu wene sangbanapai ga agu awirina sino nga ga gamahe re akusihe!​—Batu. 11:1, 6.

9, 10. (a) Gini aregbo ti agu aregbo i aakeka Ziazia Kekeapai ti ni si aaida abaundosunge dagba ga Mbori aboro yo? (b) Gini asunge akumba afutiyo ka mangaha areme rogo dungurati?

⁹ Rogo gu ringara aYisaraere naadu mbata, badungu aregbo anidu kinaho si anaaida abaundosunge. (Gate 36:2; 1 Peka 29:5; Nem. 11:2) Areme, mo ima du a na dungu amomu bero ka fu tiro na gamo regbo, gamo ahe, gbiati gamo birĩ mangaapai tipa ka undo awirinamo. Na ka mo mangihe wo, mo nika gbia bakere ngbarago gbiati dungu amaku.

¹⁰ Fugo Mbori nangarasa akumba rogo dungurati nga i naamangasunge na Yekova ni mangayo ome tipa ka rẽ tipa agu amomu nga ga sunge gbiati ngerakurii apai. (1 Tim. 3:1, 8, 9; 1 Pet. 5:2, 3) Agu aboro namanga gipai re naida ka undo kura aboro rogo mangimangipai yo na rogo toro yo. (Amo. 6:1-4) Ya mo abaakumba sananga ro singia mo na nyemu ka mangasunge ni gu boro nambakada ba aboro watadu ka undo ba kparaka awaraga yo, rogo sunge ngerafuo adagbarago nga ga tungusapai, rogo sunge ngerafuo Bambu Kindo watadu rogo kura apai yo? Agu aboro namanga gi ngbatunga asunge re ima rengba ka pe gupai foro nga undo kura aboro naye na bakere ngbarago fu boro.

11. Wai du kura wirina sa nagbia undo ti gu pabakure ri amangaha ti regbo meka agu arago nga ga Kindo?

¹¹ Agu aboro nafutiyo tipa agu asunge nga ga Kindo ninaamanga vovo abakure dedede.  Oni bingo gu kpiapai nga ga gu wirina nga Margie, nga guri naima mangasunge dudua aBambu Kindo tipa agarã 18. Vuru agi agarã re yo, ri ima yugo gupai nga ri na nyemu gu paranga awirina nga adee tiri, na kini raba yo. Ri ima bi gupai nga gipai re nga wene gene kisusi ka ngarasa akurase rogo toro yo. (Rom. 1:12) Ho ri naagbia tiri ni na akpakarapai rogo gari raka yo, ri naagbia ngarasaro be agu aboro ri azio bakure na yo ti regbo dudua aBambu Kindo. Ya mo mo afunga tiro tipa gu sunge meka arago gaani riigbu amangaha? Singia mo na inohe tipaha watadu mo na inohe te, ya mo mo rengbe ka fu tiro?

12. Wai du rengbe mo ka fu undo ho gberãngo amanga ni?

¹² Ti regbo agberãngo, ga Mbori aboro na amomu beyo ka mangasunge na Mbori ni undoyo awirinayo rogo mangimangipai yo. Ni kpiapai, i nafu marã tipa si undo agu aboro du rogo gu gberãngo re. (Yo. 13:34, 35; Amo. 11:27-30) Gu kurapai i naamangaha berewe nga ka giriso rago na ka mbakada agu abambu paha agberã ti regbo gu gberãngo re. Wirina nga Gabriela, Poland yo nga guri pa kpuri agberẽ be hihi ime mai adu na bakere ngbarago ho awirina rogo agu adungurati naadu mbembedi na kpuri aye ni ka undo ri. Ri aya. “Mi aidanga ka fura tipa agu ahe mi azangaha te, agu ahe re gbua nga kungbo aũzegino. Kuba gure, mi naida ka pepa agu ahe furoni mi agbiaha. Gupai namangi re aima fu gu kido fere nga du ni papara gu dungurati nga ga aKristano nga kparakpara momu na kidu a ni gupai naye na ngbarago.” Badungu agu aboro ninaagbia undo tingbafuo gberãngo nidu na kina bangisa gu bipai re. Na agu aboro namangasunge na Yekova ka fu ngbatunga gu undo re nagbia bakere ngbarago.​—Oni gedi Amokedi 20:35; 2 AKorindo 9:6, 7.

13. Wai du pa fu tirani ka undo narengbe ka nyakasa gaani pagume na Yekova? Oni funga kpiapai.

¹³ Stephanie gbiati kura abatungusipai aima gbia ngbarago ti mangasunge na Yekova ka undo agu aDezire Yekova nazubo rogo gayo aringara ku Amerika yo. I aundo ni gbata yo abambu fuyo gbiati aũkporo. Stephanie aya, “Gu ngbarago gbiati tambuahe i adu na ni mbiko biyo gu nyemuse nga ga awirinayo du rogo zegino dunduko aima fõngbaduraniyo.” Ri ape gupai berewe nga, “Agi aborokporo re naberã gupai nga ani du undo yo, ono ka gumba rengo, i ima undo rani ki susi. Gu nyemuse,  kodatise, gbiati kido kuti Yekova ani nabihe ima nyakasa gaani nyemuse tipa Yekova na gipai re ima sa rani ani du na tambuahe tipa agu apai dunduko ani agbiaha vurube gako riigbu.”

14, 15. (a) Gini toro gu nebi nangia Yesaya ayuguhe? (b) Waigu rengbe abatungusipa Kindo ka wirika gu toro naadu ti Yesaya areme?

¹⁴ Ya mo mo nakpinyemu ka mangasunge na Yekova ni bakerehe? Ya mo mo rengbe ka ga ka mangasunge fuko rogo gu ba du na bakere zingo abamangisunge rogoho rogo gako riigbu? Rengo ngaha nga, si aidanga ga Mbori amoyambu nduandu mbata tuturũ ti akpuyo tipa ka gamahe te. Ono agu apai du tipa kura awirina nambugene ambu fuyo tipa i ndu ku rogo agu aba du tuturũ. I na kina gu bangisa toro naadu ti gu nebi nangia Yesaya. Ho Yekova asanahe ni nga, “Mi akéda da, da nikandu tipa rani?” Yesaya aya, “Mi du re! Mo kédi re” (Yes. 6:8) Ya mo mo na rengba na kidu na nyemu ka mangasunge rogo ga Yekova riigbu? Gini bete agene rengbe mo ka undo ngbaha?

¹⁵ Nibipa tungusapai na kini sa aboro ni abawiriki, Yesu aya: “Zuzuhe ni bakere he ni rengo, ono abamangisunge ni kina umba yo. Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.” (Mt. 9:37, 38) Ya mo mo rengbe ka mangasunge rogo agu aba du na bakere zingo abatungusipai rogoho, isoke ni bazakigene? Watadu ya mo mo rengbe ka undo kura boro ni mangihe wo? Badungu awirina ima gumba gupai nga bawene gene tipa ka yugo nyemuse fu Mbori na fu akurase nga, ka mangasunge ni bazakigene rogo agu aba watadu rogo gu dagbarago du na bakere zingo abatungusipai rogoho. Ya mo mo rengbe ka berãpa kura agene berewe rengbe mo ka kiiso gamo sunge ngbaha? Bakere ngbarago duti pa kiiso mo gamo sunge.

16, 17. Gini kura amomu duho ka mo akpinyemu ka kiiso gamo sunge fu Yekova?

¹⁶ Ya mo mo rengbe ka mangasunge Betere yo watadu ka undo rogo meka arago nga ga Kindo, singia tipa bete regbo watadu ki ta ru kpuro yo kini ye kaa mangasunge? Bakere zingo kindi duho tipa agu aboro rengbe ka mangasunge fu Yekova rogo ai gu ba i narengbe ka keda yo ku rogoho na ka manga ai gu ngbatunga sunge i afuhe fuyo i mangihe. Si rengbe kadu nga si naida i mangi kura ngbatunga sunge rogo gu ba du zingo rogoho, ono nga gu adunga yo na birĩ mangaha ya. Wa vura duhe wo, Yekova na tambuahe tipa gu toro nga ga futise aboro ni basasa ayugoho ni nduyo kaa mangasunge rogo agu aba du na zingo rogoho.​—Tam. 110:3.

¹⁷ Ya mo mo nakpinyemu ka gbia kura arabahe berewe tipa ke rẽ wenengai ka manga gamo ziazia sunge? Kangia wo duhe, mo ima rengba ka rẽ ka ndu tipa Gu Sukuru Du Tipa Abatungusipa Kindo. Gi sukuru re naraba agu awirina naima nyaka rogo toroyo nga agu yo du tingba sunge tungusapai ti aregbo dũ tipa i kiisi sunge tungusapai berewe gbe. Si naida agu aboro nakpinyemu ka ndu tipa gi sukuru re du regerege tipa ka idapa ai gu sunge i nika fuhe fuyo tifuo nyasa yo gu sukuru re. Ya mo mo nakpinyemu ka mangasunge na gi momu re tipa ka kiiso gamo sunge fu Yekova?​—1 Kor. 9:23.

18. Gini aundo du ti mangasunge na Yekova na aˈauru dunduko?

¹⁸ Wangia ani ga Yekova aboro, ani nga aboro gamahe, kidu ni wene aboro, kidu ni wene sino aboro, na kidu na nyemuse. Ani naberãpa aboro ti aregbo dunduko. Ho ani amanga gipai re ni, ani nagbia ngbarago na zereda. (Gara. 5:22, 23) Ka apai vura du tipa ro wai vurũ rogo gamo raka yo, mo rengbe ka gbia ngbarago ni wirika mo ga Yekova sino nga ga gamahe na ni du mo ni boro sa dagba gako nyanyakipa abadiasunge yo!​—Snz. 3:9, 10.