1. Tipagine du airisi Yekova ti ni ni aboro ngbarago? (Oni bi gu sura duti tonatonaha.)

ADEZIRE YEKOVA nga aboro ngbarago. Ho du yo ni sa ti regbo gayo adunguratise, bakere adunguratise, watadu adunguratise nga ga wasa, i nafura kini momu na akurayo. Tipagine du yo ti ni na bakere ngbarago? Gu bangua ndupai duho nga i ima ino Yekova nga “betedi Mbori,” na i nairiso ko kini mangi nyanyaki asadatise ka wirika ko. (1 Tim. 1:11; Tam. 16:11) Nidu Mbori ni baenge ngbarago, ko naida gupai nga ani du na ngbarago, na ko nafu dungu nduapai furani tipa ani du na ngbarago.—Pa Rug. 12:7; Batu. 3:12, 13.

2, 3. (a) Ginihe nga kadu na ngbarago? (b) Tipagine rengbehe kadu ti ni ni mbumbuhe kadu na ngbarago?

² Na mo tigamo? Ya mo mo na ngbarago? Ya mo mo rengbe ka kiiso gamo ngbarago? Kadu na ngbarago nga ‘padu boro wenengai berãni yo na kpotoniyo, na ki rengbe kina be gani raka.’ Ziazia Kekeapai nayugo gupai nga ndikidi ngbarago nga guhe du gu boro na ni Yekova nafu maku funi. Ono tie, rogo zegino areme, si ima rengba kadu ni mbumbuhe kadu na ngbarago. Tipagine?

³ Agu akpakarapai duwa kpio gaani boro, kusayo gaani boro kusayo rogo dungurati, mbutise, watadu zanga ani gaani sunge ima  rengba ka saha furani ni mbumbuhe ani du na ngbarago. Kpata gbiati zanga fugo zereda kporo ima rengba ka dia gaani ngbarago kusayo. Ho akuarani basunge yo watadu sukuru yo asawia rani ni watadu ho i arungosi rani ni na kini ba rani ku bambu kisoyo tipa pa gaani irisombori, si ima rengba kadu ni mbumbuhe furani ani du na ngbarago. Na berewe a, si ima rengba kadu ni mbumbuhe furani ani du na ngbarago ho adunga kpotorani ni wenengai ya, ho du bangabanga kaza ni tirani watadu ho du ani ni rogo bakere gberãrago. Ono wa vura duhe wo, Yesu Kristo, “du ni beedi ko ni bangisa Bazogo,” adu na nyemu fu wasa gbiati ngbarago fu aboro. (1 Tim. 6:15; Mt. 11:28-30) Rogo gu ga Yesu Tungusapai Naadu Rii Bagangara yo, ko apeke asino nga gu rengbe ka ye na ngbarago furani si ki vura du vurũ nga gi ga Satana zegino re na akpakarapai rogoho.

4, 5. Waigu rengbe ani ka gbia ngbarago na ki bandaha?

⁴ Gu bambatapai Yesu afura tipaha na nyanyakipaha gbe, ko aya: “Aboro ngbarago nga agu aboro inipa gu gayó azingo nga ga toro bambiko gu ngbi nga ga ngbangbaturũ nga gayo, NW.” (Mt. 5:3) Wai du ani ayugo gupai nga ani naberãpa gu gaani azingo nga ga toro? Ani nayugoho ni ri ani gu riahe nga ga toro, ni bi ani pa agu apai nga toro na nyanyakipaha, na ni maa ani pa iriso gaani Mbori ngbarago mbatayo rogo gaani raka yo. Ka ani mangi agu apai re, si nika kiiso gaani ngbarago. Ani nika nyakasa gaani idapase kuti gupai nga gu ga Yekova akidohe du kumbatayo nika digiso tihe adigiso. Na ani nika gbia ngarasaro be gu “betedi maabangirise” Fugo Mbori afuhe fu ndikidi airisombori.—Tito 2:13.

⁵ Sonosa nyanyaki pagume na Yekova nga nyanyakipa gene ka gbia nyenye ngbarago. Ga Mbori toro adu kugii gu mokedi nangia Pauro ko ke gupai nga: “Oni ngí rogo Gbia [Yekova] yo dedede: mi agumba ha berewe, Oni ngí!” (Frp. 4:4) Tipa kadu na pagume na Yekova, si naida ani gbia gu tatamana naye be Mbori. Fugo Mbori naya: “Boro ngbarago nga gu ni ini tatamana, na gu boro du na rugatinapai. Si nga ngua unga fu agu yo zadi he; ngbarago du fu agu yo dunduko ka kuti ni nyanyaki.”—Snz. 3:13, 18.

6. Ginipai si aidaha tipa kadu na nyenye ngbarago?

⁶ Ono tipa kadu na ngbarago nyeanye kindi, si ni nyanyakipa pai ani naageda Fugo Mbori na kini mangipai kuti gupai ani agedaha. Tipa ka nyakasa ndu pa manga ani pai kuti gupai ani awirikaha, Yesu aya: “Ka oni ini agi apai re, rago ngba angba ti roni ka oni amanga ha.” (Yo. 13:17; oni gedi Yakoba 1:25.) Gere nga wiri rifungura tipa ka mbiisa gamo azingo nga ga toro na kadu na nyenye ngbarago. Ono waigu rengbe ani kadu na ngbarago baraho du dungu apai ni nga gu rengbe ka dia gaani ngbarago tirani kusayo? Ani wisigingo gupai Yesu agumbaha berewe ti regbo gu gako Tungusapai Naadu Rii Bagangara yo.

7. Waigu rengbe agu aboro narungo kpotoyo yo kadu na ngbarago?

⁷ “Aboro ngbarago nga agu yo narungo kpotoyo yo, bambiko i afu wasa fu yo, NW.” (Mt. 5:4) Kura aboro ima rengba kaa baka bangiriyo nga, ‘waigu rengbe gu boro narungo kpotoniyo kadu na ngbarago?’ Anga agu aboro dunduko narungo mbiko kura nduapai naadu berã Yesu yo te. Zavura gbegberẽ aboro narungo arungo kpotoyo yo mbiko gu kpakaraapai du rogo gi “kusa rago” re. (2 Tim. 3:1) Ono mbiko wa i aberã kina patiyo  angianga Yekova ya, i asonosanga wene pagume na ko te; na i agbianga ngbarago te. Si nirengo nga Yesu adu na pa agu aboro berãko yo naberã tipa gu gayo azingo nga ga toro na kini rungo kpotoyo yo mbiko wai badungu aboro nasogo Mbori na ki zanga raka kuti gako arugute. I ima ino padu yo ni aboro ingaapai na i nabi gu kereapai namanga rogo zegino mbiko ga aboro ingaapai. Yekova ima rugatiko na pa agu aboro narungo kpotoyo yo re; ko nafu wasa fuyo rogo Fugoko yo na kini fu ngbarago fuyo rogo gayo raka.—Oni gedi Yezekere 5:11; 9:4.

8. Oni sakingo rogo wai yo rengbe padu boro ni bayee ni ka ye na ngbarago.

⁸ “Aboro ngbarago nga bayee aboro, bambiko i adú ni adikumbo zegino, NW.” (Mt. 5:5) Waigu rengbe padu boro ni bayee ni ka ye na ngbarago? Ho aboro aye ka gbia gu ndikidi inohe ni nga ga rengo, i namanga ariapai amanga. Ti kura regbo, si rengbe kadu nga i anaamangaapai ngbaome na kidu ni aboro papaya na ni zingizingi yo. Ono awere i ima ukadi “vovo boro” na i nayugo “inapai, na weneringise, na umbasitise, na zera, na gbanga hipai.” (Koro. 3:9-12) Ni sangbana gipai re, i naraka gu raka awere du ni zezeredihe na nyemuse gbiati ngbarago. Kurigure, Fugo Mbori nakidohe nga ngbatunga agi aboro re “adia kumbo ringara.”—Tam. 37:8-10, 29.

9. (a) Rogo gini gene yo bayee aboro nika du ni “adikumbo zegino”? (b) Tipagine rengbe agu aboro “gomoro amanga yo na gomoro ime tipa rurupai” kadu ti ni na ngbarago?

⁹ Ginipai Yesu aaida ka gumbaha ho ko aya ni bayee aboro nika du ni “adikumbo zegino”? Ga Yesu mbedimbedi abawiriki nika dia kumbo zegino ho i nika zogarago ni ni abakindo na ni aboromotumo. (Yugo. 20:6) Ono tie, agu amirioni aboro adunga na gu maabangirise nga ga raka ngbangbaturũ yo ya nika diakumbo zegino rogo gu gene yo nga i nika raka rogoho nyeanye kindi ni rengberengbeyo rogo zereda gbiati ngbarago. Kina gu ngisa aboro re du du na ngbarago mbiko gupai nga ‘gomoro namanga yo na gomoro ime tipa rurupai.’ (Mt. 5:6) I nika mbiisa gayo gomoro gbiati gomoro ime dunduko nga ga toro tipa rurupai rogo vovo zegino. (2 Pet. 3:13) Ho Mbori nika nyasariipa gbegberẽ apai ni dunduko, ruru aboro nika du na ngbarago na i arungongo berewe kpotoyo yo mbiko gu gbegberẽ apai aboro amangaha te.—Tam. 37:17.

10. Rogo gupai yo nga kadu na inapai nga gine?

¹⁰ “Aboro ngbarago nga airainapai, bambiko i ainapai fuyo, NW.” (Mt. 5:7) Ka yugo inapai nga kadu dawedawe, kadu na wesewese nyemuse, gbiati nunga, naida ka ya, ka yugo nunga fu agu aboro narungo. Ono tie, anga du na inapai gbua nga kina du na nunga koyo du aboro ni te. Rogo Ziazia Kekeapai yo, du na inapai nakoda mangapai tipa ka undo kura aboro.

11. Ginipai rengbe ani ka wirikaha tipa du na inapai ti gu sanza nga ga boro Somorona?

¹¹ Oni gedi Ruka 10:30-37. Ga Yesu sanza nga ga boro Somorona nayugo rogo gupai yo wenengai nga ka yugo inapai. Nunga gbiati inapai afõngbadu boro Somorona yo ko ki mangipai ka undo gu kumba naadu rogo rungo. Tingbafuo Yesu pe gu sanza re, ko aya: “Mo ndú ki mangi kina wo a.” Sidu, ani rengbe ka sana tirani nga: ‘Ya mo mi namanga kina gu bangisapai re? Ya mo mi namanga gupai gu boro Somorona naadu na nunga re amangihe? Ya mo mi rengbe ka yugo inapai gbe na kini yugu wenesino mangaapai koyo du agu aboro ni narungo? Ni kpiapai, ya mo mi rengbe ka undo sosono akuare aKristano, adekurugbo, gbiati agu agude adunga avunguyo ni airisi Yekova ya? Ya mo mi rengbe ka “nyákasa agu yo nawo” watadu du rogo bakere gberãrago?’—1 Tesa. 5:14; Yak. 1:27.

12. Wai du padu na inapai aye na ngbarago?

 ¹² Ono wai du tie padu na inapai aye na ngbarago? Ho ani ayugo inapai ni fu aboro, ani nagbia gu ngbarago naye ti gamahe. Kurigure, ani naino gupai nga ani nafu ngbarago fu Yekova. (Amo. 20:35; oni gedi AEbere 13:16.) Nibipa gu boro nayugo inapai, Bakindo Davide aya: “Yekova abanda ni, ki ka kuti ni ni ungani; ni adu ni boro maku zegino.” (Tam. 41:1, 2) Ka ani ayugo inapai gbiati nunga koyo du aboro ni, Yekova nika inapai a furani na ani kidu na ngbarago nyeanye kindi.—Yak. 2:13.

13, 14. Gini ngbanya du dagba gu kpotoseyo du ni ziaziaha na ngbarago?

¹³ Yesu aya, “Aboro ngbarago nga agu yo du ziazia kpotoyo yo, bambiko i abí Mbori, NW.” (Mt. 5:8) Tipa kpotoraniyo du ziazia, si naida ani du gigiri kpotoraniyo na gaani nyemuahe kidu ni iriirihe. Si naida ani banda gaani aberã ni gigirihe tipa gupai nga Yekova idi na gaani irisombori.—Oni gedi 2 AKorindo 4:2; 1 Tim. 1:5.

¹⁴ Agu aboro du kpotoyo yo ni ziaziaha ima rengba kadu na wene pagume na Yekova, nga guko naya: ‘Aboro ngbarago nga agu yo nazunda gayo aremu.’ (Yugo. 22:14) Rogo gini gene i ‘azunda gayo aremu’? Mbedimbedi aKristano “nazunda gayo aremu” rogo gu gene yo nga i gigiri bangiri Yekova na i nika fu gu raka fuyo zanga kpio na i kini raki rogo nyenye ngbarago rogo gayo bangiriba ngbangbaturũ yo. Gu bakere rimbasa aboro du na maabangirise ka raka auru kpotosende ima rengba kadu a na wene pagume na Mbori ni abakureako. Zavura awere, i ‘nazunda gayo aremu, na kini vurusi he ni kure Wiri Kandoro.’—Yugo. 7:9, 13, 14.

15, 16. Waigu rengbe agu aboro du na ziazia kpotoyo yo ka ‘bi Mbori’?

¹⁵ Ono rogo gini gene tie agu aboro du na kpotoyo yo ni ziaziaha “abi Mbori” baraho duhe ni nga boro ho sa “ka bi [Mbori], ki nye ni ungani wa sa te”? (Gate 33:20) Gu fugo Giriki nga “bi” ima rengba ka yugo gupai nga “ka bipai berãse yo, ka rugatise na pai, ka inopai.” Agu aboro nabi Mbori na ‘gu bangirise nga ga kpotoseyo’ nga agu aboro naima ye ki iniko nzunzu, na kini kpinyemu gako asino. (Ef. 1:18) Yesu aima yugo kpia Mbori teketeke, sidu, ko ape gupai nga: “Gu ni bi re ni bi Buba.”—Yo. 14:7-9.

¹⁶ Kurii gu nga ga ino asino Mbori, ndikidi airisimbori ‘nabi Mbori’ ni biyo gu gene ko aundo yo ngbaha. (Eyo. 42:5) I ‘nabi Mbori’ a ni maa yo ‘gu bangiriyo nga ga kpotoyo yo’ kuti gu wene amaku Mbori nakidopaha tipa agu aboro namanga nyanyaki asadatise ka nye ni ziazia yo na ka irisoko ni ruruyo. Na mbedimbedi aKristano nika bi ndikidi bibi Yekova ho i nika zingisa yo ni ku ngbangbaturũ yo.—1 Yo. 3:2.

17. Tipagine du amangi zereda ti ni na ngbarago?

¹⁷ Yesu ape gupai berewe nga: “Aboro ngbarago nga aboro azarõ, NW.” (Mt. 5:9) Agu aboro namanga diandue ka manga zereda na bawene ndupai beyo kadu na ngbarago. Gu bawiriki nangia Yakoba akepai ki ya: “Zuzu rurupai du ni rũrũ he rogo zereda fu agu yo namanga zereda.” (Yak. 3:18) Ho du kpakarapai ni dagbarani na boro rogo dungurati watadu kporo, ani ima rengba ka kpara fu Mbori tipa ko undo rani ani du ni amangi zereda. Rogo gi gene re, Yekova nika fu gako ziazia toro si ki undo rani ani yugu agu asino nga ga aKristano na ani kidu na ngbarago kisusi. Yesu anyakasipa wai duhe ni nyanyakipa pai ka manga diandue tipa ka manga zereda ho ko aya ni wẽ: “Were ka mo agama ga gamahe bamotumo yo, mo ki tingidi he si ngia pai dagba roni na wirinamo, mo ki he ga gamahe barangba bamotumo yo, ki guari, mo ki mbakadi pai dagba roni na wirinamo mbata, mo nikaye ka gama ga gamahe.”—Mt. 5:23, 24.

18, 19. Tipagine rengbe aKristano kadu ti ni na ngbarago si ki vura du vurũ nga i narungosi yo?

¹⁸ “Ngbarago fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re, NW.” Ginipai du Yesu aaida ka gumbaha? Ko andu kumbatayo ki gumba gupai nga: “Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe: bambiko kina wo i amangi anebi nadu mbata fu roni.” (Mt. 5:11, 12) Ho i aata amokedi ni na kini zayo nga ka i tungusinga pai ya, ‘i aguari barangba abororondo, rago ningba angba ti yo.’ Rengo ngaha nga, i aagbianga ngbarago agbia ti gu kpata i agbiaha te. Ono tie, rago aangba tiyo “mbiko wa ya yo i re are nahi wasiro tipa [rimo Yesu].”—Amo. 5:41.

¹⁹ Ti gi gaani regbo re, ga Yekova aboro nahipai ahi na ngbarago ho i arungosiyo ni tipa rimo Yesu watadu ho i agbiatiyo ni na nyanyaki aʹasada. (Oni gedi Yakoba 1:2-4.) Wakina agu amokedi re, rago angbanga angba tirani ho i arungosi rani ni te. Ono ka ani nye ni rururani fu Mbori ti regbo aʹasada, Yekova ima rengba ka undo rani ani hipai na wingbaduse. Ni kpiapai, rogo Buza 1944, agu airangbii naazogarago ngbaome akedi aHenryk Dornik na unvurako ku rogo gu bataya nga ga zizi aboro ti regbo vura. Ono tie, agu aboro naarungosi yo aya: “Ka boro sosodinga yo i mangi ai pai te. Gayo arungosiro nafu kina ngbarago fuyo.” Wiriba Dornik aya: “Wa si avura du nga mi aadunga na nyemu gupai nga ka gbia rungosiro te, pa rungosiyo re tipa padu mi na wingbaduse na irisa tipa gimi pa nye ni ruruse fu Yekova anaafu ngbarago fere. . . . Kakaka kparakpee ambedisi re na Yekova, na ko ayugu tiko fere nzunzu ni gu Moundo rengbe ani ka kido kuti ni.”

20. Tipagine du ani ti ni na ngbarago ka iriso “betedi Mbori”?

²⁰ Ho Yekova nga “betedi Mbori,” naidi ni na ani, ani ima rengba kadu na ngbarago si ki vura du vurũ nga ani nagbia tirani na arungosiro tipa gaani idapase, arungosiro kporo, kaza, watadu gbinza. (1 Tim. 1:11) Ani nadu na ngbarago a mbiko gu wene akidohe gaani Mbori nakido paha “nga gu Mbori, arengba nga na re zire ya.” (Tito 1:2) Pa digiso gi ga Yekova akidohe re nika du ni bawenehe kisusi, si nika sa gupai nga agu akpakarapai na aʹasada ani agbia tirani na ni ti gi regbo re, ka si yengo ku berã rani yo ya. Rogo gu Paradizo naye kumbatayo, ga Yekova amaku nika susa gupai rengbe ani ka berãpaha. Na ani nika gbia gu ngbarago ani aagbianga ha mbata ya. Nirengo, ani nika du “na ngbarago tipa gu wenepia du kpaima.”—Tam. 37:11.