1. Waigu airisi Yekova ayugoho nga i nakpinyemu akurayo?

AIRISI Yekova rogo zegino dunduko nga aborokporo sa. (1 Yo. 4:16, 21) I nga agu awirina nakpinyemu tiyo. I namanga ba apai amanga fu awirinayo ti kura aregbo, ono dedede, i nayugo ngbatunga gi nyemuse re rogo rukutu apai yo wa gu nga wene afugo gbiati wene mangaapai. Ho ani amanga pai ni na aboro wenengai na kini berẽpa yo, ani ‘nawirika Mbori, wa du ani ni awiri manguse.’—Ef. 5:1.

2. Waigu Yesu ayugu ga Mbori nyemuse?

² Yesu awiriki Bako teketeke. Yesu aya: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni . . . , bambiko bayee boro nga mi nga irazerangbaduse.” (Mt. 11:28, 29) Ho ani awirika ga Yesu kpiapai ni ‘ni berã pa rurungbura boro,’ gu Barani du ngbangbaturũ yo naida na gaani pai na ani ki gbia bakere ngbarago. (Tam. 41:1) Ani bingo wai rengbe ani ka berãpa aboro rogo gaani ngbadimo kporo, rogo dungurati na gene tungusapai yo.

3. Waigu rengbe kumbakudee ka berãpa diako? (Oni bi gu sura duti tonatonaha.)

³ Si naida akumbakuadee ngbembatayo rogo berãpa aboro rogo gayo ngbadimo kporo. (Ef. 5:25; 6:4) Ni kpiapai, i nangarasa yo nga si naida i ra kporo na adiayo “na rugatinapai.” (1 Pet. 3:7) Rugatinapai gbiati berãpa boro nandu kina sa. Ni kpiapai, gu kumbakudee du na rugatinapai ima ino gupai nga diako nga gako moundo kia tiko rogo dungu agene yo, ono ri na pari kusende te. (Bam. P. 2:18) Ko naberãpa gari aberãpai aberã na kini mangipai na ri rogo irisa yo. Diakumba Kanada yo agumba gupai tipa kumbari nga: “Ko naabingo gimi aberãpai na paha kusende te watadu kaa ya fere, ‘Si aidanga mo du wa gure te’ te. Ko naadegatuko adega a wenengai fere. Ho ko naaundo re ni mi rugu gu bipai du mi na ni tipa pai, ko naamangaha ngba wene gene.”

4. Waigu rengbe kumbakudee ka berãpa diako ho ko amangapai ni na kura adee?

⁴ Gu kumbakudee du na rugatinapai naberãpa diako aberã ho ko afura ni na kura adee. Ko abanga nyemuko tiyo watadu kadu na iraira nyemupai tipa yo te; na ko ayugongo ngbatunga gu nyemupai re ho ko amangasunge ni na aũfugo dagbase watadu Internet te. (Eyo. 31:1) Nirengo, ko nanye ni ruruko fu diako, angianga mbiko kina gako nyemuse tipa ri sa ya ono mbiko gako nyemuse a tipa Mbori na gako sogote tipa gbegberẽpai.—Oni gedi Atambuahe 19:14; 97:10.

5. Waigu rengbe diakumba ka berãpa kumbari?

⁵ Ho kumbakudee angera ni koyo du riko ni nga Yesu Kristo ni gako kpiapai, ko naundo diako ri “nigunde” tiko watadu ri niyugu dudunguro irisa fuko. (Ef. 5:22-25, 33) Padu ri na irisa nika sa ri ri naaberãpa kumbari, isoke ho ko amanga agu asunge ni nga ga siokrasia watadu ho du ko ni na akpakarapai berãko yo. Kumbakudee sa ringara aNgirisi yo aya: “Ti kura aregbo, diare nabi kina kpakpure yo ki ima ino gupai nga pai kinaho nafuda re. Fuani, ri ki mangisunge na gu rugute du rogo Asanza 20:5, zavura ho du he ni nga si naida ri pidi wene regbo apido tipa ka ‘kúsa’ agu apai du berãre yo ka si du nga si nga gupai mi naima rengba ka sakaha na ri.”

6. Waigu rengbe ani dunduko ka ngarasa agude tipa i naabi aboro na nyanyakipa yo, na waigu agude nika gbia undo?

⁶ Ho avunguagude aberãpa tiyo ni dagba yo, i namaa wene kpiapai fu awiriyo. Rengo ngaha nga, avunguagude nga gu bambata aboro du na gu tindiro beyo nga ga undo awiriyo i naabi aboro na nyanyakipa yo. Ni kpiapai, avunguagude rengbe ka yugopai fu awiriyo tipa ka i naaotokanga Bambu Kindo yo ya. Ti regbo asungo, si naida avunguagude gumba gupai fu awiriyo nga si naida i mbu sosono aboro i di riahe mbata. Si ni rengo nga, aboro dunduko rogo dungurati rengbe ka songoda avunguagude. Ni kpiapai, ho gude namangi wenepai ni furani—isoke ka zaka ngbadimo furani—si naida ani fu tambuahe fu ru. Pa manga ani he wo ima rengba kadu na wene sangbanaha kurii gu tooni gude re na si ki undo ru u ini gupai nga “gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi,” NW.—Amo. 20:35.

7. Waigu Yesu ayugu gupai nga ko aaberãpa gu kumba naadu na kisikisi tuko yo, na gini apai rengbe ani ka wirikaha ti ga Yesu kpiapai?

⁷ Ti kura regbo sa ho Yesu adu ni Dekapori yo, aboro aye “koyo du ko ni na kumba naadu na kisikisi tuko, ki nikongodi pai.” (Mk. 7:31-35) Kuba gupai nga Yesu husi ko ku bangiri aboro, ko ‘adi ko ni sa ko ku sa yo’ na ki husi ko. Tipagine ko amangihe ti ni wo? Ga gu kumba kaza re aima rengba ka sako ko bi tiko nga ko arẽnga kadu dagba dungu aboro te. Isoke Yesu ata ino gipai re, ko kini ariako ka husa ko. Si ni rengo nga ka ani husi nga aboro ngba iiriwo agene te. Ono si naida ani berẽpa agu azingo nga ga awirinarani gbiati gayo aberãpai na ani ki yugu wenesino fuyo. Gu mokedi nangia Pauro akepai ki ya: “Ani bérẽ pa akuarani ka nyakasa yo kuti  nyemuse na wene mangaapai.” (Eb. 10:24) Yesu aima rugatiko na wai gu kisikisi tu kumba re adu na ko ki mangipai na ko ngba wene gene. Nga gu bawene kpiapai furani!

8, 9. Gini agene rengbe ani ka berãpa sosono aboro gbiati kazakaza yo ngbaha? (Oni funga akpiapai.)

⁸ Oni naaberãpa sosono aboro gbiati kazakaza yo. I naino gu dungurati nga ga aKristano ti nyemuse, angianga mbiko gu dungu apai i amangaha ya. (Yo. 13:34, 35) Gu nyemuse re du nasarani ani ndu ka undo agu awirina duni sosonoyo gbiati aguyo du na akakaza tipa i ye kadu pati agu adunguratise nga ga aKristano na tipa i ndu gene tungusa wene pangbanga yo. Ani naundo yo ka si vura du vurũ nga i arengbanga ka manga apai ni bakerehe te. (Mt. 13:23) Michael nga gu ko ninaasungo kina ku baa ko rii ngbagida gbarĩgbarĩ aboro ima du na bakere tambuahe tipa gu undo ko agbiaha be gako aborokporo gbiati agu awirina du rogo gako badona nga ga sunge tungusapai. Ko aya: “Mbiko agu aundo i afuhe fere dunduko, mi na rengba kaa ndu tipa badungu adunguratise na kaa ndu dedede gene sunge tungusapai yo. Tungusapai gbaiga ima ngba tire gbe.”

⁹ Badungu aBetere du na sosono aboro rogoho gbiati kazakaza yo. Ababiapai nayugo gupai nga i naberãpa gi ruru amoyambu re aberã ni mangayo mbakadapai fuyo tipa i nitungusipai ni keka yo awaraga na rogo terefuni. Bill du garãko nga 86 nga guko ni naatungusapai ni keka ko awaraga fu agu aboro du rogo agu aba du tuturũ aya: “Ani ima du na tambuahe tipa gu momu du berani nga ga keka awaraga.” Nancy, garãri naima mbeda kuti 90, aya: “Mi naabingo tungusapai ni keka awaraga wa ka i ya kungba keka awaraga du gbua te. Mi naabihe nga si nga sunge tungusapai. Si naida aboro ino rengo!” Ethel, i avunguri rogo 1921, aya: “Igirã nga papara gimi raka. Ti kura aregbo si naambu ambu fere tipa mi vo roko.” Wa vura duhe wo, ri naagbia ngbarago agbia ti tungusapai rogo terefuni na ri na wene aboro beri ri naakaraga tiri fuoyo. Barbara, du garãri nga 85 aya: “Mbiko gupai nga mi naawoka awoka dedede, si ni mbumbuhe fere mi nindu tipa sunge tungusapai dedede. Ono tungusapai rogo terefuni ninaasa re mi naafura na aboro. Tambuahe foro Yekova!” Mbata fu garã sa da, gi badona nga ga gi sosono awirinarani ani abiyo na nyanyakipa yo re afu asa nga 1,228, ki keke awaraga nga 6,265, ki yambuhe na terefuni naima susa bara 2,000, na ki fu awaraga naima susa 6,315! Nirengo, gi gayo bakere asadatise re ima ye na ngbarago ku kpoto Yekova yo!—Snz. 27:11.

10. Waigu rengbe ani ka undo awirinarani i gbia undo ni bakerehe ti agu adunguratise nga ga aKristano?

¹⁰ Oni naaberãpa aboro ba agu adunguratise yo nga ga aKristano. Ani naida awirinarani gbia undo ni bakerehe ti adunguratise. Pa berã ani pa yo nika undo yo i gbia undo ti ni. Ngba gini agene? Gene sa dagba agu akuraha yo nga ka da ba adunguratise yo mbu regbo kindi koyo tipa ka ani agbenga berãyo kusayo ti adunguratise ya. Rengo ngaha nga, ti kura aregbo apai ima rengba ka manga nga gu ani naainongo nga si nika manga ya na si ki sa gupai nga ani da kusa. Ono ka si du nga sino rani du nga kaa da kusa tipa adunguratise, si naida ani berẽpa gu sangbanapai duhe na ni kurii awirinarani na agu aʹariapai rengbe ani ka mangaha tipa ka yugo gupai nga ani naberãpa awirinarani aberã. Oni moi gupai ku berãroni yo nga, aYekova na Yesu du nayamba rani tipa adunguratise. (Mt. 18:20) Si rẽarẽ tipa ani naayugo irisa fuyo ni da ani tipa adunguratise ti regbo!

11. Tipagine du si aida agu aboro i nafu asunge fuyo ti regbo dunguratise mangipai ti ni kuti gu rugute du rogo 1 AKorindo 14:40?

¹¹ Ani rengbe kaa berãpa awirinarani a ni irisa ani gu rugute nga: “I mángi apai dunduko nzunzu ni tangaratangara ha.” (1 Kor. 14:40) Agu awirina i nafu sunge fuyo ti regbo adunguratise nairisa gu rugute re ni mangayo gayo sunge kina vuru gu regbo yo i nafuhe fuyo. Pa mangayo ho wo nayugo gupai nga i naberãpa gu wirina aberã naye tifuo yo gbiati dungurati a. Kura awirina naga tuturũ. Agu akurayo naga na tarambiri tinda aboro ti marã watadu na nduyo. Na agu akurayo rengbe kadu na gayo abadiarogatise angianga aDezire Yekova ya, nga aguyo naida i yego ni ipo ku kporo yo.

12. Tipagine rẽhe arẽ ti ni ani ‘naairisa abaakumba bakere gbe ni nyemuse’? (Oni bi gu sanduki nga, “ Oni Naaberãpa Agu Aboro Nangbembatayo.”)

 ¹² Agu abaakumba namangasunge nyanyaki rogo dungurati na kini ngbembatayo zaaza rogo sunge tungusapai ima rẽ na gaani irisa gbiati nyemuse. (Oni gedi 1 ATesaroniko 5:12, 13.) Si nawira gupai nirengo nga mo ima du na tambuahe tipa gu ome abaakumba amanga tipa ro. Sidu tie, mo yugu gamo tambuahe ni gia mo sangbayo na kini songodi yo, bambiko “i nangera tipa pa mbisimoroni, wa i ka ringbisa pai tipa roni.”—Eb. 13:7, 17.

13. Ginipai rengbe ani ka wirikaha ti wai Yesu aamangapai na aboro?

¹³ Yesaya agumba gupai kumbatayo tipa Yesu nga: “Ko akita nga kamakama nganzi te, ko abisa nga pidapida giri we te.” (Yes. 42:3) Ga Yesu nunga tipa aboro asako ko yugu nunga. Ko aima rugatiko na pa agu aboro naadu na gberãrago na ki du ni rurungbura yo wakina “kamakama nganzi” watadu “pidapida giri we.” Ni sangbana gipai re, ko kini mangipai na yo wenengai na ni hipai. Zavura rukutu agude anaaida aida kadu na Yesu. (Mk. 10:14) Rengo ngaha nga, ani na gu dudungurobipai gbiati tandu yugopai Yesu adu na ni te! Ono ani ima rengba kaa berãpa agu aboro du rogo gaani dagbarago na si nga gupai si aida aida ani mangihe. Gure nakodapa wai ani afura na yo, gu regbo ani afura na yo ti ni, na bagizo gu regbo ani adiaha na yo.

14. Tipagine si aida ani berẽ ti ni kurii pa wai ani afura na aboro?

¹⁴ Wai du si aida ani naafura na aboro? Areme, badungu amirioni aboro ‘narungo,  ki nigbandaka’ be gu kere mangaapai nga ga gbegberẽ ababagiahe, aboro birĩ-zogarago gbiati abarumbatayo rogo pambori. (Mt. 9:36) Ni sangbana gipai re, badungu aboro na kido gbiati maabangirise berewe te. Nairiwo wai tie duhe furani ni nyanyakipa pai tipa ani naafura na kini mangisunge na agu afugo nayugo gupai nga ani namangapai na yo ngba wene gene na ani naberãpa yo aberã! Nirengo badungu aboro naida na gaani pangbanga angianga kina mbiko gupai sa nga ani na inohe nga ga Ziazia Kekeapai na kini mangisunge na ni wenengai ya, ono i naida na ni a mbiko gupai nga ani na nyemu yo tirani na ani nayugo irisa fuyo.

15. Gini agene rengbe ani ka berãpa agu aboro ngbaha ani amanga dezirepai fuyo?

¹⁵ Badungu agene duho rengbe ani ka yugo gupai ngbaha nga ani naberãpa agu aboro aberã ani amanga dezirepai fuyo. Ni kpiapai, mangasunge na asanahe nga wene gene yugopai. Si naida ani naasana agu asanahe du ni wenehe na nga gu nayugo irisa. Bazakigene sa naamanga sunge tungusapai rogo gu dagbarago du aboro rogoho na zee anaasananga agu asanahe rengbe ka ba zee ti aboro te. Si anaakoda agu asanahe boro arengbanga ka ino karagapai tipaha ya watadu boro narengbe ka karagapai kutini ni irairaha. Ni kpiapai, ko anaazanga sana agu asanahe du wa, ‘Mo ini rimo Mbori?’ watadu ‘Mo ini guhe nga ga Mbori Kindo?’ Kuba gure, ko anipe pai wa gu nga, “Mi wiriki gupai rogo Ziazia Kekeapai yo nga Mbori na kina rimoko ti ni. Ya mo ka mi yugu gu rimo re foro?” Anga gipai gi wirina re aamangaha nga gupai si aida si niimangi rogo arago dunduko te, mbiko sino aboro na aboro ni bakiakia. Ono tie, si naida gupai dedede nga ani naaberãpa agu aboro aberã du rogo gaani dagbarago na kini yugu irisa fuyo, gere nakoda gupai nga ani ini agu aboro du rogo gu rago du ani rogoho wenengai.

16, 17. Ka si du nga ani naberãpa agu aboro aberã du rogo gaani dagbarago nga ga tungusapai (a) gini aregbo si aida ani ndu fuoyo ti ni (b) bagizo regbo wai si aida ani dihe na yo?

¹⁶ Gini aregbo si aida ani ndu fuo aboro ti ni? Ho ani atungusapai ni kporo na kporo, ani nga agu agino i ayamba nga yo ayamba ya. Nairiwo wai tie duhe ni nyanyakipa pai tipa ka ndu ti gu regbo aboro narengbe arengba ka ida ka fura na ani ti ni! (Mt. 7:12) Ni kpiapai, ya mo aboro nidu na nyemu kaa ra ni gbangaha ti digido aposo rogo gamo dagbarago? Kangia wo duhe, mo ima rengba ka tona gamo tungusapai mbata bangiri gene, rogo gu ba du na dungu aboro rogoho, watadu mo ima rengba ka karaga tiro fuo agu aboro mo afura na yo mbata nga agu yo mo naima du na gu kido nga i nika ida aida ka fura na mo.

¹⁷ Bagizo regbo wai si aida ani dihe na aboro? Badungu aboro du na dungu apai tiyo, sidu, si ni wenepai ani di regbo na yo ni guruhe, gbe ho ani andu ni fuoyo ti bambata regbo. Sakapai ki nyasihe vuru guru regbo yo ngba ti dia bakere regbo. (1 Kor. 9:20-23) Ka aboro bi gupai nga ani ima ino gupai nga dungu apai ima nge tiyo, i nika duadu zaaza tipa ka ida ani ye berewe. Si tie ziazia nga, si naida ani yugu ga Mbori zuzu toro gene tungusapai yo. Ka ani amangaha wo, ani nika da nzunzu ni “ga Mbori abadiasunge.” Yekova ima rengba ka mangasunge na ani tipa ka undo boro ni wiriki rengo.—1 Kor. 3:6, 7, 9.

18. Ka sidu nga ani naberãpa aboro, gini amaku rengbe ani kadu na maabangirise ka gbiaha?

¹⁸ Sidu tie, si naida ani mangi bakere asadatise tipa kaa berãpa aboro—rogo gaani ngbadimo kporo, rogo dungurati, na gene tungusapai yo. Ka ani mangihe wo, ani nika gbia dungu amaku awere na kumbatayo. Atambuahe 41:1, 2 naya: “Boro maku [ngbarago] nga gu ni naberã pa rurungbura boro! Yekova abatasa ni rago gbigbitapai; . . . ni adu ni boro maku zegino.”