YESU ape gupai ti kura regbo sa nga: “Gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi.” (Amo. 20:35, NW) Gu bangua rengo re nabipa gaani pagume na Yekova. Tipagine duhe ti ni wo? Yekova ima gama badungu ahe furani nga gu nafu ngbarago furani, ono ani ima rengba ka gbia bakere ngago ni gama ani he fu Yekova. Gini gamahe rengbe ani ka fuhe fu Yekova? Asanza 3:9 naya: “Mo írisi Yekova na gamo nyanyakipa ahe dũ,” NW. Gaani “nyanyakipa ahe” nakoda gaani regbo, gaani tandu mangaapai, gaani ome, gbiati agu ahe du berani. Ho ani amangasunge ni na agu ahe re tipa ka sonosa ndikidi irisombori, gure nga ani nafu gamahe fu Yekova, na manga ani he wo naye na bakere ngbarago furani.

Ho daha ni tipa agu ahe du berani, ginipai nika undo rani ka ani zanganga fu gaani gamahe fu Yekova ya? Gu mokedi nangia Pauro agumba gupai fu AKorindo nga i ‘nimoi gayo ahe pati yo’ watadu i nikpara he kubani ni gamahe. (1 Kor. 16:2) Ginipai rengbe mo ka mangaha ka mo aida ka gbia kura apai nibipa agu agene fu gamahe du rogo gu rago du mo rogoho? Mo bi gu sanduki du kusende re.

Anga aringara dunduko i narengbe ka fu gamahe rogoho rogo Internet te. Ono tie, agu arugapai du tipa fu gamahe rogo kura agene kina rogo gu bangiriba nga ga internet du tipa fu gamahe. Rogo kura aringara, kura kekeapai gudu ho rogo gu bangiriba re nga gu nafuka akaragapai kuti agu asanahe aboro asanaha dedede tipa fu agamahe.