GU BORO nawisigopa rago singia bavugumo watadu bawege nika manga, ninaasungo kaa wisigo gu makana nayugo gini regbo si nika manga ti ni na wai si nika manga. Ni naabi gupai nga kere bavugumo ima mbeda ka manga rogo gu rago badungu aboro araka rogoho. Mbiko wa duhe nga ni nabaka bangirini tipa padu aboro wenengai, ni naasada ti ni na omeni dunduko tipa ka fu zahe fu agu aboro re mbata fu regbo susi.

Wakina gure, Yekova nafu zahe awere furani tipa “bakamikami yuge” nga gu du ni kerehe kisusi agu apai ani narengbe ka giaha ngba agu aboro na wisigopa arago. Waigu ko amanga gipai re? Na tipagine rengbe ani ti ni kadu na gu kido nga ko ima fu regbo fu aboro rengbe arengba tipa i mangipai kuti gu zahe re? Tipa ani gbia karagapai, ani makianga bete agu azahe Yekova afuhe mbata kusayo.

Ti agu aregbo i aakeka Ziazia Kekeapai ti ni, Yekova afu zahe tipa angbatunga “bakamikami yuge,” watadu mangapai nga ga sarangbanga, nga gu ko nika ye na ni kurii agu aboro naká ka degatuyo kuti gako zahe. (Snz. 10:25; Yere. 30:23) Rogo agi apai re ni basasa, ko apepa gipai re fu agu aboro gipai re aaye kurii yo mbu regbo kindi kumbatayo na ki fu rugapai fuyo tipa gupai si aaida i mangihe tipa ka giasangba ko. (2 Aba. 17:12-15; Nem. 9:29, 30) Tipa ka undo aboro i mangi agu aˈariapai si aidaha, ko naamangasunge dedede na gu gako amoyambu du auru kpotosende tipa i gumbapa gi sarangbanga re na ki undo aboro tipa i bi gupai nga si naida i mangipai ni ipo.​—Amosa 3:7.

Noa nga kpiapai sa nga ga gu boro Mbori amangisunge na ni tipa ni gumbapa gako sarangbanga. Tipa dungu agarã, ko afu zahe fu agu aboro naaraka ti gako regbo nga aguyo nagasi be manga wasiwasi apai na zuu tipa gu Ime Akangbii naaye kumbatayo. (Bam. P. 6:9-13, 17) Ko agumba gupai fuyo a si aaida i mangihe tipa ka bata be gu Ime Akangbii, si ki sa gupai nga i yambu ko kusa nga “batungusi rurupai.”​—2 Pet. 2:5.

Wa Noa avura manga ome, agu aboro naraki mbata fu Ime Akangbii aká ka gia gupai Mbori agumbaha. I ayugu gupai nga i aadunga na idapase te. Ni sangbana gipai re, i akpiki ho Ime Akangbii “aye ni ki nirogo yo dunduko ku sa yo.” (Mt. 24:39; Eb. 11:7) Wa digido regbo aambeda, i aarengbanga ka pe gupai nga Mbori aafunga zahe fuyo te te.

Ti gu kura aregbo, Yekova afu zahe fu aboro mbata fu gu “bakamikami yuge” nga ga gako sarangbanga tona. Wa si avura du wo, ko anaabihe nga, agu aboro gipai re nika ye kurii yo ima gia gu zahe re mbu regbo kindi kumbatayo kidu na regbo tipa manga ariapai. Ni kpiapai, ko afu azahe mbu regbo kindi kumbatayo tipa agu Ambusa Nadu Bawe nga gu si adu nga si nika ye kurii aboro Ezipeta. Kpiapai sa nga, Yekova akedi aMoize na Arona tipa i fu zahe fu Faro na gako amoyambu tipa gu saba gberãngbi, nangia mai na morogumba nga gu nagberesi pa ahe. Wa si adu nga gu morogumba re nika tona tifuo girorago, ya mo Mbori afu regbo fuyo rengbearengba tipa i gbata abambu na ki oro kutiihe yo? Ziazia Kekeapai nagumbapai nga: “Gu ni nanigunde ti sangba Yekova dagba ga Faro amoyambu yo, ni ki nisosodi gani akanga i óro ku dimo yo na gani zogozogo anya.” (Gate 9:18-21) Si tie ziazia nga, ga Yekova zahe aima dia regbo si ki sa gupai nga ka agu aboro namangipai ni ipo gbianga ambugo wa kura aboro ya.

Faro na gako amoyambu aima gbia zahe a mbembedi kuti bawe gberãngbi. Wa si avura duwo, i aka gu zahe re ka i amanganga pai kutini ya. (Gate 4:22, 23) Ni sangbana gipai re, bambata awiriyo dunduko akpiki. Nga gu riko gbegberẽpai nangiaha re! (Gate 11:4-10; 12:29) Ya mo i adu na regbo beyo tipa ka mangapai kuti gu zahe re? Ii! Moize afu zahe nibasa fu aYisaraere tipa agu agberãngbi bawe naaye kumbatayo  na ki gumba gupai fuyo si aaida i mangihe tipa ka batasa gayo aborokporo. (Gate 12:21-28) Bange aboro wai namangipai kuti gu zahe re? Si nangera wa aboro bangeyo naima da ti amirioni biata kodihe na aYisaraere na gu “rimbasa kungba aboro” naadunga ni ngbatunga aYisaraere ya gbiati aEzipeto nabati be ga Mbori sarangbanga ki guari Ezipeta yo.​—Gate 12:38.

Wa agi akpiapai re ayugoho, Yekova ti aregbo dunduko ni naabihe nga regbo ima du rengbearengba tipa aboro mangipai kuti gako zahe. (Pa Rug. 32:4) Tipagine Mbori naamangapai ti ni wa gure? Gu mokedi nangia Petero asaki rogo gipai re yo ki ya, si wo mbiko Yekova “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Pet. 3:9) Ni rengo, Mbori naberãpa gako aboro aberã. Ko naida i saberã yo na ki mangi agu aˈariapai si aidaha mbata fu uru gako sarangbanga da.​—Yes. 48:17, 18; Rom. 2:4.

Areme a, aboro dunduko si aida i mangipai kuti gu nyanyakipa zahe i atungusapa ha rogo zegino dunduko. Ho Yesu adu ni auru kpotosende, ko afu gu zahe nga gi sino raka re nika nyasa barambeda kumbatayo ti regbo “bakere gberãngbi.” (Mt. 24:21) Ni bipa gu sarangbanga du kumbatayo, ko afura tipa gu sangbanebi nasakapai futufutu tipa agu apai apefuoko nika bihe na ki susi rogoho wa regbo nikaa mbeda. Yesu asakipai tipa gu nyanyakipa apai nga gu nikaa manga rogo zegino dunduko ti gi gaani regbo re.​—Mt. 24:3-12; Rk. 21:10-13.

Na ngbanya na gi sangbaanebi re, Yekova nazungodi aboro dunduko tipa i sia ka iriso ko na ka giasangba ko. Ko nakpinyemu gupai nga agu aboro du na giasangba raki wene raka awere na rogo gu gako vovo zegino du kumbatayo nga gu ruruapai nika du rogoho. (2 Pet. 3:13) Yekova na nyemu ka undo aboro i du na idapase kuti gako akidohe. Ko naundo yo i mangi gipai re ni fuko gu pangbanga fuyo nga ga bata. Gi pangbanga re nga gu “wene pangbanga nga ga ngbi” watadu Kindo, nga gu Yesu agumba gupai nga “i atungusa ha rogo zegino dunduko mbiko ndika fu arikaaboro dũ.” (Mt. 24:14) Mbori ima mbakada ndikidi airisiko tipa i mangi dezirepai watadu ka tungusapa gu pangbanga naye be Mbori rogo aringara wa 240. Yekova naida dungu aboro degetuyo kuti gi zahe re na ki bati be gu “gbarasahe” gako ruru sarangbanga nika ye na ni.​—Zef 1:14, 15; 2:2, 3.

Anga gupai nyakipaha tie nga, si ngia Yekova ninaafu gu regbo rengbe arengba tipa aboro mangipai kuti gako zahe te. A wa goapai ayugoho, ko ti aregbo dunduko ni naafu regbo rengbe arengba. Kuba gure, gu nyanyakipa sanahe duho nga: Ya mo aboro adegatuyo kuti ga Mbori zahe mbata fu regbo susi? Wa du ani ni ga Mbori abamangisunge, ani naandunga andu kindi kumbatayo tipa kaa undo badungu aboro wa rengbe omerani na ni tipa i bati ti regbo digido gi sino raka re.