1-2. (a) Ginipai abazogo nga ga zegino yo nika takapandehe barambeda kumbatayo? (b) Gini asanahe si aida akaragapai kutini?

ONI BERẼNGA gupai nga agu abazogo nga ga zegino yo mangi gu takapandepai i agumbapaha kumbatayo tipa ‘zereda, na ngbabase.’ I nika du na rukö nga zereda ima ye ku rogo zegino. Agu abazogo nga ga zegino yo nika berã gupai nga i ima rengba ka diabe agu akpakarapai dunduko nga ga zegino. Ono ome adunga beyo tipa ka rugusa gupai nika manga fuo gure te! Tipagine duhe ti ni wo? Bambiko ringbisihe kuti gu sangbanebi nga ga Ziazia Kekeapai, ‘gberãngbi nika ye ku ri yo ni ba sa, na ka i abata nga wa sa ya.’​—1 Tesa. 5:3.

² Nyanyakipa asanahe kinaho si aida karagapai kutini, agu asanahe re nga: Ginipai nika manga mbata fu “bakere gberãngbi”? Ginipai Yekova nika ida gupai nga ani mangihe tigu regbo re? Na waigu rengbe ani ka mbakadatirani awere tipa ka nye ni rururani ti regbo bakere gberãngbi?​—Mt. 24:21.

3. Ringbisihe kuti Yugoti 17:5, 15-18, waigu Mbori nika gbarasa “Babera du ni bakere he”?

³ Oni gedi Yugoti 17:5, 15-18. I nika gbarasa “Babera du ni bakere he”! A wa i nigumbaha kusayo, abazogo nga ga zegino yo adunga na ome kurii gupai nika manga ti gu regbo re te. Tipagine duhe ti ni wo? Bambiko “Mbori [nika maa] sangbako ku  kpotoyo yo i mangi he.” Ginihe du nga gu sangbako re? Gu sangbako re nga ka gbarasa bariwara ngbii ziree pambori dunduko, kodihe na agu akanisa i aya tipaha wẽ si nga ga aKristano. Mbori nika maa sangbako ku kpoto “zamba nyarinde” yo du na “gbangaru bawe.” Gu gbangaru du bawe re narukuba agu azogarago dunduko nga ga wiri aboro nga gu nasongoda “zamba nyarinde”​—du nga United Nations (Yu-eni). (Yugo. 17:3, 11-13; 18:8) Ho agu azogarago nga ga wiri aboro re nika zubo ziree pambori ni, gure nika yugo gupai nga bakere gberãngbi ima tona. Si nika manga ni ipo na si kidu na sangbanaha kurii aboro auru kpotosende.

4. (a) Gini nduapai si awiraha wa abazogo nga ga zegino yo nika fuhe tipa zubo ziree apambori? (b) Ginipai si angera wa agu aboro naanidu mbata rogo ziree pambori nika mangaha?

⁴ Ani ainongo gu nduapai abazogo nga ga zegino yo nika fuhe tipa zubo Babera Du na Bakere Ome Ti Ni te. I ima rengba ka ya agu apambori du rogo zegino du naká na zereda na si naˈasada dedede kadu na maapai kurii agu apai azogarago amangaha. Watadu i ima rengba ka ya apambori ima dungura bakere aũkumuko ni kerehe gbiati ahe. (Yugo. 18:3, 7) Ho abazogo nika zubo ziree pambori ni, si nangera wa i agbarasanga agu aboro dunduko du rogo ziree pambori te. Kuba gure, si nangera wa ka i ya abazogo nika nyasa riipa ziree apambori. Bara sa kindi i nika gbarasa ziree apambori, agu aboro naanidu yo nika ye ka ino gupai nga gene berewe be gayo abarumbatayo rogo pambori te na si nangera wa ka i ya i nika kparatiyo kusayo ti agu apambori re.

5. Ginipai Yekova nakido ho tipa bakere gberãngbi, na tipagine?

⁵ Ziazia Kekeapai ayugongo bagizo gu regbo gbarasa Babera Du na Bakere Ome Ti Ni nika diaha te, ono ani ima ino gupai nga si adianga bakere regbo te. (Yugo. 18:10, 21) Yekova ima kidohe nga ko nika ‘guruso gu rago’ nga ga gberãngbi mbiko gako “siasia aboro” bati gbiati ndikidi pambori. (Mk. 13:19, 20) Ono ginipai Yekova nikaa ida gupai nga ani mangihe bangbanda tonatona gberãngbi na gu vura nga ga Aramegido?

6. Gini kurapai si aida ani mangihe kupati kpara tirani kusayo ti ziree pambori?

⁶ A wa i asakipai tipaha rogo gu kekeapai nasusi, Yekova naida airisiko kparatiyo kusayo ti Babera Du na Bakere Ome Ti Ni. Ono tie, anga kina kparatise sa kusayo si aidaha te. Si naida ani diberã ka songoda ndikidi irisombori​—gu ziazia irisombori nga ga Yekova. Ani bingo agene ue rengbe ani ka manga gupai re ngbaha.

7. (a) Waigu rengbe ani kaa ndu kindi kumbatayo kaa songoda ga Yekova ruru arugute tipa wene mangaapai? (b) Waigu AEbere 10:24, 25 anyakasapa ndu gupai duhe ti ni ni nyanyakipa pai ani naadungura tirani gbe awere?

⁷ Ni bambataha, si naida ani nindu kindi kumbatayo kaa songoda ga Yekova ruru arugute tipa wene mangaapai. Si aidanga ani idi na ga zegino gbegberẽ sino mangaapai te. Ni kpiapai, ani aidanga na ai ngbatunga wasiwasi mangaapai, kodihe na rogatise dagba kumba na kumba watadu dee na kurari gbiati kodaba kumba na kurako watadu dee na kurari te. (Mt. 19:4, 5; Rom. 1:26, 27) Uepai nga, si naida ani naandu kindi kumbatayo kaa irisombori na akuarani aidipase. Ani namanga gipai re rogo ai ba, singia rogo aBambu Kindo, rogo akporo watadu rogo gbuko yo. Ka kina ginipai vura manga vurũ, ani ambunga nduge tipa adunguratise te. Nirengo, si naida ani nidungura tirani na akuarani “ki nimangi he susi, wa bi [ani] he ya gu uru re si nambeda.”​—Oni gedi AEbere 10:24, 25.

8. Si nawiraha wa gu pangbanga ani atungusaha nika ariatihe wai kumbatayo?

⁸ Si nawiraha wa gu pangbanga ani atungusaha awere nika aria tihe aˈaria ti regbo bakere gberãngbi. Awere, ani natungusa gu wene pangbanga nga ga Kindo na kini asadi ka sa aboro ni abawiriki. Ono ti gu regbo re, ani nikaa tungusa gu pangbanga nika du ni nyanyakihe wakina Morogumba. (Yugo. 16:21) Si rengbe kadu nga ani nikaa tungusapai nga i nika gbarasa ga Satana zegino naabaha barambeda. Fuo bete regbo, ani nika ino gu pangbanga aino ani nikaa tungusaha na wai ani nikaa tungusaha. Ya mo ani nika mangasunge na kina gu bangisa gene ani namangisunge na ni tipa agarã kama awere tipa ka tungusapai na ka yugopai? Watadu ya mo ani nika manga sunge na gu kura gene yugopai kia? Ani ainongo ho te. Ka si vura du nga kina ginipai, si nangera wa ani nika du na gu momu nga ga takapandepa ga Yekova pangbanga sapangbanga na wingbaduse!​—Yeze. 2:3-5.

9. Wai du abazogo zegino nika mangapai kuti gaani pangbanga, ono ginipai du ani na kido tipaha?

⁹ Si nawiraha wa, gaani pangbanga nika sa abazogo zegino i asadi ka rugusa rani nyeanye kindi. Ani nikaa ida ga Yekova undo aida ti gu regbo re kina wai ani akido kuti gako undo tipa sunge tungusapai awere. Ani ima rengba kadu na gu kido nga gaani Mbori nika fu gu ome furani si aidaha tipa ani digisi gupai ko akpinyemu.​—Mika 3:8.

10. A wa i agumbaha kumbatayo rogo Ruka 21:25-28, wai du badungu aboro nika mangapai kuti agu apai nika manga ti regbo bakere gberãngbi?

¹⁰ Oni gedi Ruka 21:25-28. Ti regbo bakere gberãngbi, kina ngba aboro nika zera nga agu ahe dunduko i aaberã gupai nga si nika nyeanye kindi nika gberã dunduko. I nika du rogo “fudifudipai,” na i nika du na gunde nga i nika kpi akpi ti gu kere regbo nga gu naadunga mbata rogo ga aboro raka yo ya. (Zef. 1:14, 15) Ti gu regbo re, si nangera wa raka nika du ni kere kpakarakpakaraha zavura fu ga Yekova aboro. Ani nika gbiatirani agbia na akpakarapai mbiko ani nga aboro zegino te. Si nangera wa ani adunga na agu ahe dunduko berani ani aidaha  te, zavura agu ahe du na nyanyakipaha rogo raka yo.

11. (a) Tipagine berã aboro nika du ti ni kuti aDezire Yekova? (b) Tipagine si aidanga ani gunde ti ni be bakere gberãngbi ya?

¹¹ Kura regbo nika du kinaho agu aboro i nika gbarasa gayo apambori nika du na bakere zinga kuti aDezire Yekova tipa gupai nga i namanga agu apai nga ga gayo pambori kindi. I nika mangasunge na ahe wa Internet tipa kura aboro ini pa gayo gberãrago. Agu abazogo nga ga zegino yo na gayo bazogo nga Satana nika soga rani mbiko gupai nga kina gaani pambori sa i nikaa gbarasanga ha ya. Si nika du wo mbiko gupai nga gu sasa i adu na ni nga ga gbarasa apambori dunduko rogo zegino, i adanga ti ni te. Sidu, berãyo nika du kina kuti rani. Ti gu regbo re, abazogo nga ga zegino yo nika da ni Gogo boro Magogo. * I nika kodatiyo sa tipa ka zubo ga Yekova aboro. (Yeze. 38:2, 14-16) Ani ima rengba ka tona bakabangirani tipa gupai nika manga ti regbo bakere gberãngbi mbiko gupai gbe nga ani ainongo gu futufutuapai nika manga te. Ono tie, pai sa du ani na kido tipaha nga: Si aidanga ani gunde be bakere gberãngbi te. Yekova nika fu agu arugapai afu furani nika batasa rani. (Tam. 34:19) Ani nika ‘ngéra ku ari yo ki tumba rirani’ bambiko ani nika ino gupai nga ‘rago tumo rani nambeda.’ *

12. Waigu “kangara moyambu” adigi nimbakadi rani tipa gupai naye kumbatayo?

¹² “Kangara moyambu” aima digo ni mbakadi rani tipa ani nye ni rururani ti regbo bakere gberãngbi. (Mt. 24:45) I ima manga gipai re ngba dungu agene, na kpiapai sa nga vurube gu gaani bakere adunguratise namangi rogo 2016 kuti 2018. I aima nyakasa rani rogo agu adunguratise re tipa ani nyakasi agu asino ani aidaha wa ani ambeda kuti ga Yekova uru. Ani fugungo pai tipa bete agu asino re.

13. Waigu rengbe ani ka nyakasapa gaani du ni ruruse fu Yekova, na tipagine si aida ani mangihe ti ni wo?

¹³ Du ni ruruse: Rii gu bakere dunguratise naamangi rogo 2016 angia, “Mo Nye Ni Rururo Fu Yekova!” Gu bakere dunguratise re ayugu gupai furani nga ka ani du na mbembedi pagume na Yekova, ani nika du ni rururani fuko. I atingidi rani na gupai nga ani rengbe ka mbeda na Mbori rogo kparakpee yo na wisigo Fugoko nga Ziazia Kekeapai. Manga ani agu apai re nika fu gu ome furani ani aidaha tipa ka diabe akpakarapai. Wa ga Satana zegino ambeda ka digo, ani nika gbiatirani agbia na agu aˈasada nabipa du ani ni rururani fu Mbori na gako Kindo. Si nawiraha wa aboro nikaa sawia rani asawia kindi. (2 Pet. 3:3, 4) Gipai re nikaa manga amanga kindi mbikopa zanga ani songoda ga Satana zegino. Si naida ani nyakasi gaani padu ni ruruse awere tipa wa ka ani nye ni rururani ti regbo bakere gberãngbi.

14. (a) Gini ariapai nika manga nibipa agu awirina nangbembatayo rogo apai auru kpotosende? (b) Tipagine si nikaa ida gupai ti ni nga ani du ni rururani ti gu regbo re?

¹⁴ Ti regbo bakere gberãngbi, ariapai nika manga nibipa agu awirina nangbembatayo rogo apai auru kpotosende. Regbo nika du kinaho i nika dungura gu mbedimbedi aKristano du auru kpotosende ku ngbangbaturũ yo tipa i so gu vura nga ga Aramegido.  (Mt. 24:31; Yugo. 2:26, 27) Gere nayugo gupai nga gu mbedimbedi aKristano du rogo Riigbu Bipasunge adunga ho berewe na ani auru kpotosende ane te. Ono tie, bakere rimbasa aboro nika nye ni mbakadimbakadi yo. Agu awirina nga akumba naima rẽ du dagba gu kura akandoro yo nikaa ngbembatayo rogo apai yo. Si nika ida ani yugu gupai nga ani ni rururani fu Yekova ni songoda ani agu awirina re na kini mangipai kuti agu arugapai nikaa ye be Mbori vurube yo. Pa bata ani nika ru riipa manga ani he wo!

15. Waigu rengbe ani ka nyakasa gaani hipai, na tipagine duhe ti ni ni nyanyakipa pai ka mangaha wo awere?

¹⁵ Hipai: Rii gu bakere dunguratise namangi rogo 2017 angia, “Ka Omeroni Batingo Ya!” Gu bakere dunguratise re aundo rani tipa ani du na rengba ka hi aˈasada. Ani awiriki gupai nga pa hi ani pai arunga riipa gu regbo du apai ni wenehe te. Ani rengbe ka nyakasa gaani hipai ni kido ani kuti Yekova. (Rom. 12:12) Ka bangirani ya gonga ti gu ga Yesu kidohe nga: “Gu ni nika hipai ki da ho ragoho ka diga ni, ni abáta abata” ya. (Mt. 24:13, NW.) Gi kidohe re nayugo gupai nga si naida ani nye ni rururani ani ki vura kaa gbiatirani vurũ na akpakarapai. Ka ani hi gaani akpakarapai dunduko awere, gaani idapase nika du nyanyaki mbata fu bakere gberãngbi tona.

16. Ginipai nasarani ani du na wingbaduse, na waigu rengbe ani ka nyakasa gaani wingbaduse awere?

¹⁶ Wingbaduse: Rii gu bakere dunguratise naamangi rogo 2018 angia, ‘Mo Du Na Wingbaduse’! Agu agumbapai naadu rogo gu bakere dunguratise re aundo rani ani tingidi gupai nga ani na wingbaduse mbiko gaani tandu te. A kina wai duhe tipa hipai, ndikidi wingbaduse naye ti kido ani kuti Yekova. Waigu rengbe ani ka nyakasa gaani kido kutiko? Ani rengbe ka nyakasaha ni geda ani Fugo Yekova na aˈuru dunduko na kini berẽkuriipa wai ko abatasi gako aboro mbata kusayo. (Tam. 68:20; 2 Pet. 2:9) Ho agu abazogo nga ga zegino yo nika zubo rani ni ti regbo bakere gberãngbi, si nika ida gupai nga ani du na wingbaduse na ki kido kuti Yekova susi wai si nidu mbata. (Tam. 112:7, 8; Eb. 13:6) Ka ani kido kuti Yekova awere, ani nika du na gu wingbaduse si aidaha ho Gogo nika zubo rani ni. *

17. Tipagine si aidanga ani gunde ti ni be Aramegido ya? (Oni bi gu sura du ti kpotoho.)

¹⁷ A wa i agumbaha rogo gu kekeapai nasusi, badungu rani raki gaani raka naabaha ti regbo yangara arame. Ono si naida aidaha ani bati ti regbo bakere gberãngbi. Gu vura nga ga Aramegido nika digiso gi yangara arame re. Ono tie, pai ho si aida ani gunde behe te. Tipagine? Bambiko ga Yekova vura du nika du, ani asongaha te. (Snz. 1:33; Yeze. 38:18-20; Zek. 14:3) Ho Yekova nika fu zinahe ni fu Yesu Kristo, ko nika ngbe kumbatayo fu ga Mbori abasovura tipa vura. Gu mbedimbedi aKristano i nika zingisayo nika du na kina ko gbiati dungu kutu amaraika. I dunduko nika sovura kuti Satana, gako adaimona, gbiati gayo abasovura.​—Dan. 12:1; Yugo. 6:2; 17:14.

18. (a) Ginipai Yekova nakido paha? (b) Waigu Yugoti 7:9, 13-17 asa rani ani du na kido kumbatayo?

¹⁸ Yekova ima kidohe nga: ‘Gu ũvura i ka mbakada ha kuti roni si adía nga be roni wa sa te.’ (Yes. 54:17) “Bakere rimbasa aboro” nga gu ruru airisi Yekova nika kura “rogo bakere gberãngbi” ni ungayo! Na i nikaa ndu kindi kumbatayo kaa iriso Yekova. (Oni gedi Yugoti 7:9, 13-17.) Ziazia Kekeapai ima fu gu badungu nduapai furani si aida ani du ti ni na kido nga ani nika bata abata! Ani ima ino gupai nga “Yekova nabanda [ruru aboro].” (Tam. 31:23) Agu aboro dunduko nakpinyemu Yekova nika du na ngbarago ka bi ko ko niziasi ziazia rimoko.​—Yeze. 38:23.

19. Gini bawene maabangirise napido rani kumbatayo barambeda?

¹⁹ Mo berẽnga pa wai rengbe yo ka maa agu afugo du rogo 2 Timoteo 3:2-5 ka si du nga i nafura tipa aboro rogo vovo zegino nga agu aboro nikaa dunga kutii ga Satana maapai ya. (Oni bi gu sanduki nga, “ Wai Aboro Nika Du.”) Wirinarani nangia George Gangas, * namangisunge ni boro sa rogo Riigbu Bipasunge aya: “Zegino nika ngia bawene ba kisusi ho aboro dunduko nikaa iriso Yekova ni! Barambeda, oni nika du na gu momu nga ga raka rogo vovo zegino. Oni nika raka nyeanye kindi a wa Yekova nikaa raka nyeanye kindi. Ani nika raka nyeanye kindi.” Nangba gu bawene maabangirise re!