1. Ginipai si anaaida boro mangihe ka ni aida ka fura fu bakindo Parasa?

MO BERẼNGA gupai nga mo naraka Parasa yo agarã wa 2,500 kusayo. Mo nakpinyemu ka fura fu bakindo tipa kurapai, sidu, mo kini ndu ku rogo gu gbata bakindo araka rogoho nga Susana. Ono mbata fu mo fura fu bakindo, si naida mo sanahe mbata tipa ko idihe foro mo fura na ko. Ka mo asadi ka fura fuko mbata fu sana mo he, i ima rengba ka imo ro!—Est. 4:11.

2. Waigu si aida ani naabipa fura ani na Yekova?

² Nairiwo gu tambuahe du ani na ni nga Yekova wa gu bakindo Parasa re te! Yekova na bakere ome tiko, na kidu na nyanyakipa ko kisusi abazogo dunduko, ono wa vura duhe wo, ani rengbe ka fura na ko ti ai regbo. Yekova aidanga ani gunde ti fura na ko te. Ni kpiapai, wa vura duhe nga Yekova ni gu boro i ayamba ko na agu arimo du wa Bakerepa Bakusiahe, gu Mbori Du na Tanduapai Dũ, gbiati Bakerepa Bakindo, ko naida ani naafura fuko ni manga ani sunge na gu fugo nyemuse nga “Barani.” (Mt. 6:9) Si nafu kina ngbarago furani nga Yekova naida gupai nga ani naabi tirani mbembedi na ko wa gure.

3. Tipagine rengbe ani ka yamba Yekova ti ni nga “Barani,” na ginipai ani nika sakapai tipaha rogo gi kekeapai re?

³ Si rẽarẽ ani naayamba Yekova nga “Barani,” bambiko ko nga Mburu gaani unga. (Tam. 36:9) Bambiko gupai nga ko nga Barani, ani na tindiro berani ka giasangbako. Ka ani amanga agu apai ko aya furani ani mangihe, ani nika gbia bawene amaku. (Eb. 12:9) Agu amaku re nakoda nyenye unga, singia ngbangbaturũ yo watadu auru kpotosende. Ani nagbia aundo agbia awere a. Gi kekeapai re nika sakapai tipa wai Yekova amanga apai awere ni gu Barani du na nyemuse na ndu gupai rengbe ani kadu na kido ti ni nga ko ambunga rani kumbatayo te. Ono ni bambataha, ani furanga tipa ndu gupai ani narengbe kadu na kido ti ni nga gu Barani du ngbangbaturũ yo ima kpinyemu rani gbe na ko nangera angera fuo rani.

4. Tipagine duhe ti ni ni mbumbuhe fu kura aboro ka bi Yekova ni Bayo?

⁴ Ya mo si nidu ni mbumbuhe foro ka berãpa Mbori ni Bamo? Kura aboro naberã gupai nga wa du Yekova ni gu boro pa ko naima kio kisusi, parani anyakanga fuko te. I nakapa akapa singia gu Mbori Du na Tanduapai Dũ nangera angera fuoyo wa du yo ni basasa dunduko. Ono tie, gu Barani nga boro nyemuse aidanga ani du na gu berãpai re te. Ko afu unga furani na ko naida ani du na pagume na ko. Fuo gu mokedi nangia Pauro gumbapa gi rengo re, ko asaki gupai fu agu aboro naagia ko Atenai yo nga Yekova “aturã nga na ani wa sa te.” (Amo. 17:24-29) Mbori naida ani dunduko ni basasa naafura na ko kina wai gude naafura na gu vunguni du na nyemuse na nangerafuo ni.

5. Ginipai ani awirikaha ti gu pangbanga nga ga kura Kristano sa ni dee?

⁵ Kura aboro naabihe ni mbumbuhe ka bi Yekova ni Bayo mbiko gupai nga ndikidi Bayo ayugu nyemuse fuyo ni umbaha watadu ni aayugongo nyemuse watadu wenesino fuyo te. Oni bingo agu afugo kura Kristano sa ni dee agumbaha. Ri aya, “Buba adu ni gu boro nanaamanga aboro gbegberẽ. Ho mi atona wisigo Ziazia Kekeapai ni, si aima du ni mbumbuhe fere mi bi tire nga mi mbembedi na gu Buba du ngbangbaturũ yo. Ono fuo ye mi ka ino Yekova, gimi bipai kini ariatihe.” Ya mo mo na kina gu bangisa berãpai re? Kangia wo duhe, mo du na gu kido nga mo ima rengba a ka ye ka bi Yekova ni gu Bamo ngba kisusi.

6. Ringbisihe kuti Matayo 11:27, gini gene sa Yekova naundo rani ngbaha tipa ani naabiko ni gu Barani nga boro nyemuse?

⁶ Gene sa Yekova naundo rani ngbaha tipa ani naabiko ni gu Barani du na nyemuse nga, ni sako afugo Yesu gbiati gako mangaapai si du ni kekehe rogo Ziazia Kekeapai yo. (Oni gedi Matayo 11:27.) Yesu aima wirika asino Bako teketeke si ki sa gupai nga ko ya: “Gu ni bi re ni bi Buba.” (Yo. 14:9) Yesu anaafura dedede tipa Yekova ni Bako. Rogo Akitabu Wene Pangbanga yo nisaha, Yesu amangisunge na gu fugo nga “Buba” wa bara 165 ho ko aafura ni tipa Yekova. Tipagine du Yesu afura ti ni ni bakerehe gbe tipa Yekova? Ndupai sa nga tipa gupai nga ka sa aboro i idi kuti gupai nga Yekova nga gu Ba nga boro nyemuse.—Yo. 17:25, 26.

7. Ginipai ani awirikaha tipa Yekova ti gu gene ko amangipai na Wiriko ngbaha?

⁷ Oni bingo gupai ani awirikaha tipa Yekova ti gu gene ko amangipai na Wiriko, nga Yesu ngbaha. Yekova anaagia ga Yesu akparakpee ti aregbo dunduko. Ko anaagianga kina gigi ga Yesu akparakpee gbua te, ono ko anaakaragapai akaraga a kutini. (Yo. 11:41, 42) Singia gini ngbatunga akpakarapai Yesu anaagbia tiko na ni, ko anaabihe ti aregbo dunduko nga Bako ima kpinyemu ko na ko naundo ko aundo.—Rk. 22:42, 43.

8. Gini agene Yekova anaangerafuo Yesu ngbaha?

⁸ Yesu aima rugatiko na gupai nga Bako nangia Mburu gako raka na ni Bangerefuo ho ho ko aya ni wẽ: “Mi ni ungare mbiko Buba.” (Yo. 6:57) Yesu aima du na kido kuti Bako na ngbadukoyo dunduko, na Yekova anaangera angera fuo gu gako azingo nga ga borose. Na gu paha anyaki anyaka gbe nga, Yekova anaangera fuo Yesu rogo toro yo.—Mt. 4:4.

9. Waigu Yekova ayugu gupai nga ko aima du ni gu Ba naima kpinyemu Yesu gbe?

⁹ Ni du Yekova ni gu Ba du na nyemuse, Ko aima sa gupai nga Yesu inihe nga Ko anaasongoda ko asongoda. (Mt. 26:53; Yo. 8:16) Wa vura duhe nga Yekova aabandanga Yesu be agu aigirã dunduko ko aagbiatiko na ni te, Ko aima undo ko tipa ko hipai. Yesu aima ino gupai nga ai gu igirã ko nika gbiatiko na ni nika du gbua tipa bete regbo. (Eb. 12:2) Yekova ayugu gupai nga ko aima kpinyemu Yesu ni dega ko tuko  fuko, ni ngera ko fuoko, ni raba Ko ko, na ni songoda Ko ko. (Yo. 5:20; 8:28) Ani bingo wai awere gu Barani du ngbangbaturũ yo angerafuo rani rogo ngbatunga agene wakina gure.

10. Ringbisihe kuti Atambuahe 66:19, 20, waigu Yekova ayugo gupai nga ko ima kpinyemu rani?

¹⁰ Yekova nadegatuko kuti gaani akparakpee. (Oni gedi Atambuahe 66:19, 20.) Ko aidanga gupai nga ani naamanga kparakpee fuko gbua ni basasa te, kuba gure, ko nangarasa rani nga ani naakpara fuko dedede. (1 Tesa. 5:17) Ani ima rengba ka kpara fu gaani Mbori ti ai regbo, ka ani vura du kina rogo gini ba vurũ. Ko ti aregbo dunduko kinaho ka degatuko kuti gaani akparakpee. Ho ani aino gupai ni nga Yekova nadega tuko adega kuti akparakpee, ani naye kadu mbembedi na ko. Bake papara Atambuahe aya, “Mi nakpi nyemu Yekova, bambiko ko anagia fugore.”—Tam. 116:1.

11. Wai du Yekova akaragapai kuti gaani akparakpee?

¹¹ Barani agianga kina gigi gaani akparakpee sa te, ono ko nakaragapai akaraga kutini a. Gu mokedi nangia Yoane afu gu kido furani nga: “Ka ani ho gu he ku sangba [ga Mbori] nyemuhe yo, ko gi pa rani agia.” (1 Yo. 5:14, 15) Rengo ngaha nga, Yekova ima rengba ka zanga karagapai kuti gaani akparakpee ngba gu gene ani aberãpaha. Ko ima ino gupai du ni wenehe kisusi tipa rani, sidu, ti kura aregbo gako karagapai ima rengba kadu nga oó watadu ko naida gupai nga ani sungudi ko.—2 Kor. 12:7-9.

12-13. Gini agene gu Barani du ngbangbaturũ yo angera fuo rani ngbaha?

¹² Yekova nangera angera fuo rani. Ko namanga gupai ko aida abaagude dunduko naamangaha. (1 Tim. 5:8) Ko nangera angerafuo awiriko rogo borose yo. Ko aidanga ani naabaka bangirani tipa riahe, roko, watadu bambu tipa raka rogoho te. (Mt. 6:32, 33; 7:11) Ni du Yekova ni gu Barani nga boro nyemuse, ko ima manga mbakadapai a tipa ka mbiisa gu gaani azingo nika du kumbatayo.

¹³ Gu nyakipaha anyaka gbe nga, Yekova nangerafuo gu gaani azingo nga ga toro. Vuru Fugoko yo, ko ima yugo gu rengo du tipa ko, gako ringbisapai, ndu gupai aboro araka ti ni, gbiati gupai nika manga kumbatayo. Ko agbeberã ko koyo du ani ni ti gu regbo ani awiriki rengo, ni mangako sunge na avungurani watadu gu kura boro ni undo rani ani ye ka inoko. Na ko nandu kindi kumbatayo kaa undo rani ani du ni abakureako vurube abaakumba rogo dungurati gbiati gu kura awirina nga akumba na adee nga aguyo naima nyaka rogo toro yo. Kurigure, Yekova naraba rani ti regbo gu gaani adunguratise nga ga dungurati, nga gu regbo ani awirikapai wa sa na gu gaani aborokporo nga ga toro yo. Rogo agi agene re gbiati agu akuraha, Yekova nayugo gupai nga ko ima kpinyemu rani wa du ani dunduko.—Tam. 32:8.

14. Tipagine Yekova araba rani ti ni, na wai du ko amanga gipai re?

¹⁴ Yekova naraba rani. Yesu angia rengberengbe boro, ono ani tigaani nga kpakpa aboro. Sidu, tipa ka raba rani, gu Barani nga ga nyemuse ko naruga rani aruga ho si aidaha ni wo. Fugoko natingida rani na gupai nga: “Gbia naruga gu boro ko akpi nyemu ni.” (Eb. 12:6, 7) Yekova naruga rani ngba dungu agene. Ni kpiapai, ani ima rengba ka gedapai rogo Fugoko yo watadu ka giapai ti regbo gaani adunguratise nga gu naima rengba ka ruga rani. Watadu isoke, gu rugute si aidaha tipa rani ima rengba ka ye be abaakumba. Singia kina gini gene du Yekova aruga rani ngbaha, ko namangaha wo ti aregbo dunduko mbiko gupai nga ko ima kpinyemu rani.—Yere. 30:11.

15. Gini agene Yekova abanda rani ngbaha?

¹⁵ Yekova nasongoda rani ho du ani ni rogo aˈasada. A kina wai gu bagude du na nyemuse  naasongoda awirini ti regbo akpakarapai, kinawo a gu Barani du ngbangbaturũ yo asongoda rani ti regbo aˈasada. Ko namangasunge na gako ziazia toro tipa ka banda rani ti ai gupai rengbe ka gbarasapa rani rogo toro yo. (Rk. 11:13) Yekova naundo rani aundo a ho du ani ni rogo gberãrago. Ni kpiapai, ko nafu bawene maabangirise furani. Gu maabangirise du ani na ni tipa kumbatayo re naundo rani ani hi akpakarapai. Oni berẽnga kurii gipai re: Ka kina gini gbegberẽ apai vura kaa manga rani vurũ, gu Barani nga ga nyemuse ko nika husa ai gu igirã ani ambu behe. Singia kina gini aˈasada ani agbiatirani na ni, si tipa bete regbo gbua, ono agu amaku Yekova afuhe nika nyeanye kindi.—2 Kor. 4:16-18.

16. Ginipai namangi ho Adamu abasasangba gu Bako ni nga ga nyemuse ko?

¹⁶ Ani nabi gu gopai abi nayugo pa ga Yekova nyemuse tipa rani ho ani aberãpa gupai ni ko amangihe ho Adamu abasasangba ko ni. Ho Adamu abasasangba gu Bako ni du ngbangbaturũ yo, ko aadunga berewe ni papara gu riikporo nga ga Yekova te, na zavura atitako aadunga berewe ni paparaha a te. (Rom. 5:12; 7:14) Ono tie, Yekova amangipai tipa ka undo atita Adamu.

17. Tingbafuo ga Adamu samungu, ginipai Yekova amangihe nibasa?

¹⁷ Yekova afu mbusa fu Adamu, ono ko amangi kidohe nga ko nika undo atita Adamu aundo. Ko amangi gu kidohe nibasa nga ko nika karaga aboro giasangba akaraga berewe ku rogo gako riikporo. (Bam. P. 3:15; Rom. 8:20, 21) Yekova amangi gi mbakadapai re vurube gu motumo tumorii nga ga gu Wiriko ko aima kpinyemuko gbe nga Yesu. Ni fu Yekova Wiriko tipa rani, ko ayugu gupai nga ko ima kpinyemu rani ni bakerehe gbe.—Yo. 3:16.

18. Tipagine rengbe ani kadu ti ni na gu kido nga Yekova naida rani aida ni awiriko, zavura ka ani vura bitikpa kusayo vurũ tiko?

¹⁸ Wa vura duhe nga ani nga kpakpa aboro,  Yekova naida gupai nga ani du rogo gako riikporo, na ko abingo ho nga si ima du fuko ni kere mbumbuhe ka undo rani te. Ani ima rengba ka ba gberãrago tiko watadu ka bitikpa kusayo tiko, ono tie, omeko abatanga berãni te. Yesu ayugupa wai Yekova nakpinyemu awiriko ni gumba ko pangbanga tipa ingiingi paranga. (Rk. 15:11-32) Ba gu paranga re adu kindi na maabangirise nga Wiriko nika yego ayego. Ho gu paranga re ayego ni ku kporo, bako adiko kugume na bakere ngbarago. Ka ani bitikpa kusayo ti Yekova ono ki mangi saberã, ani ima rengba kadu na gu kido nga gu Barani nga ga nyemuse ko regerege ka dia rani kugume berewe.

19. Waigu Yekova nika mbakada agu apai dunduko Adamu agberesihe?

¹⁹ Barani nika mbakada agu apai dunduko Adamu agberesihe. Tingbafuo ga Adamu samungu, Yekova adiberã ka roga aboro nga 144,000 dagba ngbatunga aboro yo dunduko nga aguyo nika mangasunge ni abakindo na ni aboromotumo ngbangbaturũ yo na Wiriko. Yesu gbiati agu aboro nika zogarago na ko nika undo aboro giasangba i da ni rengberengbe yo rogo vovo zegino. Tingbafuo i susi rogo yangara asada nga ga giasangba, Mbori nika fu nyenye unga fuyo. Fuo gure, Barani kini du na ngbarago ho ko nika bi kpotosende ni si nahi be rengberengbe awiriko. Nairiwo gu bawene regbo nika ngiaha re!

20. Gini agene Yekova nayugu gupai ngbaha nga ko ima kpinyemu rani, na ginipai gu kekeapai ngbefuo gere nika sakapai tipaha?

²⁰ Yekova ima yugo gupai nga ko ima kpinyemu rani ni bakerehe gbe. Ko nga gu Barani ngba kisusi. Ko nadega tuko kuti gaani akparakpee na ko nangerafuo rani na agu ahe dunduko ani aidaha rogo borose yo na rogo toro yo. Ko naraba rani na kini songodi rani. Ko nika manga bawene apai a furani kumbatayo. Si ni pa ngbarago ka ino gupai nga Barani ima kpinyemu rani na ko nangera angera fuo rani! Gu kekeapai ngbefuo gere nika sakapai tipa agu agene ani nga awiriko narengbe ka yugo gupai ngbaha nga ani na tambuahe tipa gako nyemuse.