AGARÃ 3,000 kusayo, gu tita aYisaraere nangia Eyobo aima ino gupai nga azire ari nape dungu apai furani tipa gu mangasunge nga ga Mbori. Gaami mangaapai nasa ra ami du ni kpiapai gbiati pa masaku. Rogo Ziazia Kekeapai yo, badungu agu apai i ayugoho tipa azire ari nayugo nyanyakipa pai furani tipa raka gbiati gaani pagume na Mbori. Ani bingo bete akpiapai.

Agu aboro naaraka Yerusarema yo aima inopai wenengai tipa ambirambira, ami ana dua gaami bambu rii abambu yo. Agura adua ga ami abambu ri ga Soromo yekaru yo. Si wa ka i ya, agu ambirambira naana dua gaami bambu rii yekaru yo ana bihe na agarã dunduko nga ba bandahe, nga gu ba ami ani rengbe ka vunga awira ku rogoho zanga gbegberẽpai mangi ra.

Bake papara Atambuahe 84 angia boro sa dagba awiri Kora yo, nga gu ko naana mangasunge yekaru yo tipa poso sa tifuo adiwi sita aima bi bambu agu ambirambira re yekaru yo. Ko akpinyemu ka du wa agu ambirambira nadua nyenye ba rogo ga Yekova bambu yo re. Ko apoi kuari ki ya: “Ako Yekova nga ga arimbasa ko nangba gamo abanye! Mbisimore nakpi nyemu ga Yekova avurukporo, ii, he namaka re tipa ha a; kpotore yo nangbiko na borore a tipa unga Mbori. Ii, bavurukporo nabi bambu ru, mbirambira nabi bambu tipa ru a, yo u ka ma pararu ku ho ni, nga gamo abamotumo, Ako Yekova nga ga arimbasa ko, gi Bakindo nga gi Mbori!” (Atambuahe 84:1-3) Ya mo ani, gbiati gaani paranga aboro ni du na kina gu bangisa tambuahe re tipa ga Yekova bambu na kidu na nyemu kaa dungura tirani dedede na ga Mbori aboro?​—Atambuahe 26:8, 12.

Gu nebi nangia Yeremaya akepai ki ya: “Gonyo ari yo u ini gau arago.” Ko aima inopa ga agonyo ta vuru ringara mokido. Bangbanda Marungu na Zerekpe, agonyo naima susa 300, 000 i nagedi ra ninaaguari vuru Afirika kaa ga ku Putu yo ti gene ngbongbo rago nga ga Yaradene. Gu regbo du kina rogorayo ni naapehe fura tipa ami karaga tira ku bara yo kitö nada. Wakina kura azire, “ami rugu tira na pa rago gaami yega.”​—Yeremaya 8:7.

Gu buku nafura tipa gu ta nga ga Azire naya: “Pa ga azire ta kina rogo ra yo.” Yekova Mbori aima maa gu tatamana ku rogo ra yo nibipa ga ami regbo ta, ono ko afu gu rengbanapai fu aboro nga ka ino regbo na rago ahe. (Ruka 12:54-56) Gu inohe Mbori afuhe fu aboro tipa i ini gu regbo ani araka ti ni re kia ti gu tatamana nga ga agonyo.  Agu aYisaraere nadu ti regbo Yeremaya ainongo agu apai i aino apai ti ni te. Mbori agumba ndu gupai re ki ya: “I gindiga ga Yekova pai, gini tatamana du rogo yo yo?”​—Yeremaya 8:9.

Areme, ani na dungu nduapai berani nayugo gupai nga ani naraka ti gu regbo Ziazia Kekeapai ayambaha nga “kusa rago.” (2 Timoteo 3:1-5) Ya mo mo awirika agonyo ki inipa ‘arago’?

I ima fura tipa dingimo bara dunguhe rogo Ziazia Kekeapai na kpiaru ni badunguhe Ringara Mokido yo. U naraka ri mbia yo, Ziazia Kekeapai naya: “Yo u namaa rago ni tipa nya ka zia ru, bangiriru nabi he tuturu ku sa yo.” (Eyobo 39:27-29) Bangiri dingimo na ome tini ni kerehe, na si nangera tuturũ wa (kirometere 1) ka bi ndakuta.

Kina wai dingimo abihe “tuturu ku sa yo,” kina wo Yekova abi raka kumbatayo. Rogo gi gene re, Yekova Mbori naya: “Nataki pande pa digidapai ti tonatona rago na pa agu ahe ata manga nga ya bakuru yo.” (Yesaya 46:10) Ka ani aka kuti gako arugute, ani ima rengba ka gbia undo ti gako tatamana gbiati wai ko angera tuturũ.​—Yesaya. 48:17, 18.

Ziazia Kekeapai naringbisa agu aboro aringbisa nakido kuti Yekova kuti dingimo: “Ono agu yo nakida kuti Yekova i aúngasi omeyo, i agúka wa adingimo.” (Yesaya 40:31) Dingimo namanga sunge na guhe du tii puporu yo tipa kaa kusa fofoi wege. Ho dingimo agbia tiru ni na zera rago, u nazaraga puporu si ni ke kirikiri pati gu ba du fofoi wege rogoho kuari gbe. Dingimo akidongo kina kuti gu ome du puporu na ni tipa ka gu ni gbangaha te. Wakina gure a, agu aboro nakido kuti Yekova ima rengba ka ngera koyo du ko ni nga gu boro nakido yo tipa “gu bakere tandu susi.”​—2 AKorindo 4:7, 8.

Poso sa mbata fu kpi Yesu, ko aru ka ngana gu bakere bagbata nangia ga aYudo ki ya: “Ako aboro Yerusarema, aboro Yerusarema, ninaimo anebi, ki nizumudi agu yo i akedi yo fuo roni! mi akpi nyemu dungura awironi a wa kondo nadungura awiru ku tii puporu bara wãi, ka oni aida nga ha ya!”​—Matayo 23:37.

Gu nyanyaki nyemupai du rogo azire yo nga ka banda awira. Agu azire na mbakada bambura sande wa akondo, si aida ami ngere wenengai tipa gu kerepai rengbe ka ye. Ka nakondo bi nzagu u ni ke kirikiri ariyo u nata ngbaru ka yugo pa kerepai fu awiru, na awiru nayaara ni ipo tipa ka gbia bandahe tii puporu yo. Awiru nagbia nzereme a tii puporu yo be uru na bakere mai. Kinawo a Yesu aaida ka fu bandahe gbiati nzereme nga ga toro fu aboro Yerusarema. Areme, Yesu naya ani ye fuoko tipa ka gbia nzereme gbiati bandahe be gaani ambugo gbiati gu bakabangirise nga ga raka.​—Matayo 11:28, 29.

Nirengo, badungu apai duho rengbe ani ka wirikaha ti azire. Wa mo nikaa bi gaami mangaapai mo asadi ka bingo gu veresi nafura tipa ra. Ambirambira undongo ro aundo mo du na tambuahe tipa ga Yekova bambu iriso. Mo ngere ku be Mbori tipa ndikidi maabangirise nga gu nika undo ro mo ni gu wa kina dingimo. Mo ye fuo Yesu tipa gu rengo nga ga toro nga gu nika banda ro wa kina wai pupo nakondo ni naabanda awiru. Na agonyo undongo ro mo ni ngere angera tipa agu apai nayugopa yangara areme.