1, 2. (a) Gini mosoro ga Mbori amoyambu amaabangiriyo tipaha? (b) Gine naundo rani ani moibangirani fuo gaani mosoro? (Oni bi gu sura duti tonatonaha.)

WAKINA gu mokedi nangia Pauro, agu aKristano areme du ni mbedimbediyo ni toro na gu nyanyakipa maabangirise beyo nga ka “dia gu mosoro du ti ga Mbori yambahe ari yo.” (Frp. 3:14) I nangera kumbatayo tipa ka mangasunge sa na Yesu Kristo rogo gako Kindo nga ga ngbangbaturũ na ka kodabeyo na ko tipa ka sa ngbatunga aboro dunduko ni rengberengbeyo. (Yugo. 20:6) Nairiwo gu wene sasa Mbori nayambuyo i pekefuoho re! Kura akandoro tigayo na gu maabangirise du kia. I namaabangiriyo tipa ka gbia gu mosoro nga nyenye unga auru kpotosende ane, na gure nga bawene maabangirise a!—2 Pet. 3:13.

² Tipa gupai nga Pauro undo akurako mbedimbedi aKristano i nye ni ruruyo na ki gbia mosoro, ko angarasiyo ki ya: “Oni mói gaoni berã ti agu ahe du ari yo.” (Koro. 3:2) Si aaida i naaberãpa gayo nyanyakipa maabangirise nga ga gbia ũkumbo ngbangbaturũ yo. (Koro. 1:4, 5) Nirengo, berãkurii agu amaku Yekova namoihe mbatayo fu gako aboro naundo ga Mbori amoyambu dunduko tipa gupai nga i  moibangiriyo fuo gayo mosoro, singia i na gu maabangirise nga ga ga ku ngbangbaturũ yo watadu ka raka auru kpotosende ane.—1 Kor. 9:24.

3. Gini kereapai Pauro agbeberã akurako aKristano kutini?

³ Pauro agbeberã akurako aKristano a kuti gu kereapai nga gu rengbe ka dia gayo mosoro beyo. Ni kpiapai, ko ake waraga fu gu dungurati naadu Korosai yo tipa ziree aKristano nga aguyo naasada ka sa ngbarago ti Mbori vurube mangapai kuti ga Moize aNdiko kuba gupai nga kadu na idapase kuti Kristo. (Koro. 2:16-18) Pauro afura a tipa kereapai nga gu duadu areme a nga gu rengbe ka dia gaani mosoro berani. Ni kpiapai, ko asakipai tipa wai ka sovura kuti wasiwasi nyemuapai, ka mangapai kuti tagbagapai dagbarani na awirinarani, na wai ka mangapai kuti gu kpakaraapai nga ga aborokporo. Gu rugute ko afuhe tipa agu apai re na kina nyanyakipaha furani areme a. Sidu tie, ani wisigongo bete ga Pauro azahe nga ga nyemuse nga gu du rogo gu waraga yo ko akehe fu aKorosaio.

4. Tipagine rengbe wasiwasi nyemuapai ka dia gaani mosoro ti ni berani?

⁴ Tingbafuo Pauro tingidi awirinako na pa gayo bawene maabangirise, ko akepai nga: “Oni ími apa kpotoroni yo du auru kpotosende no; [nibipa] pa bari, na meteka, na gbagaura, na kpi nyemu gbegberẽ apai, na kpihe.” (Koro. 3:5) Wasiwasi nyemuapai rengbe kadu na kere ome ti ni na si rengbe ka dia gaani aũkumuko nga ga toro berani. Kura wirina sa wasiwasi nyemuapai afuriiko ape gupai tingbafuo ko karagatiko ku rogo dungurati nga, “gu ome naagbe re aima du ni nyanyakihe ni kerehe si ki da nga ka mi arianga berãre ya daho si ada ni nga gene berewe te.”

5. Wai du rengbe ani ka bandatirani rogo kereapai yo?

⁵ Si ni nyanyakipa pai gbe kadu na rubangirise ho ani agbiatirani ni na gupai rengbe ka asada rani ani basa gu ga Yekova arugute du tipa iriiri mangaapai. Ni kpiapai, si ni patatamana fu agu aboro nambakada pa rogatise ka maa angbanda fu tiyo kina ti tonatonaha yo nibipa agu apai duwa zapadatise, nyorangbaa, watadu du nisayo ti agu aregbo na rogo agu aba adanga ya. (Snz. 22:3) Kerepai rengbe ka kura a nibipa iriiri mangaapai ka si du nga Kristano ndu ku rogo kura ba tipa sunge bagaahe watadu ka si du nga Kristano namangasunge na gu boro angianga gani badiarogatise ya. (Snz. 2:10-12, 16) Ka mo gbiatiro rogo ngbatungapai wa gure, mo yugu tiro fu aboro dunduko nga mo nga boro sa dagba aDezire Yekova, mo kini mangipai ngba iriiri gene, na kini tingidi gupai nga ka ba nyemuro ti kura boro rengbe ka kusa gbegberẽ sangbanapai. Ani ima rengba kadu ngbapai yo a ka si du nga ani na bakere gberãrago na ani ni rurungbura rani. Ti ngbatunga aregbo wa gure, ani rengbe kadu na bakere nyemu gupai nga boro duho ka sarani ani naabi tirani nga nyaki parani anyaka. Ani rengbe kadu na bakere nyemu gupai nga boro fu wasa furani si ki da nga ani mbu ai boro ni fuhe furani. Ka ngbatungapai wa gure mangi ro, mo gbata undo be Yekova gbiati gako aboro tipa ka zanga mbu tiro i di ga mosoro bero.—Oni gedi Atambuahe 34:18; Asanza 13:20.

6. Ginipai si aida si du berãrani yo nibipa agu aũngbarago ani asia ha?

⁶ Tipa ka imo wasiwasi nyemuapai, si naida ani sogo wasiwasi aũngbarago. Badungu agu aũngbarago du areme natingida rani na kina pa wai apai adu Sodomo yo na Amora yo. (Yuda 7) Agu aboro nakusa aũngbarago nasonosa gayo berãpai nibipa mangaapai niyugo yo bäri gbiati meteka ni gupai agberẽnga ya, nga gu ayengo na gbegberẽ asangbanapai ya. Si naida ani du na rubangirise, ki zanga dia agu aũngbarago dunduko kugume i akusaha. Si naida ani sia agu aũngbarago nga gu nikaa ka nga na ani ti maabangirani fuo gaani mosoro nga ga raka ya.—Snz. 4:23.

7. Gini kpakaraapai rengbe ani ka gbiatirani na ni rogo gu dungurati nga ga aKristano?

⁷ Ani dunduko ima ida kuti gupai nga pa maku du ngaha kadu ni papara gu dungurati nga ga aKristano. Gu wisigopai nga ga Fugo Mbori du ba gaani adunguratise yo gbiati gu undo nga ga nyemuse ani afuhe fu akuarani naundo rani ani moibangirani fuo gaani mosoro. Ono wa vura duhe wo, ti gu kura aregbo, zangagiatise ima rengba ka ye na tagbagapai dagba aboro rogo dungurati. Ka ani mbu agu atagbagapai re ambu zanga mbakadaha, si ima rengba ka sa gupai nga boro kpipai kuti kurani.—Oni gedi 1 Petero 3:8, 9.

8, 9. (a) Gini asino ka ani du na ni si ki undo rani ani gbia gaani mosoro? (b) Gine rengbe ka undo rani ani banda zereda ka kuarani Kristano imisi rani?

⁸ Wai du rengbe ani ka zanga mbu kpipai kuti boro si di gaani mosoro berani? Pauro angarasi aKorosaio nga: “Ziazia amangure, wa du oni ni ga Mbori siasia yo, oni úkadi ngbadu inapai, na weneringise, na umbasitise, na zera, na gbanga hipai; nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga. Ku ri agi apai re dũ oni úkadi nyemuse, nga gu ũvodatise nga ga ziaziapai.”—Koro. 3:12-14.

⁹ Nyemuse gbiati wenesino rengbe ka undo rani ani naambupai fu akuarani. Ni kpiapai, ka si du nga kuarani Kristano pe gupai furani watadu mangi rani na gupai imisi rani, ani rengbe ka tingida gu regbo kusayo ani ape gupai watadu amangi gupai naangbanga ya. Ya mo ani adunga na tambuahe tipa gu nyemuse gbiati wenesino nga ga agu awirina nambupai furani ti gaani aingahe te? (Oni gedi Batungusipai 7:21, 22.) Gu susi asusa gbe nga ani na tambuahe tipa ga Kristo wenesino wa ko nadungura ndikidi airisimbori i du sa na kodatise. (Koro. 3:15) Ani dunduko nakpinyemu bangisa Mbori, kini tungusi ngisa pangbanga, na kini gbiatirani na badungu ngisa akpakarapai. Ho ani ayugo wenesino ni fu akuarani na kini kpinyemuyo, ani nafubee tipa gu kodatise nga ga aKristano na kini moibangirani fuo gaani mosoro nga ga raka.

10, 11. (a) Tipagine du du kpihe ti ni ni kere he? (b) Wai du rengbe ani ka sovura kuti kpihe ka si dinga gaani mosoro berani ya?

¹⁰ Agu akpiapai nga ga zahe du rogo Ziazia Kekeapai yo natingida rani na gupai nga kpihe ima rengba ka dia gaani mosoro berani. Ni kpiapai, Kaina akpi wirinako nangia Abere na ko ki imiko. Kora, Datana, na Abirama akpi Moize na i ki sovura kutiko. Berewe a, Bakindo Saura akpi Davide mbiko gako diabese na ko ki asadi ka imoko. Si airiwongo te tie nga Fugo Mbori naya: “Ho du kpiboro ni na kpata, yo du gbarakagbaraka pai ni na ngbatunga gbigbitapai dunduko.”—Yak. 3:16.

¹¹ Ka ani sonosi nyemuse gbiati wenesino kpotoraniyo, si dunga taata tipa gupai nga ani naakpihe te. Fugo Mbori naya: “Nyemuse nahi pai ni gbanga ha, ki du na weneringise; nyemuse akpi nga he te.” (1 Kor. 13:4) Tipa ka sovura kuti kpihe ka si sononga kpotoraniyo ya, si naida ani mangi nyanyaki asadatise kaa bi apai kina wai Mbori abihe, kaa bi awirinarani ni papara gu dungurati nga ga aKristano. Gipai re nika undo rani ani naayugo nunga, na ngbanya kuti gu rugute ga Mbori toro adu kugiipa kehe nga: “I irisi gu paha sa, kura apaha ki ngi angi na ni dunduko.” (1 Kor. 12:16-18, 26) Rogo gi gene re, kuba gupai nga kaa kpi kura aboro ho i agbia amaku ni, ani nadu na ngbarago. Oni bingo gu kpiapai nga ga wiri Bakindo Saura nangia Yonatana. Ko aakpingo Davide ho i amoi Davide ni ni dikumbo mbatabakindo te. Kuba gure, ko angarasi Davide. (1 Sam. 23:16-18) Ya mo ani rengbe kadu na wenesino gbiati nyemuse wa Yonatana?

12. Degatue kuti gini rugute nga ga Ziazia Kekeapai rengbe ka undo rani ani gbia mosoro na gaani aboro wa sa?

¹² Ka aborokporo amangapai kuti agu arugute nga ga Ziazia Kekeapai, si rengbe ka ye na  zereda gbiati ngbarago fuyo na ki undo yo i gbia gayo mosoro. Gini arugute nga ga Ziazia Kekeapai fu aborokporo Pauro afuhe fu agu aKristano naadu Korosai yo? Ko aya: “Dere akumba, oni rá fu kina akumbaroni, wa re he rogo Gbia yo. Akumba, oni nikpí nyemu adiaroni ka ngbaduroni ími nga fu yo ya. Agude, oni gí sangba avunguroni rogo apai dũ, bambiko gere ngba rogo Gbia yo. Aba, ka oni wí nga ngba awironi ni wia ya i ka mbu.” (Koro. 3:18-21) Zanga kapa, mo ima rengba ka ida kuti gupai nga mangaapai kuti gu rugute ga Mbori toro adu kugii Pauro ko kehe naundo akumbakuadee, dereakumba, gbiati agude.

13. Wai du rengbe gu wirina nga Kristano ka sa gu kumbari angianga boro ndikidi idapase ya ko gi rengo?

¹³ Na ka si du nga mo nga diakumba na mo kini bihe nga kumbamo nga guko angianga idipase ya amanganga ro ngba wene gene te? Ya mo mo rengbe ka sa apai si du wenengai ni paa mo na ko tipa gako mangaapai? Ka si vura du nga mo rengbe ka sako ko mangi gupai mo aidaha, ya mo mo sako ko ye ku rogo rengo yo? Si awiranga ha wo te. Ono ka mo airisa gu pagbia nga ga kumbamo, mo rengbe ka fubee tipa zereda rogo gamo ngbadimokporo, mo ki ye na taarimo fu Yekova, na mo ima rengba zaatu ka sa kumbamo ko ye ku rogo ndikidi irisombori; rogo gi gene re, oni dunduko ki gbia gaoni mosoro.—Oni gedi 1 Petero 3:1, 2.

14. Ginipai si aida gu kumbakudee nga Kristano mangihe ka si du nga diako nga guri angianga idipase ya airisanga ko te?

¹⁴ Na ka si du nga mo nga kumbakudee na  mo kini bihe nga diaro nga guri angianga idipase ya airisanga ro te? Ya mo mo rengbe ka fõngbaduriyo ri yugu irisa foro gbe ka si du nga mo nataka ngbaro kuriri tipa ka yugo gupai furi nga mo du nga bairakporo? Wagu sa te! Mbori naida gupai bero nga mo ngerekurii gamo kporo na nyemuse, ni wirika mo gu kpiapai nga ga Yesu. (Ef. 5:23) Yesu nangerakurii gako dungurati na nyemuse gbiati zerangbaduse. (Rk. 9:46-48) Ho kumbakudee awirika ga Yesu kpiapai ni, ko ima rengba ka sa diako ri ye ku rogo rengo yo.

15. Wai du gu kumba nga Kristano ayugo nyemuse fu diako?

¹⁵ Ziazia Kekeapai nape gupai fu akumbakuadee nga: “Oni nikpí nyemu adiaroni ka ngbaduroni ími nga fu yo ya.” (Koro. 3:19) Gu kumbakudee du na nyemuse nayugo irisa fu diako nidega ko tuko kuti gari berãpai na ni kidoko ri nga ko nabi gupai abi ri apehe na nyanyakipaha. (1 Pet. 3:7) Wa vura duhe nga ko arengbanga kaa manga agu apai ti aregbo dunduko ri apehe te, dedede, ko namanga gu diaberã nga gu daada nisana ko ri tipa gari berãpai. (Snz. 15:22) Gu kumbakudee du na nyemuse naasada ka gbia gu irisa nga ga diako ni manga ko agu apai nika sa ri ri naairisa ko angianga ka sanahe tipaha ngbaome ya. Si nawira gupai nga, gu kumbakudee nakpinyemu diako gbiati awiriko nadu na gu ngbadimokporo beko nairiso Yekova na ngbarago na ki gbia gu mosoro nga ga raka kina sa.

16, 17. Wangia mo paranga boro, wai du rengbe mo ka zanga du na bakere gberãrago na avunguro?

¹⁶ Na ka mo ngia sosono gude na mo kini bihe nga avunguro nga aKristano aruganga tiyo na mo te na i naka na mo ti manga kuraapai? Gu gberãrago rengbe mo kadu na ni ima rengba ka sa ro mo naakapa singia iriso Yekova nga wene gene raka. Ono ka mo mbu gberãrago si sa ro mo mbu iriso Yekova, ngbutuko, mo nika kura bara gupai nga boro ho nakpinyemuro nzunzu kisusi avunguro nga aguyo nagunde ti Mbori gbiati gamo dungurati te.

¹⁷ Ka si du nga avunguro aruganga ro te, ya mo mo bakingo bangiro singia boro i naberã paro aberã nzunzu te? (Eb. 12:8) Ono isoke si rengbe kadu nga gu gene avunguro aruga ro ngbaha du angbanga tiro ya. Kuba gupai nga kaa kpakana gu gene i afu rugute foro ngbaha, mo asadi ka ino gupai nga, ndupai ima rengba kadu ho i amangapai ti ni wa gu i amangaha re. Sidu, mo ongo ki zanga zinga ka si du nga i nabisira gupai mo namangihe. Fugo Mbori naya: “Gu boro naka na fugoni du na inahe, na gu ni du na bayee toro nga boro rugatinapai.” (Snz. 17:27) Mo moihe ni gamo sasa nga kada ni gu boro naima nyaka rogo toro yo nga guni rengbe ka onga aonga ho i afu rugute ni funi, nga guni nagbia undo ti rugute zanga kpakana gu gene i nafuhe ngbaha. (Snz. 1:8) Pa maku du ngaha kadu na avunguroni ni agu aboro naima kpinyemu Yekova nzunzu. Nirengo, i na nyemu ka undo roni oni gbia gaoni mosoro nga ga raka.

18. Tipagine mo nadiberã ti ni ka maabangiro fuo gamo mosoro?

¹⁸ Gu mosoro du furani kumbatayo singia gu raka adunga na digidoho ti ni ya ngbangbaturũ yo watadu nyenye unga auru kpotosende ane, ima ngba kisusi tipa kaa berãkuriihe. Si nga gu maabangirise nika da ada ti rengo, nga gu du mburuhe rii gu kidohe nga ga Bakusiahe nitiko. Nibipa Paradizo kpotosende, Mbori aya: “Kpotosende ahí be ina pa Yekova.” (Yes. 11:9) Sidu tie, agu aboro dunduko nikaa raka auru kpotosende Mbori nika yugopai fuyo. Gure nirengo nga gu mosoro rẽarẽ tipa boro mangi nyanyaki asadatise tipaha. Sidu, oni moi berãroni fuo agu apai Yekova nakidopaha, na ka he dinga gaoni mosoro beroni ya!