Gi veresi re naya: “Ka mo bi he ya i narungosi rungorungo boro rogo gu ringara airazuu ki di sarangbanga ku sa yo na rurupai, ka si íriwo nga ti ro ya; bambiko boro ho susi gu ni nabi he, ono agu yo kina ho berewe kii pa yo ki susi yo dũ.”—Batu 5:8.

Kuti gu bipai nga ga aboro, afugo gi veresi re nasakapai nzunzu tipa agu akumba du na pagbia beyo rogo zogarago. Ono ka ani berẽkuriihe berewe gbe, rengo kinaho si ayugoho tipa Yekova nga gu rengbe ka fu wasa na kido furani.

Batungusipai 5:8 nafura tipa gu bazogo narungosi rungorungo aboro na kini mangiyo ngba iraira gene. Si naida gu bazogo re tingidi gupai nga boro kinaho nabi ni abi nga guni du na pagbia beni kisusi gu du ni na ni rogo zogarago. Na si rengbe kadu nga kura aboro kinaho du rogo gu bangiriba du kuari kisusi berewe gbe. Si nipa rungo nga, rogo gu zogarago nga ga wiri aboro, agi abazogo re dunduko rengbe kadu ni airabiriki, na aboro narungo mbiko gi gayo biriki re.

Ono zavura ho apai angera ni wa ka i ya maabangirise ho te, ani ima rengba ka gbia wasa mbiko ruga ani tirani na gupai nga Yekova ‘nabi agu aboro abi du na pagbia beyo kisusi’ rogo ga aboro zogarago. Ani rengbe ka sana Mbori tipa undo na ki ba gaani akpakarapai ku auru ko. (Tam. 55:22; Frp. 4:6, 7) Ani ima ino gupai nga “bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.”—2 Peka 16:9.

Nibi gipai re, Batungusipai 5:8 natingida rani na pa gu zegino ani araka rogoho na pa gupai nga aregbo dunduko du boro ho nga guni du na pagbia beni kisusi rogo gi zegino re. Gu nyakipaha gbe nga, gu veresi re rengbe ka undo rani ani berẽkurii gu rengo nga Yekova du na pagbia beko kisusi rogo zegino dũ. Ko nazogarago awere vurube Wiriko nga Kristo Yesu, nga guko nga Bakindo ga Mbori Kindo. Gu Mbori Du na Tanduapai Dũ, nga guko nabi apai dunduko, ni ruruko na Wiriko kinawo a.