1. Gini regbo rengbehe kadu ni kpakarakpakaraha gbe ka iriso Yekova?

GINI regbo rengbehe kadu ni kpakarakpakaraha gbe ka iriso Yekova, gu regbo boro agbia tini na badungu akpakarapai watadu gu regbo ni agbianga tini na badungu akpakarapai ya? Ho du ani ni rogo akpakarapai, si taata furani ani kido kuti Yekova. Ono ginipai ani naamangaha ho du raka rani ni zezeredi? Ya mo bangirani ninaago ti kura aregbo ti wai nyakipa iriso Mbori? Yekova aima za aYisaraere nga gipai re ima rengba ka manga.—Pa Rug. 6:10-12.

2. Gini kpiapai Bakindo Asa amoihe?

² Bakindo Asa nga bawene kpiapai kisusi nga ga gu boro namangisunge ni tatamana ni du ko na bakere kido kuti Yekova. Ko aamanganga pa Yekova kina ti regbo akpakarapai sa te, ono ti regbo zereda a. Tona kina bakuru kusayo, “kpoto Asa yo adu ni ziazia ha koyo du Yekova” ni. (1 Aba. 15:14) Gene sa Asa ayugu gupai ngbaha nga ko aairiso Yekova na kpotokoyo dũ nga ni nyasa ko riipa ziree irisombori Yuda yo. Ziazia Kekeapai nagumba gupai nga “ko arogo kungba abamotumo dunduko ku sa yo na tumbatumba arago, ki kuadi duadua ambia ki dewe aAsera nga ngbama.” (2 Peka 14:3, 5) Zavura ko adi titako nangia Maka kusayo rogo gu nyanyakipa bangiriba ri adu rogoho rogo zogarago. Tipagine? Bambiko ri anaangarasa aboro i naairiso kpiahe.—1 Aba. 15:11-13.

3. Gini apai ani nika sakapai tipaha rogo gi kekeapai re?

³ Asa aima manga kurapai kurii gu nga ga nyasariipa ziree irisombori. Ko asonosi ziazia irisombori, ki undo aboro Yuda i karagatiyo fuo Yekova. Yekova afu zereda fu Asa gbiati aYisaraere. * “Ringara adu zezeredi” tipa agarã bawe ti regbo  ga Asa zogarago. (2 Peka 14:1, 4, 6) Rogo gi kekeapai re, ani nika sakapai tipa wai Asa amangisunge na gu regbo zereda re. Fuo gure, ani nika sakapai tipa gu kpiapai nga ga agu aKristano naadu rogo bambata sa kama agarã, nga aguyo namangisunge ni tatamana na regbo zereda wakina Asa. Ni yangaraha, ani nika karagapai kuti gu sanahe nga: Ka mo araka rogo gu ringara du ranirii adu rogoho nga ga irisombori, waigu rengbe mo ka mangasunge na gu regbo zereda re ni tatamana?

4. Ringbisihe kuti 2 Pekapai 14:2, 6, 7, waigu Asa amangisunge na regbo zereda?

⁴ Oni gedi 2 Pekapai 14:2, 6, 7. Asa ape gupai fu aboro nga Yekova du naafu “zereda fu [yo] rogo arago dunduko.” Asa aabingo ho nga gu regbo zereda re angia regbo tipa ka gbia ngbarago rogo raka te. Kuba gure, ko atona kaa me abaakporo, angapa, gbanga gbanga abambu, gbiati angbadimo. Ko agumba gupai fu avuru Yuda nga: “Ringara kindi ni gaani.” Ginipai du Asa aaida ka gumbaha re? Gupai ko aaida ka gumbaha nga aboro aima rengba kaa ta zanga kpakarapai rogo gu ringara Mbori afuhe fuyo, na kini dua abambu zanga avurayo duho ka rugusa yo ti ni. Ko angarasi aboro nga i mangisunge na gi regbo zereda re ni tatamana.

5. Tipagine Asa anyakasi gako aborovura ti ni?

⁵ Asa amangisunge a na gu regbo zereda re tipa ka nyakasa gako aborovura. (2 Peka 14:8) Ya mo gure nayugo gupai nga ko aadunga na kido kuti Yekova te? Oó. Kuba gure, Asa aima ino gupai nga wa ko angia bakindo, gako sunge du nangiaha ka mbakada aboro tipa agu akpakarapai i narengbe ka gbiatiyo na ni kumbatayo. Asa aima ino gupai nga gu regbo zereda re ima rengba ka digo kumbatayo, na gure nga kina boro gupai naamangi.

6. Waigu agu aKristano naadu rogo bambata sa kama agarã amangisunge na regbo zereda?

⁶ Wa si avura du nga i anaarungosi agu aKristano naadu rogo bambata sa kama agarã dedede, aregbo anidu kinaho a i anidu rogo zereda. Waigu i amangisunge na agu aregbo re? Gu ruru akumba na adee re anaatungusa wene pangbanga zanga piriga. Gu pangbanga du rogo Amokedi yo nape gupai nga i “anaata na gunde Gbia.” I aandu kindi kumbatayo kaa tungusa wene pangbanga, na ni sangbana gipai re, i kini ‘nge ange’ kumbatayo. Nirengo, Yekova aima fu maku kurii gayo kakaka tungusapai ti regbo zereda.—Amo. 9:26-31.

7-8. Ginipai Pauro na kura aboro amangihe ho i adu ni na momu beyo? Oni sakingo rogoyo.

⁷ Agu aKristano naadu rogo bambata sa kama agarã anaamangasunge na agu amomu dunduko i anaagbiaha tipa ka tungusa wene pangbanga. Ni kpiapai, ho gu mokedi nangia Pauro aini gupai ni nga bakere ngbadimo ni zazaha fuko Efesa yo, ko amangisunge na gu momu re ka tungusapai na ka sa aboro ni abawiriki rogo gu gbata re.—1 Kor. 16:8, 9.

⁸ Pauro na kura aKristano aima du a na rengba ka tungusapai fu badungu aboro rogo gu garã nangia 49 Fuo Batikayo Kristo, ti gu regbo amokedi na kura abaakumba adiberã tipa gupai nga ga yeratise Yerusarema yo. (Amo. 15:23-29) Ho i apepa gu diaberã re ni fu adungurati, abawiriki amangi bakere asadatise tipa ka ‘tungusa’ gu wene pangbanga nga ga Yekova. (Amo. 15:30-35) Sangbanaha angia gine? Ziazia Kekeapai nagumba gupai nga ‘akanisa ki nyaki rogo idapase yo, kini nge ange na uru.’—Amo. 16:4, 5.

9. Ginipai du rogo badungu aringara areme, na gini sanahe rengbe ani ka sana tirani na ni?

⁹ Ani ima du na rengba ka tungusapai zanga kpakarapai rogo badungu aringara areme. Ya mo mo naraka rogo gu ringara du na ranirii rogoho nga ga irisombori? Kangia wo duhe, mo sananga tiro nga, ‘Waigu mi amangasunge na gi ranirii re?’ Ti gi yangara arame re, ga Yekova riigbu namanga sunge tungusapai ni bakerehe gbiati sunge yugopai kisusi gu niidu mbata. (Mk. 13:10) Badungu apai duho rengbe ani ka mangaha tingba gi sunge re.

10. Ginipai 2 Timoteo 4:2 angarasa rani ani mangihe?

¹⁰ Waigu rengbe mo ka mangapai ni tatamana ti regbo zereda? (Oni gedi 2 Timoteo 4:2.) Si angba gbe ka mo berẽkurii agu apai du tipa ro na ki bihe singia mo watadu boro sa dagba gamo aborokporo yo rengbe ka manga aˈariapai tipa gupai nga ka tungusapai ni bakerehe, isoke, ni mangasunge abazakigene. Si aidanga ani asadi kada ni airakumuko awere te, bambiko agu ahe du berani abatanga na ani ti regbo bakere gberãngbi te.—Snz. 11:4; Mt. 6:31-33; 1 Yo. 2:15-17.

11. Ginipai mo namangihe tipa ka tungusa wene pangbanga fu badungu aboro?

¹¹ Badungu abatungusipai ima wirika vovo fugo tipa gupai nga ka mangasunge na ni rogo sunge tungusapai gbiati yugopai. Ga Mbori riigbu ima kusa badungu ahe tipa si undo rani ani tungusipai rogo badungu afugo yo. Ni kpiapai, rogo 2010, gaani awaraga adu rogo afugo wa 500. Areme, gaani awaraga rogo afugo naima susa 1,000!

12. Waigu aboro agbia undo ho i agia gu pangbanga nga ga Kindo ni rogo gayo fugo? Oni funga kpiapai.

¹² Wai du aboro nidu ho i agia pa Yekova ni rogo gayo fugo yo? Oni bingo gu pangbanga nga ga kura wirina sa nga guri naagbia undo  ti bakere dunguratise rogo gu rago nga Memphis du Tennessee yo, Amerika yo. I amangi gu bakere dunguratise re rogo gari fugo nga Kinyarwanda, nga gu fugo i apehe Rwanda yo, Congo (Kinshasa) yo, na Uganda yo. Tingbafuo bakere dunguratise, gu wirina re aya: “Wa mi ayego ku Amerika ane agarã 17 kusayo, gere nga bambata regbo fere mi gi tire na gu mbakadapai nga ga bakere dunguratise wenengai gbe.” Si tie ziazia nga, gu mbakadapai re aima zio ngbaduriyo bakere gbe ho ri agihe ni rogo gari fugo yo. Ya mo mo rengbe ka wirika gu kura fugo tipa gupai nga ka undo kura aboro rogo gamo dagbarago, ka si du nga rengba bero tipa mangaha wo? Ya mo boro rengbe kadu rogo gamo dagbarago nga ga tungusapai nga guni du na nyemu gupai gbe nga ga degatuni kuti wene pangbanga ka mo fura funi rogo gani fugo? Gu bakere asadatise mo nika mangaha nika fu bakere ngbarago afu foro.

13. Waigu agu awirinarani du Russia yo amangisunge na regbo zereda?

¹³ Anga awirinarani dunduko du na ranirii ka tungusapai gbaiga te. Rogo kura aringara, awirinarani na ranirii ka tungusapai te, bambiko airangbii ima maa andiko nga gu nasa gupai nga ka i naatungusanga pai wa gu i aidaha ya. Ni kpiapai, oni berẽnga pa agu awirinarani du Russia yo. I aima rungosiyo tipa badungu agarã, ono rogo Marungu 1991, irangbii kini fu ranirii fuyo nga ga irisombori. Ti gu regbo re, bange abatungusipa Kindo adu Russia yo nga 16,000. Tingbafuo agarã ue bawe kusa, bange abatungusipai rogo gu ringara re asusi 160,000! Si tie ziazia nga, awirinarani aima mangapai ni tatamana ho i adu ni na momu beyo ka tungusapai zanga kpakarapai. Gu regbo zereda re aanyenga anye kindi te. Ono wa vura duhe nga apai ima ariatihe rogo gu ringara re, i namangasunge kindi kakaka fu Yekova. I nandu kindi kumbatayo kaa manga agu apai  dunduko rengbe yo ka mangaha tipa ka irisoko.

14-15. Waigu Yekova amangisunge na gako ome tipa ka undo Asa?

¹⁴ Ti rago Asa, regbo zereda aima ye ki digi. Badungu aborovura bangeyo aima susa mirioni sa aye Etiopia yo. Gayo barutiriivura nangia Zera, adu na gu kido nga ko na gako aborovura nika dia adia be Yuda. Ono tie, Bakindo Asa aadunga na kido kuti bange aboro te, ko adu na kido kuti gako Mbori nga Yekova. Asa amangi kparakpee ki ya: “Ako Yekova gaani Mbori, mo únda rani, bambiko ani nakida kuti ro, ani naye na rimoro kuti gi barimbasa re.”—2 Peka 14:11.

¹⁵ Wa si avura du nga bange agu aborovura naaye Etiopia yo re aima nge wa bara ue kisusi ga Asa abasovura, Asa aima ino gupai nga Yekova na ome ti ko na ko ima du na rengba ka undo Gako aboro. Na Yekova aima undo gako aboro. Asa na gako aborovura aima diabe agu aborovura nangia ga Etiopia yo re.—2 Peka 14:8-13.

16. Waigu ani aino gupai nga regbo zereda nika digo adigo?

¹⁶ Wa vura duhe nga ani ainongo gu futufutuapai dunduko nika manga tipa rani kumbatayo wa du ani ni basasa te, ani ima ino gupai nga gu zereda du ga Yekova amoyambu na ni awere nika digo adigo. Yesu ape gupai kumbatayo nga ti yangara arame, “rika aboro asóga” gako abawiriki asoga. (Mt. 24:9) Wakina gure a, gu mokedi nangia Pauro ape gupai nga “i arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” (2 Tim. 3:12) Satana na “bakere zinga,” na ka ani aberã gupai nga ani ima rengba ka ne gako zinga, gure nga ani nananga tirani.—Yugo. 12:12.

17. Gini agene rengbe gaani idapase kadu ni asadiasadihe ngbaha?

¹⁷ Barambeda kumbatayo, ani dunduko nika gbiatirani na aˈasada nga ga gaani padu ni ruruse. Barambeda, “bakere gberãngbi nikadu, wa zegino aenge da awere si adu nga wo te.” (Mt. 24:21) Ti gu regbo re, gaani aborokporo ima rengba ka sa tiyo kuti rani na airangbii ima rengba ka rugusa gaani sunge fu Yekova.  (Mt. 10:35, 36) Ya mo ani dunduko ni basasa adu wa Asa ki kido kuti Yekova tipa undo gbiati bandahe?

18. Ringbisihe kuti AEbere 10:38, 39, ginihe nika undo rani ani mbakaditirani tipa digido zereda?

¹⁸ Yekova aima digo ni mbakadi rani rogo toro yo tipa gupai du kumbatayo. Ko nangbembatayo fu “kangara moyambu” tipa i naafu gu wenewene ariahe nga ga toro “ti ragoho” tipa si naaundo rani ani nye nyanyaki rogo gaani irisombori yo. (Mt. 24:45) Ono ani dunduko ni basasa si aida ani mangi nyanyaki asadatise tipa kadu na nyanyaki idapase kuti Yekova.—Oni gedi AEbere 10:38, 39.

19-20. Nibi gupai du rogoho 1 Pekapai 28:9, gini asanahe si aida ani sana tirani na ni, na tipagine si aida ani sana tirani ti ni na ni?

¹⁹ Wakina Asa, si naida ani “gbata Yekova.” (2 Peka 14:4; 15:1, 2) Ani natona gbata Yekova ni ino ani ko na ki zi bapatiza. Ani namanga ai gupai rengbe ani ka mangaha tipa ka sa gaani nyemuse tipa ko si du ni nyanyakihe. Tipa ka bihe singia ani namanga gipai re nzunzu, ani rengbe ka sana tirani nga, ‘Ya mo mi naandu tipa agu adunguratise nga ga dungurati dedede?’ Ho du ani ni pati adunguratise, ani nagbia ome tipa kaa iriso Yekova kindi, na ani nagbia ngarasaro be awirinarani. (Mt. 11:28) Ani ima rengba ka sana tirani a nga, ‘Ya mo mi naawisigo Ziazia Kekeapai dedede?’ Ka si du nga mo naraka na gamo aborokporo, ya mo oni ninaamanga gu irisombori nga ga aborokporo na aposo dunduko? Watadu ka si du nga mo naraka ni saro, ya mo mo naadia regbo kaa manga gamo wisigopai nisase? Berewe a, ya mo mo naamangasunge tungusapai ni bakerehe gbe gbiati sunge sa aboro ni abawiriki?

²⁰ Tipagine si aida ani sana agu asanahe re ti ni? Ziazia Kekeapai nape gupai furani nga Yekova nawisigo gaani aberã gbiati agu apai du kpotoraniyo, sidu, si naida ani mangi kina gu bangisapai re a. (Oni gedi 1 Pekapai 28:9.) Ka ani bi gupai nga si naida ani mangi aˈariapai ti gaani asasa, abipai, watadu aberãpai, si naida ani sana Yekova tipa ko undo rani ani mangi agu aˈariapai re. Awere nga regbo tipa ka mbakadatirani tipa agu aˈasada du kumbatayo. Ka ai pai rugusinga ro ti mangasunge na regbo zereda ni tatamana ya!