1. A wa duhe rogo 3 Yoane 3, 4, ginipai nasarani ani du na ngbarago?

YA MO mo rengbe ka berãpa wai gu mokedi nangia Yoane adu na ngbarago ho ko agi gupai ni nga agu aboro ko aundo yo i wiriki rengo aandu kindi kumbatayo kaa iriso Yekova ni ruruyo? I aagbiatiyo agbia na akpakarapai, na Yoane aamanga ome nyanyaki tipa ka nyakasa ga gu ruru aKristano re idapase, nga aguyo ko aabiyo ni agu awiriko nga ga toro yo. Wakina gure a, ani nadu na ngbarago ho awirani, singia ga borose yo watadu ga toro yo, akparatiyo ni fu Yekova na kini ndu kindi kumbatayo kaa irisoko.—Oni gedi 3 Yoane 3, 4.

2. Tipagine Yoane ake awaraga ti ni?

² Rogo gu garã nangia 98 Fuo Batikayo Kristo, si nawira gupai nga Yoane aaraka Efesa yo watadu mbembedi na Efesa. Si nawira gupai nga ko aga koyo tingbafuo i kusiko bambukiso yo rogo gu kisanga nga ga Patemo. Bara ti gu regbo re, ga Yekova ziazia toro afõngbadukoyo ko ke awaraga biata. Ndu ke agu awaraga re angia ka fõngbadu ruru aKristano yo tipa i kakuti gu idapase i adu na ni kuti Yesu na kini ta kindi rogo toro yo.

3. Gini asanahe ani nika gbia akaragapai kutini?

³ Yoane nangia gu yangara mokedi naaraka kindi, na ko aabakabangiriko tipa gu gbegberẽ maapai kurii ziree abayugupai adu na ni kurii adungurati. * (1 Yo. 2:18, 19, 26) Agu abasamungu kuti ndikidi pambori re aamanga tiyo nga i aima ino Mbori, ono i aairisanga ga Yekova arugute te. Ani wisigingo pai tipa gu rugute ga Mbori toro adu kugii Yoane ko fuhe. Rogo gi kekeapai re, ani nika karagapai kuti asanahe biata: Rogo gupai yo nga ka ta rogo rengo yo nga gine? Gini akpakarapai rengbe ka sa rani ani mbu ta rogo rengo yo? Na waigu rengbe ani ka undo tirani dagba tirani tipa ka nye rogo rengo yo?

4. Ringbisihe kuti 1 Yoane 2:3-6 na 2 Yoane 4, 6, ta rogo rengo yo nakoda gini apai?

⁴ Tipa gupai nga ka ta rogo rengo yo, si naida ani ini gu rengo du rogo Fugo Mbori yo nga Ziazia Kekeapai. Kurigure, si naida ani ‘ka kuti ga Yekova arugute,’ naida ka ya, si naida ani naairisa ho. (Oni gedi 1 Yoane 2:3-6; 2 Yoane 4, 6.) Yesu amoi bawene kpiapai nga ga giasangba Yekova. Sidu, gene sa dagba gu nyanyakipa agene yo ani agiasangba Yekova ngbaha nga, ni peka ani fuo ga Yesu kpiapai sirisiri wa rengbe omerani na ni.—Yo. 8:29; 1 Pet. 2:21.

5. Gini apai si aida ani idi kutini?

⁵ Tipa kaa ta kindi rogo rengo yo, si naida ani idi kuti gupai nga Yekova nga Mbori rengo, na agu apai ko apehe furani rogo Fugoko yo nga Ziazia Kekeapai, si dunduko nga rengo. Na si naida ani idi kuti gupai a nga Yesu nga gu Masiya i akido pako. Badungu aboro areme du na kapa kuti gupai nga i aima mbeda Yesu ni Bakindo ga Mbori Kindo. Yoane afu zahe nga “dungu airanangahe” naadu ho narengbe ka nanga agu aboro naaidanga nyanyaki kuti gu rengo du tipa aYekova na Yesu ya. (2 Yo. 7-11) Yoane akepai ki ya: “Da nga irazire fuo kina gu ni nati kangu ya Yesu nga Kristo te?” (1 Yo. 2:22) Gu yangara gene rengbe ani ka bandatirani ngbaha tipa ka i nangingo rani ya nga ni wisigo ani Fugo Mbori. Ka ani wisigi Fugo Mbori, ani nika ye ka ino aYekova na Yesu. (Yo. 17:3) Na ani nika ida kuti gupai nzunzu nga ani rogo rengo yo.

6. Gini kpakarapai sa paranga aKristano agbiatiyo na ni?

⁶ AKristano dunduko si aida i du na rubangirise tipa gupai nga ka i nangingo yo na agu ayugopai nga ga wiri aboro ya. (1 Yo. 2:26) Paranga aKristano gbe si aida i du na rubangirise nibipa gi kerepai re. Alexia, * nga wirina sa du garãri nga 25 France yo aya: “Ho mi adu ni sukuru yo, mi awiriki gupai nga ahe akuru nisaha na mi awirikipai tipa gu kura aberãpai nga ga wiri aboro, na agu aberãpai re anaavundo rire yo avundo. Ti kura aregbo, agu ayugopai re anaangba angba tire. Ono mi aberẽ gupai nga si ima rengba kadu ni irairapai ka mbupa gupai Ziazia Kekeapai ayugoho kini idi kuti agu apai dunduko gimi abayugupai anaagumbaha.” Alexia awisigi gu buku nga Life—How Did It Get Here? By Evolution or by Creation? Vuru bete aposo yo gbua, agu akapa ri adu na ni kini go kusayo. Alexia aya: “Mi aidi kuti  gupai ni tire nga Ziazia Kekeapai na rengo rogoho. Na mi arugu tire na gupai nga raka ringbisihe kuti gaha arugute nika fu ngbarago fere gbiati zereda.”

7. Ginipai si aida ani du na rubangirise ka zanga mangaha na tipagine?

⁷ AKristano dunduko, singia paranga yo na nyanyaki yo, si aida i du na rubangirise tipa gupai nga ka zanga kaa manga tiyo nga i nairiso Yekova na ti kina gu bangisa regbo re i kini mangi agu apai du ni irairaha. Yoane agumba gupai nga ka ani naatanga rogo rengo yo na ti kina gu bangisa regbo re kini raki wasiwasi raka ya. (1 Yo. 1:6) Ka ani aida gupai nga Mbori idi na gaani pai awere na kumbatayo, si naida ani nitingidi gupai ti aregbo dũ nga Yekova nabi agu apai abi dunduko ani amangaha. Ka si vura du vurũ nga aboro abingo agu apai ani amangaha rogo gbuko yo te, Yekova nabihe dunduko.—Eb. 4:13.

8. Ginipai si aida ani káha?

⁸ Si naida ani ká gu bipai du zegino na ni tipa ingaapai. Gu mokedi nangia Yoane akepai nga: “Ka ani ya ingapai ti rani te, ani nangi tirani, rengo du nga ti rani te.” (1 Yo. 1:8) Ti rago Yoane, abasamungu kuti ndikidi pambori aagumba gupai nga boro ima rengba kaa manga ingaapai niwia na ni kidu kindi na wene pagume na Mbori. Areme, ani naraka dagba agu aboro du na kina gu bangisa bipai re. Badungu aboro naya i ima ida kuti Mbori, ono i aidanga gupai Yekova agumbaha tipa ingaapai te. I aidanga gbe kuti gupai ko agumbaha tipa kodaba te. Kura ngbatunga asino kodaba kinaho Yekova agumba gupai tipaha nga ngbanga ha te, ingapai du nga ni, ono agu aboro re naya si ngbaangba ka si du nga ga boro siapai du.

9. Tipagine duhe ti ni ni wenepai ho paranga aboro amanga gupai ni Ziazia Kekeapai agumbaha nga si nga rurupai?

⁹ Si ima rengba kadu ni kere kpakarakpakaraha fu gu paranga aboro nga aKristano tipa i du na ruru bipai tipa kodaba ho duhe ni  nga agu aboro du pati yo basunge yo watadu sukuru yo aidanga gupai Ziazia Kekeapai apehe tipa kodaba te na i kini asadi ka sosoda gi paranga aKristano re tipa i aria gayo bipai. Gere nga gupai namangi tipa Aleksandar. Ko aya: “Kura adegude sukuru yo aˈasadi ka sosoda re tipa mi kodiba na yo. I agumba gupai nga wa duhe nga nakureami ti ni nga degude te na mi aidanga yo a te, gure nayugo gupai nga mi nakodaba na kina akuare akumba.” Ngbatungapai wa gure ima rengba ka manga ro. Ono ka mo mangi gupai ini moho nga si Ziazia Kekeapai agumbaha nga si du ni ruruhe, mo nika du na ngbarago tipa tiro, ki banda kpotoro ni wenehe, ki banda tiro ti bakere gberãrago na gamo pagume na Yekova kidu wenengai. Na ai gu regbo mo ambunga aˈasada si saro mo mangi gupai du ni gbegberẽhe ya, si nika du taata foro tipa mo mangi gupai du ni ruruhe. Mo tingidi gupai a nga, gu iraira bipai du tipa kodaba aenge ti Satana. Sidu, ho mo aká ka berã wa agu aboro du rogo zegino ni, mo ‘nadia be gbegberẽ ko.’—1 Yo. 2:14.

10. Waigu 1 Yoane 1:9 aundo rani ani irisi Yekova na gigiri sangbakpotoseyo?

¹⁰ Ani ima ino gupai nga Yekova du na rengo beko ka pe pa gupai du nga ingapai. Na ani namanga asadatise ka zanga manga ingapai. Ono ho mangi ani ingapai ni, ani nakusa gaani ingapai fu Yekova rogo kparakpee yo. (Oni gedi 1 Yoane 1:9.) Na ka si du nga ani mangi kere ingapai, ani nagbata gu undo nga ga abaakumba, nga agu aboro Yekova namoi yo i naangerafuo rani. (Yak. 5:14-16) Ono tie, si aidanga ani nye kaa berã kina kurii gu ingaapai ani amangihe kusayo te. Tipagine si aidanga ha ti ni wo ya? Bambiko gu Barani nga boro nyemuse aima fu gu motumo tumorii nga ga Wiriko tipa gupai nga i mbupai furani ti gaani aingapai. Ho Yekova agumba gupai ni nga ko nika mbupai fu gu boro mangi ingaapai na ni ki mangi ndikidi saberã, ko namanga kina boro gupai ko agumbaha. Sidu, pai ho rengbe ka ká na ani ti iriso ani Yekova na gigiri sangbakpotoseyo te.—1 Yo. 2:1, 2, 12; 3:19, 20.

11. Waigu rengbe ani ka bandatirani ti agu ayugopai rengbe ka gbarasa gaani idapase?

 ¹¹ Si naida ani ká agu ayugopai nga ga abasamungu kuti ndikidi pambori. Naatona kina ti gu regbo gu dungurati nga ga aKristano atona, Bakitingbanga ninaamangasunge na abanangi aboro tipa i rimisi kapa ku kpoto ga Mbori ruru amoyambu yo. Sidu, si naida ani ini wai ka kpara gupai nga rengo ti gupai nga ziree. * Agu aboro nasoga rani ima rengba ka mangasunge na Internet ka asada ka rungburasi gaani kido kuti Yekova na gaani nyemuse tipa awirinarani. Ka oni ya idinga kuti agu aziree re ya, mbiko si naye be Satana!—1 Yo. 4:1, 6; Yugo. 12:9.

12. Tipagine si aida ani nyakasi gaani idapase ti ni rogo agu arengo yo ani nawirikihe?

¹² Tipa ka Satana rungburasingo gaani idapase ya, si naida ani nyakasi gaani idapase kuti gupai nga Yekova namangasunge na Yesu tipa ka digiso gupai ko akpinyemuhe. Si naida ani du na kido a kuti agu aboro Yekova amangasunge na yo areme tipa i naangbe kumbatayo rogo gako riigbu. (Mt. 24:45-47) Ani nanyakasa gaani kido ni geda ani Fugo Mbori dedede. Na gaani idapase nika du wakina gu ngua atarãha naima rimo dudungurõ kusende yo. Pauro agumba kina ngbatunga gupai re ho ko ake waraga ni fu gu dungurati naadu Korosai yo. Ko aya: “Wa di oni Kristo Yesu Gbia ti ni, oni tá rogo ko yo, tarãroni ki rimi oni ki du ni duadua roni rogo ko yo, oni rú na gaoni idapase nyanyaki.” (Koro. 2:6, 7) Pai ho rengbe Satana watadu agu aboro du ko namaapai kuriyo ka mangaha na gu boro naima nyakasa gani idapase te.—2 Yo. 8, 9.

13. Ginipai si aida ani inihe na tipagine?

¹³ Si naida ani ini gupai nga zegino nika soga rani asoga. (1 Yo. 3:13) Yoane atingidi rani na gupai nga, “zegino dunduko du ni zogozogo ho be gbegberẽ ko.” (1 Yo. 5:19) Wa digido gi zegino re ambeda, ga Satana zinga nakio kina kumbatayo. (Yugo. 12:12) Ko namangasunge na gu kura azubohe kisusi gu nga ga iraira mangaapai na abasamungu kuti ndikidi pambori. Ko namangasunge amanga na kere arungosiro. Satana ima ino gupai nga kina bete regbo nye fuko koyo tipa ko asadi ka rugusa gaani sunge tungusapai watadu ko rungburasi gaani idapase. Si airiwongo tirani ka bi gupai nga i ima ká na bete gaani asunge watadu gaani asunge dunduko rogo kura aringara te. Wa vura duhe wo, agu awirinarani du rogo agu aringara re nahipai ahi. I nayugo gupai nga ka Satana vura manga kina ginipai vurũ fu ga Yekova aboro, ani ima rengba ka nye ni rururani!

14. Gini gene sa rengbe ani ka undo awirinarani ngbaha i nye rogo rengo yo?

¹⁴ Tipa ka undo akuarani i nye rogo rengo yo, si naida ani du na nunga. (1 Yo. 3:10, 11, 16-18) Si naida ani kpinyemu awirinarani angianga kinaho du apai ni ni wenehe ya, ono ho apai andunga ni wenengai ya a. Ni kpiapai, ya mo mo iningo pa boro zanga gani boro rogo kpio yo na ni kini idi na wasa watadu undo rogo mangimangipai yo? Watadu ya mo mo ginga pa akuarani aidipase nga aguyo zanga badungu gayo ahe mbiko gu gberãngo naye be ome zegino na i kini idi na undo tipa ka me gayo Bambu Kindo watadu akpuyo? Ani ayugongo bakio wai ani nakpinyemu awirinarani na kini yugu nunga fuyo sa kina rogo gupai yo ani agumbaha te, ono gu nyakipaha gbe nga ani nayugoho rogo gupai yo ani amangaha.

15. A wa duhe rogo 1 Yoane 4:7, 8, ginipai si aida ani mangihe?

¹⁵ Ani nawirika gu Barani nga boro nyemuse  ni yugo ani nyemuse fu akuarani. (Oni gedi 1 Yoane 4:7, 8.) Nyanyakipa gene sa ani ayugo nyemuse ngbaha nga nimbu ani pai fu akuarani. Ni kpiapai, ka boro ba gberãrago tirani, si naida ani yugu nyemuse nimbu ani pai funi na bangirani ki go ti gani ingahe. (Koro. 3:13) Wirina du rimoko nga Aldo adu na gberãrago ho gu wirina ko anaairisa ko airisa agumba gbegberẽpai ni tipa ngbatunga gako aboro. Aldo aya, “Mi anaamanga kparakpee fu Yekova dedede tipa ko undo re ka mi dunga na gbegberẽ bipai tipa gu wirina re ya.” Ono Aldo amangi kurapai amanga berewe. Ko asana gu wirina re tipa i kuru na ko gene tungusapai yo. Wa i aatungusapai sa, Aldo agumbapa wai rago agberẽ tiko fu gu wirina re tipa gupai ko agumbaha. Aldo aya, “Ho gu wirina re agi pa wai ni rago agberẽ tire na gupai ko agumbaha, ko ahõmbupai. Gu gene ko afura ngbaha aima yugo gupai fere nga rago aima gberã tiko na gupai ko agumbaha re. Tona ho ka ndu kumbatayo, ani ada ni wene abakure berewe.”

16-17. Gini apai si aida ani diberã tipaha?

¹⁶ Gu mokedi nangia Yoane aima kpinyemu awirinako ni bakerehe na ko kini idi gupai nga i du na nyanyaki idapase. Gako nyemuse na pa berã ko payo ni yuguyuguhe ziazia rogo gu rugute yo ko afuhe rogo gu gako awaraga naadu biata re. Si ni wenepai ka ino gupai nga agu akumba na adee nika zogarago na Yesu ngbangbaturũ yo, i na kina nyemuse tiyo na i naberãpa aboro wakina Yoane!—1 Yo. 2:27.

¹⁷ Ani dinga agu arugute adia ku ngbadurani yo ani nasakipai tipaha re. Ani dinga berã adia kaa ta kina rogo rengo yo kini gisangba Yekova rogo agu apai ani amangaha rogo raka yo naabaha. Oni wisigi Fugoko na kidu na kido kutini. Oni sonosi nyanyaki idapase kuti Yesu. Oni ká gu yugopai nga ga wiri aboro na gu yugopai nga ga abasamungu kuti ndikidi pambori. Ka oni mangingo tironi nga oni nairiso Yekova na ti kina gu bangisa regbo re kini mangi gu kura apai du ni gbegberẽhe ya, na ka oni degenga turoni fu agu aboro naˈasada ka sosoda roni oni mangi gupai du ni irairaha ya. Oni raki kuti agu arugute nga ga Yekova. Na ani undo awirinarani i nye nyanyaki ni mbu ani pai fu agu aboro naimisa rani na kini undo agu aboro du rogo zingo yo. Ka ani mangihe wo, ani nikaa ta kina rogo rengo yo ka ani vura kaa gbiatirani na akpakarapai vurũ.