1. Tipagine du bapatiza ti ni nga nyanyakipa diandue? (Oni bi gu sura duti tonatonaha.)

ROGO agarã dunduko, akutu agu aboro nawirika Ziazia Kekeapai nazio bapatiza. Badungu agu aboro re nga paranga aboro, sosono agude, na rukutu agude. Si rengbe kadu nga i asonosi yo kina ku rogo rengo yo. Ya mo mo dagbayo yo? Kangia wodu, si naida i tambua ro atambua. Bapatiza nga guhe si aidaha be aKristano dunduko, na si na nyanyakipaha tipa ka gbia bata.​—Mt. 28:19, 20; 1 Pet. 3:21.

2. Tipagine si aidanga boro gunde ti ni be gu diandue nga ga bapatiza watadu ka nehe ya?

² Wa vura duhe nga bapatiza nazakagene fu boro ni gbia badungu amaku, si nayeaye na atindiro kurini a. Ngba gini gene? Ni gu uru mo aazio bapatiza, mo akaragapai nga ii kuti gu sanahe nga, “Riimburu ga Yesu Kristo motumo tumorii, mo ima saberã ti gamo ingaapai na ki kpara gamo raka fu Yekova tipa ka manga gupai ko akpinyemuhe?” Gamo bapatiza nayugopa gamo kparatise. Si nga nyanyakipa mokido mo amangihe fu Yekova nga mo nika kpinyemuko na kini peresipa gako apai mbatayo fu kura apai dunduko. Gure nga nyanyaki mozunga. Ya mo si naida mo bira tiro nga mo amangihe? Oó, si aidanga mo bira tiro te. Iraira diaberã nga ni ka  fu tiro ku be Yekova yo te. Oni bingo gi kurapai tigaha re! Gu boro afunga gani raka fu Yekova ya, ni tii gu zogarago nga ga Satana. Nyemu gupai ti Bakitingbanga nga mo bati te. Gupai zaatu ko aidaha nga mo zanga nyenye unga tipa ka ngbe na kinako tipa ka soga ga Yekova bakere pagbia.

3. Gini amaku mo agbiaha ho mo akpara tiro ni fu Yekova?

³ Kuba gupai nga ka songoda Satana, mo bingo agu amaku du bero wangia mo gu Kristano naima zio bapatiza na ki kpara tiní fu Mbori. Wadu he awere nga mo ima kpara gamo raka fu Yekova, mo rengbe ka pe gupai zukazuka nga: “Wa du Yekova tipa re; mi agunde nga wa sa te. Gini pai boro ka manga re na ni?” (Tam. 118:6) Kura bakere momu ho rengbe mo kadu na ni rogo raka yo kisusi gunga ka ngbe na Mbori na ko idi na mo te.

4, 5. (a) Ngba gini gene du du kparatise fu Mbori ni gu tindiro nga ga aboro ni basasa dũ? (b) Gini aˈasada agbianga kina paranga aboro sa ya?

⁴ Wangia mo gu Kristano naima zio bapatiza, gamo pagume na Yekova wa gu dagbangua nga ga avunguro rengbe mo ka diakumbo ho te. Kuba gure, pa gbia mo bata naru kina kuriro, ka si vura du vurũ nga mo naraka kindi kporo na avunguro. Tipagine duhe ti ni ni nyanyakipa pai ka tingida gupai re? Mbiko mo arengbanga ti aregbo dũ ka ino agu aˈasada mo nika gbiatiro na ni kumbatayo te. Ni kpiapai, kangia mo azi bapatiza ho mo adu ni kindi ni tooni gude, si nawira gupai gbe nga mo nika gbiatiro na vovo nyemuapai gbiati sosodahe wa mo nika da ni sosono gude. Kura sosono degude sa ape gipai re ngba gi gene re: “Dedede, gude arengbanga ka soga du ni Dezire Yekova mbiko gupai nga u nazanga ri gu kpakuto nga ga tingidapa vunga boro sukuru yo te. Ono tingbafuo bete agarã ho nyemu kodaba adani ni kere nyanyakihe, si naida ni du na bakere ida kuti gupai nga irisa ga Yekova andiko ti aregbo dunduko nga wene siapai.”

⁵ Rengo ngaha nga, anga kina paranga aboro sa nagbiatiyo na vovo aˈasada te. Zavura agu aboro nazi bapatiza mbuyo ni sosono aboro nagbiatiyo agbia na badungu tunguotunguo aˈasada kuti gayo idapase. Gu ngbatunga aˈasada re rengbe kadu nibipa rogatise, padu kpotose na akakaza, watadu sunge marã. Nirengo, aboro dunduko zanga bipa garãyo nika gbiatiyo agbia na gupai si nika ida i nye ni ruruyo fu Yekova rogoho.​—Yak. 1:12-14.

6. (a) Ngba gini gene du du gaani kparatise fu Yekova ni gupai ka kina ginipai vura manga vurũ ani ki ka aka kutini? (b) Ginipai rengbe mo ka wirikaha rogo AFiripoio 4:11-13?

⁶ Tipa mo nye ni ruru ro rogo aˈasada yo dunduko, ka bangiro gonga ti gupai ya nga gu kidohe mo amangihe fu Yekova, si adu nga mo nika ka aka kutini ka kina ginipai vura manga vurũ. Naida ka ya, mo ape gupai fu Bakere Bakindo zegino nga mo nikaa irisoko airiso kindi ka si vura du vurũ nga abakureamo watadu avunguro nika mbu irisoko. (Tam. 27:10) Agu akpakarapai dunduko mo nikaa gbiatiro na ni, mo sana Yekova ko undoro mo raki ringbisihe kuti gamo kparatise fuko.​—Oni gedi AFiripoio 4:11-13.

7. Mangapai tipa gamo bata “ni gunde na kio” nayugo ginipai?

⁷ Yekova naida mo du ni bakureako. Ono si naida nyanyaki asadatise aida bero tipa gupai nga mo banda gu pabakure re na tipa mo mangipai tipa gamo bata. Nirengo, AFiripoio 2:12 naya: “Oni mangi pa gaoni bata tigaoni ni gunde na kio.” Agu afugo re nayugo gupai nga si naida mo berãkuriipa wai mo nika banda gamo pabakure na Yekova na ki nye ni ruru ro fuko ka mo vura ka gbiatiro na kina gini kpakarapai vurũ. Si aidanga mo naata ngbaduro te. Zavura kura ga Mbori amoyambu nga aguyo naima mangasunge fuko tipa gbanga regbo, aima inga. Sidu tie, gini  adiandue rengbe mo ka diaha tipa ka mangapai tipa gamo bata?

8. Wisigopai nisase nakoda gine, na tipagine duhe ti ni na nyanyakipaha?

⁸ Tipa Yekova du ni bakurearani, si naida ani naadega turani fuko na kini fura fuko a. Wisigo Ziazia Kekeapai nisase nga gu bangua gene ani adegaturani fu Yekova ngbaha. Gure nakoda gbia ani inohe vurube geda Fugo Mbori gbiati agu awaraga du mburuhe rii Ziazia Kekeapai na kini berẽkuriihe. A wa mo nikaa mangaha wo, mo tingidi gupai nga, anga wisigo Ziazia Kekeapai wa gu kungbo wisigopai nga ga sukuru te. Si aidanga si du wa ka i ya mo naida ka inopai ngbariro gbua tipa ka zanga ti ti asada sukuru yo te. Gu wisigopai du na wene surungbaha, si wakina gu wene nunguro rengbe mo ka nduhe na mo ki kuru bara vovo apai ngbaha tipa asino Yekova. Si nika undoro mo mbedi na Mbori, na ko ki mbedi na mo a.​—Yak. 4:8.

9. Gini aũsunge undoro rogo gamo wisigopai yo nisase?

⁹ Ga Yekova riigbu ima kusa badungu aũsunge nga gu rengbe ka undoro mo du na wene mbakadapai bero nga ga wisigopai. Ni kpiapai, gupai nga “Bible Study Activities” nga gu du rogo gu papara jw.org nga “Teenagers” rengbe ka undoro mo wirikipai ti agu apai namangi du paha rogo Ziazia Kekeapai yo. Agu amoundo wisigopai berewe a du rogo jw.org, nga “What Does the Bible Really Teach?” rengbe ka undoro mo sonosi nyanyaki idapase kuti gamo aida. Agu amoundo wisigopai re rengbe ka undoro mo ini wai ka sakapa gamo aida fu kura aboro. Mo rengbe ka gbia kura aberãpai tipa wisigopai nisase rogo gu kekeapai nga “Young People Ask . . . How Can I Make Bible Reading Enjoyable?” rogo gu Awake! nangia ga Zerekpe 2009. Wisigopai na berãkuriipai na nyanyakipaha foro tipa mo mangipai tipa gamo bata.​—Oni gedi Atambuahe 119:105.

10. Tipagine du kparakpee ti ni na nyanyakipaha fu gu Kristano naima zio bapatiza?

¹⁰ Wadu he nga wisigopai nisase nga gene sa ani adegaturani fu Yekova ngbaha, kparakpee nga gu gene ani afura fuko ngbaha. Si aidanga Kristano naabi kparakpee gbua ni gu kungbo mangapai nga ga pambori te; anga si a nga ‘guhe nafu wene momu fu boro’ tipa gupai nga ni du na diabese rogo gani nyanyaki asadatise yo te. Kuba gure, kparakpee  nga ndikidi fugo na Bakusirani. Yekova na nyemu ka gia gupai du ngbaro. (Oni gedi AFiripoio 4:6.) Ho mo agbia tiro ni na bakabangirise, Ziazia Kekeapai nafu gu rugute foro nga, “mo bá ga tindiro ku auru Yekova.” (Tam. 55:22) Ya mo mo idi kuti gupai re nzunzu? Badungu amirioni awirina duho rengbe ka pe gupai foro nga si aima undoyo. Si ima rengba ka undoro a!

11. Tipagine si aida mo naafu tambuahe ti ni fu Yekova ti aregbo dunduko?

¹¹ Kparakusayo ti sana Yekova tipa undo, kparakpee nafu momu foro mo mangi kurapai berewe. Ziazia Kekeapai naya: ‘Oni nitambua he.’ (Koro. 3:15) Kura aregbo, ani rengbe kaa bakabangirani na kina gaani akpakarapai si ki sa gupai nga ka ani bingo gu badungu amaku du berani ya. Si adu ni wenepai ka mo diberã nga aˈuru dunduko mo nikaa berãpa apai wa kandara biata nga gu rengbe mo kadu na tambuahe tipaha. Fuani, mo ki tambua Yekova rogo kparakpee yo tipa agu amaku re. Sosono degude du rimori nga Abigail, nga guri nazi bapatiza ho garãri adu ni 12 aya: “Mi nabihe nga Yekova ima rẽ tipa ani fu tambuahe fuko kisusi kura aboro dunduko rogo zegino. Si naida ani naafu tambuahe fuko tipa agu agamunihe ko nafuhe furani ti agu aregbo dunduko momu akura ti ni.”

12, 13. Tipagine duhe ti ni ni nyanyakipa pai mo berẽpa wai mo naˈía ga Yekova wenesino nitiro?

¹² Bakindo Davide naadu bakuru kusayo, nga guko nabati be badungu kere fudifudiapai, agumba agu afugo rogo bia yo nga: “Ako, oni ía Yekova ka bi ko ko du ni wene ko! Boro maku nga gu ni ninafu tini ku be ko!” (Tam. 34:8) Gu veresi re nanyakasapa wai nyakipa gupai nga ani ía ga Yekova wenesino tipa tirani. Ho mo ageda Ziazia Kekeapai ni gbiati gaani awaraga na ho mo andu ni tipa agu adunguratise nga ga aKristano, mo nagia agu apangbanga nga ga ngarasaro nga gu du tipa wai Mbori naundo kura aboro i nye ni ruruyo. Ono a wa mo nikaa sona rogo toro yo, si naida mo bi be Yekova abi kina boro rogo gamo raka yo. Wai du mo naˈía ga Yekova wenesino nitiro?

¹³ Gene kinaho sa aKristano dunduko naˈía ga Yekova wenesino ngbaha. Si nga pa yamba Mbori yo i mbedi na ko gbiati Wiriko. Yesu aya: “A nga boro sa ka ye kono du mi ni gbua te, kina Buba nakedi re ka gbe ni.” (Yo. 6:44) Ya mo mo nabihe nga agu afugo re tipa ro? Paranga boro rengbe ka ya, ‘Yekova agbe avungure, na mi tigimi gbua ki pekefuo yo.’ Ono ho mo aakpara tiro ni fu Yekova na ki zi bapatiza, mo ayuguhe nga mo ima du na kparakpara pagume na ko. Awere tie, ko ima ino ro nzunzu. Ziazia Kekeapai nakido rani nga: “Ka boro kpi nyemu Mbori, ko ini ni.” (1 Kor. 8:3) Mo ni asadi ti aregbo dunduko kaa bi gamo bangiriba rogo ga Yekova riigbu na nyanyakipaha.

14, 15. Wai du rengbe sunge tungusapai ka undoro mo nyakasi gamo idapase?

¹⁴ Gu kura gene rengbe mo ka ía ga Yekova wenesino ngbaha nga ka bi wai ko asongoda ro wa mo atungusapa gamo idapase fu kura aboro. Mo rengbe ka manga gipai re ho du mo ni gene tungusapai yo gbiati sukuru yo. Si ima kpakara fu kura paranga aboro ka tungusapai fu akurayo sukuru yo. Si nawira wa mo ima rengba ka ino gu ndupai si nakpakara ti ni. Mbiko mo ainongo wai i nika karagapai kuti gamo tungusapai te. Si ima rengba kadu ni mbumbuhe gbe ka si du nga mo nafura fu badungu aboro angianga fu kina gude sukuru sa gbua ya. Ginipai rengbe ka undoro?

¹⁵ Bambatapai nga, mo berẽpa gu ndupai du mo ti ni na nyanyaki idapase kuti gamo aida. Ya mo agu amoundo wisigopai du rogo jw.org kina rogo paro yo? Ka mo ainongo nzunzu singia si rogoho ya, mo di regbo ka gbataha. I akusihe tipa si undoro mo berẽkurii gupai mo naidi kutini, gu ndupai mo naidi ti ni kutini, na wai mo narengbe ka sakapa  gamo aida fu kura aboro. Ho du gamo ida ni ni nyanyakihe na mo ki ima mbakada tiro wenengai, si nika fõ ro mo mangi dezirepai tipa rimo Yekova.​—Yere. 20:8, 9.

16. Ginipai rengbe ka undoro mo dibe ndundu tipa ka fura tipa gamo aida?

¹⁶ Ono tie, zavura ho mo naima mbakadatiro ni, mo ima rengba ka manga ndundu ka fura tipa gamo aida. Wirinarani du garãri 18, nga guri nazi bapatiza ho garãri adu ni 13, aya, “Mi ima ino gupai mi naidi kutini, ono ti gu kura aregbo, si ima kpakara fere ka peka agu apai du berãre yo fu kura aboro.” Wai du ri amangapai kuti gi kpakarapai re? Ri aya, “Mi naasada ka zereda azereda ka fura. Agu akuare du mi nayo sukuru yo naagundenga ka fura tipa agu apai i naamangaha te. Si aidanga mi naagunde a te. Sidu, ho mi naape pangbanga ni, mi nape pa Ziazia Kekeapai ku rogoho, ngbatungapai wa gu nga, ‘Bambeda kusayo, mi aayugo Ziazia Kekeapai na . . . ’ Fuani, mi ki ndu kumbatayo na gimi pangbanga. Wa vura duhe nga anga Ziazia Kekeapai nga gu memepai ani afura tipaha ti gu regbo re te, dedede i nidu na nyemu ka ino gupai mi naamangaha ho mi ayugo Ziazia Kekeapai ni. Kura aregbo, i nasasana re tipaha. Wa mi amangasunge na gi ngbatunga birĩ re dedede, si nada fere taata. Na tingbafuoho, mi nidu na bakere ngbarago!”

17. Wai du rengbe gu bipai du mo na ni tipa gamo idapase ka undoro mo fura fu kura aboro?

¹⁷ Wa mo nikaa yugo irisa fu kura aboro na kini yugu nyemuse fuyo, si nawira gupai gbe nga i nika manga kina gu ngisapai re foro a. “Mi aima digo nigunde nga ka mi tona ka fura tipa Ziazia Kekeapai ho ani afura ni na kura aboro, i nika bire ni kere kakaka boro pambori.” Gure nga gupai Olivia du garãri 17 agumbaha nga guri nazi bapatiza mburi kindi tooni. Fuani, ri ki tona ka aria gari bipai. Kuba gupai nga kaa berã gbe kina kurii agu apai naaba gunde tiri, ri aya: “Badungu paranga aboro ainongo pai tipa aDezire Yekova te. Ani nga gu yangara aDezire Yekova i naini yo. Sidu, gu gene ani amangapai ngbaha ima rengba kadu na maapai kurii gu gene i nika karagapai ngbaha. Na ka si du nga zee namanga rani amanga watadu si ni mbumbuhe furani ka fura tipa gaani idapase, watadu na ka ani agunde agunde ho ani afura ni tipa gaani idapase? Sidu, i ima rengba kaa birani wa ka i ya rago angbanga tirani na gu ngbatunga aboro du ani nga yo te. I ima rengba ka karagapai zaatu ngba gbegberẽ gene mbiko gupai nga wingbaduse tirani te. Ono tie, ka ani zeredi azereda ka fura na kido kuti gupai ani naidi kutini, ki saha si du ni papara gupai ani afura tipaha, si nawira gupai gbe nga i nika irisa rani airisa.”

18. Gini apai si aida mo mangihe tipa ka gbia bata?

¹⁸ A wa ani nabihe, nyanyaki tindiro du nga ni ka mangapai tipa gamo bata. Agu apai si akodaha nga, geda Fugo Mbori na kini berẽkuriihe, kparakpee fu Yekova, na kini berẽkurii agu agene Yekova nafu maku foro ngbaha. Ka mo amanga agu apai re, si rengbe ka nyakasa gamo wingbaduse rogo gu momu yo du mo na ni nga kadu na pabakure na Yekova. Gupai re tigaha, nika fõngbaduroyo mo fura fu kura aboro tipa gamo idapase.​—Oni gedi Atambuahe 73:28.

19. Gini undo du ti gu nyanyaki asadatise mo amangaha tipa ka gbia bata?

¹⁹ Yesu aya: “Gu ni ka akpi nyemu peka re, ni mbú gani apai, ki di gani wagiwagi ngua, ki nipeke re.” (Mt. 16:24) Si tie ziazia nga, du ni bawiriki nga gu nakoda kparatise fu Mbori na zio bapatiza, nga gu tindiro du kuriro wangia mo Kristano. Ono wa vura duhe wo, si nazakagene tipa badungu amaku awere na nyenye unga rogo ga Mbori vovo zegino. Sidu, mo mangi ome nyanyaki tipa gamo bata!