Ya mo mo gedinga agu aNgbaõbambu Sinziri nga ga gi garã re? Sidu, mo bingo singia mo rengbe ka karagapai kuti agi asanahe re:

Waigu si aida ani naamangapai na mbedimbedi aKristano?

Ani ima du na tambuahe tipa gayo idapase; ono tie, ani agbenga berãrani kutiyo gbe te. Ani nane gupai nga ga “bi aboro na kiki payo kisusi.” (Yuda 16, NW) Ani asananga yo na agu asanahe nabipa gayo maabangirise te.—w20.01, kpe. 29.

Ginipai rengbe ka fu gu kido foro nga Yekova ima inopai tipa ro?

Ziazia Kekeapai nayugo gupai nga ko aima inopai tipa ro mbata fu i vungu ro. Na ko nadega tuko adega kuti gamo akparakpee. Ko ima ino gamo aberãpai na gupai du kpotoroyo, na gamo mangaapai na kina sangbanaha kurii ko. (1 Peka 28:9; Snz. 27:11) Ko aima gbe ro koyo du ko ni.—w20.02, kpe. 12.

Gini aregbo si aida ani fura ti ni na gini aregbo si aidanga ani fura ti ni ya?

Ani nafura tipa Yekova na ngbarago. Ani nafura afura ho ani abi boro ni ni nindu ngba iraira gene. Abaakumba nafura tipa ka fu rugute ho si aidaha ni. Ani afuranga tipa ka gia (watadu ka peka) gu futufutuapai du tipa gaani sunge rogo agu aba i narugusihe rogoho te. Ani akusanga gbugbuapai te.—w20.03, kpe. 20-21.

Wai du du agu ayere du rogo Yoere kapita 2 kia ti agura du rogo Yugoti kapita 9?

Yoere 2:20-29 nape gupai nga Mbori nagbisa ayere kusayo na ko mangi kidohe nga ko nika tumo tipa agu ahe ami agbarasaha. Fuo gure, Mbori nauka gako toro. Gu ngbatunga apai re adigisi tihe ti gu regbo aBabero azi Yisaraere na fuo gure kusa. Yugoti 9:1-11 nasakapai tipa mbedimbedi aKristano du wa ayere ti gi gaani regbo re wa i atakapandepa ga Mbori sapangbanga kuti gi gbegberẽ sino raka re, kini sa agu aboro nasongodaha ka i dunga wenengai ya.—w20.04, kpe. 3-6.

Da nga gu bakindo nga ga nodiyo areme?

Russia gbiati agu aringara nasongodaha. I na maapai kurii ga Mbori aboro, i narugusa sunge tungusapai na kini sogo aDezire Yekova. Gu bakindo nga ga nodiyo ninaasovura na gu bakindo nga ga sudiyo.—w20.05, kpe. 13.

Ya mo agu asino ribua du rogo AGaratio 5:22, 23 nga gu yangara asino duho nga ga “zuzu toro”?

Oó. Ziazia toro naundo rani ani kusi gu kura wene asino, wa gu nga rurupai. (Ef. 5:8, 9)—w20.06, kpe. 17.

Gini kerepai duho ti gupai nga ga maa apai tipa ro rogo Internet?

Agu apai mo amaaha rogo Internet rengbe ka ye na gupai ku berã aboro yo nga mo namanga rukö na tiro, si ayugongo gupai nga mo nga boro umbasitise te.—w20.07, kpe. 6-7.

Ginipai rengbe agu abatungusipai nga aKristano ka wirikaha be wene abaziatĩo?

I namangasunge atĩo ti gu regbo na rogo gu ba i narengbe gbe ka zio atĩo rogoho. I naraba yo tipa i mangisunge na gu ũsunge rẽarẽ. Na i namangasunge atĩo ni wingbaduse zavura ho apai aˈaria tihe ni. Ani rengbe ka manga kina gu bangisapai re rogo gaani sunge tungusapai.—w20.09, kpe. 5.

Gini agene rengbe ani ka undo aBawiriki Ziazia Kekeapai ngbaha tipa i kiisi gayo nyemuse tipa Yekova?

Ani rengbe ka ngarasa yo i naageda Ziazia Kekeapai na aˈuru dũ na kini berẽkurii gupai i agedaha. Na ani rengbe ka yugopai fuyo tipa i naamanga kparakpee.—w20.11, kpe. 4.

Ada du dagba agu aboro yo du payo rogo gu fugo nga: ‘Rogo Kristo yo i adu adu ni ungayo dunduko’?—1 Kor. 15:22.

Gu mokedi nangia Pauro aapenga gupai ape nga aboro dunduko i nika zingisa yo be kpio te. Ko aafura tipa mbedimbedi aKristano, nga agu aboro “i asa yo ni ziazia yo rogo Kristo Yesu yo.” (1 Kor. 1:2; 15:18)—w20.12, kpe. 5-6.

Ginipai mbedimbedi aKristano nika mangaha tingbafuo ‘i aria yo ni ipo, wa pira bangirise, ti woro yangara kpangi’?—1 Kor. 15:51-53.

I nika zoga aboro na Kristo ni ngbondo marã. (Yugo. 2:26, 27)—w20.12, kpe. 12-13.