1-2. Gini apai aDezire Yekova nakpinyemu kaa fura tipaha?

GU NYANYAKIPA apai kisusi nabi rani areme nga—pa ga Yekova bakere pagbia gbiati pa ziasi rimoko. Wangia ani aDezire Yekova, ani ima kpinyemu fura tipa agi apai re. Ono ya mo pa ga Mbori bakere pagbia gbiati pa ziasi rimoko nga apai ni bakiakia? Oó.

² Ani dunduko naima ye ki bi gupai nga si naida rimo Mbori du ni irisiirisihe watadu ni ziasiziasihe. Ani ima ino gupai a nga si naida i yugu ga Yekova bakere pagbia, watadu gako gene zogarago nga si ngba kisusi. Sidu, agu apai dunduko ue re na nyanyakipaha.

3. Rimo Yekova nakoda ginipai?

³ Ka pe guhe nga rengo, rimo Yekova nakoda agu apai dunduko du tipa Mbori, kodihe na gako gene zogarago. Sidu, ka ani gumba gupai nga ziasi rimo Mbori nga gupai paha naima nyaka kisusi apai dunduko, gure nga ani nape gupai a nga ga Yekova gene zogarago ni gupai si aida i yuguhe ni gu yangara zogarago ngba kisusi. Rimo Yekova nandu kina sa na gu gene ko azogarago ngbaha ni gu Bakere Bakindo du na tanduapai dũ.—Oni bi gu sanduki nga, “ Agu Apai Gupai du na Nyanyakipaha Gbe Akodaha.”

4. Waigu Atambuahe 135:13 afura tipa rimo Mbori, na gini asanahe ani nika karagapai kutini rogo gi kekeapai re?

⁴ Rimo Yekova ima du kia ti kura arimo. (Oni gedi Atambuahe 135:13.) Ginipai nasa rimo Mbori si du na nyanyakipaha gbe? Waigu i agumba ziree ti rimo Mbori ni bambataha? Waigu Mbori aziasi rimoko? Na waigu rengbe ani ka undo na nyakasapai ku bara rimoko yo? Ani sakingo pai tipa agi asanahe re.

5. Ginipai rengbe kura aboro ka bakabangiriyo na ni ho i agia gupai ni nga si naida rimo Mbori du ni ziasiziasihe?

⁵ “Ani írisi rimoro airisa” watadu ani ziasi rimoro aziasi. (Mt. 6:9) Yesu ape gupai nga gipai re si aida si du ni pai sa dagba gu nyanyakipa apai yo si aida ani kpari tipaha. Rogo agu afugo Yesu yo re nga gine? Ka ziasihe nga ka saha ni ziaziaha na ni gigirihe. Ono tie, kura aboro ima rengba ka bakabangiriyo nga, ‘Ka si du nga rimo Yekova nidu ni ziaziaha na ni gigirihe, tipagine si aida i ziasihe ti ni berewe?’ Tipa ka karagapai kuti gu sanahe re, si naida ani berẽpa gupai rimo akodaha.

6. Ginipai nasa rimo si du na nyanyakipaha?

⁶ Anga rimo gbua nga guhe rengbe yo ka kehe ti waraga watadu ka yambaha te. Oni bingo gupai Ziazia Kekeapai apehe: “Wene rimo ngba ki susi ti sia bakere ũkumuko.” (Snz. 22:1; Batu. 7:1) Tipagine du rimo ti ni na nyanyakipaha wa gure? Bambiko si nakoda pa gupai aboro aberãha tipa ira gu rimo re. Sidu, gu gene i ake rimo ngbaha watadu i ayambaha ngbaha nga gupai nyakipaha gbe kisusi te; gupai nyakipaha gbe kisusi nga gupai kura aboro aberãpaha ho i abi watadu agia gu rimo re ni.

7. Waigu aboro naasada ka sa aboro i naaberãpa gbegberẽ apai tipa Mbori?

⁷ Ho aboro agumba aziree ni tipa Yekova, gure nga i naˈasada ka sa aboro i naaberãpa gbegberẽ apai tipa ko. Ho i asa aboro ni i naaberã wa gure, gure nga i naˈasada ka gbarasa rimoko. Gu bambata regbo boro ape gbegberẽ apai tipa Mbori na ki asadi ka sa aboro i naaberãpa gbegberẽ apai tipa ko angia ati Edene yo. Oni bingo gupai ani awirikaha ti gupai naamangi re.

8. Gini apai aAdamu na Eva aima inoho, na gini asanahe nakura?

⁸ AAdamu na Eva aima ino rimo Yekova gbiati gu nyanyakipa arengo du tipa ko. I aima inoko ni Bakusiahe, na ni gu Boro naafu unga fuyo, gu bawene kpuyo nangia Paradizo, gbiati rengberengbe rogatise. (Bam. P. 1:26-28; 2:18) Ono ya mo i arengbe kaa ndu kindi kumbatayo kaa mangasunge na rengberengbe berãyo tipa kaa berãkurii agu apai dunduko Yekova amangihe fuyo? Ya mo i arengbe kaa sonosa gayo nyemuse kindi gbiati tambuahe tipa Yekova? Akaragapai kuti agu asanahe re aima ye kidu ziazia ho vura Mbori aˈasadi yo ni.

9. Ringbisihe kuti Bambata Pai 2:16, 17 na 3:1-5, ginipai Yekova agumbaha fu bambata arogotise, na waigu Satana aˈaria gu rengo re?

⁹ Oni gedi Bambata Pai 2:16, 17 na 3:1-5.  Satana amangipai si ngere wa ka i ya woo du naafura fu Eva, ko asana ri na gu sanahe nga: “Ati Mbori aya, ‘Ka oni rí nga agu angua du ati yo dunduko ya’?” Satana asana gu sanahe naadu na ziree rogoho tipa Mbori, na Eva kini tona kadu na iraira berãpai tipa Mbori. Gupai Mbori apehe nzunzu angia i ri agu angua ari dunduko du ati yo, ono ki zanga ri gu kuraha sa. Adamu na Eva aima du na rengba ka ri badungu ngbatunga arindingua. (Bam. P. 2:9) Nirengo, Yekova nga boro gamahe. Ono tie, Mbori agumba pa zuzungua sa nga gu si aaidanga aAdamu na Eva rihe ya. Sidu, gu sanahe Satana asanaha aima aria gu rengo re. Ga Satana sanahe afu gu berãpai fuyo nga Yekova aadunga ni boro gamahe te. Si ima rengba kadu nga Eva abaki bangiiri nga, ‘Ya mo kura wenepai kinaho Mbori aká na ni bere?’

10. Waigu Satana agumba gbigbita ziree gbaiga kuti rimo Mbori, na sangbana gupai re angia gine?

¹⁰ Ho Satana asana gu sanahe re ni, Eva aagiasangba Yekova kindi. Ri akaragapai fu Satana ni gumba ri agu afugo Mbori agumbaha fuyo ziazia. Ri agumba gupai a nga, si adu nga ka i zadinga gu zuzungua re ya. Ri aima ino pa gu ga Mbori zahe nangia zanga giasangba nika ndu kina kuti kpio. Ono Satana akaragapai ki ya: “Oni akpí nga wa sa te.” (Bam. P. 3:2-4) Ni gumba Satana gipai re, ko aapenga gupai gbua nga si ima rengba kadu nga Yekova aima gumba ziree te. Ko aagumba gbigbita ziree gbaiga kuti rimo Mbori, na ko aape gupai fu Eva nga Yekova nga iraziree. Rogo gi gene re, Satana ada ni Bakitingbanga watadu gu boro nagumba kere ziree. Satana aima nanga Eva na ri ki idi kuti gako apai. (1 Tim. 2:14) Ri adu na bakere kido kuti Satana kisusi gu ri adu na ni kuti Yekova. Gupai re naasaha taata fu Eva ri mangi gu diaberã nagberẽ kisusi. Ri asia ka basasangba Yekova. Ri atona ka ri gu zuzungua Yekova aima ya ka ri ringa ha ya. Tifuoho, ri kini fu kuraha fu Adamu a.—Bam. P. 3:6.

11. Ginipai si aaida bambata avungurani mangihe, ono ginipai i aamanganga ha ya?

¹¹ Mo berẽnga tooni tipa gupai si aaida Eva gumbaha fu Satana. Mo berẽnga gupai nga wa ka ri agumba pai wa gu nga: “Mi ainongo da nga mo te, mi ini kina Buba nga Yekova, na mi ima kpinyemuko na kidu na kido kutiko. Agu ahe dunduko du berani na Adamu, ko naafuhe furani. Wai du ka mo ru ka gumba gbegberẽpai wa gure tipa ko? Mo guari kusayo!” Nairiwo gu pangbarago ka ngiaha fu Yekova ka gia gi ngbatunga afugo nga ga du ni ruruse re ngba gu wiriko ko aima kpinyemu ri! (Snz. 27:11) Ono Eva aadunga na bangabanga nyemuse tipa Yekova te; zavura Adamu aadunga na gi sino re a tiko te. Mbiko gupai nga aAdamu na Eva aadunga na gi ngbatunga nyemuse re koyo du Bayo ni te, i aasongodanga pai ku bara rimo koyo ho Satana agumba ziree ni kutini te.

12. Waigu Satana arimisi kapa ku berã Eva yo, na ginipai aAdamu na Eva azanga ka mangaha?

¹² A wa ani nabihe, Satana atona pai ni rimiso  ko kapa ku berã Eva yo. Ko asa ri ri tona du na kapa tipa gu ngbatunga Boro nga Yekova. Fuo gure, aAdamu na Eva azanga songodapai ku bara rimo Yekova yo. Gipai re naasa gupai fuyo taata nga i degetuyo fu Satana na ki samungu kuti Bayo. Satana namangasunge na kina gu ngbatunga abirĩ re areme a. Ko nagumba kere aziree ti rimo Yekova. Agu aboro naida kuti ga Satana aziree, si taata fuyo i ká ga Yekova ruru zogarago.

13. Waigu Yezekere 36:23 ayugopa gu memepai Ziazia Kekeapai afura tipaha?

¹³ Ya mo Yekova nambu rimoko ambu i naagumba kere aziree kutini zanga ko mangi ai wiripai tipaha? Oó! Baibiri naabaha nagumbapa agu apai Yekova namangihe tipa ka yugo gupai nga gu gbegberẽ apai Satana agumbaha tipa ko ati Edene yo, ziree du nangiaha. (Bam. P. 3:15) Ka pepai ni guruhe, ani rengbe ka ya gupai Ziazia Kekeapai naabaha afura tipaha nga: Yekova naziasi rimoko kini ye na rurupai gbiati zereda ku auru kpotosende vurube gu Kindo du Wiriko nga gaha bazogo. Sidu, ka ani ageda Ziazia Kekeapai, ani nika rugatirani na wai Yekova aziasi rimoko.—Oni gedi Yezekere 36:23.

14. Waigu ga Yekova mangapai kuti gu samungu naadu ati Edene yo naziasi rimoko?

¹⁴ Satana ninaamanga agu apai dunduko rengbe ko ka mangaha tipa ka rugusa Yekova ti digiso ko Gako ringbisapai. Ono Satana ninaadunga na diabese te. Ziazia Kekeapai nayugo pa wai Yekova namangipai, na si nayugo gupai nga kura boro ho du wa Yekova Mbori te. Nirengo, gu samungu nga ga Satana gbiati agu aboro dunduko nangbe na ko ima ye na bakere imisiri fu Yekova. (Tam. 78:40) Ono tie, ko ima mangapai kuti gi kpakarapai re na tatamana, zerangbaduse, gbiati rurupai. Ko ima yugo gako bakere ome a ngba badungu agene. Gu nyakipaha kisusi nga, ko ima yugo nyemuse rogo agu apai yo dunduko ko amangaha. (1 Yo. 4:8) Yekova ninaamanga apai amanga kindi zanga piriga tipa ka ziasi rimoko.

15. Waigu Satana agumba kere aziree ti rimo Mbori areme, na sangbanaha nga gine?

¹⁵ Satana nagumba kere aziree kindi ti rimo Mbori areme. Ko nananga aboro tipa i du na kapa kuti padu Mbori ni boro ome, rurupai,  tatamana gbiati nyemuse. Ni kpiapai, Satana naˈasada ka nanga aboro nga Yekova nga Bakusiahe te. Na ka aboro idi kuti gupai nga Mbori kina ti ni, Satana naˈasada ka sa yo i idi kuti gupai nga Mbori naká na aboro ti manga gupai i akpinyemuhe, na Gako arugute ima du ni kerehe, na si arunga te. Zavura ko nayugo gupai fu aboro nga Yekova nga gbegberẽ boro nga guko nazo aboro we yo. Ho i aida ni kuti gi kere aziree re, si naadu taata fuyo i ká ga Yekova ruru zogarago. Satana nikaa ndu kindi kumbatayo kaa gumba kere aziree tipa Yekova da kinaho Yekova nika gbarasa ko ni nyeanye kindi, na ko nikaa asada ka saro mo ká Yekova a. Ya mo Satana adu na diabese?

16. Ginipai mo narengbe ka mangaha nga gu aAdamu na Eva azanga ka mangaha?

¹⁶ Yekova nambugene fu kpakpa aboro tipa i undo na pa ziasi rimoko. Sidu, mo ima rengba ka manga gupai aAdamu na Eva azanga ka mangaha. Wa vura duhe nga ani rogo gu zegino hi be agu aboro nagumba kere aziree ti rimo Mbori na kini gberẽ ngbayo yo fuko, mo na momu bero ka gumba gu rengo tipa Yekova nga ko ni ziazia ko, ni ruruko, ni wene ko, na ni boro nyemuse. (Yes. 29:23) Mo ima rengba ka songoda gako zogarago. Mo ima rengba ka undo aboro i rugutiyo na gupai nga kina ga Yekova zogarago sa du ni ruruhe na kinaha sa nika ye na ngbarago fu kusikusiahe dunduko.—Tam. 37:9, 37; 146:5, 6, 10.

17. Waigu Yesu asa rimo Bako aboro inihe?

¹⁷ Ho ani asongoda pai ni kubara rimo Yekova yo, ani napekafuo gu kpiapai nangia ga Yesu Kristo. (Yo. 17:26) Anga mangasunge na rimo Yekova nangia gu yangara gene Yesu asa aboro i ini rimo Bako ngbaha te, ono ko aima sayo i inihe a ni yugoko wai fuyo du Yekova nzunzu. Ni kpiapai, ko ayugu gupai naadu kia ti ga aFarusi, nga aguyo nanaasa aboro ngba dungu agene i naabi Yekova wa gbegberẽ boro, kere boro, gu boro du tuturũ ti aboro na gu boro abingo rungo aboro ya. Yesu aundo aboro i naabi Bako ni boro rugatinapai, boro zerangbaduse, na boro nyemuse. Ko aima undo aboro a i ini Yekova rogo gu gene yo ko anaawirika asino Bako ngbaha na aˈuru dunduko.—Yo. 14:9.

18. Waigu rengbe ani ka bafa agu aziree kusayo aboro agumbaha tipa Mbori?

¹⁸ Wakina Yesu, ani rengbe ka gumbapa gupai  fu aboro ani nainihe tipa Yekova, kini yugupai fuyo tipa wai du ko ni gu Mbori nga boro nyemuse gbiati wenesino. Wa ani nikaa mangaha wo, ani nikaa bafa agu aziree kusayo aboro apekaha tipa Yekova. Ani nikaa ziasi rimo Yekova ni undo ani aboro i naabihe ni ziaziaha. Ani ima rengba a ka wirika Yekova. Ani ima rengba ka wirika ko wa vura duhe vurũ nga ani nga kpakpa aboro. (Ef. 5:1, 2) Ho gaani afugo gbiati mangaapai ayugo pa gu boro ni nga Yekova nzunzu fu aboro, ani naundo na pa ziasi Rimoko. Ani naziasi gu rimo re ni undo ani aboro i ini gu rengo du tipa Mbori. Ani naziasi rimo Yekova a ho ani anye ni ni rururani ani ki vura du vurũ ni kpakpa aboro.—Eyo. 27:5.

19. Waigu Yesaya 63:7 aundo rani ani bi gupai si aida si du ni gaani bangua sasa ho ani ayugopai ni fu aboro?

¹⁹ Gu kurapai kinaho berewe rengbe ani ka mangaha tipa ka ziasi rimo Yekova. Ho ani naayugo agu arengo ni du rogo Ziazia Kekeapai yo fu kura aboro, ani ninaanyakasa pa ga Mbori bakere pagbia dedede na kini nyakasi gupai a nga Yekova na rengo beko ka zoga zegino. Ono tie, wa vura duhe nga si ni nyanyakipa pai ka yugopa ga Mbori andiko fu aboro, gaani bangua sasa nga ka undo yo i kpinyemu Yekova, nga Barani, na kidu ni ruruyo fuko. Sidu, si naida ani nyakasipa asino Yekova fuyo, na kini nyakasipa gu ngbatunga Boro nga ko. (Oni gedi Yesaya 63:7.) Wa ani nikaa yugopai rogo gi gene re, ani nika undo kura aboro i kpinyemu Yekova na kini gisangbako bambiko si naida i du ni ruruyo fuko.

20. Ginipai ani nika sakapai tipaha rogo gu kekeapai ngbefuo gere?

²⁰ Ginipai tie rengbe ani ka mangaha tipa gupai nga gu gene ani amanga apai na kini yugupai ngbaha undo kura aboro i naaberã wene apai tipa Yekova ho i agia rimo Yekova ni na ki undo yo i mbedi koyo du ko ni? Gu kekeapai ngbefuo gere nika karagapai kuti gu sanahe re.