1. Tipagine Yekova aringbisi tiko ti ni kuti nagude?

“KA BANGIRI de go ti gari gude ngbamai?” Gure nga gu sanahe Yekova asanaha ti regbo gu nebi nangia Yesaya. Mbori agumba gupai fu gako aboro nga: ‘Ka bangiri agi yo re vura go, ono bangire nga Gbia agó nga ti roni te.’ (Yes. 49:15) Mbori ninaaringbisanga tiko dedede kuti nagude te. Ono tie, ko aringbisi tiko wo ti gu regbo re. Yekova aringbisi gu nyemuse du ko na ni koyo du gako amoyambu ni kuti gu nyanyaki nyemuse du nagude na ni koyo du wiiri ni bambiko ko aaida gako amoyambu ini gupai nga ko ima kpinyemu yo ni bakerehe gbe. Badungu anaagude nidu na kina gu bangisa bipai du gu wirina nga Jasmin na ni. Ri aya, “Ho mo ahagã wiro ni, mo nasonosa kparakpara nyemuse dagbatiro na u nga gu nika nye rogo raka roni yo naabaha.”

2. Waigu Yekova nidu ho wiriko sa dagba awiriko yo ambu irisoko ni?

² Ho ga Yekova moyambu ambu tungusapai na nduge tipa adunguratise ni, ko nainoho aino. Ono mo berẽnga pa gu gberãrago du ko na ni ho ko abi akutu gako amoyambu ni i nizere rogo toro yo * na agarã dũ.

3. Ginipai Yekova aidaha?

³ Badungu agi awirinarani naima zera rogo toro yo re ninaakaraga tiyo akaraga ku rogo dungurati, na ani nidu na ngbarago ho i akaragatiyo ni! Yekova naida gupai nga i karagatiyo na kina gu bangisapai re ani aidaha a. (1 Pet. 2:25) Waigu rengbe ani ka undo yo i karagatiyo? Mbata fu ani karagapai kuti gu sanahe re, si adu ni wenepai ka ani ini ndu gupai gu kura aboro ninaambu nduge tipa adunguratise ti ni na tungusapai.

4. Waigu rengbe sunge marã kadu na maapai kurii kura aboro?

⁴ Gu kura aboro ima mbu gayo sunge marã si du ni gu he nyakipaha kisusi rogo gayo raka yo. Hung * nga wirina naraka Asia yo aya, “Mi anaadia bakere regbo na kini fu ome re dunduko kina ku ba gimi sunge marã yo. Mi aadunga na tatamana te. Mi aberẽ gupai nga ka mi du na bakere marã bere, si nika sa gupai nga mi irisi Yekova wenengai. Sidu, mi anaamangasunge tipa dungu asa. Mi atona kaa kpa adunguratise na niyangaraha mi ki mbu nduge tipa adunguratise. Satana namangasunge na zegino ka gbeberã aboro kusayo tipa i tona mbu iriso Yekova yeeye.”

5. Waigu kura wirina sa amangipai kuti agu akpakarapai dunduko ri adu rogoho?

⁵ Kura awirinarani kinaho du na badungu akpakarapai tiyo nga gu nafu gberãrago fuyo. Anne du ringara aNgirisi yo na awiiri bisue aya, “Mi avungu gu kura wire sa na kere kaza tiko. Kusa, i akusi kura wire sa nga degude kusayo rogo dungurati na gu kura wire atona ka woka be gu kaza nga ga berã. Mi adu na bakere gberãrago si ki sa gupai nga mi mbu nduge tipa adunguratise gbiati tungusapai. Niyangaraha, mi azere rogo toro yo.” Ani na bakere gberãrago tipa gupai Anne na gari aborokporo adu rogoho na tipa agu aboro dunduko nagbiatiyo na akpakarapai wakina gure!

6. Waigu rengbe boro ka kpara tini kusayo ti dungurati ka si du nga ni amanganga pai kuti gupai du rogo AKorosaio 3:13 te?

⁶ Oni gedi AKorosaio 3:13. Kura ga Yekova amoyambu kinaho akurayo aidipase naima imisa yo. Gu mokedi nangia Pauro aima ino gupai nga gu kura aregbo kinaho du ani adu na wene ndupai ‘bangirani kuti’ wirinarani. Si ima rengba kadu nga i aima mangapai na ani ngba iraira gene. Ka ani adunga na rubangirise ya, ani ima rengba ka kpipai. Ho du boro ni na zinga, ni ima rengba ka kpara tini kusayo ti ga Yekova aboro. Oni bingo gu kpiapai nga ga wirina sa du rimoko nga Pablo du Amerika yo. Boro akitingbanga Pablo nga ko amangi irairapai na ni sangbana gu kitangbangase re, ko azanga gako amomu rogo dungurati. Waigu ko amangipai? Pablo aya, “Mi adu na bakere zinga na yeeye mi ki tona ka kpara tire kusayo ti dungurati.”

7. Ginipai rengbe ka manga gu boro sangbakpotoni yo ambusa ni?

⁷ Ka si du nga boro amangi kere ingapai kusayo, sangbakpoto ni yo ima rengba kaa mbusa ni tipa gbanga regbo. Ni ima rengba kaa bi tini nga ka Mbori kpingo nyemu ni berewe te. Ka si vura du nga ni ima saberã na i ki ima yugo inapai fu ni, ni ima rengba kaa bi tini nga ni arẽnga berewe kadu ni boro sa dagba ga Mbori aboro yo te. Kura wirina du rimoko nga Francisco aabi tiko wakina gure, ko aya, “I arogodi apai bere rogo dungurati mbiko gupai nga mi amangi wasiwasi kodaba. Wa si avura du nga ti tonatonaha mi anaandu andu tipa adunguratise, mi aye kadu na bakere gberãrago na mi ki bi tire nga si arẽnga mi du dagba ga Yekova aboro yo te. Sangbakpoto re yo aambusa re, na mi kini bihe nzunzu nga Yekova ata mbunga pai fere te. Niyangaraha, mi ambu tungusapai na nduge tipa adunguratise.” Mo nabi agu awirina wai nagbiatiyo na ngbatunga akpakarapai wa gu ani nasakipai tipaha re? Ya mo nunga yo tiro? Gu nyakipaha gbe nga, ga Yekova bipai nga gine tipa yo?

8. Ya mo bangiri Yekova nago ti agu aboro naaima irisoko mbata kusayo? Oni sakingo rogoyo.

⁸ Agu aboro mbu iriso Yekova tipa bete regbo nga aguyo nanaairisoko airiso mbata kusayo, bangiriko agonga tiyo te. Na bangiriko agonga ti gu sunge i amangihe fuko te. (Eb. 6:10) Gu  nebi nangia Yesaya ake bawene kpiapai nga gu nayugopa wai Yekova angerafuo gako aboro. Yesaya akepai ki ya: “Ko aríga gako rimbasa akandoro wa babandara, ko adúngura wiri akandoro ku beko, ki nitindi ra ti ngbaduko.” (Yes. 40:11) Waigu du Yekova nga guko nga Bakere Babanda akandoro ho gako kandoro abitikpa ni kusayo ti gu kura akandoro? Yesu ayugupa wai Yekova ni du ho ko asana gako abawiriki ni nga: ‘Oni naberã ha wãi? ka boro du na akandoro be ni 100, gu ru sa ki ingi, nihe nga agu ra du 99 re, ki nindu ku dagba abaagangara yo, ka gbata gu ru ingi te? Si ngia ni abi ru, ya mi fu roni ni rengo, ni angi angi tipa ru susi agu ra du 99 nainga nga ya.’—Mt. 18:12, 13.

9. Waigu wene babanda akandoro ti agu aregbo i aakeka Ziazia Kekeapai ti ni anaangerafuo gani akandoro? (Oni bi gu sura duti kpotoho.)

⁹ Tipagine rẽhe arẽ ti ni ka ringbisa Yekova kuti babanda akandoro? Bambiko ti agu aregbo i aakeka Ziazia Kekeapai ti ni, wene babanda akandoro anaangera fuo gani akandoro ni bakerehe. Ni kpiapai, Davide asovura na bau gbiati urusi tipa ka banda gako akandoro. (1 Sam. 17:34, 35) Ka ga babanda akandoro kandoro aniingi sa, ni anaainoho aino. (Yo. 10:3, 14) Ngbatunga gu babanda akandoro re anirengbe ka mbu gu gani akandoro du bange ra nga 99 re fu gu kura babanda akandoro na ki ndu ka gbata gu ru ingi sa re. Yesu amangisunge na gu kpiapai re tipa ka yugo nyanyakipa rengo furani: “Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.”—Mt. 18:14.

10. Ringbisihe kuti Yezekere 34:11-16, ginipai Yekova akidohe tipa ka mangaha fu gako ingiingi akandoro?

¹⁰ Yekova ima kpinyemu rani wa du ani ni basasa dunduko, kodihe na gu “rukutu yo” naima kparatiyo kusayo ti gako akandoro. Mbori akidohe rogo gu gako nebi yo nangia Yezekere nga, ko nika gbata gako ingiingi akandoro na ki undo yo i du na wene pagume berewe na ko. Na ko apepa agu apai ko nika mangaha tipa ka batasa yo, agu apai ko aya ko nika mangaha wakina agu apai agu ababanda akandoro nangia aYisaraere anaamangaha. (Oni gedi  Yezekere 34:11-16.) Ni bambataha, babanda akandoro anigbata gani kandoro, na gipai re anaaida na bakere regbo gbiati ome. Fuo gure, ho babanda akandoro anibi gu ingiingi kandoro re ni, ni anikaraga ru fuo gu kura akandoro. Kurigure, ka si du nga gu kandoro re aniõgo tiru watadu anidu na gomoro, gu babanda akandoro re anaaundo gi kandoro naanidu rurungbura re, ki vo ga u aro, ki tindi ru, na ki fu riahe fu ru. Si naida abaakumba nga ababanda “ga Mbori rimbasa akandoro” mangi kina gu bangisa apai re tipa ka undo ai gu boro kpara tini kusayo ti dungurati. (1 Pet. 5:2, 3) Si naida abaakumba gbata yo, ki undo yo i karaga tiyo ku rogo dungurati, na ki yugu nyemuse fuyo ni undo yo yo i da ni abakurea Yekova. *

11. Ginipai wene babanda akandoro arugu tini na ni?

¹¹ Wene babanda akandoro aima rugatini na gupai nga kandoro aima rengba ka inga. Na ho kandoro aniguari ni kusayo dagba rimbasa akandoro, babanda akandoro anaamanganga furu gbegberẽ te. Oni bingo gu kpiapai Yekova amoihe ho ko aundo gu kura gako amoyambu ni nga aguyo nakparatiyo tiko tipa bete regbo.

12. Waigu Yekova amangipai na Yona?

¹² Gu nebi nangia Yona aoro be gu sunge Yekova afuhe fuko. Wa si avura du wo, Yekova aambunga Yona te. Wakina wene babanda akandoro, Yekova abatasi ko, na ki undo ko ko gbia gu ome si aaidaha tipa ko nyasi gu sunge ko afuhe fuko. (Yona 2:7; 3:1, 2) Kusa, Mbori amangisunge na nagbanga tipa ka undo Yona ko rugutiko na pa nyaka gu unga nga ga aboro ni basasa. (Yona 4:10, 11) Ginipai ani awirikaha ti gipai re? Si aidanga abaakumba mbu agu aboro ni ipo zere rogo toro yo te. Kuba gure, si naida abaakumba asadi ka rugatiyo na ndu gupai naasa kandoro ni kpara tini ti rimbasa akandoro. Na ho gu kandoro re akaraga tini ni fuo Yekova, si naida abaakumba naandu kindi kumbatayo kaa yugo nyemuse fu ni na kini yugu gupai nga i naberã pani aberã.

13. Ginipai rengbe ani ka wirikaha ti wai Yekova amangi pai kuti gupai bake Atambuahe 73 apehe?

¹³ Bake Atambuahe 73 adu na gberãrago ho ko abi gupai ni nga si aangera wa gbegberẽ aboro  anidu na diabese ti aregbo dunduko. Ko aabaka kina bangiriko singia undo ho ti manga gupai Mbori akpinyemuhe. (Tam. 73:12, 13, 16) Waigu Yekova amangipai na ko? Ko aasaranga ngbanga ko te. Mbori asa gupai nga i ke afugo gu bake papara atambuahe re rogo Ziazia Kekeapai yo. Ni yangaraha, gu bake papara Atambuahe re aye ka rugatiko na gupai nga wene pagume na Yekova ngba kisusi ai gu kura he, si nasa raka si du ni wenehe. (Tam. 73:23, 24, 26, 28) Ginipai ani awirikaha ti gipai re? Si aidanga abaakumba naasarangbanga agu aboro ni ipo tona kaa baka bangiriyo singia undo ho ti iriso Yekova te. Kuba gupai nga abaakumba saringbanga yo, si naida i asadi ka rugatiyo na ndu gupai i afura ti ni na kini mangi pai wa gu i amangaha. Fuo rugayo tiyo na ndu gupai i afura ti ni na kini mangi pai wa gu i amangaha, ho du rengbe yo ni ka mangasunge na Ziazia Kekeapai tipa ka ngarasa yo.

14. Tipagine Eriya aaida undo ti ni, na waigu Yekova afu gu undo re?

¹⁴ Gu nebi nangia Eriya azubo be Nakindo Izebere. (1 Aba. 19:1-3) Ko aberẽ gupai nga boro ho berewe naamangasunge ni nebi fu Yekova te, na ko aberẽ gupai nga gu sunge ko aamangaha fu Yekova adu gbua zanga sunge ti ni. Rago agberẽ ti Eriya ni kerehe si ki da ti gupai nga ko idi ka kpi. (1 Aba. 19:4, 10) Kuba gupai nga Yekova bira Eriya, Yekova akido ko nga ko nisako te, na ko ima rengba kadu na kido kuti gu ome nga ga Mbori, na bakere sunge kindi fuko tipa ko mangihe. Yekova adegetuko kuti agu abakabangirise Eriya adu na ni na ko ki fu kura asunge kia fuko. (1 Aba. 19:11-16, 18) Ginipai ani awirikaha ti gipai re? Ani dunduko,  gbe abaakumba si aida ani mangipai na ga Yekova kandoro ngba wene gene. Singia boro pe gupai nga ni na zinga watadu ni nabihe nga ka Yekova mbunga pai fu ni te, si naida abaakumba degetuyo ho ni akusuko agu apai ni du ngbaduni yo. Na i ki asadi ka kido gu ingiingi kandoro re nga Yekova ima kpinyemu ni.

15. Ringbisihe kuti Yoane 6:39, waigu Yesu aabi ga Bako akandoro?

¹⁵ Waigu Yekova aida ani bi gako ingiingi akandoro? Yesu aima maa kpiapai furani. Ko aima ino gupai nga ga Yekova akandoro dunduko du na nyanyakipa ra bangiriko, sidu, Yesu amangi ai gupai ko arengbe ka mangaha tipa ka undo “gu ingiingi akandoro nga ngbatunga aYisaraere” i karaga tiyo fuo Yekova. (Mt. 15:24; Rk. 19:9, 10) Yesu nga wene babanda akandoro amangi ai gupai narengbe na ome ko tipa ka ai ga Yekova kandoro inginga ya.—Oni gedi Yoane 6:39.

16-17. Waigu si aida abaakumba bi pa undo agu aboro naima kparatiyo kusayo ti Yekova? (Oni bi gu sanduki nga, “ Wai Ingiingi Kandoro Narengbe Kaa bi Tiru.”)

¹⁶ Gu mokedi nangia Pauro angarasi agu abaakumba naadu rogo gu dungurati naadu Efesa yo tipa i wiriki ga Yesu kpiapai. Ko aya: “Oni ta manga sunge were niunda agu yo anyaka nga ya, ki tingidi pa Gbia Yesu wa ko aya tigako, ‘Fu he ngba ti dia ha.’” (Amo. 20:17, 35) Gu veresi re nayugo gupai nga abaakumba na nyanyakipa tindiro beyo nga ga ngerafuo ga Yekova aboro. Salvador nga bakumba Sepania yo aya, “Ho mi aberã ni kurii bakio wai Yekova angerafuo gako ingiingi akandoro, si nafõngbadu re yo mi mangi agu apai dunduko rengbe mi ka mangaha ka undo yo. Wa ngia mi babanda akandoro rogo toro yo, mi ima ida kuti gupai nga Yekova naida gupai nga mi ngerefuo gako akandoro.”

¹⁷ Agu aboro dunduko du payo rogo gi kekeapai re nga aguyo naakpara tiyo kusayo ti Yekova, i aima undoyo i ki karagatiyo fuo ko. Awere, badungu agu aboro naima kparatiyo kusayo ti Yekova na nyemu ka karagatiyo. Gu kekeapai ngbefuo gere nika sakapai sirisiri tipa agu apai rengbe ani ka mangaha tipa ka undo yo i karagatiyo fuo Yekova.