1. Waigu Yekova nidu ho gu boro naaima mbu irisoko atona ni kaa irisoko berewe?

A WA ANI asakipai tipaha rogo gu kekeapai nasusi, Yekova naringbisa tiko kuti gu wene babanda akandoro nangerafuo gani akandoro ni basasa. Na ko nagbata ai guru nainga. Yekova agumba gupai fu agu aYisaraere nambu ko nga: “Oni káraga tironi kono du mi ni, mi ki karaga tire koyo du oni ni a.” Ani ima ino gupai nga ko na kina gu bangisa berãpai re kindi mbiko ko naya: “Mi asa nga pa re wa sa te.” (Mara. 3:6, 7) Yesu agumba gupai nga Yekova na amaraika nadu na bakere ngbarago zavura ho Gako moyambu sa nga gu ni naingi akaraga tini ni fuo Ko.—Rk. 15:10, 32.

2. Gini apai ani nika sakapai tipaha rogo gi kekeapai re?

² Ani sakingo pai tipa ga Yesu asanza biata nga gu nayugo nyanyakipa apai tipa wai ka undo agu aboro kparatiyo kusayo ti Yekova. Ani nika sakapai tipa agu asino si aida ani du na ni tipa ka undo ingiingi kandoro u karaga tiru fuoko. Na ani nika wirika gupai nga ani nika du na bakere ngbarago ho ani nika mangasunge ni nyanyaki tipa ka undo agu aboro naima zera rogo toro yo tipa i karaga ti yo fuo Yekova.

3-4. Tipagine gu dee i nagumba pa ri rogo Ruka 15:8-10 agbata gu gari marã naingi ti ni sirisiri?

³ Si naida ani mangisunge nyanyaki tipa ka gbia agu aboro naida ka karagatiyo fuo Yekova. Rogo gu sanza du rogo gu Kitabu Wene Pangbanga nga ga Ruka, Yesu agumba pangbanga tipa dee nga guri gari marã aingi. Gu nyanyakipa pai du rogo gu pangbanga re nga pa wai ri amangi nyanyaki asadatise ka gbata gu marã re.—Oni gedi Ruka 15:8-10.

⁴ Yesu asakipai tipa gu bipai gu dee re adu na ni ho ri agbia gu gari marã ni naingi. Ti regbo Yesu, ho dee Yisaraere animangi rogatise ni, nani anifu zau-marã fu ni bawe ni rengberengbe ru. Si ima rengba kadu nga gu marã naingi be gu dee re aima du na nyanyakipa  ru gbe furi bambiko u adu dagba agu amarã yo bawe nari afura furi. Gu dee re aberẽ gupai nga gu marã re ati sande. Sidu, ri atigi baro ki ngereke tipa ru, ono ka ri abingo ru ya. Si rengbe kadu nga gari baro ahaasanga rago furi wenengai tipa ri bi gu tooni marã re te. Ni yangaraha tie, ri awege bambu dunduko. Fuo wega ri rago kini rimo gugudo ku rogo ba sa, ri abi gari marã u nikiki ima gu we ri atigihe. Ri aima gbia bakere wasa ho ri abi ru ni! Ri ayambu abakurea ri na gari amurakporo tipa ka pe gu wene pangbanga re fu yo.

5. Tipagine rengbehe kadu ti ni ni kpakarakpakaraha tipa ka gbia agu aboro naima mbu dungurati?

⁵ A wa ani nabihe rogo ga Yesu sanza yo, si naida bakere sunge tipa ka gbia guhe ingi. Wakina gure a, si naida ani mangisunge nyanyaki tipa ka ino bara agu aboro naima mbu dungurati. Si rengbe kadu nga dungu agarã ima susa wa i ambu kodatiyo na ani. Si ima rengba kadu nga i ga ku rogo gu ba agu awirina du rogoho ainongo yo ya. Ono ani ima rengba kadu na gu kido nga bete agu aboro naima zera rogo toro yo re naida aida nzunzu ka karagatiyo fuo Yekova. I naida ka iriso Yekova berewe na awirinayo, ono i naida na gaani undo.

6. Waigu rengbe agu aboro du rogo dungurati dunduko ka undo na gbata agu aboro naima zera rogo toro yo?

⁶ Da rengbe ka undo ka gbata agu aboro naima zera rogo toro yo? Ani dunduko—abaakumba, abazakigene, aborokporo, gbiati agu abatungusipai du rogo dungurati—rengbe ka undo ka gbata agu aboro naima zera rogo toro yo. Ya mo bakureamo ho watadu gumero naima zera rogo toro yo? Ya mo mo bingo gu boro naima zera rogo toro yo ho mo atungusapai ni kporo na kporo watadu ho mo atungusapai ni rogo agu aba du na badungu aboro rogoho? Ka si du nga gu boro re ima ida ka fu gani adresi watadu namba terefuni foro, mo ima rengba ka fuhe fu agu abaakumba du rogo gamo dungurati.

7. Ginipai mo awirikaha ti gupai gu bakumba du rimoko nga Thomas agumbaha?

⁷ Abaakumba du gbe du na gu tindiro riyo nga ga gbata agu aboro naima zera rogo toro yo nga aguyo naida ka karagatiyo fuo Yekova. Waigu rengbe abaakumba ka gbata yo? Oni bingo gupai gu bakumba du rimoko nga Thomas * agumbaha, nga gu ko naraka Sepania yo. Ko ima undo aDezire Yekova bangeyo naima susa 40 tipa i karagatiyo ku rogo dungurati. Thomas aya: “Gu bambatapai mi naamangaha nga, ka sana awirina singia i ini wari gu boro naima zera rogo toro yo araka ni. Watadu mi naasana abatungusipai singia i inipa gu boro ayengo tipa adunguratise berewe ya. Badungu aboro rogo dungurati nidu na ngbarago bambiko i naabihe nga i nafubee kuti undo na gbata agu aboro zere rogo toro yo. Kusa, ho mi naandu ni ka bi agu awirina naima zera rogo toro yo, mi naasana yo tipa awiriyo na gu kura agumeyo. Gu kura agu aboro naima zera rogo toro yo re anaaye aye na awiriyo tipa adunguratise, na si rengbe kadu nga agu agude re aima da ni abatungusipai ti gu regbo re. Si naida ani undo agu agude re aundo a tipa i karagatiyo fuo Yekova.”

8. Rogo gu sanza nga ga ingiingi paranga nga gu du rogo Ruka 15:17-24, wai du bagude amangipai na wiriko ho ko asaberã ko ni?

⁸ Gini asino si aida ani du na ni tipa ka undo agu aboro naida ka karagatiyo fuo Yekova? Ani bingo agu apai rengbe ani ka wirikaha ti gu ga Yesu sanza du tipa ingiingi paranga naguari kporo. (Oni gedi Ruka 15:17-24.) Yesu asakipai tipa wai gu paranga re aye ka bi tiko ni yangaraha nga ko nga iramungo na ko ki diberã ka karaga tiko ku kporo yo. Ba gu paranga re aoro ki dungo ko na ki kido ko nga ko ima kpinyemu ko. Sangbakpoto gu paranga re yo aambusa ko ambusa na ko ki bi tiko nga si aidanga bako yambu ko nga wiriko te. Fuo gu paranga re kusuko agu apai naadu ngbaduko yo, nunga ko azi bako. Na bako ki mangi agu apai nayugu na ni nga ko ima dia ko ku kporo, angianga ni bamangisunge ya, ono ni gu borokporo du na  nyanyakipa ni. Tipa ka yugo gupai nga ko ima kpinyemu wiriko na ko ima dia ko ku kporo, ko ambakadi pumbo na ki ye na wene aroko fu gi wiriko nasaberã re.

9. Gini asino si aida si du tirani tipa ka undo agu aboro naima zera rogo toro yo i karagatiyo fuo Yekova? (Oni bi gu sanduki nga, “Wai ka Undo agu Aboro Naida ka Karagatiyo fuo Yekova.”)

⁹ Yekova wakina gu bagude du pako rogo gu sanza re. Ko ima kpinyemu agu awirinarani naima zera rogo toro yo na ko naida i karagatiyo fuoko. Ni wirika ani Yekova, ani ima rengba ka undo yo i karagatiyo fuoko. Tipa ka manga gipai re, si naida ani yugu agu asino nga zerangbaduse, nunga, inapai, gbiati nyemuse. Tipagine si aida ani yugu agi asino re ti ni na waigu rengbe ani ka yugoho?

10. Tipagine si aida ani du ti ni na zerangbaduse tipa ka undo boro ni mbedi na Yekova berewe?

¹⁰ Si naida ani du na zerangbaduse bambiko si nadia regbo adia tipa boro karaga tini fuo Yekova. Badungu agu aboro naaima zera mbata rogo toro yo ninaagumba gupai nga abaakumba gbiati gu kura aboro rogo dungurati aye fuoyo mbata bara dunguhe i kini ru ka tona iriso Yekova berewe. Wirina du Asia yo du rimori nga Nancy akepai nga: “Mbembedi nakureami rogo dungurati aundo re ni bakerehe gbe. Ri akpinyemu re wa ka i ya mi nga kina boro unvurari. Ri atingidi re na pa gu wene aregbo ani anaadiaha na ri mbata kusayo. Ri anaadegaturi na zerangbaduse wa mi anaakusuko agu apai naadu ngbadureyo furi, na ri anaadunga na ndundu ka fu rugute fere te. Ri aima yugoho nga ri nga ndikidi nakure, na ri anidu regerege ti ai regbo ka undo.”

11. Tipagine si aida ani du ti ni na nunga tipa ka undo gu boro du na zinga?

¹¹ Ho boro naba gberãrago ni ti kurani, si ima rengba ka igirã wakina aro. Nunga wakina gu dawa du na ome ti ni nga gu rengbe ka undo gu boro re ni du wenengai berewe. Kura agu aboro naima zera rogo toro yo ima sota tipa dungu agarã  na gu zinga i adu na ni koyo du boro ni rogo dungurati. Mbiko gipai re, i akpinga nyemu ka karagatiyo fuo Yekova te. Gu kura aguyo ima rengba ka berã gupai nga i aima manga yo gbegberẽ. I ima rengba ka ida na gu boro rengbe ka degatuni fuyo na ki rugutini na gayo bipai. (Yak. 1:19) María naazere rogo toro yo ti kura regbo sa aya, “Mi aaida na gu boro ka degetuni fere, ka fu wasa fere, na ki fu wene arugute fere gbiati undo.”

12. Waigu du ga Yekova nyemuse wakina gire?

¹² Ziazia Kekeapai nagumba gupai nga ga Yekova nyemuse tipa aboro wakina gire. Ngba gini gene du ga Mbori nyemuse wakina gire? Oni bingo gi kpiapai re: Mo berẽnga gupai nga mo ti ku baime yo. Ime nasungburo nikerehe na si ni zezerehe. Mo ima tona rindo ku ime yo. Fuani, boro nga gu ni du rogo kurungba mbembedi na mo ba he foro nga gu rengbe mo ka kakuti ni ka mo arindongo ya. Mo na bakere tambuahe tipa gupai ni namangihe re. Ono tipa gupai nga mo bati, kura undo kinaho berewe si aidaha. Si naida mo kuru kusayo ime yo. Na tipa ka kura kusayo ime yo, si naida agu aboro du rogo kurungba ba gire foro na ki gbe ro ti ni ku kurungba yo. Yekova agumba gupai tipa agu aYisaraere nakparatiyo tiko nga: ‘Mi agbe yo na agiri nyemuse.’ (Osea 11:4) Kina gu bangisa bipai re du Yekova na ni areme tipa agu aboro naima mbu irisoko, nga aguyo akpakarapai na abakabangirise naima fu riyo. Ko naida i ini gupai nga ko ima kpinyemu yo, na ko naida i karagatiyo fuoko. Na Yekova ima rengba ka mangasunge na mo mo yugu gako nyemuse fuyo.

13. Waigu ga Pablo kpiapai ayugo gupai nga gaani nyemuse ima rengba ka undo kura aboro i karagatiyo fuo Yekova?

¹³ Si ni nyanyakipa pai ka kido agu aboro naima zera rogo toro yo nga Yekova ima kpinyemu yo na ani ima kpinyemu yo a. Pablo nga gu wirina i afura tipa ko rogo gu kekeapai nasusi azere rogo toro yo tipa agarã naima susa 30. Ko aya: “Rogo kura wiso sa, ho mi aguari ni kporo kaa mera, wene sino  sosono wirina ni dee agbia re na ki fura na mi ngba wene gene. Mi atona ka kpara wakina tooni gude. Mi agumba gupai furi nga si nangera wa Yekova du kedi ri tipa ri ye ka fura na mi. Gu regbo re du mi adiberã tipa ka karaga tire fuo Yekova.”

14. Ringbisihe kuti gu sanza du rogo Ruka 15:4, 5, ginipai babanda akandoro amangihe fuo ko bi gu kandoro naingi?

¹⁴ Si naida ani naandu kindi kumbatayo kaa undo agu aboro naima zera rogo toro yo na kini ngarasi yo tingbafuo ani gbia yo. Wakina gu ingiingi paranga du pako rogo ga Yesu sanza yo, i ima rengba kadu ni fudifudiyo ni bakerehe berãyo yo na si ima rengba ka dia regbo tipa i du wenengai. Na i ima rengba kadu rurungbura rogo toro yo mbiko agu apai i nagbiatiyo na ni rogo ga Satana zegino. Si naida ani undo yo i nyakasi gayo idapase kuti Yekova. Rogo gu sanza nga ga ingiingi kandoro, Yesu asakipai tipa wai babanda akandoro awagi gu gako kandoro pagoro ko naingi na ki karaga ru ku rogo gu ba gu kura akandoro adu rogoho. Si aima dia regbo gbiati ome tipa gu babanda akandoro re gbia gu kandoro naingi re. Ono ko aima ino gupai nga gu kandoro re naida bakere undo aida. Bakere ome tiru tipa ka ndu berewe kusayo fuo gu kura akandoro te, sidu, ko atindi ru tipa ka karaga ru kusayo fuo akurai.—Oni gedi Ruka 15:4, 5.

15. Waigu rengbe ani ka songoda gu rurungbura aboro naida ka karagatiyo fuo Yekova? (Oni bi gu sanduki nga, “Nyanyakipa Ũsunge.”)

¹⁵ Si ima rengba ka dia bakere regbo na ome tipa ka undo agu aboro naima zera rogo toro yo tipa i dibe gu kpakarapai nga gu nasaha fuyo ni mbumbuhe ka iriso Yekova berewe. Ono mbiko ga Yekova ziazia toro, Fugoko, na agu awaraga ani agbiaha vurube gako riigbu, ani ima rengba ka undo yo i nyakasi gayo pagume na Yekova berewe. (Rom. 15:1) Waigu rengbe ani ka manga gipai re? Kura bakumba sa du na inohe aya, “Si naida  dungu agu aboro diberã ka karagatiyo fuo Yekova nga aguyo naima zera rogo toro yo wiriki Ziazia Kekeapai awirika berewe.” * Sidu, ka abaakumba sanaro nga mo wiriki Ziazia Kekeapai na gu boro naima zera rogo toro yo, si naida mo di gu sunge re kugume na ngbarago ka si ngia rengba bero ka mangaha. Gu bakumba re agumba gupai a nga, “Si naida gu batungusipai nika wisigo Ziazia Kekeapai na gu boro naaima zera rogo toro yo re du ni wene bakure, nidu ni gu boro rengbe ni ka kido kuti ni na kini fura na ni gbaiga.”

16. Waigu ani aino gupai nga amaraika nika undo rani aundo ani gbia agu aboro naima zera rogo toro yo?

¹⁶ Badungu akpiapai duho nayugo gupai nga amaraika naundo rani aundo ani gbia agu aboro naaima zera rogo toro yo nga aguyo naida ka karagatiyo fuo Yekova. (Yugo. 14:6) Ni kpiapai, wirina du rimoko nga Silvio naaima zera rogo toro yo naraka Ecuador yo azungodi Yekova tipa ko kedi boro ni ye ka undo ko. Ho ko aamanga kparakpee ni kindi, nzoro apoi. Fuo zaka ko ngbadimo, ko abi abaakumba ue ngbadimo kpuko. Ti gu regbo i andu ka bi ko re, i adu na ngbarago tipa ka tona undo ko.

17. Gini mosoro ani agbiaha ti undo ani agu aboro du rurungbura rogo toro yo?

¹⁷ Ani nika gbia bakere ngbarago ti undo ani agu aboro du rurungbura rogo toro yo tipa i karagatiyo fuo Yekova. Oni bingo gupai gu bazakigene nga Salvador nga gu ko ninaamanga ome tipa ka undo agu aboro naima zera rogo toro yo agumbaha, ko aya: “Ho mi naaberãpa agu aboro ni karagatiyo fuo Yekova nga aguyo naaima zera rogo toro yo, kura aregbo kinaho mi naakpara akpara be ngbarago. Mi na bakere ngbarago nga mi aima du na rengba ka mangasunge na Yekova tipa ka undo boro sa dagba airisiko yo ni kuru kusayo rogo ga Satana zegino na ki karaga tini ku rogo dungurati.”—Amo. 20:35.

18. Ka si du nga mo ima zera rogo toro yo, ginipai si aida mo du na kido tipaha?

¹⁸ Ka si du nga mo ima zera rogo toro yo, mo du na gu kido nga Yekova nakpinyemu ro kindi. Ko naida mo karaga tiro fuoko. Si naida mo mangi asadatise tipa ka karaga tiro fuoko. Ono wakina gu bagude du rogo ga Yesu sanza yo, Yekova napido ro tipa mo karagatiro, na ko nika du na ngbarago ka dia ro kugume.