1, 2. (a) Kura avunguagude nidu wai ho wiriyo asanahe ni nga u naida ka zio bapatiza? (b) Tipagine i naasana agu aboro du tipa zio bapatiza ti ni singia i ima kparatiyo fu Yekova? (Oni bi gu sura duti tonatonaha.)

AVUNGU kura paranga degude sa ani nika yamba ri nga Maria aabi ri wa ri aaru kuari na kura aboro nga aguyo naadu tipa zio bapatiza. Ri akaragapai ziazia na fugo ri kuari kuti agu asanahe ue bagumbapai asanaha. Ngbutuko fuo gure, ri ki zi bapatiza.

² Avungu Maria adu na bakere ngbarago nga wiriyo mangi diaberã ka kpara gari raka fu Yekova na ki zi bapatiza. Ono wa si avura du wo, mbata kusayo, bete asanahe adu kinaho naata ri nari yo. Ri asana tiri nga: ‘Ya mo Maria kindi tooni tipa zio bapatiza? Ya mo ri rugutiri nzunzu na pa nyaka gupai ri amangaha re? Ya mo si rengbe kadu ni wenepai ka ri sungu mbata ri kini ru ka zio bapatiza?’ Gere nga agu asanahe badungu agu avunguagude du na nyemuse tiyo naasana tiyo na ni ho wiriyo ape gupai ni nga u na nyemu ka zio bapatiza. (Batu. 5:⁠5) Nirengo, kparatise na bapatiza nga nyanyakipa adiandue kisusi rogo gu raka yo nga ga Kristano.​​—⁠Oni bi gu sanduki nga “ Ya mo Mo Kpara Gamo Raka fu Yekova?”

3, 4. (a) Wai du gu mokedi nangia Petero ayugupa wai nyakipa bapatiza? (b) Tipagine rengbe yo ka ringbisa bapatiza ti ni kuti mbakada kurungba ti rago Noa?

 ³ Ho gu mokedi nangia Petero aafura ni tipa bapatiza, ko afura tipa ga Noa sunge mbakada kurungba ki ya: “Rogo ndikidi kpiahe yo ime nga gu he nabatasa roni, nga bapatiza.” (Oni gedi 1 Petero 3:​20, 21.) Kurungba angia guhe nayugu gu ndikidi gopai nga Noa angia gu boro naaima kpara gani raka tipa manga gupai Mbori akpinyemuhe. Noa aima digiso gu sunge Yekova afuhe fuko. Nirengo, gu mangaapai nga ga idapase nga gu aboro aabihe abi asa gupai nga Noa gbiati gako aborokporo bati ti regbo ime akangbii. Ginipai du Petero aaida ka pehe na gu kpiapai re?

⁴ Kina wai kurungba angia gu gopai nayugupa ga Noa idapase fu aboro, bapatiza ku bangiri aboro nayugo gu gopai aboro abihe abi. Ginipai si ayugoho? Si nayugo gupai nga gu bawiriki nga Kristano re ima kpara tiní fu Yekova riimburu idapase kuti Kristo, nga guko nazingi be kpio. Wakina Noa, agu abawiriki kparatiyo fu Mbori nagiasangbako kini mangi gu sunge ko nafuhe fuyo i mangihe. Kina wai a Noa abati ti regbo Ime Akangbii, kinawo a gu ruru aboro zi bapatiza nika bata ho digido gi gbegberẽ zegino re nika da ni. (Mk. 13:10; Yugo. 7:​9, 10) Gipai re nasa kparatise gbiati bapatiza ni nyanyakipa apai gbe. Gu boro naakeesa akeesa na pa zio bapatiza zanga nduhe ti ni namaa gani maabangirise nga ga gbia nyenye unga ngbapai yo.

5. Gini apai ani nika sakapai tipaha rogo gi kekeapai re?

⁵ Nibi wai du bapatiza ni nyanyakipai, si naida ani gbeberã rani kuti asanahe biata. Ginipai Ziazia Kekeapai apehe tipa bapatiza? Gini adiandue si aida boro dihe mbata fu ni zi bapatiza? Tipagine si aida Kristano du ti ni na pa wai nyakipa bapatiza berãni yo ho ni ayugopai ni fu wirini watadu fu kura bawiriki Ziazia Kekeapai?

6, 7. (a) Rogo gu bapatiza yo Yoane aamangaha angia gine? (b) Gini kparakpara bapatiza Yoane amangihe?

⁶ Gu bambata boro ani ageda pani rogo Ziazia Kekeapai yo nga gu ni naabapatiza aboro angia Yoane Bafu Bapatiza. (Mt. 3:​1-6) Agu aboro naaye fuoko tipa ka zio bapatiza amangihe wo ni gopai nga ga gayo saberã ti gayo aingapai mbiko wa i agurii ga Moize aNdiko. Ono tie, gu nyanyakipa bapatiza kisusi Yoane amangihe aabingo pa saberã te. Yoane adu na gu kparakpara momu beko nga ga bapatiza rengberengbe Wiri Mbori nga Yesu. (Mt. 3:​13-​17) Yesu aadunga na ingapai tiko te, sidu, saberã ho si aaida ko mangihe te. (1 Pet. 2:​22) Gako bapatiza aayugo gako futise ka manga gupai Mbori akpinyemuhe.​—⁠Eb. 10:⁠7.

⁷ Ti regbo ga Yesu sunge tungusapai auru kpotosende, gako abawiriki aima bapatiza aboro a. (Yo. 3:​22; 4:​1, 2) Wakina agu abapatiza a Yoane amangihe, agi abapatiza re aayugopa ga aboro saberã ti gayo aingapai mbiko wa i agurii ga Moize aNdiko. Ono tie, tingbafuo Yesu kpi na ki zingi be kpio, si adu nga gu bapatiza nga ga apefuoko nika du na kura rogoyo kia.

8. (a) Gini zinahe Yesu afuhe fu apefuoko fuo zingako be kpio? (b) Tipagine si aida aKristano zi bapatiza ti ni?

⁸ Rogo gu garã nangia 33, Yesu nga guko nazingi be kpio akuru fu ndurumo akumba na adee bangeyo aima susa 500, na si nawira gupai nga agude aduadu dagbayo a. Si rengbe kadu nga ti gu regbo re du ko agumba gupai nga: “Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro, ki nirugu yo a i niká kuti agu apai dunduko mi arugu roni kuti ni.” (Mt. 28:​19, 20; 1 Kor. 15:⁠6) Nirengo, si nawira gupai nga akama apefuo Yesu adu kinaho ho ko afu gu sunge ni fuyo nga ga sa aboro ni abawiriki. Sidu, Yesu kini yugu gupai nga si naida ai gu boro idi kadu ni gako bawiriki, watadu ka tinda gako gonga zi bapatiza. (Mt. 11:​29, 30) Si naida ai gu boro naida ka iriso Yekova ngba gu gene ko aidaha rugutini na ga Yesu bangiriba rogo gu ringbisapai yo nga ga Yekova, na ki idipaha. Fuo gu boro re mangihe wo, ni kini ru tie ka zio bapatiza. Gere nga gu yangara bapatiza nga ga ime Mbori naidipaha. Ziazia Kekeapai nafu gu bakere gopai nga rogo bambata sa kama agarã, ga Kristo vovo abawiriki aima rugatiyo na wai nyakipa bapatiza. Na i aakeesanga na zio bapatiza zanga nduhe ti ni te.​—⁠Amo. 2:​41; 9:​18; 16:​14, 15, 32, 33.

9, 10. Ginipai rengbe ani ka wirikaha tipa bapatiza be gu boro Etiopia nasa tiko ku rogo gu pambori yo nga ga aYudo na be gu mokedi nangia Pauro?

⁹ Oni gedi Amokedi 8:​35, 36. Oni bingo gu kpiapai nga ga kumba ni boro Etiopia nga guko nasa tiko ku rogo gu pambori nga ga aYudo, na nga guko naaga ku kpuko yo fuo ndu ko ku Yerusarema yo tipa irisombori. Ga Yekova maraika akedi Firipo ko ndu fuo gu boro Etiopia re, na Firipo “ki tungusi pa Yesu fu ko.” Ginipai gu boro Etiopia re amangihe? Gupai ko amangihe tingbafuo gure ayugu gu ndikidi gopai nga ko aima du na tambuahe tipa agu arengo ko awirikihe. Ko adu na nyemu ka mangapai ringbisihe kuti ga Yekova mbakadapai, sidu, ko ki zi bapatiza zanga keesa.

¹⁰ Gu kura ue kpiapai nga ga Yudo sa, nga guko naarungosi aKristano. I avunguko dagba gu rikaaboro yo nga aguyo naadu ni kparakparayo fu Mbori. Ono tie, pa ga aYudo kparakpara pagume na Yekova aima gberã. Gu kumba re adu zaaza tipa agu asino pambori nangia ga aYudo, ono tie, ko awirikipai tipa gu gene irisombori du ni wenehe. Yesu Kristo nga guko naima zinga be kpio amangi dezirepai fuko. Ginipai gu kumba re amangihe? Ko adi gu undo kugume gu Kristano nangia Anania afuhe ko. Nibipa  gu kumba re, Ziazia Kekeapai nape gupai furani nga: “Ko ki guari i ki bapatizi ko.” (Amo. 9:​17, 18; Gara. 1:​14) Oni ima ye ka ino gupai nirengo nga gu Yudo re du nangia gu kumba naye kada kusa ni mokedi rimoko angia Pauro. Ono oni berãnga kurii gu rengo nga Pauro amangipai nibasa fuo inoko gu rengo du tipa ga Yesu bangiriba rogo gu ringbisapai yo nga ga Mbori. Ko azi bapatiza zanga keesa.​—⁠Oni gedi Amokedi 22:​12-​16.

11. (a) Ginipai nafõngbadu awiriki Ziazia Kekeapai yo areme i zi bapatiza? (b) Ani nidu wai ho ani abi gu vovo aboro ni kparatiyo fu Yekova i nizi bapatiza?

¹¹ Kina gu bangisapai re du tipa agu awiriki Ziazia Kekeapai du areme, singia paranga aboro watadu sosono aboro. Agu aboro du na idapase gbiati ndikidi tambuahe tipa gu rengo nga ga Ziazia Kekeapai na nyemu ka kparatiyo fu Yekova na ki zi bapatiza. Gu gumbapai i naamangaha gbe fu gu ngbatunga aboro re ningia nyanyakipa papara bakere adunguratise dunduko. ADezire Yekova nidu na ngbarago ho gu boro nawirika Ziazia Kekeapai naadia rengo ni kugume na ki mangi sonakumbatayo ki zi bapatiza. Ya mo agu avunguagude nga aKristano naadunga na bakere ngbarago ka bi awiriyo dagba gu vovo abawiriki yo nazio bapatiza te? Ti regbo gu garã nga ga sunge nangia 2017, aboro bangeyo naima susa 284,000, nga aguyo “i aima ringbisa yo” ayugu gayo kparatise fu Yekova ni zio yo bapatiza rogo ime. (Amo. 13:48) Si tie ziazia nga, gu vovo abawiriki re aima rugatiyo na gupai nga bapatiza nga guhe si aidaha be aKristano. Gini adiandue i adihe tipa ka zio bapatiza?

12. Gini adiandue si aida bawiriki Ziazia Kekeapai mangihe bambata fu ni zi bapatiza?

¹² Mbata fu bawiriki Ziazia Kekeapai zi bapatiza, si naida ni sonosi gu idapase du mburuhe rii ndikidi inohe tipa Mbori, tipa Gako Ringbisapai, na tipa Gako mbakadapai tipa batasa aboro. (1 Tim. 2:​3-6) Gu ngbatunga idapase re nafõngbadu bawiriki Ziazia Kekeapai yo ni ne agu asino naba gberãrago ti Mbori, na ni naamanga apai ringbisihe kuti ga Yekova arugute. (Amo. 3:​19) Si nirengo nga, ka boro mangingo ndikidi kparatise fu Mbori ono kini mangi agu apai rengbe ka sa ni ka ni rimingo ku rogo ga Mbori Kindo yo ya te. (1 Kor. 6:​9, 10) Ono kurapai kinaho berewe si aidaha kuti gu nga kakuti agu arugute nga ga Yekova. Si naida gu boro naida ka manga rurupai naadu a pati agu adunguratise nga ga dungurati na kini mangisunge tungusa wene pangbanga dedede gbiati sunge sa aboro ni abawiriki. Yesu ape gupai nga gako ndikidi abawiriki du nikaa manga gi sunge re. (Amo. 1:⁠8) Kina gu ka vovo bawiriki mangi agu adiandue re, si ka ni ru ti ni ka manga ndikidi kparatise fu Yekova rogo kparakpee yo nisani na fuani ni ki yugu gu kparatise re gbaiga ni zio ni bapatiza ku bangiri aboro.

13. Tipagine si aida ti ni agu aboro nayugo Ziazia Kekeapai fu aboro moi gupai ku berãyo yo nga bapatiza nga guhe si aidaha be Kristano?

¹³ Ho ani aundo awirani ni gbiati kura abawiriki Ziazia Kekeapai i mangi gi nyanyakipa adiandue re, si naida ani moi gupai ku berãrani yo nga du ni ndikidi bawiriki nakoda zio bapatiza. Ka ani moi gupai re ziazia ku berãrani yo, si nika sa gupai nga ani naafura wenengai gbe na agu aboro ani awirika Ziazia Kekeapai na yo. Si nika sa gupai a nga ka ani mangingo ndundu kaa fura na yo ti agu aregbo rẽarẽ nibipa nyakapa kparatise fu Yekova gbiati bapatiza ya. Nirengo, ani naida gupai nga awirani gbiati kura abawiriki Ziazia Kekeapai mangi sonakumbatayo ki zi bapatiza!

14. Tipagine si aidanga ani sosodi boro ti ni ni zi bapatiza ya?

¹⁴ Nirengo, si aidanga vungu boro, gu boro nayugo Ziazia Kekeapai funi, watadu kura boro rogo dungurati sosodi ni ni zi bapatiza te. Ga Yekova gene mangaapai wa gure te. (1 Yo. 4:⁠8) Kuba gure, wa ani ayugopai fu gu  ngbatunga aboro re, si naida ani nyakasipa wai fuyo nyakipa sonosa pagume na Mbori. Ga bawiriki Ziazia Kekeapai tambuahe tipa rengo gbiati gani nyemupai ka tinda gu gonga nga ga agu abawiriki nga aKristano du nika fõngbaduniyo ni zi bapatiza.​​—⁠2 Kor. 5:​14, 15.

15, 16. (a) Ya mo garã kinaho i namoihe nga gu si aida boro zi bapatiza ni kidu na ni? Oni sakingo rogoyo. (b) Tipagine si aida Bawiriki Ziazia Kekeapai zi bapatiza ti ni ni Dezire Yekova ka si vura du vurũ nga ni aima zio bapatiza rogo gu pambori ni adu mbata rogoho?

¹⁵ Garã ho i namoihe nga gu si aida boro da mbatano ti ni ni kini ru ka zio bapatiza te. Abawiriki Ziazia Kekeapai dunduko namanga sonakumbatayo ni bakiakia. Dungu aboro nazio bapatiza mbuyo kindi rukutu, na i ki nye anye ni ruru yo fu Yekova. Kura abawiriki Ziazia Kekeapai kinaho naye ka inopa wai du bapatiza na nyanyakipaha fuo wirikayo gu rengo nga ga Ziazia Kekeapai ho garãyo naima nge ni, na aguyo kinaho garãyo naima susa 100!

¹⁶ Kura sosono dee sa nga guri naawirika Ziazia Kekeapai asana gu boro naawirikapai na ri singia si rẽarẽ ri zi bapatiza berewe; ri aima zio bapatiza mbata agarã kusayo rogo dungu apambori. Gu dee re gbiati gari nayugupai awisigi averesi rogo Ziazia Kekeapai yo nga gu nafura tipa gupai re. Gu nawiriki Ziazia Kekeapai re aye awere ka rugatiri na gupai Ziazia Kekeapai aidaha, na fuani ka si aimanga ya ri ki zi bapatiza. Wa garãri avura mbeda vurũ kuti 80, ri aabingo ho nga si arẽnga ri zi bapatiza te te. Nirengo, mburu ndikidi bapatiza narurii ndikidi inohe tipa gupai Yekova akpinyemuhe. Sidu, ka si vura du vurũ nga i aima bapatiza vovo abawiriki mbata rogo kura pambori, si naida aida i zi bapatiza berewe.​—⁠Oni gedi Amokedi 19:​3-5.

17. Ginipai rẽ tipa berãkuriihe rogo gu uru boro azio bapatiza?

¹⁷ Gu uru boro azio bapatiza rogoho nga uru bakere ngbarago. Si a nga regbo berãkuriipai wenengai. Raka boro ringbisihe kuti gani kparatise fu Yekova nakoda nyanyaki sunge. Si du nga ndu gupai Yesu aringbisi du ni gu Kristano ti ni nga bawiriki kuti gonga. Si aidanga ga Yesu abawiriki ‘du ni ungayo fu tiyo te, ono fu guko nakpi tipa yo ki zingi berewe.’​—⁠2 Kor. 5:​15; Mt. 16:⁠24.

18. Gini asanahe ani nika sakapai tipaha rogo gu kekeapai ngbefuo gere?

¹⁸ Na Maria aima du na ngbatunga agu aberã re riri yo ho ri asana agu asanahe ni i nipepa ha ti tonatona gi kekeapai re. Ka si ngia vungu gude nga mo, si rengbe kadu nga mo aima sana tiro nga: ‘Ya mo wire ima rẽ tipa ka zio bapatiza? Ya mo ni na inohe wenengai tipa ka manga ndikidi kparatise fu Mbori? Ya mo si naida wire wirikipai wenengai na ki gbia sunge mbata fu u zi bapatiza? Ginipai ka mangi ka wire zi bapatiza na fuani u kini mangi kere ingapai?’ Rogo gu kekeapai ngbefuo gere, ani nika fura tipa agi apai re na ki sakipai tipa wai agu avunguagude nga aKristano narengbe ka du na ruru bipai tipa bapatiza.