MI ASONO Graz, Austria yo. Ho garãre adu ni nga saba, i akedi re ku sukuru yo tipa mi gbia gu rabahe yo nga ga pambori. Ono tie, mi anaabi abavugahe na anarani i nimangi kere wasiwasi kodaba. Sidu, si aadianga garã sa te, nina ki ya mi guari rogo gu sukuru re.

Kusa, mi aga ku rogo gu sukuru agude sukuru ara ara rogoho. Rogo kura yuru sa, Buba aye koyo tipa ka dia re, bambiko i abaafa abombu ni kerehe kurii Graz. Ani andu ka gbu rogo gu gbata nga Schladming. Fuo da ani nibasa na ki si rii paga ku mbitiyo, i agberesipa gu paga re na bombu. Ti gu kura regbo sa, tiyara vura nga gu naandu kina ti ngba sende azumudi rani na tita vurukporo. Tifuo vura nyasi, si awiri gupai nga kanisa gbiati irangbii aamanganga gupai furani ani aaidaha te.

Rogo 1950, boro sa dagba aDezire Yekova yo atona wirika Ziazia Kekeapai na nina. Mi anaadega ture adega kuti gayo sakaapai na zavura kini ndu na nina tipa kura adunguratise nga ga dungurati. Fuo nina ini gupai nga aDezire Yekova adu na rengo beyo, ri azi bapatiza rogo 1952.

Ti gu regbo re, gu dungurati naadu rogo gaani dagbarago adu bangire wa ka i ya gu ba du kina sosono adee rogoho. Ono tie, kusa, ani andu ku rogo dungurati sa nga gu naadu na dungu paranga aboro rogoho, angianga kina sosono adee wa gu mi aaberãha ya! Ho ani akaraga tirani ni ku Graz yo, mi atona nduge tipa adunguratise dunduko, na fuo regbo ngbutuko, mi aidi kuti gupai a nga rengo du mi aawirikaha. Mi aye a ka ino Yekova ni gu Mbori nafu gu undo fu gako amoyambu i aidaha. Ko namangaha wo zavura ho ani abihe ni nga ani nagbiatirani na kere akpakarapai ni sarani.​—⁠Tam. 3:​5, 6.

Mi aaida ka yugo rengo fu kura aboro. Mi atonaha na awirinami. Aunvurami biama aima ga ku rogo kura aba tipa ka mangasunge yo ni anayugupai. Ono mi atanga tiyo dunduko rogo agu agbaria ni basasa i adu rogoho ki ngarasi yo i wiriki Ziazia Kekeapai. Niyangaraha, awirinami dunduko awiriki Ziazia Kekeapai na ki da ni aDezire Yekova.

Rogo gi ue poso kutingba tungusapai kporo na kporo, mi agbia dee garãri aima susa 30 na mi ki  tona wisigo Ziazia Kekeapai na ri. Ri amangi sonakumbatayo ki zi bapatiza, na kusa, kumbari gbiati awiiri ue ni akumba ki zi bapatiza a. Gu wisigopai mi aamangaha na ri re aima du na bakere wene sangbanapai nga ga toro kurire. Tipagine si adu ti ni wo? Boro ho namangi ndikidi wirika Ziazia Kekeapai na mi te. Si aniˈidi mi naambakada gaani wirikapai dunduko wenengai. Ka pepai ngba kura gene, mi anaamangaha wo tipa ka yugopai fu tire, na fuani, mi kini ru tie ka yugopai fu gu boro mi aawirika Ziazia Kekeapai na ni! Nirengo, gupai re aima dungurosi gimi giarogopai yo nga ga rengo. Rogo Zerekpe 1954, mi ayugu gimi kparatise fu Yekova gbaiga ni zio mi bapatiza rogo ime.

Rogo 1955, mi andu tipa gu bakere adunguratise nakoda dungu aringara ku Germani yo, France yo, gbiati ringara aNgirisi yo. Ho mi adu ni London yo, mi agbia Albert Schroeder. Ko angia bayugupai rogo gu sukuru nga ga Girada, na kusa ko ki mangisunge rogo Riigbu Bipasunge. Ho ani andu ni ka bi gu bambu banda kuru ahe tipa yugoho nga ga Britain, Wiriba Schroeder ayugu kura kekeapai ni bee furani nga ga Ziazia Kekeapai. Si adu na rimo Mbori rogoho rogo pa-Ebere, na ko asaki wai furani gu kekeapai re adu na nyanyakipaha. Gipai re aima zio ngbadure yo na ki undo re rogo toro yo, na ki sare mi diberã kisusi gu naadu mbata ka tungusapa gu rengo du rogo Fugo Mbori yo.

Mi atona mangasunge ni gu nazakigene natungusapai ti aregbo dũ rogo Ngi 1, 1956. Fuo adiwi biama kusa, i aya fere mi ndu ka tona mangasunge ni kparakpara nazakigene Austria yo. Ti gu regbo re, aDezire Yekova aadunga Mistelbach yo te, nga gu gbata si adu nga mi nikaa mangasunge ni nazakigene rogoho. Ono kura kpakarapai adu kinaho mi agbia tire na ni. Apai adu tipa rani ni bakiakia na gu wirina ani aamangasunge abazakigene na ri. Garã re aima mbeda kuti 19 na mi aye gbata yo; garãri kidu nga 25, na ri kingia gu boro naaye gbaria yo. Mi anaaida kaa zinga kusa wiso; ri kini idi tigari kaa zinga kina boro ngbawiso. Ho nyemu anida ni, mi anaagumbanga ka ndu ka pi te; ri anaaimanga tigari te ri ki ndu ka pi. Ono wa si avura duwo, mbiko gupai nga ani aamangapai ringbisihe kuti agu arugute nga ga Ziazia Kekeapai, ani aima mbakada agu akpakarapai naadu dagbarani na ki gbia ngbarago ti du ani na diabese tingba gaani sunge ni anazakigene.

Ka pe guhe nga rengo, ani aima ye ka gbiatirani na kura bakere akpakarapai. Ani aima gbiatirani na arungosiro, ono ani ‘aadunga ni sara ni te’ watadu Mbori aambunga ra ni te. (2 Kor. 4:​7-9) Ti kura regbo sa ho ani aatungusapai ni rogo kura gbaria sa, aboro azaki gayo aango kuti rani. Bakindigi aango ake rani na gimi badia tungusapai ni kina boro ipo, na ami ki tona ka gbokoda na kini ri ngba rindi ra. Ani azi berani, na zavura mi ki mangi kparakpee ki ya, “Ako, Yekova, ho ami nika da ni tirani, ani kpikingo ni kina boro ipo!” Ho agu aango re ambedi ni gbe na ani, ami aru, ki tona ba sara, na fuani, ami ki karaga tira. Ani abihe nga Yekova aima banda rani. Fuo gure, ani atungusipai rogo gu gbaria re dunduko, na ani adu na bakere ngbarago nga aboro aima ida na gupai ani aatungusaha wenengai. Isoke si aima iriwo tiyo nga agu aango re aarundukanga rani te, watadu mbiko gupai nga ani aandu kindi kumbatayo kaa tungusapai ani ki vura gbiatirani na gu kerepai re vurũ. Badunguyo aima ye ki da ni aDezire Yekova.

Ani agbiatirani na kurapai berewe nabagunde tirani. Rogo kura uru sa, baira gu bambu ani aaraka rogoho ti marã ayego ku kporo na mare buda, na ko ki serekpo rani nga ko nika imo rani,  na ki ya ani aafuda aboro rogo gu dagbarago re. Diako aasadi ka zeresa ko, ono ka ri aadunga na diabese ya. Ani aru dimo fuo rani yo ki gi agu apai re dũ. Ani kini mega akiti ni ipo kuti ngbadimo na kini tona mbakada bara gaani ahe ku rogo amangu. Ho ani azaki ngbadimo ni, ani abiko ko naru aru na basape beko. Sidu, ani azubo ti gu ngbadimo naadu rumburu bambu yo na ki ndu ti gene naadu rogo ati na gaani ahe dunduko ka ani akaraganga tirani berewe ya.

Ani andu ku rogo kura ba naadu na abambu rame rogoho ti marã, na ki sanahe tipa bambu. Si aye kada nga ani araki rogo gu bambu re tipa bagizo regbo naaima mbeda kuti garã sa, na si aima undo gaani sunge tungusapai. Rogo gini gene? Gu bambu rame ti marã re adu kina boro bebere gbata yo, na kura agu aboro ani aawirika Ziazia Kekeapai na yo anaaida ka ye kaa wirikapai kina yo. Si aaimanga te ani ki tona manga wisigo buku gbiati Wisigo Ngbaõbambu Sinziri na aposo dunduko rogo gu bambu ani aaraka tiihe ti marã re, na bange agu aboro nanaaye kupati ni aniidu wa 15.

Ani araki Mistelbach yo tipa bagizo regbo naima susa garã sa. Fuani, i kini kedi re ku rogo gu gbata nga Feldbach, nga gu du bangbanda sudiyo na uroyo Graz yo. Mi aye kadu na vovo wirina nga guri ani aamangasunge abazakigene na ri, ono dungurati aadunga a rogo gu rago re te. Ani aaraka rogo umba bambu nga gu naadu ni namba ue kuari yo. Wege anaaya aya ti ayaro nga gu naadu ti gu bambu re, sidu, ani kini asadi ka kisoho na awaraga apangbanga. Ani anaatu ime a kina guga yo. Ono wa si avura duwo, weneapai aima manga furani. Vuru bete adiwi yo gbua, i asigira badona rogo gu rago re. Niyangaraha, aboro 30 nga ga riikporo sa ani aawisigo Ziazia Kekeapai na yo aye ku rogo rengo!

Agu apai re aima nyakasa gimi tambuahe tipa gu ga Yekova undo nga gu ko afuhe fu agu aboro namerã fuo agu apai nga ga Kindo. Ka si vura du nga wiri aboro arengbanga ka undo rani te, Yekova kinaho ti aregbo dũ.​​—⁠Tam. 121:​1-3.

Rogo 1958 si adu nga i nika manga bakere dunguratise nga ga dungu aringara New York City yo, rogo agu aba ngimbaro nga Yankee Stadium gbiati Polo Grounds. Mi asanahe tipa ka ndu kadu pati ni, na gu be-basunge nga ga Austria asana re singia mi rengbe kadu na nyemu ka ndu tipa gu namba 32 Sukuru Nga ga Girada. Wai du ka mi aru ka ka ngbatunga momu wa gure? Mi akaragapai ni ipo nga, “Ii!”

Mi aasungo pati Martin Poetzinger ti regbo gu Sukuru Nga ga Girada re. Ko ahi kereapai rogo gu bataya zizi aboro nangia ga aNazi. Ko aima mangasunge kusa a rogo Riigbu Bipasunge. Ti  regbo wirikapai, Martin anaasana re ti kura aregbo rogo patapata nga, “Erika, rogo gupai re yo nga gine rogo pa-Germani?”

Ho ani ada ni bebere wirikapai, Nathan Knorr apepa gaani asunge na agu aba ani nika ndu ku rogoho. Gimi adu ku Paraguay yo. Mbiko gupai nga garãre adu kindi tooni, si aaida mi sana buba mbata tipa ko idihe fere mi ndu ku rogo gu ringara re. Fuo sana mi buba ko kini idihe fere, mi andu ku Paraguay yo rogo Marungu 1959. I akedi re mi ndu kaa raka rogo ga amokedi kporo Asunción yo, na gimi vovo badiasunge tungusipai ni dee.

Fuo regbo ngbutuko, mi agbia Walter Bright, nga gu mokedi namangi namba 30 Sukuru Nga ga Girada. Fuo bete regbo kusa, ani arogo tirani na ko na kini sovura kuti agu akpakarapai nga ga raka kina sa. Ai gu regbo ani anigbia tirani na kpakarapai, ani anigedi gu ga Yekova kidohe du rogo Yesaya 41:​10, nga gu naya: “Ka mo gúnde nga ya, mbiko mi du na mo, ka mo kío nga ya, mbiko mi nga ga Mbori; mi anyákasa ro.” Gipai re afu gu kido furani nga, ka ani nye ni rururani fu Mbori na ki moi pa gako Kindo mbatayo rogo gaani raka, ko azanganga manga gupai furani ani aidaha te.

Fuo bete regbo kusa, i akedi rani na sunge amokedi ku rogo kura rago, nga gu naadu ti gu ngbanda rago nga ga Brazil. Ho ani adu ni yo, abarumbatayo rogo pambori angarasi paranga aboro i zumudi gu kporo ani aaraka rogoho na mbia, nga gu kporo apaparaha aima tona gberã zaatu. Fuani, Walter atona wisigo Ziazia Kekeapai na baira aborisi. Gu baira aborisi re akedi aborisi i ye ka sungo pati kpurani tipa poso sa, na agu aboro re aarungosingo rani berewe te. Ngbutuko fuo gure, i agbisi rani ku rogo kura kporo nga gu apai aduadu tipaha wenengai, na si adu gii ngbandarago yo nga ga Brazil. Si aima ngba tipa rani bambiko ani aima du na rengba kaa manga adunguratise Paraguay yo na Brazil yo. Mbata fu ani guari rogo gu ba re, umba adungurati ue aima zaka yo.

Amunganga ape gupai fere nga ka mi vungunga berewe te, sidu, iriwoapai aima ti tirani ka bi gupai nga mi adu na gude rogo 1962! Fuani, ani aga ku Hollywood, Florida yo, kidu mbembedi na agume Walter. Tipa bete agarã, ani na Walter aadunga na rengba ka mangasunge ni abazakigene te. Ani aangerafuo aborokporo. Ono wa si avura duwo, ani aamaa agu apai nga ga Kindo mbatayo kindi rogo gaani raka.​—⁠Mt. 6:​33.

Ho ani ada ni Florida yo rogo Ngbangba 1962, iriwoapai aima ti tirani ka bi gupai nga mbiko gu bipai aboro adu na ni rogo gu rago re, agu awirina nangia bi aboro aamanga gayo adunguratise kia, pusi yo kini mangi gayo a kia, na zavura i anaatungusapai a rogo aba ni bakiakia. Ono Yekova akparakanga aboro te, fuo regbo ngbutuko, bibiri awirina gbiati pusi yo atona manga adunguratise dunduko kina sa. Be Yekova aima du ni yuguyuguhe rogo gi mbakadapai re, bambiko dungu adungurati du awere rogo gu rago re.

Si nafu kina gberãrago nga, Walter aima kpi be gu kansa nagbirisa berã boro rogo 2015. Ko aima du ni bawene sino kumbami tipa agarã nga 55, na ko angia gu boro naaima kpinyemu Yekova na ki undo dungu awirina. Mi nangera kumbatayo ka biko berewe ho ko nika zinga ni be kpio na kpotoko ni wenehe.​—⁠Amo. 24:⁠15.

Mi na bakere tambuahe tipa du tingba sunge tungusapai ti aregbo dũ tipa agarã naima susa 40, kini gbia bakere ngbarago gbiati dungu amosoro. Ni kpiapai, ani na Walter adu na rengba kadu ti agu aregbo agu aboro ani awirika Ziazia Kekeapai na yo bangeyo adu nga 136 anaazio bapatiza. Rengo ngaha nga, akpakarapai adu kinaho ani aagbia tirani na ni. Ono ani aabingo ho ni ndupai tipa ka mbu iriso gaani ruru Mbori te. Kuba gure, ani ambedi na ko, kini kido kutiko ko mangi agu apai furani ani aidaha ti gu regbo na ngba gu gene da bangiriko. Na ko aima mangaha wo!​—⁠2 Tim. 4:​16, 17.

Mi nazingo tipa Walter ni kerehe, ono tungusapai ni nazakigene naundo re mi du na diabese. Mi nabihe ni pa undo gbe kaa yugupai fu kura aboro, na zavura kini tungusipa gu maabangirise nga ga zingabekpio fuyo. Nirengo, pai ho mi aidi Yekova mangihe fere, ka ko aamanganga ha fere ya te. Ringbisihe kuti gako kidohe, ko ima undo re, ki nyakasi re, na ki songodi re ni ‘kumbabe ko du na gako rurupai.’​​—⁠Yes. 41:⁠10.