1-2. (a) Ringbisihe kuti Asanza 16:31, waigu si aida ani naabi sosono awirinarani? (b) Gini asanahe ani nika karagapai kutini rogo gi kekeapai re?

KURA babiko arago kinaho Amerika yo nga gu rengbe mo ka bi ambia fongo rogoho si napiki sande. Ono tie i ata girisongo kpoto agu ambia fongo re tipa ka mbakada afongo rogoho te. Ni sangbanaha, dungu agu aboro nabi agi ambia fongo re arengbanga ka ino gupai nga ambia fongo du i abihe te na i ima rengba ka susa pati gi nyanyakipa ahe re.

² Wakina agu ambia fongo re, sosono awirinarani na nyanyakipa yo. Fugo Mbori naringbisa gayo nvue kuti kpakpari taarimo. (Oni gedi Asanza 16:31; 20:29) Ono tie, ani ima rengba kaa bi gi nyanyakipa aũkumuko re na taata paha. Ho paranga aboro arugatiyo ni na gupai nga sosono aboro na nyanyakipa yo, i nagbia guhe agbia du na nyanyakipaha kisusi ndikidi aũkumuko. Rogo gi kekeapai re, ani nika karagapai kuti asanahe biata: Tipagine Yekova abi sosono awirinarani ti ni wakina nyanyakipa aũkumuko? Tipagine du sosono awirinarani ti ni na nyanyakipa yo fu ga Yekova riigbu? Ginipai rengbe ani ka mangaha ka gbia bakere undo ti gayo kpiapai?

3. Ringbisihe kuti Atambuahe 92:12-15, tipagine du sosono awirina ti ni na nyanyakipa yo fu Yekova?

³ Gu sosono awirina du ni ruruyo na nyanyakipa yo fu Yekova Mbori. Ko ima ino gu ngbatunga aboro nga yo na ko nabi gayo wene asino na nyanyakipaha. Ko na ngbarago ho sosono aboro afura ni fu paranga aboro tipa gu tatamana i nagbiaha vuru gu badungu agarã yo dunduko i namangisunge ni ruruyo. (Eyo. 12:12; Snz. 1:1-4) Yekova nabi gayo hipai abi a na nyanyakipaha.  (Mara. 3:16) I aima gbiatiyo na akpakarapai rogo gayo raka yo, ono i aambunga nyanyaki idapase kuti Yekova te. Gayo maabangirise tipa raka kumbatayo ni nyanyakihe awere kisusi wai si adu ti gu regbo i agi rengo ni bambataha. Na Yekova ima kpinyemu yo mbiko i nandu kindi kumbatayo kaa takapandepa rimo ko zavura “ti rago gbinza yo.”—Oni gedi Atambuahe 92:12-15.

4. Gini apai rengbe ka ngarasa sosono awirinarani?

⁴ Ka si du nga oni ima tona kaa gbinza, oni tingidi gupai nga Yekova natingidapa gu sunge atingida oni namangihe fuko kusayo. (Eb. 6:10) Oni ima songoda sunge tungusapai zaaza, na gipai re nasa gu Barani du ngbangbaturũ yo ko du na ngbarago. Oni ima hi badungu akpakarapai, zavura gu nasa roni oni du na bakere gberãrago. Oni ima giasangba Ziazia Kekeapai na ki songodipai ku bara gu ruru arugute yo nga ga Ziazia Kekeapai, na oni ima manga nyanyakipa asunge rogo ga Yekova riigbu na ki raba kura aboro. Oni ima manga ome ka inido tironi na gu badungu aˈariapai ga Yekova riigbu namangihe. Oni ima songoda agu aboro namangasunge Kindo ti aregbo dunduko na kini ngarasi yo. Yekova Mbori ima kpinyemu roni ni bakerehe tipa du oni niruru roni. Ko ima kidohe nga “ko ambú nga pa gako ziazia aboro te”! (Tam. 37:28) Ko nafu gu kidohe furoni nga: “Mi atínda roni kindi dati rago kura nvue rironi yo.” (Yes. 46:4) Sidu, ka oni berẽnga gupai nga mbiko oni ima gbinza oni berewe na nyanyakipa roni rogo ga Yekova riigbu ya te. Oni na kina nyanyakipa roni!

5. Gini pai si aida sosono awirina tingidihe?

⁵ Sosono awirina ima rengba ka undo ga Yekova riigbu ngba dungu agene. Wa vura duhe nga i ima rengba ka zanga du na bakere ome wa gu i anidu na ni mbata, i na bakere inohe nga gu gbiayo ho vuru agu agarã yo susi. Yekova ima rengba kaa ndu kindi kumbatayo kaa mangasunge na yo ngba dungu agene, a wa agu akpiapai naye re ayugoho nga ga agu aboro naadu mbata kusayo na agu aboro du awere.

6-7. Oni funga akpiapai rogo Baibiri yo nga ga sosono awirina nagbia amaku mbiko i amangisunge fu Yekova niruru yo.

⁶ Ani ima rengba ka bi wene akpiapai rogo Ziazia Kekeapai yo nga ga agu aboro naamangasunge kindi fu Yekova ho i adu ni ni  gbinza yo. Ni kpiapai, garã Moize adu wa 80 ho ko atona mangasunge ni niga Yekova nebi na ni gu boro naarukuba gu rikaaboro nangia aYisaraere. Si nawiraha wa garã Daniere aima susa 90, Yekova nimangisunge kindi na ko ni nebi. Na si nawiraha wa garã gu mokedi nangia Yoane aima susa 90 a ho ga Mbori toro adu ni kugiiko ko ke gu buku nga Yugoti.

⁷ Badungu kura ruru awirina kinaho aboro aainongo yo wenengai ya, na aboro aima rengba ka zanga biyo na nyanyakipa yo. Wa si avura du wo, Yekova aima inopai tipa yo na ko aima fu mosoro fuyo tipa gayo du ni ruruse. Ni kpiapai, i fura tipa Simona gbua tooni rogo Ziazia Kekeapai yo, nga gu kumba naadu ‘niruru ko, ki niberẽ ga Mbori pai aberã gbe,’ ono Yekova aima ino gu ngbatunga boro nangia ko na ki fu gu momu fuko nga ga bi fogo Yesu na gu momu nga ga gumba sangbanebi tipa Yesu gbiati nako. (Rk. 2:22, 25-35) Oni berẽnga a tipa gu dekurugbo ni denebi nangia Ana. Garãri adu nga 84, ono ‘ri anaaguaringa yekaru yo te.’ Yekova afu maku furi mbiko ri anaandu dedede ku yekaru yo na ko ambu ri ri bi fogo Yesu. ASimona na Ana adu na nyanyakipa yo fu Yekova.—Rk. 2:36-38.

8-9. Gini undo adekurugbo andu kindi kumbatayo kaa fuhe?

⁸ Ti gi gaani regbo re, badungu sosono awirina du ni ruruyo namaa bawene akpiapai fu paranga aboro. Oni bingo gu kpiapai nga ga gu wirina du rimori nga Lois Didur. Garãri adu gbua nga 21 ho ri atona mangasunge ni ni nazakigene Kanada yo. Fuo gure, ri gbiati kumbari nangia John adi badungu agarã kuti ta kaa biko adungurati. Kusa, i amangisunge rogo gu Betere du Kanada yo tipa agarã naima susa 20. Ho garã Lois adu ni nga 58, i asana ri gbiati kumbari i ndu ka manga kura sunge Ukureni yo. Ginipai i arengbe ka mangaha? Ya mo i arengbe ka berã gupai nga i ima gbinza ni kerehe na gene beyo tipa ka ndu ka mangasunge rogo kura ringara te? I aima ida na gu sunge re, na i amoi John ko naamangasunge rogo Rondo nga ga Be Basunge. Tifuo agarã saba kusa fuo kpio John, Lois adiberã ka nye kina tingba gari sunge. Garã Lois awere nga 81, ri namangasunge kindi fu Yekova niruru ri rogo gu Betere du Ukureni yo, na avuru gu Betere re ima kpinyemu ri ni bakerehe gbe.

⁹ Aboro ima rengba ka zanga maaberã yo ni bakerehe fuo adekurugbo wa Lois were; kisusi wai i anaamaaberã yo fuoyo mbata fu akumbayo kpiki, ono i kindi na nyanyakipa yo. Yekova nabi agu awirina nga adee na nyanyakipa yo nasongodi akumbayo tipa dungu agarã na nandu kindi kumbatayo kaa mangasunge fuko niruru yo. (1 Tim. 5:3) Kurigure, i nafu bakere ngarasaro fu paranga aboro.

10. Gini bawene kpiapai Tony amoihe?

¹⁰ Gu badungu sosono awirina naraka rogo agu aba i angerafuo sosono aboro rogoho na kina nyanyakipa yo a. Ni kpiapai, wirina du rimoko nga Tony naraka rogo gu ngbatunga ba re. Ko azi bapatiza Pennsylvania yo, Amerika  yo rogo Buza 1942 ho garãko adu ni nga 20. Ngbutuko tifuo ko zi bapatiza, i asanako tipa ko rimi sunge abanzengere, mbiko wa ko aká ka rimoho, i aba ko ku bambukiso yo tipa agarã ue na beberehe. Ko gbiati diako nga Hilda asonosi agude ue rogo rengo yo. Tipa dungu agarã, Tony amangisunge rogo adungurati biata ni gu babiapai nangerakurii gu sunge nga ga dungurati (du awere nga barii gu rondo nga ga abaakumba) na ko amangisunge a ni bangerekurii bakere adunguratise. Ko anaandu ku bambukiso yo kini mangi adunguratise na kini wisigi Ziazia Kekeapai na aboro yo. Garã Tony awere nga 98, na ko ata mbunga mangasunge fu Yekova te. Ko nandu kindi kumbatayo kaa iriso Yekova na awirinako rogo gu dungurati du ko rogoho!

11. Waigu rengbe ani ka yugo gupai nga ani nabi sosono awirinarani na nyanyakipa yo?

¹¹ Waigu rengbe ani ka yugo irisa fu sosono awirinarani? Ho du rengba adu ni, abaakumba ima rengba ka undo ngbatunga agi aboro re tipa i du pati adunguratise watadu i naadegatuyo kuti adunguratise na kini tungusipai. Ani rengbe ka yugo gupai nga ani naberãpa yo aberã nindu ani ka bi yo watadu ni yamba ani yo rogo vidio. Si naida ani berẽpa gu sosono awirina gbe naima rengba kaa raka tuturũ ti gayo adungurati. Ka ani adunga na rubangirise ya, ani ima rengba ka zanga maaberã rani fuo gi sosono awirina re. Agu akurayo kinaho naima rengba ka bihe ni kpakarakpakaraha watadu ka bihe nga si arẽnga i naafura tipa tiyo te. Ono ani ima rengba ka gbia bakere undo ka ani di regbo ka sanayo na asanahe na ki degeturani wenengai ho i apeka pa gu ngbarago ni i nagbiaha rogo ga Yekova riigbu.

12. Gini ngbatunga awirina rengbe ani ka gbia yo rogo gaani dungurati?

¹² Kina ngbarani rengbe ka zera nga bawene akpiapai kinaho rogo gaani dungurati nga ga gu sosono awirina du ni ruruyo. Wirina du rimori nga Harriette airisi Yekova niruru ri rogo gu dungurati ri adu rogoho New Jersey yo, Amerika yo. Fuoho, ri kini guari yo ka ga kaa raka na wiiri. Awirina rogo gari vovo dungurati adi regbo tipa ka ino ri, na i aye ka rugatiyo na gupai nga, ri na nyanyakipa ri gbe. Ri angarasi yo na agu apangbanga nga ga sunge tungusapai nga gu namangi ho ri awiriki rengo awirika ni bara rogo gu garã nangia 1925. Ti gu regbo re, ho ri anaandu ni gene tungusapai yo, ri anaatinda gari korinde atinda mbiko i aima rengba ka zio ri na ki ba ri ku bambukiso yo tipa bete regbo. I azi ri bara ue rogo 1933, gu bambata zio ri i azi ri, ri adi poso sa ku bambukiso yo, na ri ki di poso sa a ku bambukiso yo ti gu ue regbo i azi ri. Ti gu regbo re, kumbari aangianga Dezire Yekova te, ono ko aima songoda ri na ho ri adu ni bambukiso yo, ko angerefuo awiriyo naadu biata. Ni rengo, si rẽarẽ ani yugu irisa fu gu sosono ruru awirina du wa Harriette!

13. Ginipai ani nawirikihe tipa nyakapa sosono awirina rogo ga Yekova riigbu?

¹³ Gaani sosono awirina na bakere nyanyakipa yo fu Yekova na fu gako riigbu. I ima bi wai Yekova nafu amaku ngba dungu agene kurii gako riigbu na fuyo nitiyo. I ima wirika nyanyakipa apai ti agu aingahe i namangihe. Oni naabi yo wa “gugaabi tatamana,” na kini wirikipai ti gayo inohe. (Snz. 18:4) Ka oni di regbo ka ino yo, gaoni idapase nika du ninyanyakihe na oni nika wirika dungu apai be yo!

14. Ginipai Pa Fu Rugute ni Ue he 32:7 angarasa paranga aboro i mangihe?

¹⁴ Oni di regbo ka fura na sosono awirina. (Oni gedi Pa Fu Rugute ni Ue he 32:7.) Rengo ngaha nga, i ima rengba ka zanga kaa ngera wenengai, i ima rengba kaa andu yee, na i  ima rengba kaa fura zezeredi, ono i naida kindi kadu zaaza, na i ima manga “wene rimo” na Yekova. (Batu. 7:1) Oni tingidipa ndu gupai Yekova abi yo ti ni na nyanyakipa yo. Oni naandu kindi kumbatayo kaa yugo irisa fuyo. Oni du wa Erisa. Ko aka kindi kuti Eriya ti gu yangara uru i adu sa. Erisa agumba gupai fu Eriya bara biata nga: “Mi ambú nga ro te.”—2 Aba. 2:2, 4, 6.

15. Gini asanahe rengbe ani ka sana sosono awirina na ni?

¹⁵ Oni yugu gupai nga nyemu sosono awirina kina tironi nisana oni yo na asanahe. (Snz. 1:5; 20:5; 1 Tim. 5:1, 2) Oni sana ngbatunga asanahe wa agere: “Ho mo adu ni ni paranga boro, ginipai nasa ro mo da kuti gupai nga mo ima gbia rengo?” “Waigu agu apai namangi ro naundo ro mo du mbembedi gbe na Yekova?” “Ginipai undo ro mo du kindi na ngbarago tingba ga Yekova sunge?” (1 Tim. 6:6-8) Na oni degeturoni wenengai ho i nikaa gumba gayo pangbanga ni.

16. Waigu rengbe fugodagbase ka ngarasa sosono wirina na paranga wirina?

¹⁶ Ho sosono boro na paranga boro afura ni dagbatiyo, i dunduko nagbia ngarasaro. (Rom. 1:12) Paranga aboro, oni nika bi gupai nga Yekova nangera angerafuo gako aboro, na sosono aboro nika bi gupai nga i nakpinyemu yo akpi. I nika du na ngbarago ka pepa wai furoni i nagbia amaku be Yekova.

17. Tipagine rengbe ani ka ya ti ni wẽ gu sosono awirina du ni ruruyo nangba gbe wa agarã asusa?

¹⁷ Dedede, ngbanya kpotose ninaago ago kusayo ho boro atona kaa gbinza ni, ono agu aboro du ni ruruyo fu Yekova nangba gbe tiko wa agarã asusa. (1 Tesa. 1:2, 3) Tipagine du gupai re ti ni nirengo? Mbiko wa agarã asusa, i ima mbu ga Mbori toro si undo yo na ki raba yo i sonosi wene asino. A wa ani nikaa inido tirani na sosono awirina, kini yugu irisa fuyo, na kini wirikipai be yo, kinawo a ani nikaa bi yo wa nyanyakipa aũkumuko!

18. Ginipai ani nika sakapai tipaha rogo gu kekeapai ngbefuo gere?

¹⁸ Dungurati nanyaka gbe angianga kinaho sa paranga awirina abi sosono awirina ni na nyanyakipa yo ya, ono ho sosono awirina abi paranga aboro ni na nyanyakipa yo a. Rogo gu kekeapai ngbefuo gere, ani nika sakapai tipa wai rengbe sosono awirina ka yugoho nga i nabi paranga awirina abi rogo dungurati na nyanyakipa yo.