II TI GU kura aregbo. Ani bingo kpiapai sa. Pa Fu Rugute ni Ue he 24:14, 15 naya: “Ka oni nírungosi nga gu moyambu nadia mosoro sunge du ni irarungo ni irazingohe ya, watadu ka ni du dagba awirinaroni yo, watadu dagba gu kungba aboro sungu ku rogo gaoni ringara . . . ni ka kpara fu Yekova kuti roni, si ki du ni ingapai ku ri roni.”

Kekeapai gudu ho nayugo gupai nga ngbatunga zungodihe wa gure amangi rogo saba kama agarã Mbata fu Batikayo Kristo. I akuru baraha mbembedi na Ashdod. Si nawira gupai nga i akehe fu gu bamangisunge ati yo nga guni i akitingbanga ni ya ni azanga ka kusa agu ahu ati i aaidaha beni, gi pai re, si adu ni kekehe ti kuadikuadi pere, si agumba gupai nga: “Tingbafuo gamo moyambu [gu boro nazungadi he] nyasi mbakada bara agu ahe i akehe ati yo re fuo bete aˈauru, Hoshayahu nga wiri Shobay kini ye ka dia gu roko nga ga gu ga moyambu re. . . . Gu gimi abadiasunge dunduko ani aake ahe na yo rogo kere fofoi uru nika pe gupai nga . . . kina boro rengo du mi nagumbaha re. Mi amanganga ai gbegberẽpai te. . . . Ka si du nga banyaki abingo ho nga gako sunge nga ni ka fura tipa gupai nga i karaga gu roko nga ga gamo moyambu te, mo bi rungo re ki undo re! Ka mo ongonga aonga gbua kaa bi ga moyambu baraho adunga ni ni na gani roko ya.”

Bakeke kuru apangbanga sa nga Simon Schamar aya, gi zungadihe re “afuranga sa kina tipa gu bakere nyemupai gu bamangisunge re adu na ni tipa i gasi [gako roko] te. Si nayugo gupai a nga gu boro naazungadi he re aima inopai tipa agu andiko nga ga Ziazia Kekeapai, gu susi asusa gbe nga agu arugute du rogo Pa Amotumo na Pa Fu Rugute ni Ue he nga gu naazahe ti manga irarungo gbegberẽ.”