1. Tipagine du gi regbo ani araka ti ni re ni gu regbo du kia ti kura aregbo?

REGBO aadunga mbata rogo gu pangbanga yo nga ga ga aboro raka wa gi regbo ani araka awere ti ni re te. A wa Ziazia Kekeapai afura tipaha kumbatayo, Yekova nadungura “bakere rimbasa aboro, . . . dagba rika aboro dunduko, na angbatunga yo, na aboro, na angbatunga afugo dunduko.” Agu aboro ko aadungura yo re nga gu “nyanyaki rikaaboro” du na ngbarago bangeyo naima susa amirioni muambe nga aguyo “namanga pa [Mbori] uru na yuru.” (Yugo. 7:9, 15; Yes. 60:22) Badungu aboro aadunga mbata wa gure nga aguyo nakpinyemu Mbori na kini kpinyemu akurayo te.

2. Gini ngbatunga iraira nyemuse du ti agu aboro angianga abakurea Mbori ya? (Oni bi gu sura duti tonatonaha.)

² Ono wa vura duhe wo, Ziazia Kekeapai ga Mbori toro adu kugiipa kehe afura kumbatayo a ki ya ti gi gaani regbo re, agu aboro angianga abakurea Mbori ya nika du na gu ngbatunga nyemuse tiyo du ni irairaha, du nga gu nyemuse nga ga gbangbati. Gu mokedi nangia Pauro akepai nga: ‘Rogo kusa rago aboro akpi kina nyemu tiyo, ki du ni airakpinyemumarã, i akpí nyemu sangba borose susi nyemu Mbori.’ (2 Tim. 3:1-4) Gi ngbatunga nyemuse nga gu du  ti agu aboro naberã kina patiyo re andunga sa na gu nyemuse nga ga aKristano te; si kia ti ni. Merafuo agu asasa nga ga gbangbati ayengo na gu ngbarago fu aboro i aidaha te. Nirengo, gu ngbatunga nyemuse re nasonosa gbangbati rogo zegino, si kini sa raka ni kpakarakpakaraha fu aboro dunduko.

3. Ginipai ani nika wisigoho rogo gi kekeapai re, na tipagine?

³ Pauro aima ino gupai nga gu nyemuse nga ga gbangbati nika maapai na si nika du ni asada fu aKristano. Sidu, ko afu gu zahe fuyo nga i “kpára” tiyo ti agu aboro du na gu ngbatunga nyemuse tiyo du ni irairaha. (2 Tim. 3:5) Ono tie, ani arengbanga ka ne gu ngbatunga aboro re rogo apai yo dunduko te. Sidu tie, wai du rengbe ani ka kpara tirani ti gu sino nga ga zegino nga gu ke rani ake kirikiri re na ki mangi nyanyaki asadatise ka sa ngbarago ti Yekova nga Mbori nyemuse? Ani bingo wai du gu nyemuse Mbori aida ani du na ni kia ti gu nyemuse i nafura tipaha rogo 2 Timoteo 3:2-4. Mangaha wo nika undo rani ani ini gu ngbatunga nyemuse si aida ani yuguhe, nga gu naye na ndikidi ngbarago.

4. Tipagine agberãnga ha ti ni kadu na bete nyemuse tipa tirani ya?

⁴ Ga Mbori toro adu kugii gu mokedi re ko ke gupai nga, “aboro akpi kina nyemu tiyo.” Ya mo gberẽhe agberã ani kpinyemu tirani? Oó, pai ho gberẽ ti ni te, si naida aida ani kpinyemu tirani. Wo du Yekova akusi rani. Yesu aya: ‘Agu aboro ini mo yo dunduko mo nikpi nyemu yo wa mo akpi nyemu tiro.’ (Mk. 12:31) Ka ani akpingo nyemu tirani ya, ani arengbanga ka kpinyemu kura aboro te. Ani nageda gupai berewe a rogo Ziazia Kekeapai yo nga: ‘Akumba kpí nyemu adiayo a wa boroyo. Gu ni nakpi nyemu diani ni nakpi nyemu tini. Bambiko a nga boro sa nasoga boroni te, kina mbu ti ni na banda ha.’ (Ef. 5:28, 29) Si tie ziazia nga si naida aida ani du na bete nyemuse tipa tirani.

5. Wai du du agu aboro nakpinyemu tiyo kisusi?

⁵ Gu kpinyemu tise i nafura tipaha rogo 2 Timoteo 3:2, anga si nga gu wene nyemuse nga gu daada te. Si nga gu nyemuse nga ga gbangbati. Agu aboro kpinyemu tiyo kisusi naberãpa tiyo kisusi wai si aida i berẽhe. (Oni gedi ARomo 12:3.) Gu yangarapai i aberãpaha rogo raka yo nga kina patiyo. I aberãnga pa kura aboro kandara tooni te. Ho i amanga ingahe ni, i nabira kina kura aboro tipaha kuba gupai nga ka idapa gayo ingahe. Gu ngbatunga aboro naberã kina patiyo re na ngbarago nzunzu te.

6. Gini sangbanapai naye ti kpinyemu Mbori?

⁶ Wene abawirikipai tipa Ziazia Kekeapai nagumba gupai nga Pauro agumbapa kpi kina nyemu tise ni bambataha dagba agu asino yo nika maapai ti yangara areme mbiko si du nakusa gu kura asino re. Ono tipa agu aboro tigayo nakpinyemu Mbori, i na agu asino tiyo du kia. Ziazia Kekeapai nagumba gupai nga gu nyemuse Mbori aida ani naayugoho na ngbanya dagbaha na ngbarago, zereda, zerangbaduse, weneringise, wenesino, idapase, zera, gbiati zatise. (Gara. 5:22, 23) Bake papara atambuahe ake gupai nga: “Rago nangba ti agu aboro du gayo Mbori nga Yekova!” (Tam. 144:15) Yekova nga gu Mbori du na ngbarago, na gako aboro na kina ngbarago a. Kurigure, ga Yekova amoyambu wa agu aboro nakpi kina nyemu tiyo na du na nyemu gupai nga kina aboro naafu he fuyo te, i nagbia ngbarago ti futiyo ka mangapai tipa ka undo kura aboro.—Amo. 20:35.

7. Gini asanahe nika undo rani ani wisigi gaani nyemuse tipa Mbori?

⁷ Wai du rengbe ani ka ino singia wai ani akpinyemu tirani naida ka furii wai ani akpinyemu Mbori? Oni bingo gu rugute du rogo AFiripoio 2:3, 4 nga gu naya: “Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni. Ka oni bérẽ nga pa kina gaoni pai ya, ono oni bérẽ pa ga akuaroni  apai.” Ani rengbe ka sana tirani nga: ‘Ya mo mi namangasunge na gu rugute re rogo gimi raka yo? Ya mo mi naasada nzunzu ka manga gupai Mbori akpinyemuhe? Ya mo mi naagbata gene kaa undo kura aboro rogo dungurati na gene tungusapai yo?’ Taatapai ngaha ka futirani tipa ka undo kura aboro te. Si naida boro mangi bakere asadatise amanga na ka mbupa kura gani apai. Ono ginipai rengbe ka fu bakere ngbarago furani kisusi gu nga ka ino gupai nga ani nasa ngbarago ti Bakerepa Bakindo zegino dũ?

8. Ginipai nyemuse tipa Mbori nafõngbadu kura aboro yo i mangihe?

⁸ Nyemuse tipa Mbori ima sa kura aboro i mbu agu asunge nga gu ka ye na bakere marã fuyo tipa gupai nga ka mangasunge fu Yekova ni bakerehe gbe. Ericka nga guri naraka Amerika yo nga munganga. Ono kuba gupai nga ri gbata bakere marã tingba sunge amunganga, ri ada ni nazakigene na ri gbiati kumbari ima tungusapai rogo badungu aringara. Ho ri aberã ni kusayo, ri naya: “Gu weneapai namangi furani ho ani aaundo ni rogo gu dagbarago nagumba kura fugo kia, gbiati agu abakure ani nazihe, ima kumukosi rani nzunzu. Mi kindi nga munganga, ono pa manga mi sunge na bakere gimi regbo gbiati gimi ome ka undo aboro i hu rogo toro yo na tipa ka ngerafuo gu zingo nga ga dungurati naye na bakere ngbarago fere.”

9. Tipagine nyemu marã ayengo ti ni na ngbarago ya?

⁹ Pauro akepai nga aboro nika du ni “airakpinyemumarã.” Bete agarã kusayo, bazakigene sa Ireland yo atungusipai tipa Mbori fu kura kumba. Gu kumba re akusi gako wiri mangu marã ki kusi kpe marã rogoho ki yaru kuari yo ki gumba gupai nga, “Gi mbori du re!” Wa vura duhe nga badungu aboro arengbanga ka pehe gbayaga wa gu kumba re te, zegino ima hi be agu aboro nakpinyemu marã gbiati agu ahe rengbe marã ka ngbehe. Ono tie, Ziazia Kekeapai nafu zahe nga: “Gu ni nakpi nyemu marã, marã anyasa nga gani nyemuhe te; watadu gu ni [nakpi] nyemu badungu ahe na mokiisa ku ri he.” (Batu. 5:10) Gu ngbatunga aboro re nikaa ida kadu na kina bakere marã kindi, na ho i kaa manga bakere ome ni ka dunguraha, i nika ye na “dungu arungo” kuti tiyo.—1 Tim. 6:9, 10.

10. Ginipai Agura akehe tipa kumuko gbiati rungo?

¹⁰ Rengo ngaha nga, ani dunduko naida aida kadu na marã berani. Marã nabanda boro abanda tooni. (Batu. 7:12) Ono ya mo boro rengbe nzunzu kadu na ngbarago ka si du nga ni na kina agu ahe beni si aidaha tipa raka ni? Ii, ni ima rengba kadu! (Oni gedi Batungusipai 5:12.) Agura wiri Yake akepai nga: “Ka mo fú nga rungo fere watadu aũkumuko a ya; ono mo rígi re ni kina gu riahe rengbe fere.” Si taata ani ini gu ndupai ko aaidanga ti ni kadu ni kere irarungo ya. A wa ko andu kumbatayo ka saka rogoyo, ko aaidanga kadu ni asadiasadi ko ka dĩ he te mbiko dĩ arengbe ka ye na wasiro kuti rimo Mbori. Ono tipagine ko akpari ti ni nga ko aidanga kumuko te? Ko akepai nga: “Mi ka mbi, ki oro rimoro, ki ya, ‘Da nga Yekova?’” (Snz. 30:8, 9) Si nawira gupai nga aboro kinaho mo naima ino yo nga aguyo nakido kuti gayo aũkumuko kuba kido kuti Mbori.

11. Gini rugute Yesu afuhe tipa marã?

¹¹ Agu aboro nakpinyemu marã arengbanga ka sa ngbarago ti Mbori te. Yesu aya: “A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino a te.” Ko atona fugo ni peko gupai nga: “Ka oni dúngura nga ũkumuko ni gaoni zegino ya, no ayawe agbarasa ahe ni na gbegbe, no airadĩ akua bambu ni nidĩ ahe; ono oni dúngura ũkumuko ni gaoni ku ngbangbaturũ yo; yo ayawe agbarasa nga ahe ni na gbegbe ya, yo airadĩ akua nga bambu ni nidĩ ahe ya.”—Mt. 6:19, 20, 24.

12. Wai du rengbe raka taata raka ka saha furani taata ani mangisunge fu Mbori? Oni funga kpiapai.

 ¹² Badungu aboro bi gupai nga raka taata raka nasa yo i du na bakere ngbarago na i du na bakere regbo beyo ka mangasunge fu Yekova. Jack nga guko naraka Amerika yo abagi gako bakere kporo gbiati gako sunge marã mbiko gupai nga ko ainihe nga pa mangako ho wo nika saha taata fuko ko mangisunge abazakigene na diako. Ko aya: “Si aadunga ni taatapai ka baga gu bawene kpurani re gbiati gaani dagbangua nga gu naadu rogo gaani ringara te. Ono tie tipa dungu agarã, mi anaayego basunge yo ku kporo na bakere gberãrago mbiko agu akpakarapai mi aagbia tire na ni yo. Diare nga guri naamangasunge abazakigene adu ti aregbo dũ na ngbarago. Ri anaaya fere, ‘Gimi bairasunge ngba kisusi abairasunge dũ!’ Wa duhe nga mi namangasunge bazakigene amanga awere, ani dunduko namangasunge fu kina gu ngisa Boro re, nga Yekova.”

13. Wai du rengbe ani ka wisigo gu bipai du ani na ni tipa marã?

¹³ Tipa ka wisigo gu bipai du ani na ni tipa marã, ani rengbe ka bi wai nzunzu ani narengbe ka karagapai kuti agi asanahe re kina boro ngbaduraniyo: ‘Ya mo mi ima ida nzunzu kuti gupai Ziazia Kekeapai apehe tipa marã, na ya mo mi naraka ringbisihe kutini? Ya mo sunge marã nga bambatapai rogo gimi raka yo? Ya mo mi nabi aũzegino na nyanyakipaha kisusi gimi pagume na Yekova gbiati aboro? Ya mo mi nakido nzunzu kuti Yekova nga ko nika ngera angerafuo gimi azingo?’ Ani ima rengba kadu na gu kido nga, ko ambunga ngerafuo agu aboro nakido kutiko te.—Mt. 6:33.

14. Gini ngbatunga bipai du ni ruruhe tipa agu apai nga ga ngbarago?

¹⁴ A wa i afura tipaha kumbatayo, badungu aboro areme ‘nakpinyemu sangba borose.’ Kina wai agberẽnga ha kadu na wene bipai nga gu daada tipa tise na tipa marã ya, kinawo a agberãnga ha kadu na gu bipai daada tipa agu apai nga ga ngbarago ya. Yekova aidanga gupai nga ani mbu agu apai dunduko nga gu rengbe ka sa ngbarago tirani te. Ziazia Kekeapai nangarasa ruru aboro nga: “Mo ndú, ka ri ga riahe na ngbarago, ki nimbiri ga imekakue na ngbarago kpotoro yo.”—Batu. 9:7.

15. Gini ngbatunga ngbarago i nafura tipaha rogo 2 Timoteo 3:4?

 ¹⁵ Ue Timoteo 3:4 nafura tipa agu aboro namerã fuo agu apai nga ga ngbarago ki zanga berãpa Mbori. Wene bawirikipai sa akepai nga: “Gi [veresi] re ayugongo gupai nga i gu duadu na bete nyemuse tipa Mbori te. Si nayugo gupai nga i akpingo nyemu Mbori kandara tooni te.” Nairiwo gu nyanyaki zahe nga ni re fu agu aboro nasonosa bakere nyemu agu apai nga ga ngbarago! Gu fugo nga “akpí nyemu sangba borose” ima rẽ na agu aboro ‘merẽ gayo kina gene berã pa nyemu ahe rogo gi unga re.’—Rk. 8:14.

16, 17. Gini kpiapai Yesu amoihe nibipa agu apai nga ga ngbarago?

¹⁶ Yesu adu na ruru bipai tipa agu apai nga ga ngbarago. Ko anduandu tipa pumbo “diade” na tipa “bakere pumbo.” (Yo. 2:1-10; Rk. 5:29) Ho imekakue anyasi ni ti regbo gu pumbo diade re, ko asa ime ngba iˈiriwo gene yo ku rogo imekakue yo. Na ti gu kura regbo aboro aabisira Yesu mbiko ko aarihe na kini mbirihe, ko ayuguhe fuyo ziazia nga gayo bipai aarunga te.—Rk. 7:33-36.

¹⁷ Ono wa si avura duwo, Yesu aafunga tiko tipa gu raka nga ga kina ngbarago te. Ko aperesipa agu apai nga ga Yekova mbatayo na ki futiko kakaka ka undo kura aboro. Tipa gupai nga badungu aboro gbia unga, ko aidihe ka kpi kere iˈigirã kpio ti ngbundurungua. Ho Yesu aafura ni fu apefuoko, ko aya: “Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re. Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe: bambiko kina wo i amangi anebi nadu mbata fu roni.”—Mt. 5:11, 12.

18. Gini asanahe nika undo rani ani ini bakio wai ani akpinyemu agu apai nga ga ngbarago?

¹⁸ Wai du rengbe ani ka ino bakio wai ani nakpinyemu agu apai nga ga ngbarago? Si naida ani sana tirani nga: ‘Ya mo mi peresipa aũngbarago mbatayo fu dunguratise gbiati tungusapai? Ya mo mi na nyemu ka mbu kura agu apai ngba tire mbiko mi naida ka mangasunge fu Mbori? Ho mi agbata aũngbarago ni, ya mo mi naaberã pa gu bipai du Yekova na ni tipa gimi asiapai?’ Ka si du nga ani ima kpinyemu Mbori nzunzu, ani anenga kina agu apai sa ani nainihe nga si nika ba gberãrago tiko te ono ani nika ne agu apai a ani abihe nga si ima rengba ka ba gberãrago tiko.—Oni gedi Matayo 22:37, 38.

19. Ada kaa dunga nzunzu na ngbarago ya?

¹⁹ Ga Satana zegino ima rungosi aboro tipa agarã wa 6000, na digido gu gako zegino re ima mbeda kada. Kpotosende ima hi be agu aboro nakpinyemu tiyo, marã, gbiati agu apai nga ga ngbarago ni bakerehe kisusi. I nga agu aboro du na nyemu kina guhe rengbe yo ka gbiaha be kura aboro, nga agu aboro nabi agu apai i akpinyemuhe na nyanyakipaha kisusi rogo gayo raka yo. Ka gu ngbatunga aboro re dunga nzunzu na ngbarago te. Kuba gure, a wa bake papara atambuahe akehe: “Rago nangba ti gu ni du na ga Yakoba Mbori ni gani mounda, nga gu ni namaa bangirini koyo du Yekova ni, nga gani Mbori.”—Tam. 146:5.

20. Wai du gu nyemuse nga ga Mbori naye na ngbarago foro?

²⁰ Nyemuse tipa Mbori nazambua azambua dagba ga Yekova aboro yo, na agarã dunduko ani ange kina kumbatayo. Gure nga gu gopai nayugo gupai nga ga Mbori Kindo nazogarago na barambeda, si nika ye na agu amaku ku auru kpotosende ani arengbanga ka berã kandara berẽberẽ paha ya. Ndikidi ngbarago nga gu nanyeanye kindi naye ti manga gupai Mbori akpinyemuhe, na ti ino gupai nga ani nasa ngbarago ti Bakerepa Boro kisusi. Na agu aboro nakpinyemu Yekova nika du na ngbarago nyeanye kindi! Rogo gu kekeapai ngbefuo gere, ani nika bi agu asino gu nyemuse nga ga gbangbati akusaha na ki bi gu kparakparapai du dagbaha na agu asino du ti ga Yekova amoyambu.