1. Gini wene toro ani abihe dagba ga Yekova aboro?

BAKURU kusayo, Ziazia Kekeapai aima gumba gupai kumbatayo tipa ga Mbori aboro nga, i ‘afú tiyo zaza’ ka manga ga Yekova sunge tiibe gu rugapai nga ga Wiriko. (Tam. 110:3) Gu sangbanebi re nadigiso tihe adigiso areme nirengo. Rogo agarã dunduko, ga Yekova amoyambu nadia amirioni asaa kuti sunge tungusapai kakaka. I atumongo yo tipa i mangi gi sunge re te, i namangaha bambiko i naida ka mangaha. I nadia regbo a ka undo awirinayo i gbia agu ahe du yo na zingoho, ka ngarasa yo na ka nyakasa gayo idapase kuti Yekova. Abaakumba na amoundo abaakumba nadia dungu asaa kaa mbakada apapara adunguratise, na ka ndu kaa bi awirinayo kaa ngarasa yo. Gini ndupai nasa ga Yekova aboro i naamanga agi asunge re dunduko? Bambiko i ima kpinyemu Yekova, na i ima kpinyemu aboro a.​—Mt. 22:37-39.

2. A wa i nasakipai tipaha rogo ARomo 15:1-3, gini kpiapai Yesu amoihe?

² Yesu ayugu gupai nga, ko naberãpa agu azingo nga ga kura aboro susi gako. Ani naˈasada na omerani dunduko ka pekafuo gako kpiapai. (Oni gedi ARomo 15:1-3.) Agu aboro nawirika ko nika gbia aundo agbia. Yesu aya: “Fu he ngba ti dia ha.”​—Amo. 20:35.

3. Gini apai ani nika wisigoho rogo gi kekeapai re?

³ Rogo gi kekeapai re, ani nika fugo bete agu apai Yesu amangihe tipa ka undo kura aboro na ani nika wisigo wai rengbe ani ka wirika gako kpiapai. Ani nika sakapai a tipa wai rengbe ani ka kiiso gaani nyemupai tipa ka undo kura aboro.

4. Wai du Yesu amoi agu azingo nga ga kura aboro mbatayo fu gako?

⁴Yesu aundo kura aboro zavura ho ko adu ni na mbugo. Oni  berẽnga pa gupai Yesu amangihe ho dungu aboro aye ni fuoko ku pavuru bagangara yo, nga gu si awira gupai nga si adu mbembedi na Kaparanauma. Yesu amangi kparakpee yuru sasasa. Ko aima du na bakere mbugo nirengo, ono ho ko abi ndurumo aboro ni, nunga rungorungo aboro aima zio ko gbiati gu kazakaza aboro naadu dagba yo. Ko aahusanga kina husi husi yo sa te, ono ko amangi nyanyakipa gumbapai a nga ga ngarasaro, nga gu i ayambaha nga​—Gu ga Yesu Yugopai Naadu Rii Bagangara Yo.​—Rk. 6:12-20.

5. Waigu abariikporo apekafuo ga Yesu kpiapai nga ga yugo nyemuse ho du yo ni na mbugo?

⁵Gu gene abariikporo awirika Yesu ngbaha. Oni makianga pa gi kpiapai re: Fuo baagude mangi nyanyaki sunge rogo uru naabaha, ko ga ku kporo yo na bakere mbugo. Wa vura duhe nga ko ni asadiasadi ko ka mbu manga gu Irisombori Nga ga Aborokporo ni gu nyemu re, ko sana Yekova tipa ko nyakasi ko ko mangihe. Yekova karagapai kuti gako kparakpee na gayo irisombori ki mangi kina wai si naamanga mbata. Agude wiriki nyanyakipa pai ni gu nyemu re, gupai i nawirikihe nga, agu apai nga ga toro avunguyo amaa paha mbatayo kisusi apai dunduko.

6. Oni funga kpiapai tipa wai Yesu adi gako regbo tipa ka undo kura aboro.

⁶Yesu aaringinga na gako regbo te. Ya mo oni rengbe ka berãpa wai Yesu adu ho ko agi gupai ni nga i imi bakureako nangia Yoane Bafu Bapatiza? Yesu aima du nirengo na bakere gberãrago. Ziazia Kekeapai naya: “Ho Yesu agi [pa kpio Yoane ni], ko ki kpara ni sa ko ka ndu kurungba yo, ku ngbakungba yo.” (Mt. 14:10-13) Ani ima rengba ka ruga tirani na ndu gupai ko aaida kadu ti ni ni sako. Badungu rani ninaakpinyemu kaa kpara rogo gu ba du ni aria ariaha. Ono tie, Yesu aadunga na rengba kadu nisako te. Bakere rimbasa aboro ada rogo gu ba ko aandu kadu ni sako rogoho re mbata fu ko da yo. Waigu Yesu amangipai? Ko aberẽpa gu zingo nangia ga gu rimbasa aboro re, na “nungayo ki nimangi ko amanga.” Yesu aini gupai nga i aaida undo na wasa be Mbori, sidu, Yesu ki tona ka undo yo nibasa. Nirengo, ‘ko atona ka yugo dungu apai fu yo’ angianga bete apai ya.​—Mk. 6:31-34; Rk. 9:10, 11.

7-8. Oni funga kpiapai tipa wai agu abaakumba du na nyemuse awirika Yesu ho boro aida undo ni rogo dungurati.

 ⁷Gu gene agu abaakumba du na nyemuse awirika Yesu ngbaha. Ani na bakere tambuahe tipa gu sunge gaani abaakumba afu tiyo ka mangaha tipa rani! Badungu awirina rogo dungurati ainongo pa gu sunge dunduko i amangaha te. Ni kpiapai, agu awirina du rogo gu Rondo Du Tipa Sakapai na Amunganga naundo awirinayo niipo ho tunguotunguo pai nga ga kaza akura ni. Dedede, ngbatunga gu tunguotunguo apai re ninaakura bebere yuru! Ono nunga nafõngbadu agi abaakumba re yo kodihe na gayo aborokporo i moi gu nyemupai nga akurayo aidipase du rogo fudifudipai mbatayo fu gayo.

⁸ Abaakumba naundo a na sunge meka aBambu Kindo na kura abambu nga ga riigbu, na i naundo a ti regbo gberãngo. Na i nadia gayo regbo tipa kaa yugopai furani, kini ngarasi rani na kini undo rani. Agi awirina re dunduko na gayo aborokporo ima rẽ ani fu tambuahe fuyo. Yekova dunga adu na gu toro i ayugoho. Ono tie, wakina kura aboro, si naida abaakumba duadu na ruru bipai. Si aidanga i naadia bakere regbo kuti manga agi apai re fu dungurati si ki sa gupai nga ka regbo dunga beyo tipa ka ngerafuo agu azingo nga ga gayo aborokporo ya te.

9. Ringbisihe kuti AFiripoio 2:4, 5, gini berãpai si aida aKristano dunduko sonosihe?

⁹ Oni gedi AFiripoio 2:4, 5. Rengo ngaha nga ani dunduko nga abaakumba te, ono ani  dunduko rengbe kadu wa Yesu ki moi pa agu azingo nga ga aboro mbatayo fu gaani. Baibiri naya “ko auka pa tiko ki du wa kina kanga.” (Frp. 2:7) Oni berẽnga pa gupai rengbe ani ka wirikaha ti gu veresi re. Gu kanga watadu moyambu i abi ni na nyanyakipa ni rengbe ka gbata amomu tipa ka fu ngbarago fu baira ni. Nidu mo ni ga Yekova kanga na ni moyambu fu awirinamo, zanga kapa, mo na nyemu Yekova gbiati awirinamo mangisunge na mo ni bakerehe. Mo rengbe ka mangaha wo ni berã mo pa agi aberãpai du kusende re.

10. Gini asanahe rengbe ani ka sana tirani na ni?

¹⁰Mo wisigi gamo berãpai. Mo sana tiro na ngbatunga asanahe wa agu nga: ‘Waigu du mi na nyemu ka mbupa kura gimi apai ka undo kura aboro? Ni kpiapai, ginipai rengbe mi ka mangaha ka i sana re mi ndu ka bi sosono wirina watadu mi ndu na sosono wirina tipa adunguratise? Ya mo mi na nyemu ka undo na giriso ba bakere dunguratise watadu ka mbakada Bambu Kindo?’ Ho ani akpara tirani ni fu Yekova, ani akido ko nga ani nika mangasunge na agu ahe du berani dunduko ka irisoko. Ko naida ani mangisunge na gaani regbo, ome gbiati agu ahe du berani ka undo kura aboro. Sidu, ko na ngbarago ho ani afu tirani ni ka mangaha wo. Ka ani bihe nga ariapai kinaho si aida ani mangihe, ginipai rengbe ani ka mangaha?

11. Waigu rengbe kparakpee ka undo rani ani du na bakere nyemu ka undo kura aboro?

¹¹Mo pe kina boro gupai mo aidaha fu Yekova rogo kparakpee yo. Ani yanga mo bi gupai nga bangiriba kinaho si aida mo mangi ariapai rogoho, ono ka pai adunga ho nafõngbaduroyo mo mangi gu ariapai re ya. Ka pai du wa gure, mo mangi kparakpee fu Yekova. Mo pe kina boro gupai namanga ro fuko. Mo pe pa wai du mo fu Yekova na ki sana ko ko fu “nyemupai na ome” foro mo mangipai.​—Frp. 2:13, NW.

12. Waigu rengbe gu paranga awirina nga akumba naima zio bapatiza ka undo gayo adungurati?

¹² Ka si du nga paranga wirina nga mo naima zio bapatiza, mo sana Yekova ko undo ro mo sonosi gu nyemupai nga ga manga bakere sunge rogo dungurati. Rogo gu kura aringara, abaakumba nge kisusi amoundo abaakumba, na badungu agu amoundo abaakumba re nga paranga aboro te. Wa riigbu asona kina kumbatayo ni bakerehe, ani naida na badungu paranga aboro tipa i undo rani na ngerafuo ga Yekova aboro. Ka mo du na nyemu ka undo rogo ai gu ba i aida ro rogoho, mo nika du na ngbarago. Tipagine? Bambiko mo nika sa ngbarago ti Yekova, mo nika gbia wene rimo, na mo nika gbia gu ngbarago naye mbiko undo kura aboro.

13-14. Gini apai rengbe ani ka mangaha tipa ka undo awirinarani? (Oni bi gu sura duti kpotoho.)

¹³Mo du ni gu boro nakparia apai, na ki ini gu regbo boro aida undo. Pauro afu gu rugapai fu aEbere nga: “Ka bangironi go nga ti manga wene pai na fuka ahe ya; bambiko ngbatunga gi rũhe re, si ngba ti Mbori.” (Eb. 13:16) Wene rugute du naadu! Ngbutuko tifuo agu aKristano naadu Yuda yo gbia gi waraga re, si aidi i mbu akpuyo, gayo sunge bagaahe na agu agumeyo naangianga aidipase ya na ki ‘oro ku bagangara yo.’ (Mt. 24:16) Ti gu regbo re, si adu ni nyanyakipa pai fuyo gbe ka undo tiyo dagbatiyo. Ka si du nga mbata fu gipai re i anaamanga pai amanga kuti ga Pauro rugute kaa gama ahe dagbatiyo, si aima rengba kadu taata fuyo ka inido gayo vovo gene raka.

¹⁴ Awirinarani ti aregbo dunduko arengbanga ka sarani ani ini gayo azingo te. Ni kpiapai, wirina ni dee rengbe ka kpi, kumbari ki  nye rogo imisiri. Ya mo gu wirinarani re naida undo nga ga riahe, ũnduge, watadu asunge kporo? Ko ima rengba ka zanga sana rani tipa undo bambiko ko aidanga ka fuda rani te. Ono ko ima rengba kadu na bakere tambuahe ka ani guari nitirani ka fu gu undo fuko ko aidaha. Si aidanga ani berẽ gupai nga kura boro kia nika undo ko watadu ko nikaa pepa agu aundo furani ko aidaha ti aregbo dunduko te. Mo sananga tiro nga, ‘Ka mi nidu rogo ngbatunga pai wa gure, gini undo ka mi nidu na nyemu ka gbiaha?’

15. Ginipai si aida ani mangihe ka ani aida ka undo kura aboro?

¹⁵Mo saha taata fu kura aboro i sana ro tipa undo. Zanga kapa, mo ima ino agu awirina du rogo gamo dungurati du regerege ti aregbo dunduko ka undo kura aboro. I naasanga rani ani bihe nga ani nafuda yo te. Ani ima ino gupai nga, i nika du ti aregbo dunduko na nyemu ka undo rani, na ani na nyemu kadu wakina yo! Alan, nga bakumba du garãko nga 45, naida kadu ni gu boro duhe taata fu kura aboro i sana ni tipa undo. Alan aaberãkurii ga Yesu kpiapai ki pe gupai nga: “Badungu apai naadu ti Yesu ko anaamangaha, ono ko aima ngba ti paranga aboro na sosono aboro, na i anaagundenga ka sana ko tipa undo te. I anaabi ko ni gu boro naaberãpa yo aberã nzunzu. Mi naida kadu wakina Yesu na aboro ki ini re ni gu boro duhe taata fu kura aboro i sana ni tipa undo, du wenengai na aboro, na kini berẽpa yo.”

16. Waigu rengbe pa manga ani pai kuti Atambuahe 119:59, 60 ka undo rani ani pekefuo ga Yesu kpiapai wenengai?

¹⁶ Si aidanga rago gberẽ tirani ka si du nga ani awirikanga Yesu ngba rengberengbe gene te. (Yak. 3:2) Gude sukuru ainongo pai susi gani bayugupai te. Ono wa gude sukuru nikaa  wirikapai ti gani aingahe na kini mangi ome ka pekafuo gu kpiapai nga ga gani bayugupai sirisiri wa rengbe omeni na ni, ni nikaa inopai kina kumbatayo. Wakina gure a, ka si du nga ani namangapai kuti gupai ani awirikaha ho ani amanga wisigopai nga ga Baibiri ni nisase, kini mangi ai gupai rengbe ani ka mangaha tipa ka mbakada agu aingahe kadu tirani, ani nika pekafuo gu kpiapai wenengai Yesu amoihe furani.​—Oni gedi Atambuahe 119:59, 60.

17-18. A wa ani nikaa wirika ga Yesu sino nga ga du na nyemu ka undo kura aboro, gini aundo ani nika gbiaha?

¹⁷ Ho du ani ni na nyemu ka undo, si ima rengba ka sa kura aboro i mangi kina gu bangisa pai re. Bakumba du rimoko nga Tim aya: “Kura paranga awirina ima da ni amoundo abaakumba. Ndupai sa naasa yo i da nga, i abi wai kura aboro adu na nyemu ka undo, na i kini idi kadu wakina yo. Gi paranga awirina re naundo gaani dungurati na kini undo abaakumba ni bakerehe.”

¹⁸ Badungu aboro rogo zegino areme nga aboro gbangbati. Ono ga Yekova aboro wa yo te. Gu toro nga gu Yesu adu na ni nga ga du na nyemu ka undo aboro ima zio ngbaduraniyo, na ani diberã tipa ka pekafuo gako kpiapai. Ani arengbanga ka pekafuo ko ngba rengberengbe gene te, ono, ani ima rengba ka ‘pekafuo’ ko wenengai wa rengbe omerani na ni. (1 Pet. 2:21) Wa ani nikaa manga ai gupai rengbe omerani na ni ka pekafuo Yesu, ani nika du na ngbarago bambiko ani nafu ngbarago fu Yekova.