1, 2. (a) Gini bipai du aDezire Yekova na ni tipa Ziazia Kekeapai? (b) Gini papara Ziazia Kekeapai ngba tiro gbe?

ADEZIRE YEKOVA ima kpinyemu Ziazia Kekeapai. Si nafu wene arugapai na kini undo rani ani gbia wasa na maabangirise. (Rom. 15:4) Ani abingo Ziazia Kekeapai ni gu buku naye mbiko gu berãpai nga ga aboro te, “ono ni ga Mbori pai.”—1 Tesa. 2:13.

² Zanga kapa, ani dunduko du na gu papara Ziazia Kekeapai ngba tirani gbe. Gu kura aboro nagbia ngbarago ti geda Kitabu Wene Pangbanga, nga gu nafura tipa gu wene asino Yekova naadu ti Wiriko. (Yo. 14:9) Gu kura aboro nakpinyemu agu apapara Ziazia Kekeapai du na sangbaanebi rogoho, wa Yugoti, nga gu nafura tipa “agu apai nikamanga mbembedi.” (Yugo. 1:1) Na da dagbarani yo agbianga wasa rogo Atambuahe watadu wirikipai be agu apai du rogo Asanza yo ya? Nirengo, Ziazia Kekeapai nzunzu nga gu kitabu du fu aboro dũ.

3, 4. (a) Gini bipai du ani na ni tipa gaani awaraga? (b) Gini ngbatunga awaraga ani agbiaha tipa ngbatunga badona nga ga aboro ni bakiakia?

³ Mbiko wa ani nakpinyemu Ziazia Kekeapai, kinawo a kpi ani nyemu gaani awaraga du mburuhe rii Ziazia Kekeapai. Ni kpiapai, ani na tambuahe tipa gu riahe nga ga toro ani agbiaha vurube gaani abuku, burosua, magazini, na gu kura awaraga. Ani ima inoho nga gi mbakadapai naye be Yekova re si tipa ka undo rani ani ngere  angera rogo toro yo, kini rihe wenengai na “ki du nzunzu rogo idapase yo.”—Tito 2:2.

⁴ Kupati agu awaraga du tipa aDezire Yekova dunduko, ani nagbia gu kura awaraga naundo badona aboro ni bakiakia. I nake agu akuraha si undo paranga aboro; na agu akuraha naundo avunguagude. Dungu agu awaraga i akusaha tipa kparakaha na gu du rogo gaani bangiriba nga ga Internet, si fu agu aboro angianga aDezire Yekova ya. Gu ngbatunga riahe nga ga toro du kpaima re, si natingida rani na gupai nga Yekova ima kakuti gako kidohe du tipa ‘manga pumbo fu aboro dunduko.’—Yes. 25:6.

5. Ginihe rengbe ani kadu na kido nga Yekova nabihe na nyanyakipaha?

⁵ Dungu rani nabihe nga ka regbo nidu adu berani, ka ani naageda Ziazia Kekeapai ageda na agu awaraga du mburuhe rii Ziazia Kekeapai. Ani du na kido nga Yekova nabi gu ome abi ani amangaha na nyanyakipaha ka ‘banda gaani saa’ tipa ka geda Ziazia Kekeapai dedede gbiati wisigopai nisase. (Ef. 5:15, 16) Ka pe kina rengo, ani arengbanga kadu na regbo berani tipa gu riahe dunduko nga ga toro duho furani te. Ono tie, si naida ani du na rubangirise ti gu kerepai ani abingo ho ya. Ginipai du ngaha?

6. Ginihe rengbe ka sarani ani zanga gbia undo ti kura ambakadapai nga ga Yekova?

⁶ Gu kura kerepai kinaho nga ani ima rengba ka zanga gbia kura aundo ka ani du na gu bipai nga gu kura ariahe kinaho nga ga toro adunga tipa rani ya. Ni kpiapai, ginipai rengbe ka manga ka si du nga gu kura papara Ziazia Kekeapai kinaho ani abihe nga si arengbanga ka undo rani te? Watadu ginipai rengbe ka manga ka si du nga ani bihe nga i aakenga gi papara waraga re furani te? Ya mo ani naaora aora gbua ri agu apai re watadu ani agedanga kandara gedi gedihe te? Ka si duwo, gure nga ani nazanga gu kura apai nga gu rengbe ka undo rani ni bakerehe. Wai du rengbe ani ka zanga ti ku rogo gu gbina re? Kurigure, ani dunduko si aida ani moi gupai ku berãrani yo nga Mbori nga mburu gu gaani riahe nga ga toro re. Yekova afura vurube gu nebi nangia Yesaya ki ya: “Mi nga Yekova ga Mbori, nayugo pai foro sa u.” (Yes. 48:17) Si adu ni wenepai ka ani wisigi aberãpai biata nga gu rengbe ka undo rani ani gbia undo ti apapara Ziazia Kekeapai dũ gbiati ngbatunga agu ariahe nga ga toro duho furani.

7. Tipagine si aida ani gedi Ziazia Kekeapai ti ni na zaza berãrani?

⁷ Oni gedipai na berãroni ni zazaha. Ziazia Kekeapai nape gupai ape ziazia nga ‘Ziazia Kekeapai dunduko si aye be ga Mbori Toro.’ (2 Tim. 3:16) Kina rengo du ngaha nga, gu kura papara Ziazia Kekeapai kinaho i akehe fu gu kura badona aboro. Si nga ndu gupai si aida ani gedi Ziazia Kekeapai ti ni na berãrani ni zazaha. Kura wirina sa ape gupai nga, “Ho mi ageda Ziazia Kekeapai ni, mi naatingida gupai nga gu kura badungu apai kinaho rengbe mi ka wirikaha rogo gu pai yo re.” Ko agbia kurapai kutini nga, “Ho mi atingida gipai re ni, si na sare mi ini agu apai adunga gbaiga rogoho yo ya.” Mbata fu ani gedi Fugo Mbori, si naida ani sana Yekova rogo kpee yo tipa ko zaki berãrani na ki fu tatamana furani ani rengbe ka bi agu apai ko aida ani wirikihe rogoho.—Eza. 7:10; oni gedi Yakoba 1:5.

8, 9. (a) Ho ani ageda Ziazia Kekeapai ni, gini asanahe si aida ani sana tirani na ni? (b) Gini apai agu apai Yekova aidaha be agu abaakumba nga aKristano apehe furani tipa ko?

⁸ Mo sasanahe. A wa mo nika geda Ziazia Kekeapai, mo di regbo tipa ka ru tooni na ki sana tiro na asanahe wa gere: ‘Ginipai gipai re apehe fere tipa Yekova? Wai du rengbe mi ka mangasunge na gipai re rogo gimi raka yo? Wai du rengbe mi ka mangasunge na gipai re ka undo kura aboro?’ Ho ani aberã ni kurii ngbatunga agi asanahe re, ani nika gbia undo  agbia ti gaani geda Ziazia Kekeapai. Ni kpiapai, mo berẽnga kurii agu apai si aidaha be agu aKristano nga abaakumba. (Oni gedi 1 Timoteo 3:2-7.) Wa vura duhe nga dungu rani nga abaakumba te, ani ima rengba ka berã gupai nga gu papara Ziazia Kekeapai re tipa rani te. Ono tie, ho ani adia regbo ni ka berãkurii agu akaragapai du kuti agu asanahe re, ani nika bi gupai nga si ima rengba ka undo rani ngba dungu agene.

⁹ Ginipai gipai re apehe fere tipa Yekova? Pa fu Yekova agu pai ko aidaha be abaakumba nayugo gupai nga ko na nyanyakipa arugute beko fu agu aboro nangbembatayo rogo apai yo. Ko naida i du ni wene kpiapai, na ko nika sana yo asana tipa wai i amangapai fu dungurati ‘ko angbehe ni kure’ Wiriko. (Amo. 20:28) Yekova naida ani bi tirani abi nga baa rani gu ngbaangba tiibe agu ababanda akandoro namangasunge tiibe ko. (Yes. 32:1, 2) Nibi gipai re, agu apai si aidaha be agu aKristano abaakumba natingida rani na gupai nga Yekova na ngera angerafuo rani.

10, 11. (a) Ho ani ageda agu apai ni si aida abaakumba mangihe, wai du rengbe ani ka mangasunge na agu apai re rogo gaani raka yo? (b) Wai du rengbe ani ka mangasunge na gupai re ka undo kura aboro?

¹⁰ Wai du rengbe mi ka manga gipai re rogo gimi raka yo? Ti gu kura aregbo, si naida bakumba niwisigi tini awisigo nibi agu apai si aidaha beni rogo Ziazia Kekeapai, na ki ningere tipa agu abangiriba si aida ni mangi ariapai rogoho. Gu wirina na “gbata sunge babipai,” si naida ni du na rubangirise tipa agi apai re, mbiko si naida ni mangi agu apai re na ome ni dunduko. (1 Tim. 3:1) Nirengo, aKristano dunduko niima rengba ka wirikipai ti agu apai i na kekehe rogo agu averesi re, mbiko dunguyo namanga agu apai amanga Yekova aidaha aKristano. Ni kpiapai, ani dunduko si aida i du na ruru bipai gbiati ruru berã. (Frp. 4:5; 1 Pet. 4:7) Ho abaakumba aˈasada kadu ni nga ‘kpiapai fu rimbasa akandoro,’ ani ima rengba ka wirika yo na “ki wiriki pa gayo idapase.”—1 Pet. 5:3; Eb. 13:7.

¹¹ Wai du rengbe mi ka mangasunge na gipai re tipa ka undo kura aboro? Ani ima rengba ka mangasunge na agu apai si aidaha be abaakumba tipa ka undo agu aboro du na nyemu rengo watadu aguyo nawirika Ziazia Kekeapai i bi agu apai nakpara agu abaakumba nga aDezire Yekova ti abarumbatayo rogo pambori. Berewe a, ho ani ageda agu apai re ni, ani rengbe ka fura tipa gu ome abaakumba amangaha tipa rani rogo gaani  adungurati. Berã ani kurii gipai re rengbe ka sarani ani irisi “agu yo namanga nyanyaki sunge” dagbarani. (1 Tesa. 5:12) Ka ani du na bakere irisa fu agu ababiapai namangasunge nyanyaki dagbarani, si nika fu ngbarago fuyo.—Eb. 13:17.

12, 13. (a) Ka ani mangisunge na agu aũsunge du berani, gini ngbatunga wetekapai rengbe ani ka mangaha? (b) Oni funga kpiapai tipa wai rengbe ino kura apai tipa gupai ani agedaha narengbe ka yugo kura nduapai ani ainongo ya tipa pai.

¹² Mo Wetekepai. Ka ani mangisunge na agu aũsunge du berani, ani ima rengba ka ngera tipa ngbatunga apai wa gere:

• Da nake gi papara Ziazia Kekeapai re?

• Gini ba i akehe rogoho na ti gini regbo?

• Gini nyanyakipa pai namangi ti gu regbo i ake gi papara Ziazia Kekeapai re ti ni?

Ngbatunga apai wa gure ima rengba ka undo rani ani bi agu apai rengbe ani ka wirikaha ti gupai re nibasa.

¹³ Ni kpiapai, ani bingo Yezekere 14:13, 14, ani nagedapai yo nga: “Ho ringara [amanga] ingapai ni kuti re ni manga pai ni tiandika, mi ki taĩ bere kuti ni, ki kua gaha ariahe ti he ki kedi ngbongi ku ri he, ki rogo aboro na anya ku sa yo, zavura agi akumba biata re adu rogo ho, nga Noa, Daniere, na Eyobo, i aréngba ka batasa kina ungayo tigayo ni gayo ruruapai, wo poi Gbia Mbori.” Ka ani mangi wetekapai, ani ini gupai aino nga i ake gi papara Yezekere re bara rogo gu garã nangia 612 Mbata fu Batikayo Kristo. Bara ti agu regbo re, Noa na Eyobo aima kpiko kama a garã kusayo, na agu apai i amangihe ni ruruyo paha adu kindi bangiri Mbori. Ono Daniere aaraka kindi. Nirengo, si nawira wa garãko aima susa 20 ho Yekova ayani fuko ko niruru ko wa kina Noa na Eyobo. Ginipai ani awirikaha ti gipai re? Yekova nabi gu rurupai abi airisiko amangaha, kodihe na aguyo du kindi ni paranga yo.—Tam. 148:12-14.

14. Wai du agu awaraga i akusaha fu paranga aundo yo, na wai du rengbehe ka undo kura aboro a? (Oni bi gu sura du ti tonatonaha.)

¹⁴ A wa ani nabihe ni wenepai tipa ka wisigo apapara Fugo Mbori naabaha, ani rengbe arengba a ka gbia undo ti gu riahe nga ga toro dunduko du areme furani. Ani bingo bete akpiapai. Agu awaraga du fu paranga aboro. Rogo agu agarã susi, dungu gaani awaraga i akusihe fu paranga aboro. ^[1] I ambakadi bete agu awaraga re tipa si undo yo i sovura kuti agu asoapai du sukuru yo watadu gu i agbiatiyo na ni wa i asona. Wai du rengbe ani dunduko ka gbia undo be ngbatunga agu awaraga re? Ho ani amangaha ni wo, si natingida rani na pa agu apai gaani paranga aboro agbiatiyo na ni. Gure nasarani ani rengbe ka undo yo na ka ngarasa yo a.

15. Tipagine si aida sosono aKristano duadu ti ni na nyemu agu apai i akehe fu paranga aboro?

¹⁵ Anga agu apai i nafura tipaha rogo agu awaraga du fu paranga aboro re amanganga kina yo sa te. Ani dunduko si aida ani songodi gaani idapase, ani zatirani, ani sogo gbegberẽ abakure, na ki ne gbegberẽ aũngbarago. Agi apai re dunduko i naima fura tipaha rogo agu awaraga du fu paranga aboro. Ya mo si naida nyanyaki aKristano bihe nga si arẽnga fuyo i gedi agu awaraga re te? Wagusa te! Wa vura duhe nga i nake agu awaraga re tipa gedaha ngba ti paranga aboro, agu apai du rogoho, mburuhe rii agu arugute nga ga Ziazia Kekeapai na ani dunduko rengbe arengba ka gbia undo be gu riahe nga ga toro re.

16. Gini kurapai gaani awaraga aundo paranga aboro i mangihe?

¹⁶ Kupati undo paranga aboro i sovura kuti gayo akpakarapai, gaani awaraga naundo yo i sono rogo toro yo na ki mbedisi yo na Yekova. (Oni gedi Batungusipai 12:1, 13.) Zavura rogo gi bangiriba re, sosono aKristano rengbe  arengba ka gbia undo. Ni kpiapai, gu Awake! nangia ga Zerekpe 2009 adu na kekeapai rogoho nga “Young People Ask . . . How Can I Make Bible Reading Enjoyable?” Gu kekeapai re adu na dungu aberãpai rogoho kodihe na sanduki rengbe boro arengba ka yeraha na ki moihe rogo gani Ziazia Kekeapai. Ya mo sosono aboro agbia undo ti gu kekeapai re? Kura dee sa nga naagude aya, “Wo mi anaasota na geda Ziazia Kekeapai. Mi amangisunge na gu berãpai i afuhe rogo gu kekeapai re na mi namangasunge na gu paparaha mi ayere he re wenengai. Awere, mi nangera kumbatayo tipa ka geda Ziazia Kekeapai. Mi nabi wai abi agu akitabu nga ga Ziazia Kekeapai afura kina kubanisa. Rago aangbanga tire na geda Ziazia Kekeapai wa gere mbata te.”

17, 18. Wai du rengbe ani ka gbia undo ti geda ani agu awaraga i akehe fu kura aboro? Oni funga kpiapai.

¹⁷ Agu awaraga du fu gu kura aboro. Natona rogo gu garã nangia 2008, ani ima wisigo gu Ngbaõbambu Sinziri du tipa dunguratise, nga gu i akehe fu kina aDezire Yekova. Ono ginipai du tipa gu gaani amagazini du fu gu kura aboro? Ya mo ani rengbe ka gbia undo a ti gedaha? Ani bingo kpiapai. Oni berẽnga gupai nga rogo kura uru sa, mbata fu gumbapai mangi, mo bi gupai nga gu boro mo ayambu ni ima ye ku Bambu Kindo yo. Zanga kapa, mo nadu na ngbarago. Wa bagumbapai nikaa manga gumbapai, si nawira wa mo nikaa berã berã tipa gu gino re. Gure wa ka i ya mo nagia gu gumbapai re fu gu boro re. Ni sangbanaha, mo kuru ba gu gumbapai re na bakere tambuahe tipa gupai i nasakipai tipaha re.

¹⁸ Kina gu bangisapai re rengbe ka manga ho ani ageda agu awaraga ni i akusaha fu kura aboro. Ni kpiapai, gu Ngbaõbambu Sinziri i akusaha tipa tungusapai, si na agu apai rogoho du mburuhe rii Ziazia Kekeapai i akusaha fu agu aboro angianga aDezire Yekova ya tipa i gi rogoho yo. Kina gu bangisapai re du tipa gu kura kekeapai du rogo gaani bangiriba nga jw.org/zne wa gu du tii gu riipai nga “Agu Asanahe Ziazia Kekeapai Akaragapai Kutini” na “Agu Asanahe Aboro Naasanaha Dedede.” Ho ani ageda agu apai re ni, si nakiiso gaani inohe nga ga rengo. Kurigure, ani ima rengba ka gbia vovo gene berewe tipa ka sakapai tipa gaani idapase ho ani atungusapai ni. Wakina gure a, Awake! nangarasa rani nga ndikidi Mbori kina ti ni, na si naundo rani ani ini wai ka songoda gaani idapase.—Oni gedi 1 Petero 3:15.

19. Wai du rengbe ani ka yugo gaani tambuahe fu Yekova tipa agu ariahe nga ga toro?

¹⁹ Si ziazia tie nga, Yekova ima fu bakere riahe tipa ka mbisa gaani “azingo nga ga toro.” (Mt. 5:3, New World Translation of the Holly Scriptures.) Ani mangingo sunge amanga na agu ahe nga ga toro ko nafuhe furani re. Gure nga ani nayugo gaani tambuahe fu Guko nayugopai furani tipa ani gbia undo.—Yes. 48:17.