Ya mo kaza amangingo ro tipa wiri bete regbo? Si ima rengba kadu nga mo ahu ni kina boro wiri ipo na bangiro ki ima go ti wai gu kaza re amangi ro. Ono tie, rungo tipa kpio boro wa gure te. Kura kumba sa du rimoko nga Dr. Alan Wolfelt akepai rogo gako buku yo nga, “Pai ho du nga ‘bangiri boro go’ ti rungo tipa kpio gani boro te.” (Healing a Spouse’s Grieving Heart.) Ono tie, ko ape kurapai nga: “Tingbafuo bete regbo na mbiko gu undo nga ga kura aboro, gu rungo du mo na ni nazereda azereda.”

Ni kpiapai, mo bingo wai gu bakumba nangia Abarayama amangipai ho diako akpi ni. Ziazia Kekeapai naya, “Abarayama ki rimi dimo yo, ki ni kpari ni aume ki nita ngbaduko tipa Sara.” Gu fugo nga “ki ni” nayugo gupai nga si aima dia ko na regbo tipa bangiriko go tipa pakpio diako. * Gu kura kpiapai nga ga Yakobo, i anangi ko nga kere nya ima imo wiriko nangia Yosefa. Ko akpari tipa “dungu arame,” na gako aborokporo arengbanga kafu wasa fuko te. Tingbafuo badungu agarã kusa, ko aarungo kindi tipa pakpio Yosefa.—Bambata Pai 23:2; 37:34, 35; 42:36; 45:28.

Kina gu bangisapai re du areme tipa agu aboro narungo tipa pakpio gayo aboro. Mo bingo agi akpiapai re.

• “Kumbami nga Robert akpi rogo Bamburu 9, 2008. Gu wiso gu béno re amangi rogoho aadunga kia ti gu kura awiso te. Fuo ri ani riahe wiso, a wa ani anaamangaha, dedede, mbata fu ko ndu ku basunge yo, ani nanyora ngbarani ki dungo tirani, na ki ya fu tirani wẽ ‘mi na kpinyemu ro.’ Agarã sita kusa fuo manga gupai re, mi kindi na imisiri. Mi ainongo ho nga bangire ago tipa pakpio Robert te.”—Gail du garãri nga 60.

• “Wa vura duhe nga mi ima raka awere tipa agarã susi 18 zanga diare, mi narungo kindi tipa ri na kini kpari tipa ri a. Ho mi abi guhe ni du ni wenehe, berãre nazubo kina fuori, na mi kini berẽ kina pa wai ka ri nidu na ngbarago ka bi guhe re.”—Etienne du garãko nga 84.

Si tie ziazia nga, gbegberẽpai ho du ti berã ngbatunga agu aberãpai du wa gure te. Boro na boro nakpara kina wai ngbaha ti ni, na si rengbe kadu ni gbegberẽpai ka ani abisirapa gu gene boro amangapai ngbaha kuti pakpio gani boro. Ti kina gu bangisa regbo re a, si naida ani ne biratirani ki susi ome si ki duwa ani du naasa gupai nga gu boro re kpi. Wai du rengbe ani ka diabe gu rungo nga ga pakpio boro?