2. Ngbongi
2. Ngbongi
“Angbongi nikadu.”—MARAKO 13:8.
● Kumba nagbata riahe rogo kura gbaria sa Niger yo. Agumeko ima ye rogo kura papara ringara tipa ka gbata riahe. Ono wa agumeko navura ye, ko pi nisako sande rii ira. Tipagine du ko ti ni nisako? “Ko nisako bambiko ko arengbanga ka riga gako aboro te, na ko arengbanga kaa biyo i nikoba be gomoro te,” gure nga fugo gu bariimbia nga ga gu rago re ko.
GINI APAI NAMANGA ROGO ZEGINO? Rogo zegino dunduko, ka aboro du saba, guni sa nikaa dunga na riahe beni rengbearengba na uru sa ya. Gupai re ima gberã kisusi pavuru Afirika bara ku dioyo. Badungu aboro nara kurii wiri riahe tooni. Ka si du nga kumba na diako na wiriko, ono riahe kidu gbua ba aboro ue ka i rihe i ki mbiki, gini ní nika nye na gomoro? Kumba? Dee? Gure nga gupai ngbatunga agu aboro re naadiaberã tipaha na aʹuru dũ.
GINI BIPAI DU DUNGU ABORO NANI? Sende nakusa bakere riahe akusa fu aboro kisusi. Gupai si aidaha gbua nga ka ino mangasunge nani.
YA MO RENGO DU NGA GIPAI RE? Nirengo, abasopobino nakusa bakere riahe susi gu naanidu mbata. Wa ka si nidu nga irangbii namangasunge wenengai na gu riahe re tipa aboro dunduko nigbiaha agbia, ka gomoro dunga te. Ono tie, i ima asada manga gipai re tipa badungu agarã, ka i arengbanga ka dia gomoro kusayo ya.
GAONI BIPAI NGA GINE SA GIPAI RE? Ya mo sangba gu veresi nga Marako 13:8 nadigo areme? Wa vura duhe nga zegino nasona kumbatayo rogo dungu agene, ya mo aboro narungo areme be gomoro rogo zegino dunduko?
Abazigizo na ngbongi naaye na kura he i ainopa yangara arame ti ni. Si gu gumbayo paha rogo gu papara kekeapai ngbefuo gere.
[Gu sura du ti kpewaraga 5]
“Badungu agu agude nakpiko be kaza-onga, kaza-vuseyo, na gu kura akaza rengbe arengba ka bata wa ka si nidu nga ami narihe ari wenengai.”—ANN M. VENEMAN, NANGIA BANGEREKURII GU MARÃ NGA GA YU-ENI NGA GUDU TIPA NGERAFUO AGUDE.
[Gu sura du ti kpewaraga 5]
© Paul Lowe/Panos Pictures
