Gi gaani kpotosende re ni wenehe tipa aboro raki rogoho. Si na ime rogoho kpaima nga gu du ni wenehe tipa raka. Gu gene sungu zegino ngbaha, na wai si ake, si dunduko du ni bawene tipa ka banda gu kikindigi aime du pati zegino ka si kputanga ya, watadu ka faa wa gbakagbaka ime ya. Gu haurago du ariyo na gu manyeti nga ga kpotosende, si nabandaha be kere faa uru. Si ima iiriwo ka bi wai ahe araka mbiko akuraha auru kpotosende. Ni sangbana gipai re, dungu aboro idi kuti gupai nga ndupai kinaho i mbakadi gi gaani kpotosende re ti ni.—Oni gedi Yesaya 45:18.

Ono mo ima rengba ka bakabangiro nga: ‘Ya mo rungo na iraira mangapai angia papara gu ndupai re?’—Oni gedi Pa Fu Rugute ni Ue he 32:4, 5.

I mbakadi kpotosende si du ni wene kporo fu agu aboro nairisa akurayo na kini kpinyemu Bakusiyo. Sidu, ga aboro raka ima du na paha kuari ti gu nga ga angua watadu anya. Ani ima ino da nga Bakusirani na ani rengbe arengba ka wirika gako nyemuse na rurupai.—Oni gedi Batungusipai 12:13; Mika 6:8.

Bakusirani rengbe arengba ka manga agu apai dunduko ko akpinyemu ka mangaha. Sidu tie, ani na kido nga ko nika nyasariipa arungo na iraira mangapai na ki sa gaani kpotosende asa berewe si du ni wene kporo furani.—Oni gedi Atambuahe 37:11, 29; Yesaya 55:11.