1, 2. (a) Ginipai si aidaha be ga Mbori aboro ho daha ni ti sino mangapai? (b) Gini asanahe gi kekeapai re akaragapai tipaha?

GA YEKOVA toro adu kugii gu mokedi nangia Petero ko kodi pa gu du ziazia du rogo gu kitabu nga Pa Amotumo kuti padu ga aKristano mangapai ni ziaziaha. (Oni gedi 1 Petero 1:14-16.) Yekova “du ni ziazia ko” ko naida mbedimbedi aKristano na “kura akandoro” i mangi ome tipa ka du nabayo ni ziazia yo rogo gayo mangapai, angianga kina bete gayo mangapai ya.—Yo. 10:16.

² Ka ani wisigipai berewe dudunguro tipa gu nyanyakipa apai nga ga toro du rogo gu kitabu nga Pa Amotumo, si nika undo rani ni bakerehe, na ka ani mangi agu apai ani awirikaha rogoho, si nika undo rani gaani mangapai du ni ziaziaha. Ani nika wisigopai tipa agu asanahe du wa: Si naida ani bi mbupa manga rurupai wai? Ginipai Pa Amotumo ayugoho furani tipa bi ga Yekova bakere pagbia na kikiipaha? Ginipai rengbe ani ka wirikaha tipa pa fu amotumo?

3, 4. (a) Tipagine si aidanga aKristano mbupa manga agu andiko na bangua arugute nga ga Ziazia Kekeapai ti ni ya? (b) Tipagine si aidanga ani iribape ti ni watadu ka kpipai ya?

³ Kangia ani naida ka fu ngbarago fu Yekova, ani du wa ka ani songodi gako andiko na gako bangua arugute, zanga du na  gbegberẽ sino mangapai, watadu bipai tipaha. Wa vura duhe nga ani tii ga Moize aNdiko te, agu apai du rogoho naundo rani ani rugutirani na gupai Mbori aida na ni na gu ko asogaha. Ni kpiapai, Mbori azinahe fu aYisaraere ki ya: “Ka oni niíri nga bape watadu kpi pai kuti awiri gaoni aboro ya, ono oni akpí nyemu akuaroni wa oni akpi nyemu tironi: Mi nga Yekova.”—Pa Mot. 19:18.

⁴ Yekova aidanga ani iribape te, na ko aidanga ani kpipai kuti kura aboro a te. (Rom. 12:19) Kangia ani basapa mangasunge na agu andiko re gbiati gu bangua arugute re, Bakitingbanga nika du na ngbarago, na ani nika ye na gbarasarimo kuti Yekova. Ka si vura du nga boro imisi rani, ka ni sanga tirani wa akoro i avura zogaha sande si kini foi kindi ya. Mbori nabi rani ni “agu ahe i ameke he rogo sende yo” du tipa manga gako sunge. (2 Kor. 4:1, 7) Si aidanga ani kpipai kuti akuarani du nga kina agu ahe i amekehe rogo sende yo te mbiko payo a ni nyanyakihe.

5. Ginipai rengbe ani ka wirikaha ti gu pangbanga du tipa Arona na pakpio awiriko? (Oni bi gu sura du ti tonatonaha.)

⁵ Pangbanga rungo tipa Arona na gako aborokporo gu du rogo Pa Amotumo 10:1-11. I aima du na bakere gberãrago ho we aye ni ngbangbaturũ yo na ki riti agu awiriko nangia Nadaba na Abiu ho i amangasunge ni banye yo. Nairiwo wai ga Arona idapase gbiati gu nga ga gako aborokporo adu ni asadi asadihe ho si adu ni nga ka i kparingo kangba agumeyo ya! Ya mo mo ni ziazia ro nibi wai duhe nga ka mo kodinga tiro na agu agumero watadu gu kura aboro i nakusiyo rogo rengo ya?—Oni gedi 1 AKorindo 5:11.

6, 7. (a) Gu regbo mo adiaberã singia daha ada mo ndu tipa rogatise ku kanisa yo, gini nyanyakipa apai si adia mo wisigihe? (Mo bi gu kekeapai du bandu waraga yo.) (b) Wai rengbe ani ka sakapai na agu agumerani angianga aDezire Yekova nibipa gaani diaberã tipa ndu tipa rogatise ku kanisa yo?

⁶ Si rengbe kadu nga ani agbianga tirani na gu ngbatunga asada Arona agbiatiko na ni na gako aborokporo re te. Ono ginipai rengbe ka manga ka si du nga boro yambu rani tipa gu rogatise namanga kanisa yo watadu ani ndu ka undo? Arugute ho rogo Ziazia Kekeapai nafura ngburungburu tipa gipai re te, ono ya mo bangua arugute ho nga ga Ziazia Kekeapai rengbe ka undo rani ani mangi ruru diaberã? *

⁷ Gaani diaberã tipa kadu ni ziazia rani fu Yekova ti regbo ngbatunga apai wa gure ima rengba ka zeresa ngba agu agumerani angianga aDezire Yekova ya. (1 Pet. 4:3, 4) Rengo ngaha nga, ani namanga ome ka zanga ba gberãrago tiyo, ono si adu ni wenehe ka ani fura nayo tipa gupai re. Isoke ani rengbe ka manga gipai mbata fu pai wa gure kuru. Ani rengbe ka tambua yo na ki pe gupai fuyo nga ani na ngbarago wa i nayambu rani ani du pati gi rogatise re. Fuani, ani rengbe ka ya, nibi agu apai nga ga pambori, ka ni ndu koyo, padu ani yo ima rengba ka gbarasapa gayo ngbarago rogo gu uru re na ki fu gberãrago fu agu aboro nika du pati ni. Gere nga gu gene rengbe ani ka zanga mbupa manga rurupai tipa gaani idapase ngbaha.

8. Waigu Pa Amotumo ayugopai tipa ga Yekova bakere pagbia?

⁸ Gu kitabu nga Pa Amotumo fura tipa ga Yekova bakere pagbia. Pa Amotumo fura wa bara 30 nga agu andiko du rogoho Yekova du na kusihe. Moize aima ida kuti gipai re na ki mangi gupai Yekova aaida ko mangihe. (Pa Mot. 8:4, 5) Teketeke a, si naida ani mangi gupai ti aregbo dũ gaani Bakerepa Bakindo nga Yekova aidaha ani mangihe. Ga Mbori riigbu nika undo rani aundo rogo gi bangiriba re. Ono ho du ani ni nisarani,  pai ima rengba ka asada gaani idapase a wa si amangi tipa Yesu ho ko adu ni ngbakungbo yo. (Rk. 4:1-13) Ono ka ani moiberãrani kuti ga Mbori bakere pagbia na kini kido kutiko, boro ho rengbe ka sarani ani mbu manga rurupai na ki zi ti gu gbina nga ga fũru gunde te.—Snz. 29:25.

9. Tipagine aboro asoga ga Yekova aboro ti ni?

⁹ Wangia ani apefuo Kristano na ni ga Yekova aDezire, aboro narungosi rani rogo zegino dunduko. Si naida ani inihe nga gipai re amanga rani amanga mbiko Yesu aya fu gako abawiriki wẽ: “[Aboro afuka] roni sa gberãngbi; ki iimi roni. Rika aboro asóga roni asoga dunduko tipa rimore.” (Mt. 24:9) Ono tie, ho ani agbiatirani ni na ngbatunga agu asogote re, ani nahipai na kini mangi ome tipa ka du ni ziazia rani bangiri Yekova. Tipagine i asoga rani ti ni wa du ani ni ruru rani, ki niraki gigiri raka, na kingia agu aboro-ringara naraka kuti andiko? (Rom. 13:1-7) Si wo mbiko ani sa Yekova ni gaani Bakerepa Bakindo! Ani namanga ziazia asunge sa “fu kinako” na ani ambunga mangapai kuti gako ruru andiko na bangua arugute nga ga Ziazia Kekeapai te.—Mt. 4:10.

10. Ginipai namangi ho kura wirina ambupa gako idapase ni?

¹⁰ Ani a nga “aboro zegino” te. Sidu, ani arimisongo tirani ku rogo agu avura nga ga zegino na agu apai nga ga biri-zogarago te. (Oni gedi Yoane 15:18-21; Yesaya 2:4.) Kura aboro kinaho naima kparatiyo fu Mbori na ki mbupa gayo idapase. Dungu aguyo ima saberã na ki mbakadi gayo pagume na gu Barani du ngbangbaturũ yo. (Tam. 51:17) Bete aguyo asanga gayo berã te. Ni kpiapai, ti regbo gu Ue Vura Nga ga Zegino, abazogo adungura awirina rogo gu ringara nga Hungary bangeyo angia 160 garãyo adu nga 45 na ki moi yo ku rogo bambukiso rogo kura gbata sa. I aya fuyo i mangisunge asekere. Gi ruru awirina re aru nyanyaki, ono aguyo ribua dagbayo azungahe ki di roko asekere. Fuo agarã ue kusa, gu kurako sa abi tiko nga ko gu du dagba agu aboro i nasia yo i imi agu aDezire Yekova nanye ni ruruyo. Unvurako adu kina dagba agu aDezire Yekova re. Ono tie, i aimongo yo te.

11, 12. Gu gene Yekova aya aYisaraere nifu motumo ngbaha, gini rogoyo du fu aKristano areme?

¹¹ Ringbisihe kuti ga Moize aNdiko, si anaaida aYisaraere fu gu motumo du ni kparakparaha. (Pa Mot. 9:1-4, 15-21) Si anaaida ka gbegberẽhe dunga ti gu motumo re ya mbiko si aarukuba ga Yesu rengberengbe motumo. Kurigure, agu amotumo ni basasa i anaafuhe, apai anidu kinaho si anaaida i mangihe. Ni kpiapai, ani bingo gupai si anaaida dee mangihe ho ri nabatika ni. Pa Amotumo 12:6 naya: “Ho rame gari munzere nikaninyasi ni, tipa kumbagude watadu tipa degude, ri aniye na wiri kandoro du garãru sa tipa zozo motumo, na paranga gbungu watadu mbipo tipa motumo ingapai fu boromotumo ku ngbadimo bamburoko dungurati yo.” Apai adu kinaho Mbori anaaidaha beyo, ono gako ruru bipai anidu ni yuguyuguhe rogo aNdiko. Ka si dunga nagude aarengbanga ka ye na kandoro te, ri anirengbe ka ye na mbipo watadu gbungu kubaha. (Pa Mot. 12:8) Wa gu irisi Yekova re anivura du ni rungorungo ni, Yekova anaabi ni na kikiipa ni na kini kpinyemu ni kina wai ko aabi agu aboro nanaafu nyanyakipa motumo. Ginipai rengbe ani ka wirikaha be gipai re?

¹² Gu mokedi nangia Pauro azungodi akurako aidipase i fu “motumo tambuahe” fu Mbori. (Eb. 13:15) Si naida mirãrani tambua ziazia rimo Yekova atambua gbaiga. Agu awirinarani nga airangbiängä i namangasunge na fugo nibee tipa ka taasarimo Mbori. Agu awirina adunga gene beyo tipa ka ta ya, i natungusapai rogo keka awaraga, terefuni, gbiati tungusapai fu agu aboro  naye kaa biyo. Si naida gu motumo tambuahe ani afuhe fu Yekova, wai ani ayugo rimoko fu aboro, na wai ani atakapandepa wene pangbanga ndu sa na agu apai du tipa kpotorani gbiati omerani. Ani fu kina guhe ngba gbe fuko.—Rom. 12:1; 2 Tim. 2:15.

13. Tipagine si aida ani fu gaani fũo sunge nga ga tungusapai ti ni?

¹³ Gu gaani motumo tambuahe ani afuhe fu Mbori nga agu apai kina rani naidi ka mangaha mbiko ani nakpinyemu ko. (Mt. 22:37, 38) Si naida ani fu gaani fũo sunge nga ga tungusapai. Gini bipai si aida ani du na ni tipa gi mbakadapai re? Gu fũo sunge ani afuhe na adiwi dunduko si ni kodikodihe kuti gaani kakuti sinombori. (2 Pet. 1:7) Rengo ngaha nga, si aidanga boro zi rani ngbaome tipa ani tungusipai ni bakerehe ka gbia dungu asa si du nga ani mangisunge ni bakerehe te. Si du nga ndu gupai duhe ti ni nga agu awirina nawoka du rogo agu akporo nga ga aborokaza, i rengbe kafu aminiti 15 kuba saa sa. Yekova nabi agu aminiti re na kikiipaha wakina gu gani motumo ngbaangba gbe, na gure nayugopa gu nyemuse du ni na ni tipa ko gbiati gu momu nga ga du ni gako Dezire. A wa si adu tipa agu aYisaraere gene aadunga beyo i nifu kikiipa amotumo ya, gu ga Yekova amoyambu du na ­adingisoro rengbe arengba ka fu gayo fũo sunge. Gu fũo sunge ani afuhe ni basasa re, si du i amaaha rogo gu fũo sunge nga ga zegino dunduko, na si naundo riigbu si rengbe ka ino gupai si aida si mangihe tipa tungusapa Kindo ku mbatayo. Sidu tie, ya mo gbegberẽpai ngaha ho i asana rani nga ani fu gu fũo sunge mangi ani he?

14. Mo sakingo pai tipa ndu gupai si aida ani wisigi gaani wisigopai nisase ti ni.

¹⁴ Fuo wisigo ani gu wene apai du rogo gu kitabu nga Pa Amotumo re, mo ima rengba ka tona berã nga, ‘Mi ima du na bete inohe tipa ndu gupai i arimisi gi kitabu re ti ni ku rogo Fugo Mbori gako toro adu kugiipa kehe.’ (2 Tim. 3:16) Mo ima rengba ka diaberã awere nga mo naida kadu ziazia, angianga kango gupai nga Yekova naida ani du wo ya ono mbiko mo naida ka manga ome ka fu ngbarago fuko. Si rengbe kadu nga gupai mo nawirikihe tipa Pa Amotumo re rogo gi kekeapai du ue re ima undo ro mo asadi ka wisigopai dudunguro rogo Ziazia Kekeapai. (Oni gedi Asanza 2:1-5.) Mo kpari fu Mbori na ki wisigi gu gene mo awisigopai ngbaha. Nirengo, mo naida rago ngbaangba ti Yekova na gamo motumo tambuahe. Ya mo mo bi gupai nga mo mbu terevizioni, avidio, ambaro, gbiati kura apai si gbe berãro kusayo na ki gbarasipa gamo apai nga ga toro? Kangia wo duhe, si adu ni wenepai mo berẽkurii agu afugo gu mokedi nangia ­Pauro du ni kekehe rogo gu kitabu nga AEbere.

15, 16. Tipagine Pauro afura ti ni kpadio fu agu aKristano nangia aEbere?

¹⁵ Pauro afura kpadio baraho ko aafura ni fu agu aKristano nangia aEbere. (Oni gedi AEbere 5:7, 11-14.) Gu mokedi re aanõfanga yo na afugoko te. Ko ape gupai fuyo nga ‘tuyo ni mumungoho.’ Tipagine Pauro ape gipa re ti ni fuyo? Ko aasada ka yugo gu  nyemuse Yekova adu na ni tipa agu aKristano naaida kadu na ngbarangbara inohe gbua rogo Ziazia Kekeapai. Si ngbaangba boro ini gu nyanyakipa ayugopai nga ga aKristano. Ono tie, si naida Kristano ri “nyanyaki riahe” ari ka ni aida ka sonakumbatayo rogo toro yo.

¹⁶ Kuba gupai nga agu aKristano re nyaki rogo toro yo na ki tona ka yugopai fu kura aboro, si aida kura boro yugupai ayugo fuyo. Tipagine? Mbiko i ambu ri “nyanyaki riahe.” Mo sananga tiro nga: ‘Ya mo gimi bipai tipa gu nyanyaki riahe nga ga toro ni wenehe? Ya mo mi naarihe? Ya mo mi nagunde be kpara fu Mbori na wisigopai nisare dudunguro? Kangia wo duhe, ya mo gu gene mi awisigopai nisase ngbaha naye na gipai re?’ Anga gaani sunge gbua nga ka tungusapai fu aboro te ono ka yugopai fuyo na ka sayo ni abawiriki.—Mt. 28:19, 20.

17, 18. (a) Tipagine si aida ani ri gu nyanyaki riahe nga ga toro ti ni dedede? (b) Gini bipai si aida si du tirani tipa mbirabuda nibipa agu adunguratise nga ga aKristano?

¹⁷ Taatapai ngaha fu agurani tipa ka wisigo Ziazia Kekeapai nisase te. Rengo ngaha nga, Yekova angarasa nga gako aboro tipa i wisigipai nisayo ka bi tiyo nga i ima manga gbegberẽpai te. Wa vura duhe wo, ka si vurangia ani aima kpara gaani raka fu Yekova tipa dungu agarã watadu tipa bete regbo, si naida ani nindu andu ku mbatayo kindi nari gu nyanyaki riahe nga ga toro. Manga ani he wo na nyanyakipa ha ka ani aida ka du ni ziazia rani.

¹⁸ Ka ani aida ka du ni ziazia rani, ani du wa ka ani wisigi Ziazia Kekeapai sirisiri na kini mangi gupai Mbori aida ani mangihe. Ani bingo gupai naadu tipa agu awiri Arona nangia Nadaba na Abiu Mbori aimiyo tipa fuyo “kungba we ku bangiri” ko mbiko i akpibuda. (Pa Mot. 10:1, 2) Oni kparia gupai Yekova apehe fu Arona. (Oni gedi Pa Amotumo 10:8-11.) Ya mo gu pangbanga re nayugo gupai nga si aidanga ani mbiri buda mbata fu ani ndu tipa dunguratise nga ga aKristano te? Oni berẽnga kurii gipai re: Ani tii ga Moize aNdiko te. (Rom. 10:4) Rogo gu kura aringara, kura awirinarani nambira buda rengbe arengba ti regbo riahe mbata fu i ndu tipa adunguratise. Ti regbo Tingida Pakpio Yesu, i amangisunge na akopo biama nga ga imekakue. Ho Yesu asigira Tingida Pakpioko ni, ko afu imekakue fu gako amokedi i mbirihe mbiko si aarukuba kureko. (Mt. 26:27) Ziazia Kekeapai nasoga bakere mbira buda na kpibuda. (1 Kor. 6:10; 1 Tim. 3:8) Na sangbakpoto kura aKristano yo aidanga ha fuyo i nimbiri buda mbata fu tungusa yo pai te. Ono tie, apai tipa aringara ni bakiakia, ono gupai nyakipaha fu aKristano nga i ini gu kparakparapai du “dagba gu he du ni birikobiriko he na gu du ni gigiri he” tipa ka mangapai ni ziaziaha bangiri Mbori wa ka rago ngbatiko.

19. (a) Ginipai si aida ani moihe ku berãrani yo ho daha ni ti gu irisombori nga ga aborokporo gbiati wisigopai nisase? (b) Ginipai di oni berã ka mangaha nibipa du oni ziazia?

¹⁹ Ka ani wisigipai dudunguro rogo Fugo Mbori yo, ani ini dungu wene apai aino nga ga toro. Oni mangisunge na agu aũ wetekapai duho tipa gaoni irisombori nga ga aborokporo gbiati wisigopai nisase. Oni kiisi gaoni inohe tipa Yekova na tipa gako ringbisapai. Oni mbedi na ko susi gu nidu mbata. (Yak. 4:8) Oni kpari fu Mbori wa gu bake papara Atambuahe akpari ki ya: “Mo zá bangire mi bi iiriwo apai rogo ga rugute.” (Tam. 119:18) Ka oni mbunga manga agu andiko nga ga Ziazia Kekeapai na gaha bangua arugute ya. Oni di agu andiko nga ga Yekova “du ni ziazia ko” kugume, na oni kini tungusi “ga Mbori wene pangbanga” kakaka. (1 Pet. 1:15; Rom. 15:16) Oni du ni ziazia roni rogo gi kere regbo nga ga yangara arame re. Ani dunduko du nga adu ni ziazia rani rogo gaani mangapai yo tipa wa ka ani ruho ka songoda ga Yekova Mbori bakere pagbia du ni ziazia ko.