1, 2. (a) Tipagine aYisaraere 24,000 azanga gu wene momu ti ni naadu fuyo? (b) Tipagine du gupai namangi yo re ti ni na nyanyaki paha furani?

NGBUTUKO mbata fu aYisaraere rimi ku rogo Ringara Mokido, dungu akumba amangi “bari na awiri aMoabo nga ade.” Ni sangbana gipai re, Yekova aimi yo nga 24,000. Oni bingo kina gupai nga aYisaraere aima mbeda ku rogo gu rago i aima digo ni pidi ka diaha, si ki vura du wo, i azanga gu wene maku re mbiko tiyo ku rogo asada.​—Geda 25:1-5, 9.

² Gi kerepai namangiyo re, i akehe ‘tipa za rani, nga agurani ye digida rago ku auru’ rani. (1 Kor. 10:6-11) Rogo gi papara “kusa rago” re, ga Mbori amoyambu ima mbeda ka rimo ku rogo vovo zegino. (2 Tim. 3:1; 2 Pet. 3:13) Si ni pa rungo tie nga, kura ga Yekova amoyambu kinaho sangbakpotoyo yo amanganga sunge berewe ya. I ima zio ti gu gbina nga ga wasiwasi mangapai na ki gbiatiyo na gbegberẽ sangbanaha. Ngbatunga agi aboro re nagbarasapa gu wene maku nga ga nyenye unga ka ini gbiaha.

3. Tipagine arogotise aida ti ni Yekova ruguyo na kini bandayo? (Oni bi gu sura du ti tonatonaha.)

³ Mbiko gu wasiwasi mangapai du areme, akumbakuadee  na dereakumba naida na ga Yekova arugute gbiati bandahe tipa wa ka gu gayo ome i amangaha ka banda gayo ramukporo du ni wenehe. (Oni gedi Atambuahe 127:1.) Ani nika sakapai tipa wai rengbe arogatise ka nyakasa gayo ramukporo ni banda yo ngbaduyo yo, mbeda na Mbori, vo vovo borose, du na wene fugodagbase, na ka i kanga fu tiyo ya.

4. Ginipai nasa gu kura aKristano i rimisi tiyo ku rogo gbegberẽ mangapai?

⁴ Rogo gini gene duhe taata fu Kristano ni rimisi tiní ku rogo wasiwasi mangapai? Rimisotise ku rogo wasiwasi mangapai naenga dedede rogo ngera yo. Yesu aya: “Gu ni nangana de ni nyemu ri ni ima manga bari na ri kpotoni yo.” (Mt. 5:27, 28; 2 Pet. 2:14) Gu dungu aKristano narimiso tiyo ku rogo gbegberẽ mangapai natona rungburasi sangbakpotoyo yo nibiyo agu ahe nazingisa nyemu kodaba, gedapai tipaha, watadu bihe rogo kura abangiriaba nga ga Internet. Aguyo nabi agu avidio du na kodaba rogoho, ndu kuba ambaro yo, watadu agu ambakadapai nga ga terevizioni. Aguyo kini ndu ku kporo agbere yo yuru, ku pati gu aboro adoho ni kundiriyo, watadu agu aba i zapada boro rogoho ka zingisa ni roko yo.

5. Tipagine si aida ani banda ngbaduraniyo ti ni?

⁵ Gu kura aboro nati ku rogo aˈasada mbiko i nadia regbo na gu boro angianga gayo badiarogatise ya. Rogo gi zegino adunga aboro na zatise rogoho re ya, na aboro agbia ngbarago be wasiwasi mangapai, si taata tipa ngbadu boroyo nangi ni ni tona ka kpinyemu gu boro angianga gani badiarogatise ya. (Oni gedi Yeremaya 17:9, 10.) Yesu aya: “Kpoto yo gbegberẽ aberã niye ni, nga pa imoboro, na pa bari, na meteka.”​—Mt. 15:19.

6, 7. (a) Kpotoboro yo rengbe ka nanga ni ni ti ku rogo gini ingapai? (b) Wai rengbe arogotise ka bandatiyo ti manga gbegberẽpai?

⁶ Bara sa kindi gbegberẽ nyemupai nazi baha ku kpoto kumba na dee angianga gani badiarogatise ya, si taata i tona kaa fura tipa agu apai si aida i ni pekehe na kina gayo badiarogatise. Fuo gure, i natona kaa gbata amomu tipa kaa sungo kina sa na kini mangi tiyo nga anga i du nzunzu naida ka sungo wo te, na kini mangi gipai re dedede. Wa gi gbegberẽ nyemupai du tiyo re nikaa sona, i adunga na gene ka bandatiyo rogo toro yo te. Ka gu gbegberẽ nyemupai re moipai tiyo, si nadu ni kpakarapai tipa i rugusihe, ka i vura ino gupai vurũ nga i namanga gbegberẽpai.​—Snz. 7:21, 22.

⁷ Bangiriyo natona go ti gu ga Yekova arugute du tipa ruru mangapai yeeyee, wa gu gbegberẽ nyemupai re nika tona kaa sona, i ki tona ka zio beyo, nyora-ngbayo, nofoda tiyo, zapada tiyo, gbiati gu kura mangapai nazingisa nyemu kodaba, nga gu si aida i mangihe na kina gayo badiarogatise sa. Ni yangaraha, ‘gu nyemuhe nagbe yo nga ga borose na ki nangi yo.’ Ho gu nyemuhe re amaapai ni, “si ki vungu ingapai,” nga wasiwasi kodaba. (Yak. 1:14, 15) Nairiwo gu riko gbegberẽpai re! Agu apai re dunduko, i aima rengba ka nehe ka i ambu Yekova ko ruguyo i nibiyo rogatise niˈiriirihe. Ono rogo gini gene?

8. Wai wene pagume na Yekova abanda arogotise ka i tinga ku rogo ingapai ya?

⁸ Oni gedi Atambuahe 97:10. Wene pagume na Yekova na nyanyaki paha ka ani  aida ka bandatirani. Wa ani kaa wirikapai tipa ga Mbori wene asino na kini mangi ome tipa ka ‘wírika Mbori wa du ani ni awiri manguse, ani ki nita rogo nyemuse yo,’ ani nika du ni nyanyaki rani tipa ka sovura kuti “bari, na pa meteka dũ.” (Ef. 5:1-4) Pa ino arogotise gupai nga “airameteka na airabari Mbori asapa ngbanga yo asapa,” nasayo i mangi ome tipa gayo rogatise du ni gigirihe zanga biriko.​—Eb. 13:4.

9. (a) Wai Yosefa abanda tiko be asada? (b) Ginipai rengbe ani ka wirikaha ti ga Yosefa kpiapai?

⁹ Kura ga Mbori ruru amoyambu namaa tiyo rogo toro yo ngbapai mbiko kodatiyo na gu gayo abadiasunge angianga aDezire Yekova ya fuo nyasa sunge. Zavura ti regbo sunge, aˈasada ima rengba ka kura. Gu wene paranga nangia Yosefa, ba gako sunge yo du ko aye ka ino gupai ni nga dia bairako nakpinyemuko. Aˈuru dunduko ri anaasada ka zomia ko. Ni yangaraha, ‘ri azi ko ti gako roko, ki ya, “Mo rá na mi.”’ Ono Yosefa amangi ome na ki oro beri. Ginihe naundo Yosefa ko banda tiko rogo toro yo ti ngbatunga regbo asada wa gure? Gako diaberã du naadu nga ko aaidanga ka gberesa gako pagume na Mbori te, na si du naasa gupai nga ko du ni gigiri ko na ni ruruko fu Mbori. Ni sangbana gipai re, ko azanga gako sunge na i ki kisi ko ku bambukiso yo zanga nduhe, ono Yekova ki fu maku fuko. (Bam. P. 39:1-12; 41:38-43) Singia basunge yo watadu rogo gu ba du ni kparakparaha, si naida aKristano bandatiyo ti zio bakure na gu boro angianga gayo badiarogatise ya.

10. Ginipai vovo borose aundo rani ani bandaha?

¹⁰ Wa duhe nga vovo borose gu du “ku sangba Mbori yo na rurupai na ziaziapai nga ga rengo,” si ni nyanyaki paha fu arogotise mbiko si nabanda yo rogo toro yo. (Ef. 4:24) Agu aboro navo gi vovo borose re i ‘naimo apa kpotoyo nga pa bari, na meteka, na gbagaura, na kpinyemu gbegberẽ apai, na kpihe.’ (Oni gedi AKorosaio 3:5, 6.) Gu fugo nga ka ‘imo’ nayugo gupai nga si naida ani mangi ome nyanyaki tipa ka sovura kuti gbegberẽ nyemuapai. Si naida ani ne agu apai dunduko rengbe ka zingisa nyemu kodaba tirani kuti gu boro angianga gaani badiarogatise ya. (Eyo. 31:1) Wa ani afu gaani raka ka manga gupai Mbori akpinyemuhe, si naida ani “né gu pai ane nga gbegberẽpai” na ki ‘zí tirani kuti gupai ngbaangba.’​—Rom. 12:2, 9.

11. Wai rengbe vovo borose ka nyakasa rogatise?

¹¹ Gu vovo borose re nayugo “kpia gu ko nafu” he nga Yekova. (Koro. 3:10) Nangba wai kumbakudee na diakumba narengbe ka gbia amaku ka i banda tiyo ti gbegberẽ apai na ki “úkadi ngbadu inapai, na weneringise, na umbasitise, na zera, na gbanga hipai”! (Koro. 3:12) I nadu a na kodatise rogo gayo ramukporo ho i ambu ‘ga Kristo zereda ni si zogo kpotoyo yo.’ (Koro. 3:15) Nairiwo wai ngbaha tipa arogotise du na “gu nyemuse nga ga awirina”! I na ngbarago ka ‘maa kina akurayo mbatayo’ ka yugo “irisa” fuyo.​—Rom. 12:10.

12. Gini sino oni nabihe nga si ni nyanyaki paha tipa ramukporo du na ngbarago?

¹² Ho i asana Sid ni tipa gu sino na nyakasi gayo rogatise, ko aya: “Nyemuse nga gu sino ani naamanga ome dedede tipa ka du na ni. Na ani abihe a nga si ni nyanyakipa pai kadu na zera.” Diako nga Sonja agbia kurapai kutini nga: “Mangapase a nga nyanyakipa sino. Na  ani naasada kadu na umbasitise a, wa vura duhe vurũ nga si naadunga dedede taata te.”

13. Ginipai nasa rogatise si du ni nyanyakihe, na tipagine?

¹³ Nirengo, fura na nunga rogoho nga gu banguapai rengbe ka sa rogatise si du wenengai. Si adu ni pa rungo ka arogotise afura dagbayo zanga irisa susi wai i naafura fu kungbo boro watadu fu nya. Ho arogotise amangapai ni “na zinga, na erã, na paa, [na] gbegberẽ fugo,” i nagbarasapa nyaka gayo ramukporo. (Ef. 4:31) Kuba gupai nga i naabisirapa gayo badiarogatise watadu kaa peka gbegberẽ afugo fuyo, si naida i nisongodi gayo pagume na wenewene afugo, mangapase, na kini fura na nunga.​—Ef. 4:32.

14. Gini mangapai si aida ani nehe?

¹⁴ Ziazia Kekeapai naya “rago onga kii” kina ti ni. (Batu. 3:7) Ono gure ayugongo gupai nga si naida boro niongo ku ngba kurani te mbiko si rengbe ka gbarasapa fugodagbase. Diakumba sa Germani yo aya: “Ti gu ngbatunga aregbo re, onga ku ngba badiarogatise ima rengba ka imisa ni.” Ono tie, ri agbia kurapai nga: “Ka si vura du nga si taata tipa boro hipai ti gu regbo du ni ni fudifudi ni te, si angbanga kafu tise sa zinga ho foi apai ni te. Mo rengbe ka pe gupai watadu ka manga gupai gbakirigbakiri naka bagberarago ti ga badiarogatise na ki gberesi apai kina ku mbatayo.” Wa regbo naka susa, si aidanga kumbakudee na diako ni mbakadi gayo akpakarapai na papaya watadu ka onga zanga fura dagba tiyo te. Kuba gure, i nanyakasa gayo ramukporo ni zanga yo mbu zanga giatise ka si da nga ni sinoyo na ki sayo ina tikango ati kindi tipa apai ya.

15. Wai rengbe wene fugodagbase ka nyakasa ramukporo?

¹⁵ Ramukporo nanyaka ho arogotise adia regbo ni tipa kaa peka gayo aberãpai dagbayo na agu abipai du yo na ni. Gu  gene ani apepai ngbaha si na nyanyaki paha wakina gupai ani apehe. Sidu tie, ho du kpakarapai ni, si naida boro mangipai ome ka pe gupai du na nunga rogoho rogo woro fugo ni yo. Rogo gi gene re, mo nasaha taata fu gamu badiarogatise ni degetuni foro. (Oni gedi AKorosaio 4:6.) Kumbakudee gbiati diakumba rengbe ka nyakasa gayo ramukporo na wene fugodagbase ni peka yo “kina ngbatunga gu pai ngba angba sa nyakasa ho zingoho nidu ni” fu gayo badiarogatise.​—Ef. 4:29.

16, 17. Tipagine duhe ti ni ni nyanyakipa pai fu arogotise i ni berẽpa agu apai gayo badiarogatise aidaha?

¹⁶ Arogotise rengbe ka nyakasa gayo ramukporo berewe ka i aberãpa gupai ngba ti gayo badiarogatise, nga maa agu apai ni aidaha mbata fu gani. (Frp. 2:3, 4) Si naida i rugutiyo na pa agu apai du tipa yo rogo nunga yo na gayo nyemupai nga ga kodaba.​—Oni gedi 1 AKorindo 7:3, 4.

¹⁷ Si nafu kina gberãrago nga, kura dereakumba kinaho aidanga ka yugo nyemuse ka kodaba na gayo abadiarogatise ya, si kini sa gupai nga kura akumba nimangi apai ngbaome. Ziazia Kekeapai naya: “Kina a wo akumba, oni rá kporo na yo na rugatinapai.” (1 Pet. 3:7) Si naida kumbakudee rugu tiní na gupai nga ramukporo nga kina kodaba te. Ramukporo rengbe ka ngba ti dee ka si du nga kumbari nayugo nyemuse furi angianga kina ti regbo kodaba sa ya. Ho kumba na diako ayugo nyemuse ni dagbatiyo, si nika sayo i niringbisi gu nyemuapai gayo badiarogatise aidaha.

18. Wai rengbe kumba na diako ka nyakasa gayo ramukporo?

¹⁸ Wa vura duhe nga si naida arogotise du ni ruru yo fu gayo badiarogatise, zanga yugo nunga fu gayo badiarogatise rengbe ka sani ni gbata gu boro rengbe ka yugoho funi. (Snz. 5:18; Batu. 9:9) Sidu tie, Ziazia Kekeapai nazungodi arogotise nga: “Ka gu ni ka nga fu gu ni ya, kina gu oni ka ida ha dagbaroni.” Tipagine? “Satana ka asada roni mbiko gaoni zanga rugatise.” (1 Kor. 7:5) Nairiwo gu gbegberẽpai kangiaha ka si du nga arogotise mbu Satana ko mangisunge na gayo “zanga rugatise” i ti ku rogo asada nga ga bäri. Ho rogotise ‘agbáta nga gani [kina guhe ngba tini] ya, ono gu ngba fu kurani,’ na kini kodiba na gani badiarogatise mbiko nyemuse angianga mbiko gupai si aida ni mangihe ya, gu gayo nyemuse re nanyakasa gayo ramukporo.​—1 Kor. 10:24.

19. Ginipai si aida ani diberã tipa ka mangaha, na tipagine?

¹⁹ Ani ima mbeda ka rimo ku rogo vovo zegino. Gere nga ndu gupai rengbe gu nyemupai nga ga borose kadu ti ni furani ni gbegberẽhe a wa si adu fu agu aYisaraere naadu nga 24,000 nakpi rogo gu Kpasakpasarago Nga ga Moaba. Fuo Fugo Mbori sakipai tipa gupai namangi, si nazahe niya: “Gu ni naberã ha ya ni ru, ni bánda tini, ni ka ti.” (1 Kor. 10:12) Sidu, si adu ni wenepai ka ani nyakasi gaani rogatise ni nye ani ni ruru rani fu gu Barani du ngbangbaturũ yo na fu gaani abadiarogatise. (Mt. 19:5, 6) Si naida oni mangi ome awere kisusi gu nidu mbata “nifú tironi nyanyaki ya i bi roni zezeredi, ka wiri biriko he adú nga ti roni barangba ko na sirõ a ya.”​—2 Pet. 3:13, 14.