Ya mo Mbori nika mbu aboro ambu i ni zogo akurayo na ki nimoi ga akurayo raka ngbapai ku mbatayo? Oó, a wa bi anihe, ko nika nyasariipa agu arungo gbegberẽ zogarago naye na ni tipa dungu kama agarã. Bakusi-aboro gbiati kpotosende naida aida mo ini gupai nga regbo ima mbeda tipa ko mangipai. Wai du ko na yugupa gu nyanyakipa pai re?

Oni bingo gi kpiapai re: Ho mo andu nunguro ni na tarambiri, mo rengbe ka bi gbakigbaki kpiarago, na gu kekeapai nayugo bara rago. Wa mo nikaa ndu kini bi agu arago nawira gu gbakigbaki kpiarago du bero, mo nadu na kido nga mo ima mbeda ku rogo gu ba mo andu ku rogoho. Wakina gure a, Mbori ima fu Fugoko furani nga gu naringbisapa gu sino raka nika du ti aboro rogo zegino dũ. Ho ani kaa bi gu nyanyakipa pai re si nimangi, ani ini gupai nga ani ti gu regbo nandu kuti digido zegino.

Ziazia Kekeapai naya zegino nika dati nyanyakipa regbo naadunga mbata ya nga gu nika nyasa ti digido zegino. Ti gu regbo re, dungu apai nika manga rogo zegino nga gu naamanganga mbata rogo ga aboro raka yo ya. Oni makianga pa bete agu apai furayo tipaha rogo Fugo Mbori yo.

1. WAAWAA ROGO ZEGINO DŨ Gu sangbanebi du rogo Matayo kapita 24 natangara agu apai nika manga auru kpotosende nga agu apai i aino apai ti ni. Agu apai i aino pa apai ti ni re nika yugopa “regbo digiso agu apai nga ga zegino” na si nika ndu kuti gu regbo zegino nika ‘diga’ ti ni. (Veresi 3, 14) Agi apai re nakoda bakere avura, zingo riahe, abazigizo rogo aba ni bakiakia, sona kuoandiko kina ku mbatayo, zanga nyemuse, gbiati biriki nga ga abarumbatayo rogo pambori ka nanga aboro. (Veresi 6-26) Rengo ngaha nga, bete agi apai re aima digo ni mangi tipa dungu akama agarã. Ono tie, wa digido zegino ambeda, agi apai re dũ nika manga kina ti gu ngisa regbo hi be totoroto re. Si nakoda gu kura akpiapai biata nga ga zahe.

2. ASINO ABORO Ziazia Kekeapai naya gu ‘kusa arago’ nga ga gu regbo nandu kuti digido zegino re, sino aboro nika gberã kina ku mbatayo. Ani nagedaha nga: “Aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise, i akpí nyemu sangba borose susi nyemu Mbori.” (2 Timoteo 3:1-4) Nirengo, zanga irisa tipa kura aboro nga vovopai te, ono kina ti ‘kusa arago’ si adu nga gu sino re nika maapai ni bakerehe si ki rẽarẽ i ringbisipa gu regbo re nga ‘gbegberẽ arago.’ Ya mo oni abingo gi gbegberẽ apai re rogo sino aboro yo te?

3. ABORO NAGBARASA KPOTOSENDE Ziazia Kekeapai naya Mbori nika “gbarasa agu yo nagbarasa kpotosende.” (Yugoti 11:18) Ngba gini gene du si adunga aboro nika gbarasa kpotosende? I aringbisipa gu regbo Noa aaraka ti ni wakina gure nga: “Kpotosende ki gberẽ agberã bangiri Mbori, kpotosende ki hi be bakere zuu. Mbori ki bi kpotosende, mo ngére, si agberẽ agberã.” Mbori ki ya tipa gu gbegberẽ rikaaboro re wẽ: “Mi aba tungayo.” (Bambata Pai 6:11-13) Ya mo oni bi gu goapai nayugoho nga zegino ima hi be zuu? Kurigure, aboro ima gberã awere kisusi wai i adu mbata: I ima rengba ka gbarasa kpotosende na agu aboro du rogoho dũ. I na bakere abundu beyo. Na i nagbarasa kpotosende berewe ngba kura gene. Agu ahe nasongoda raka auru kpotosende wa gu wege ani agbidaha, anya na angua, na bariwara-ime nagberã yeye mbiko zanga manga aboro sunge na ni ngba wene gene.

Mo sananga tiro nga, ‘agarã wa kama sa kusayo, ya mo aboro adu na ome beyo tipa ka gbarasapa ahe dũ kusayo?’ Ono awere aboro gu duadu na gu ome re na i nambakada kere abundu na kini gbarasipa kpotosende  na ni. Aboro nasona ku mbatayo niʹipo rogo birĩ-mangaahe yo, ono si nawira wa gu sangbanapai agu ahe re aye na ni ima siro beyo. Ono tie, anga aboro du nika diaberã tipa gupai du tipa kpotosende ku mbatayo te. Mbata fu i gbarasipa rakirakiahe auru kpotosende dũ, Mbori nika gbarasa agu aboro nagbarasa kpotosende. Gure nga gako kidohe!

4. TUNGUSAPAI ROGO ZEGINO DŨ I fura tipa gu kurapai ku mbatayo nayugopa digido zegino nga pa gu bakere sunge nika manga niya: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Si adunga gi tua nga ga tungusapai re nika du kia ti gu sunge takapande pambori badungu apambori aima digo nimangihe tipa akama agarã. Ti yangara arame, pangbanga kinaho sa i nika nyakasapaha, nga “gi wene pangbanga nga ga ngbi re.” Ya mo mo iningo pa gu pambori nanyakasapa gu pangbanga re? Na ka si vura dunga kura aboro namanga tiyo nga i natungusaha, ya mo i natungusaha rogo bangisa dagbarago sa, watadu i nagbandaka gi wene pangbanga re “rogo zegino dunduko mbiko ndika fu arikaaboro dũ”?

Gu Bangiriba nga ga internet nga www.dan124.com nagbeberã kuti “gi wene pangbanga nga ga ngbi re.” Gu bangiriba re na awaraga rogoho nasaka rogo gu pangbanga re rogo afugo naima susa 700. Ya mo mo iningo pa gu kura adiandue i namangihe nanyakasapa gu wene pangbanga nga ga Kindo rogo zegino dũ? Mbata fu aboro tona ka mangasunge na internet, aboro aima ino aDezire Yekova mbiko gu ome i aamangaha ka gbandaka gu wene pangbanga nga ga ga Mbori Kindo. Naatona rogo gu garã nangia 1939, kpoto agu amagazini dunduko nga Ngbaõbambu Sinziri na gu kekepai ti ni nga “Natakapande ga Yekova Kindo.” Kura buku sa nafura tipa apambori aya gu sunge tungusapai nga ga aDezire Yekova “ka i ringbisinga gu ome duhe na ni na wai duhe rogo arago dũ na kura he te.” Gi manga dezirepai re nanyakasapa gu wene pangbanga nga barambeda gi zegino re nika diga “adiga” vurube gu mangapai nga ga ga Mbori Kindo.

Ya mo mo bi gupai nga agu azahe biama du rogo Ziazia Kekeapai ani nafura tipaha rogo gi kekeapai re namanga ziazia ti gu regbo mo araka ti ni? Tipa agarã naima susa kama sa, gi magazini re aima digo ni undo agu aboro nagedaha i ini gupai nitiyo nga ani nambeda na digido zegino. Nirengo, agu aboro nabisirapa Ziazia Kekeapai nati kina kango, i naya agu arengo du tipa agu apai namanga na agu anamba naringbisapa apai, si nafura kina tipa gu gbegberẽ apai  namanga, na i ima rengba ka iiriwosi he. I nape gupai a nga pa bi aboro agu apai namanga rogo zegino na kini gihe, nangera wa zegino nagberã kina ku mbatayo. Wa vura duhe wo, goapai nayugoho nga ani nambeda kuti gu digido regbo gupai naamanganga mbata rogo gu pangbanga nga ga ga aboro raka ya.

Kura abangbasia abainipai nabihe nga ani nambeda na bakere ariapai nga gu nika manga auru kpotosende. Ni kpiapai, rogo gu garã nangia 2014, magazini sa nga ga aboro-birĩ-inohe aza Yu-eni tipa gu kerepai rengbe ka manga aboro. Gu magazini re aya: “Wisigo gu kerepai rengbe ka ye be sona birĩ ino mbakadaahe nasarani ani dakuti gupai nga gu kerepai re nakio kina ku mbatayo.” (the Science and Security Board of the Bulletin of the Atomic Scientists.) Badungu aboro ima ida kuti gupai nga ani ima da rogo nyanyakipa regbo rogo gu raka nga ga aboro. Agu aboro nakusa gi magazini re na badungu agu aboro nagedaha ima ida kuti gupai zanga kapa nga gi regbo re nga yangara arame na digido zegino ima mbeda. Kuba gupai nga mo gunde be gupai du ku mbatayo, mo ima rengba kadu na ngbarago mbiko gu sangbanapai si nika ye na ni. Tipagine du he ti ni wo? Bambiko mo ima rengba ka bata ti regbo digido zegino!