Ziazia Kekeapai nape gupai furani nga digido zegino nika ye na gbarasahe niya: “Bakere gberãngbi nikadu, wa zegino aenge da awere si adu nga wo te . . . Ka Mbori agurusa nga gu rago re ya, ka boro abati nga te.” (Matayo 24:21, 22) Ono fugo Mbori nakido rani nga dungu aboro nika bata abata niya: “Zegino napaya apaya, . . . ono gu ni ka amanga gu pai Mbori akpi nyemu he ni nye anye kindi.”—1 Yoane 2:17.

Ka mo aida ka bata na ki “nye anye kindi” ho gi zegino re nika paya ni, ginipai si aida mo mangihe? Ya mo si naida mo tona ka dungura kura ahe watadu ka manga kura mbakadatise nga ga borose? Oó. Ziazia Kekeapai nangarasa rani ani du na gu kura bipai kia. Ani nageda gupai nga: “Wa du agi ahe re nikadu ni gbandakagbandaka ha oni ka du ni gini ngbatunga aboro tipa manga ziazia apai na sinombori? Oni ki ngere tipa ye gu uru nga ga Mbori.” (2 Petero 3:10-12) Gupai i afura tipaha ane nayugoho nga ‘agu ahe’ i nika gbarasaha re nakoda agu airabiriki nazogo gi zegino re na agu aboro idi kuti gu zogarago re kuba gu nga ga Mbori. Si tie ziazia nga, ka ani adungura ahe rogo gi zegino re, si arengbanga ka batasa rani ti regbo gbarasahe te.

Nirengo, pa bata ani nakoda kpara ani gaani raka fu Yekova Mbori na ki wiriki agu asino nasa ngbarago tiko. (Zefania 2:3) Kuba gupai nga ani pekefuo dungu aboro areme ki zanga ka bipa gi kere regbo re na nyanyakipaha, si naida ‘ani ngere tipa ye gu uru nga ga Mbori.’ ADezire Yekova ima rengba ka yugoho foro rogo Ziazia Kekeapai yo wai rengbe mo ka bata rogo gu uru re.