RAKA NI AKRISTANO
Ya mo Mo Nambakada Tiro Tipa Tingida Pakpio Yesu?
Ga Yesu yangara Pumbo Susiri adu na nyanyakipaha. Mbiko wa pakpioko adu mbembedi, ko amangi mbakadapai ka ri Pumbo Susiri na gako amokedi na ki sigira gu vovo pumbo si adu nga i nikaa mangaha na agarã dunduko, du nga, Ga Gbia Riahe. Sidu, ko akedi aPetero na Yoane i ndu ka mbakada gu ba i nika mangaha rogoho. (Rk 22:7-13; mo bi gu sura du ti kpotoho.) Gipai re natingida rani na gupai nga, si naida ani mbakadi tirani tipa Tingida Pakpio Yesu rogo Marungu 27. Si na wira wa dungurati ima manga mbakadapai tipa bagumbapai, kpakuto na imekakue, gbiati gu kura apai. Ono tie, ginipai rengbe ani ka mangaha wa du ani basasa ka mbakada tirani tipa Tingida Pakpio Yesu?
Mo mbakadi ngbaduroyo. Mo mangi gu geda Ziazia Kekeapai du tipa Tingida Pakpio Yesu na kini berẽkuriihe. Mo rengbe ka gbia gu ringbisa regbo nga ga gu geda Ziazia Kekeapai re rogo Wisigo Ziazia Kekeapai Na Aˈuru Dunduko. Na Mounda Tipa Wisigo Fugo Mbori kapita 16 na dungu futufutuapai rogoho tipa gu ringbisa regbo nga ga gu geda Ziazia Kekeapai re. (Berewe a, mo bi gu Waraga Dunguratise Nga ga Gaani Raka na Sunge nangia ga Zerekpe 2020.) Aborokporo rengbe ka gbia agu apai rengbe yo ka sakapai tipaha ti regbo gu irisombori nga ga aborokporo nibipa wai du motumo tumorii na nyanyakipaha ni mangayo wetekapai rogo Watch Tower Publications Index watadu rogo Research Guide for Jehovah’s Witnesses.
Mo yambu kura aboro. Mo mangisunge ni bakerehe ti regbo gu tua nga ga yamba aboro tipa Tingida Pakpio Yesu. Mo berẽpa agu aboro rengbe mo ka yamba yo, wa agu aboro mo akaragatiro fuo yo, agu aboro mo anaawirika Baibiri na yo mbata, agu aboro mo naima ino yo, gbiati agumero. Si naida abaakumba moiberãyo ka yamba agu aboro naima zera rogo toro yo. Mo tingidi gupai nga, ka si du nga gu boro re arakanga rogo gamo dagbarago te, mo ima rengba ka gbia gu ba na gu regbo Tingida Pakpio Yesu nika manga ti ni rogo gani dagbarago ni nora mo rii gupai nga AGU APAI DU TIPA RANI rogo jw.org/zne na ki sia gupai nga “Tingida Pakpio Yesu.”
Gini kurapai berewe rengbe ani ka mangaha tipa ka mbakada tirani?
