Wa gu vura naamanga Donetsk yo Ukraine yo aandu kina kumbatayo, Wiriba Mykola Bozhedomov andu bara dunguhe ku Kramatorsk yo ka undo dungu aboro i kuru rogo gu ba vura adu rogoho nikerehe.

Ono tie, rogo Zerekpe 8, 2022, i aimi Mykola ho i aba bombu ni kurogo gu ba gatara du Kramatorsk yo, Donetsk yo.

Ku pati pakpio Mykola garã ko adu nga 58, gu kura wirina ni dee adu kinaho berewe nakpi dagba agu boro yo nakpi 50. Na berewe a, kura wirina ni kumba adu dagba agu aboro 100 na õko. Gu kura aDezire Yekova nabati ti regbo gu zubohe re, ape gupai nga gu kura abombu atiwi ue na bakere woroho na kpatakpata amarã ki gbandaka.

Nina, nga dia Mykola i naraki na ko tipa agarã 32, ape gupai nga: “Kumbami anamaa gu nyemupai nga ga kura aboro mbatayo fu gako. Ko aima du nyemu ka undo sosono awirina na kazakaza yo. Ono agu aregbo dunduko ko anaandu ku Kramatorsk yo, apai aagberã kina kumbatayo. Si adu nga si nika ngia gako yangada nunguro.”

I ue dunduko nazi bapatiza rogo 1997. Mykola angia gu bakumba namangisunge niruru ko tipa dungu agarã. Awirina nayugo nyemuse fu Nina ni bakerehe gbe. Ri ape gupai nga: “Gayo afugo wasa naundo re ti gi kpakarakpakara regbo re.”

Nina nasakapai a tipa gu wasa ri agbiaha vurube Baibiri, gbe wa gu du rogo Yesaya 40:28-31. “Yekova ima undo re mi gbia ome berewe,” Nina aya: “Mi ima bi ga Yekova nyemuse ni bakerehe gbe. Mbata kusayo, mi anaageda pa gu nyemuse re kina rogo gaani awaraga, ono awere mi nabi gu nyemuse re abi nitire.”

Ani namaa Nina rogo gaani kparakpee yo gbiati agu aboro zanga gayo aboro rogo kpio yo be vura. Ani ima ino gupai nga Yekova nikaa ndu andu kumbatayo ka banda yo.—Atambuahe 20:2.