Ingapai nga ai gu mangapai, bipai, gbiati berãpai nga gu andunga sa na ga Mbori arugute ya. Si nakoda kuo ga Mbori andiko ni manga gupai du ni gbegberẽ he watadu du ni irairaha bangiri Mbori. (1 Yoane 3:4; 5:17) Baibiri ima sakapai a tipa gu ingapai naye mbiko zanga manga gupai du ni ruruhe.​—Yakoba 4:17.

 Rogo gu ndikidi afugo i ake Baibiri rogoho, gu fugo i nasaha nga ingapai rogo yo nga “ka gusa he.” Ni kpiapai, rogo gu ringara aYisaraere nadu mbata, badona nga ga abanzengere aima inido tiyo wenengai na zumo barioko si ki dati gu bangiri ba nga ka i ‘agu sa nga he ya.’ Gu fugo re, ka i saha kuti wai duhe nzunzu i rengbe ka gedaha nga ka i “ainga nga pai ya.” (Abasapungbanga 20:16) Sidu, ingapai nga gusa mangapai kuti ga Mbori ruru arugute.

 Nidu Mbori ni Bakusirani, ko na rengo beko ka maa arugute tipa aboro. (Yugoti 4:11) Ani aringbisapa tirani aringbisa fuko tipa agu apai ani amangaha.​—ARomo 14:12.

Ya mo boro rengbe nzunzu ka ne zanga manga ai ingapai?

 Oó. Baibiri naya wẽ “aboro aingi ainga dũ, ki ti bungudu ti ga Mbori taarimo.” (ARomo 3:23; 1 Abakindo 8:46; Batungusipai 7:20; 1 Yoane 1:8) Tipagine duhe ti ni wo?

 Bambatapai nga aAdamu na Eva, adu zanga ingapai tiyo. Si adu wo mbiko i akusiyo ni rengberengbe yo rogo kpia Mbori yo. (Bambata Pai 1:27) Ono tie, i aima zanga du ni rengberengbe yo mbiko basa yo sangba Mbori. (Bambata Pai 3:5, 6, 17-19) Ho i aavunga agude ni, agu agude re aadia ingapai gbiati zangarengba. (ARomo 5:12) A wa Bakindo Davide nangia ga aYisaraere ko agumbaha nga, ‘i ame re na irairapai.’​—Atambuahe 51:5.

Ya mo kura aingapai kinaho gberẽ kisusi akuraha?

 Ii. Ni kpipai, Baibiri naya agu akumba nangia ga Sodomo yo adu “ni gbigbita yo” gayo ingapai kidu “ni gbegberẽ he a gbe.” (Bambata Pai 13:13; 18:20) Mo bingo bangua apai biata nga gu nayugo ho singia gu ingapai re ni kere gbigbitaha kisusi.

1.   Gu gbegberẽ maapai si aye na ni. Baibiri naza rani nga ani ne kere aingapai wa gu nga wasiwasi kodaba, irisokpiahe, dĩ, kpibuda, roga ga aboro ahe ngbaome, imo aboro, na manga sangbaatoro. (1 AKorindo 6:9-11; Yugoti 21:8) Baibiri ima yugo gu kparakparapai du dagba agu aingapai re na gu ingapai boro aberãnga aberã mbata kuriihe kini ru ka mangaha ya watadu gu boro ainongo aino kini mangihe ya, ni kpiapai, agu afugo watadu mangapai naimisa gu kura aboro. (Asanza 12:18; AEfeso 4:31, 32) Wa vura duhe wo, Baibiri nangarasa rani nga ka ani bingo ai ingapai na paha kusende ya, mbiko si ima rengba ka sarani ani mangi agu apai nika kuo ga Mbori andiko ni bakerehe gbe.​—Matayo 5:27, 28.

2.   Ndu mangaha. Gu kura aingapai kinaho aboro amangaha zanga i ini gupai Mbori aidaha. (Amokedi 17:30; 1 Timoteo 1:13) Wa vura duhe nga Baibiri naya ngbatunga agu aingapai re nga kina ingapai, si ima kparaha ti agu aingapai boro ata ino aino kini kuo ga Mbori andiko rogo wia yo. (Pa Geda Aboro 15:30, 31) Gu ingapai boro ata ino aino kini mangihe naye rogo “gbegberẽ kpotoyo yo.”​—Yeremaya 16:12.

3.   Dogoda mangaha. Baibiri ima yugo gu kparakparapai a du gba gu ingapai boro amangaha bara sa na gu boro amangaha tipa gbanga regbo. (1 Yoane 3:4-8) Agu aboro “ingi pai ni nyemu he,” zavura tingbafuo i naima ino gupai du ni ruruhe, nagbia ga Mbori kere sapangbanga.​—AEbere 10:26, 27.

 Agu aboro nambu be sangbana kere ingapai ima rengba ka bi tiyo nga ome gayo ingapai ima fu riyo. Ni kpiapai, Bakindo Davide ake gupai nga: “Gimi irairapai fu ri re; wa rõrõi tindiro si rõi susi omere.” (Atambuahe 38:4) Wa vura duhe wo, Baibiri nafu gi maabangirise du re: “Gbegberẽ boro mbú gani pai, na gu boro zanga rurupai mbú gani aberã; ni káraga tini koyo du Yekova ni, ko ini pai fu ni, na koyo du gaani Mbori ni, mbiko ko avú ni avu kpaima.”​—Yesaya 55:7.