Oó. Baibiri nape gupai ziazia nga Mbori akusi aboro gbiati anya “ngba arikara” gbiati kurukuru ahe a. * (Bambata Pai 1:12, 21, 25, 27; Yugoti 4:11) Si nape gupai nga, ngbatunga aboro dunduko aenge ti Adamu na Eva, nga bambata avungurani. (Bambata Pai 3:20; 4:1) Gu pangbanga nga ga Baibiri asongodanga gu yugopai nga Mbori amangisunge na pa kura ahe nisaha si kusi kura angbatunga raka te. Gu rengo duho nga, wa vura duhe wo, Baibiri atagbaga nga tihe na gu yugopai nga ga aboro birĩ-inohe nga wiri ariapai kinaho namanga amanga vuru angbatunga raka yo ni bakiakia te.

•  Ya mo Mbori amangisunge na pa kura ahe ni saha?

•  Ya mo gu Yugopai nga ahe akuru ni saha, nandu sa na gu yugopai nga ga Baibiri?

•  Ya mo pa wai kurukuru ahe gbiati anya asakatihe kuti wai du arago nayugo gu pai nga ahe akuru ni saha?

 Agu aboro idi kuti gupai nga Mbori amangisunge na pa kura ahe nisaha tipa ka kusa kura ngbatunga araka na aberãpai ni bakiakia tipa wai ko amangihe. Gu buku nga Encyclopædia Britannica, na gu berãpai rogoho nga: “Mbori amangisunge na gu birĩ nasa kusikusiahe si ni kuru nisaha rogo gu ba si naima rengba ka raka rogoho.”

 Gu ida nga Mbori amangisunge na pa kura ahe nisaha tipa ka kusa kura ngbatunga araka nakoda agi aberãpai du kusende re:

•   Rakiraki ahe dunduko naenge ti agu atita ha nadu bakuru kusayo

•   Gu kura ngbatunga gene raka sa ima rengba ka satihe ku rogo gu kura gene ngbatunga raka nga gu du kia.

•   Si rengbe kadu a nga Mbori du nafubee kuti agu apai re dunduko si mangi.

 Agu aboro idi kuti gupai nga Mbori amangisunge na pa kura ahe nisaha tipa ka kusa kura ngbatunga araka, si wa ka i ya i naida ka pe gupai nga gu pangbanga nga ga Baibiri du tipa kusaahe rogo Bambata Pai arunga ki nyasi koyo te. Ono tie, Yesu afura tipa gu pangbanga nga ga Bambata Pai ni gu pangbanga nga ndikidi rengo. (Bambata Pai 1:26, 27; 2:18-24; Matayo 19:4-6) Baibiri naya mbata fu Yesu ye ku auru kpotosende no, Yesu araki ngbangbaturũ yo na Mbori na ko aima undo Mbori a i kusi “ahe dũ.” (Yoane 1:3) Sidu, gu berãpai nga Mbori amangisunge na pa kura ahe nisaha tipa ka kusa kura ngbatunga araka andunga sa na gu Yugopai nga ga Baibiri te.

 Baibiri asaka nga pai tipa bakio wai ariapai narengbe ka manga rogo angbatunga raka yo te. Na si atinga kango gupai a nga gu dungu ngbatunga anya gbiati kurukuru ahe Mbori akusihe ima rengba ka ariatihe ringbisihe kuti wai du rago te. Wa vura duhe nga ho gu ariapai re amanga ni, kura aboro nabihe nga guhe re kuru nisaha, anga kura ngbatunga vovo raka ho si akusa te.