Ii, Baibiri ima fu ndikidi agopai nga gu nayugo gupai nga Mbori kina ti ni. Si nasonosa gaani idapase kuti Mbori, angianga ka idapai ku bitimo mbiko gupai gbua apambori apehe ya, ono ni manga ani sunge na ‘gaani ome nga ga berãkuriipai.’ (ARomo 12:1, NW; 1 Yoane 5:20) Mo bingo agu aberãpai du kusende re ringbisihe kuti Baibiri:

•   Wai du zegino ni mbakadimbakadihe gbiati unga nayugo pa Bakusiahe. Baibiri nape gupai nga: “Bambiko abambu dunduko aboro du nadua ha; ono gu ko nadua ahe dunduko nga Mbori.” (AEbere 3:4) Wa vura duhe nga gi berã kuriipai re taata, badungu agu aboro du ni wene awirikipai nabihe nga si na ome tini. *

•   Wa ngia ani wiri aboro, ani na gu nyemupai rogo rani yo i avunga rani na ni nga ga ino gu ringbisapai du tipa raka, si nga gu ngbatunga gomoro nga gu nanye rogo rani yo tingbafuo ani mbiisi gu nga ga borose. Gere nga papara gupai Baibiri ayambaha nga “azingo nga ga toro,” nga gu nakoda gu nyemupai nga ga ino Mbori na kini irisiko. (Matayo 5:3 NW; Yugoti 4:11) Agi azingo nga ga toro re ayugonga kina gu gopai sa nga Mbori kina ti ni te, ono si nayugo gupai nga ko nga gu Bakusiahe du na nyemuse naida ani mbiisi gu zingo nga ga toro re.—Matayo 4:4.

•   Gu futufutuapai i akehe ni sangbanebi rogo Baibiri kama agarã mbata fu gu regbo si adu nga si ni ka manga, si aima ye ki mangi kina boro wai nzunzu i apehe nga si nika manga. Pa wai du gu futufutuapai i apepaha kumbatayo nga si nika manga na si ki mangi kina boro wo nzunzu nayugo gupai nga si aye mbiko ga Mbori toro.—2 Petero 1:21.

•   Abakeke Baibiri aima du na gu birĩ-inohe nga gu naima susa gu giarogopai yo nadu ti gu regbo re. Ni kpiapai, bakuru kusayo badungu aboro aidi kuti gupai nga kpotosende sungu rii kikii nya, wa ngbatunga agu ra nga mbarã, nya du wa zumburu, gbiati gu nya nga ox nangera wakina gbe. Ono gupai Baibiri apehe nga, Mbori amoi kpotosende niasiasihe “gbua zanga he.” (Eyobo 26:7) Wakina gure a, Baibiri ima sakapai tipa wai du kpotosende nzunzu nga si ni ‘kirikirihe,’ watadu ni gidigidihe. (Yesaya 40:22) Badungu aboro nabi gupai nga, gu wene sakarogopai yo rẽ tipa gi ngbatunga giarogopai yo re nga, agu apai abakeke Baibiri aakekaha re aye kina boro be Mbori.

•   Baibiri nafu akaragapai kuti badungu kpakarakpakara asanahe, gu ngbatunga asanahe nga gu ka boro agbianga ndikidi akaragapai kutini ya, si ima rengba ka sa ni ni da kuti gu digisopai nga Mbori ho ti ni te. Ni kpiapai: Ka sidu nga Mbori nga boro nyemuse na ome ti ko, tipagine du arungo ti ni na gbegberẽ mangapai rogo zegino? Tipagine du apambori ti ni dedede na gbegberẽ maapai kurii aboro kuba gupai nga si du na wene maapai kurii yo?—Tito 1:16.